|
ການພົວພັນລະຫວ່າງສະພາຜູ້ແທນປະຊາຊົນກັບລັດຖະບານ,ສານແລະອົງການໄອຍະການ
cri
Author: li
ຢູ່ຈີນ,ອົງການບໍລິຫານ,ອົງການຕັດສິນແລະອົງການໄອຍະການຂອງລັດລ້ວນແຕ່ກຳເນີດເກີດຂຶ້ນຈາກກອງປະຊຸມສະພາຜູ້ແທນປະຊາຊົນທີ່ເປັນອົງການອຳນາດຂອງລັດ,ຮັບຜິດຊອບຕໍ່ສະພາຜູ້ແທນປະຊາຊົນແລະຮັບການຕິດຕາມກວດກາຂອງສະພາຜູ້ແທນປະຊາຊົນ; ອົງການລັດໝູນເດີນຕາມຫຼັກການລະບອບປະຊາທິປະໄຕໂຮມສູນ. ດັ່ງນັ້ນຈຶ່ງໄດ້ຊີ້ຂາດການພົວພັນລະຫວ່າງສະພາປະຊາຊົນກັບລັດຖະບານ,ສານແລະອົງການໄອຍະການດັ່ງລຸ່ມນີ້:
1,ການພົວພັນລະຫວ່າງການຕົກລົງກັບການປະຕິບັດງານ. ສະພາປະຊາຊົນແມ່ນອົງການທີ່ຕາງໜ້າປະຊາຊົນໃຊ້ອຳນາດລັດ,ເຊັ່ນອຳນາດນິຕິບັນຍັດ,ຕົກລົງວຽກງານສຳຄັນ,ເລືອກຕັ້ງ,ແຕ່ງຕັ້ງແລະຖອນຕຳແໜ່ງແລະຕິດຕາມກວດກາເປັນຕົ້ນ. ຕໍ່ກົດໝາຍທີ່ສະພາປະຊາຊົນສ້າງຂຶ້ນພ້ອມການຕົກລົງຂອງສະພາ, ຝ່າຍລັດຖະບານ,ສານແລະອົງການໄອຍະການຕ້ອງປະຕິບັດຕາມ.
2,ການພົວພັນລະຫວ່າງການຕິດຕາມກວດກາກັບການຖືກຕິດຕາມກວດກາ. ສະພາປະຊາຊົນຕາງໜ້າໃຫ້ແກ່ປະຊາຊົນ,ມີສິດຕິດຕາມກວດກາວຽກງານຂອງລັດຖະບານ,ຂອງສານແລະອົງການໄອຍະການ. ລັດຖະບານ,ສານແລະອົງການໄອຍະການຕ້ອງຮັບຜິດຊອບແລະລາຍງານວຽກງານຕໍ່ສະພາປະຊາຊົນ,ຮັບເອົາການຕິດຕາມກວດກາຂອງສະພາປະຊາຊົນ.
3,ການພົວພັນທີ່ປະສານສົມທົບເປັນເອກະສັນກັນດຳເນີນວຽກງານ. ເຖິງວ່າສະພາປະຊາຊົນກັບລັດຖະບານ,ສານແລະອົງການໄອຍະການມີພາລະໜ້າທີ່ຕ່າງກັນ,ແບ່ງງານຕ່າງກັນ,ແຕ່ມີເປົ້າໝາຍອັນດຽວກັນ,ລ້ວນແຕ່ແມ່ນເພື່ອສ່ອງແສງແລະບັນລຸຜົນປະໂຫຍດກົກຮາກຂອງປະຊາຊົນ,ພ້ອມກັນກໍ່ສ້າງສັງຄົມນິຍົມທີ່ມີສີສັນພິເສດຂອງຈີນ. ສະພາປະຊາຊົນໃຊ້ອຳນາດຂອງລັດຢ່າງເປັນເອກະພາບກັນ,ແລະຂີດແບ່ງສິດບໍລິຫານ,ສິດຕັດສິນແລະສິດຕຸລາການຂອງລັດຢ່າງສົມເຫດສົມຜົນໃຕ້ປະຖົມປັດໄຈດັ່ງກ່າວ,ຫຼີກເວັ້ນບໍ່ໃຫ້ສິດອຳນາດໂຮມສູນເກີນໄປ,ທັງຫຼີກເວັ້ນບໍ່ໃຫ້ມີການຈ່ອງດຶງກັນທີ່ບໍ່ຈຳເປັນ,ເຮັດໃຫ້ອົງການລັດຕ່າງໆປະຕິບັດພາລະໜ້າທີ່ຂອງຕົນໂດຍຈຳເພາະ,ທັງປະສານສົມທົບກັນດຳເນີນວຽກງານຢ່າງກົມກຽວກັນ.
|
|
