|
ກອງປະຊຸມຂອງສະພາປະຊາຊົນແມ່ນໄຂແນວໃດ,ແກ້ໄຂບັນຫາຫຍັງແດ່?
cri
Author: li
ສະພາຜູ້ແທນປະຊາຊົນແມ່ນໃຊ້ສິດຕຳແໜ່ງເປັນໝູ່ຄະນະ,ຕົກລົງບັນຫາໂດຍໝູ່ຄະນະ. ການຈັດກອງປະຊຸມແມ່ນຮູບການພື້ນຖານຂອງສະພາຜູ້ແທນປະຊາຊົນໃນການໃຊ້ຕຳແໜ່ງ. ອີງຕາມການກຳນົດຂອງກົດໝາຍ,ທົ່ວໄປແລ້ວ ສະພາປະຊາຊົນແຫ່ງຊາດຈັດກອງປະຊຸມປີລະເທື່ອ,ສະພາປະຊາຊົນທຸກຂັ້ນຂອງທ້ອງຖິ່ນຢ່າງໜ້ອຍຈັດກອງປະຊຸມປີລະເທື່ອ.
1 ການກະກຽມໄຂກອງປະຊຸມ: ກອງປະຊຸມສະພາປະຊາຊົນແຕ່ຂັ້ນເມືອງຂຶ້ນໄປແມ່ນໃຫ້ຄະນະປະຈຳສະພາປະຊາຊົນຂັ້ນດຽວກັນຮຽກໂຮມ. ກ່ອນໄຂກອງປະຊຸມ,ຄະນະປະຈຳຕ້ອງສະເໜີຮ່າງວາລະປະຊຸມ,ຮ່າງລາຍຊື່ຂອງຄະນະປະທານແລະເລຂາທິການກອງປະຊຸມ,ຕົກລົງລາຍຊື່ຜູ້ຈະເຂົ້ານັ່ງຟັງໃນກອງປະຊຸມ,ທຳການກະກຽມດ້ານອື່ນໆຂອງກອງປະຊຸມ. ບັນດາຜູ້ແທນຈັດຕັ້ງກັນເປັນຄະນະຜູ້ແທນຕາມຫົວໜ່ວຍຫຼືເຂດເລືອກຕັ້ງ,ແລ້ວເລືອກຫົວໜ້າແລະຮອງຫົວໜ້າຂອງຄະນະ. ຫົວໜ້າຄະນເປັນຜູ້ຮຽກໂຮມແລະເປັນປະທານຈັດກອງປະຊຸມຄົບຄະນະ,ຮອງຫົວໜ້າຄະນະເປັນຜູ້ຊ່ອຍວຽກຫົວໜ້າຄະນະ. ກອງປະຊຸມສະພາຂັ້ນຕາແສງແມ່ນຄະນະປະທານຂອງກອງປະຊຸມສະພາຄັ້ງກ່ອນເປັນຜູ້ຮຽກໂຮມ,ແລະຮັບຜິດຊອບທຳການກະກຽມຕ່າງໆລ່ວງໜ້າ.
2.ໄຂກອງປະຊຸມກຽມ: ຕ້ອງມີຜູ້ແທນ 2/3 ຂຶ້ນໄປເຂົ້າຮ່ວມ,ກອງປະຊຸມສະພາປະຊາຊົນຈຶ່ງໄຂຂຶ້ນໄດ້. ກ່ອນໄຂກອງປະຊຸມທາງການຂອງສະພາປະຊາຊົນແຕ່ຂັ້ນເມືອງຂຶ້ນໄປ,ຕ້ອງມີຄະນະປະຈຳສະພາປະຊາຊົນຂັ້ນດຽວກັນເປັນປະທານໄຂກອງປະຊຸມກະກຽມ,ເລືອກຕັ້ງຄະນະປະທານແລະເລຂາທິການ,ຜ່ານວາລະປະຊຸມແລະການຕົກລົງກ່ຽວກັບວຽກງານກະກຽມອື່ນໆ.
3 ໄຂກອງປະຊຸມຄະນະປະທານ: ກອງປະຊຸມຄັ້ງທຳອິດຂອງຄະນະປະທານ,ຖ້າແມ່ນສະພາປະຊາຊົນແຫ່ງຊາດຕ້ອງໃຫ້ປະທານຄະນະປະຈຳເປັນປະທານຈັດຂຶ້ນ,ສະພາທ້ອງຖິ່ນແຕ່ຂັ້ນເມືອງຂຶ້ນໄປຕ້ອງໃຫ້ປະທານຄະນະປະຈຳທຸກຂັ້ນເປັນປະທານຈັດຂຶ້ນ,ເລືອກຕັ້ງປະທານປະຈຳການຂອງຄະນະປະທານຫຼາຍຄົນ,ເລືອກຕັ້ງສະມາຊິກຄະນະປະທານຫຼາຍຄົນແບ່ງກັນເປັນປະທານບໍລິຫານງານຂອງກອງປະຊຸມຄົບຄະນະທຸກເທື່ອ,ແລະຕົກລົງຜູ້ເປັນຮອງເລຂາທິການ,ວາລະປະຊຸມ,ວິທີລົງຄະແນນສຽງຍັດຕິ,ວັນກຳນົດເຊົາຮັບເອົາຍັດຕິຂອງຜູ້ແທນແລະວຽກອື່ນທີ່ຕ້ອງຕົກລົງ.
ພາຍຫຼັງຈັດກອງປະຊຸມຄະນະປະທານຄັ້ງທຳອິດແລ້ວ,ອີງຕາມຄວາມຕ້ອງການ,ຄະນະປະທານຍັງຕ້ອງຈັດກອງປະຊຸມຫຼາຍເທື່ອ,ສຳຫຼວດພິຈາລະນາຕົກລົງບັນຫາທີ່ກ່ຽວຂ້ອງ,ກອງປະຊຸມນີ້ຕ້ອງໃຫ້ປະທານປະຈຳຂອງຄະນະປະທານຮຽກໂຮມແລະເປັນປະທານຈັດຂຶ້ນ.
4 ໄຂກອງປະຊຸມທາງການ. ຄະນະປະທານເປັນປະທານໄຂກອງປະຊຸມຄົບຄະນະຂອງສະພາ. ກອງປະຊຸມຄົບຄະນະຂອງສະພາປະຊາຊົນຮັບຟັງບົດລາຍງານວຽກງານທຸກລາຍແລະການອະທິບາຍຍັດຕິຕ່າງໆ,ມີສິດປະກອບຄຳຄິດຄຳເຫັນໃນກອງປະຊຸມ,ລົງມະຕິກ່ຽວກັບບົດລາຍງານວຽກງານແລະຍັດຕິທີ່ກ່ຽວຂ້ອງ,ເລືອກຕັ້ງແລະຕົກລົງຜູ້ກ່ຽວຂ້ອງກັບອົງການລັດ. ໃນເວລາກອງປະຊຸມຄົບຄະນະລົງມະຕິກ່ຽວກັບຍັດຕິ,ຕ້ອງມີຜູ້ແທນກາຍເຄິ່ງໜຶ່ງຂອງຈຳນວນຜູ້ແທນທັງໝົດເຫັນດີນຳຈຶ່ງຜ່ານໄດ້. ສະພາປະຊາຊົນແຫ່ງຊາດດັດແກ້ລັດຖະທຳມະນູນ,ຕ້ອງມີຜູ້ແທນກາຍ 2/3 ຂອງຈຳນວນຜູ້ແທນທັງໝົດເຫັນດີນຳຈຶ່ງຜ່ານໄດ້. ໜ້າທີ່ຂອງກອງປະຊຸມຄະນະຜູ້ແທນແລະກອງປະຊຸມໜ່ວຍແມ່ນສຳຫຼວດພິຈາລະນາບົດລາຍງານວຽກງານທຸກລາຍແລະຍັດຕິຕ່າງໆ.
ກອງປະຊຸມສະພາປະຊາຊົນແມ່ນໄຂຢ່າງເປີດເຜີຍ,ຢູ່ບ່ອນທີ່ເງື່ອນໄຂອຳນວຍ,ກອງປະຊຸມຄົບຄະນະຂອງສະພາແລະກອງປະຊຸມຄະນະຜູ້ແທນຈະຕັ້ງບ່ອນນັ່ງຟັງກໍໄດ້,ຈັດງານຖະແຫຼງຂ່າວແລະງານຊຸມນຸມນັກຂ່າວ.
ທົ່ວໄປແລ້ວ,ກອງປະຊຸມຄະນະປະຈຳສະພາປະຊາຊົນແຫ່ງຊາດແມ່ນສອງເດືອນໄຂເທື່ອໜຶ່ງ,ໃຫ້ປະທານຄະນະປະຈຳຮຽກໂຮມແລະເປັນປະທານຈັດຂຶ້ນ. ກອງປະຊຸມຄະນະປະຈຳສະພາປະຊາຊົນທຸກຂັ້ນແຕ່ຂັ້ນເມືອງຂຶ້ນໄປຢ່າງໜ້ອຍສອງເດືອນໃດຕ້ອງໄຂເທື່ອໜຶ່ງ,ໃຫ້ປະທານຄະນະປະຈຳສະພາປະຊາຊົນຂັ້ນດຽວກັນຮຽກໂຮມແລະເປັນປະທານຈັດຂຶ້ນ. ຄະນະປະຈຳສະພາໄຂກອງປະຊຸມຕ້ອງມີສະມາຊິກກາຍເຄິ່ງໜຶ່ງເຂົ້າຮ່ວມ. ຄະນະປະຈຳສະພາຮ່າງກົດໝາຍກົດບັນຍັດແລະທຳການຕົກລົງ ຕ້ອງມີສະມາຊິກຜູ້ປະກອບຄະນະປະຈຳກາຍເຄິ່ງໜຶ່ງເຫັນດີນຳຈຶ່ງຜ່ານໄດ້.
ສະພາຜູ້ແທນປະຊາຊົນແມ່ນອົງການທີ່ປະຊາຊົນໃຊ້ສິດອຳນາດຂອງລັດ,ສະພາຜູ້ແທນປະຊາຊົນໃຊ້ສິດຕຳແໜ່ງໂດຍຜ່ານກອງປະຊຸມ,ດັ່ງນັ້ນ ສະພາຜູ້ແທນປະຊາຊົນໄຂກອງປະຊຸມກໍແມ່ນປະຊາຊົນໃຊ້ສິດຂອງຕົນຄຸ້ມຄອງປະເທດ.
ກອງປະຊຸມສະພາຜູ້ແທນປະຊາຊົນຕ້ອງພິຈາລະນາຫຼືສຳຫຼວດກວດກາ,ອະນຸມັດບົດລາຍງານວຽກງານຂອງລັດຖະບານ,ບົດລາຍງານແຜນການແລະງົບປະມານພັດທະນາເສດຖະກິດແຫ່ງຊາດແລະສັງຄົມ,ພ້ອມດ້ວຍບົດລາຍງານກ່ຽວກັບສະພາບປະຕິບັດແຜນການເຫຼົ່ານີ້,ບົດລາຍງານວຽກງານຂອງຄະນະປະຈຳສະພາປະຊາຊົນ,ບົດລາຍງານວຽກງານຂອງສານແລະອົງການໄອຍະການ,ຕົກລົງວຽກງານດ້ານຕ່າງໆຂອງທົ່ວປະເທດຫຼືຂອງເຂດບໍລິຫານປະຈຳປີ,ໄລຍະ 5 ປີຫຼືໄລຍະຍາວໄກ,ສະພາປະຊາຊົນທີ່ມີສິດນິຕິບັນຍັດອີງຕາມຄວາມຕ້ອງການສ້າງກົດໝາຍກົດບັນຍັດໃນກອງປະຊຸມ,ໃນກອງປະຊຸມສະພາປະຊາຊົນທີ່ປ່ຽນສະໄໝຕ້ອງເລືອກຕັ້ງອົງການລັດ. ຍ້ອນວ່າກອງປະຊຸມສະພາປະຊາຊົນຕ້ອງຕົກລົງບັນຫາສ່ວນທັງໝົດ,ຍາວໄກແລະບັນຫາສຳຄັນຂອງທົ່ວປະເທດຫຼືຂອງເຂດບໍລິຫານຕົນ,ກົດໝາຍກົດບັນຍັດທີ່ສ້າງຂຶ້ນນັ້ນຕ້ອງມີສິດບັງຄັບໃຊ້ໂດຍທົ່ວໄປ,ດັ່ງນັ້ນ,ກອງປະຊຸມສະພາປະຊາຊົນຈຶ່ງມີການພົວພັນຢ່າງແໜ້ນແຟ້ນກັບແຕ່ລະຄົນ,ແຕ່ລະຄອບຄົວຈົນຮອດທົ່ວສັງຄົມ. ເວົ້າໂດຍທຽບຖານແລ້ວ,ການຕົກລົງຂອງສະພາປະຊາຊົນຂັ້ນຮາກຖານແມ່ນຂ້ອນຂ້າງລະອຽດ,ການຕົກລົງຂອງສະພາປະຊາຊົນຂັ້ນເທິງຈະມີລັກສະນະຫຼັກການ,ເປັນແບບມະຫາພາກຫຼາຍກວ່າ.
|
|
