|
ຕາມຂ່າວCRI: ກອງປະຊຸມຄົບຄະນະປະຈຳປີຂອງສະພາປະຊາຊົນແຫ່ງຊາດຈີນແລະກອງປະຊຸມກຳມະການທົ່ວປະເທດຂອງສະພາປຶກສາການເມືອງປະຊາຊົນຈີນທີ່ຈັດຂຶ້ນຢູ່ທີ່ປັກກິ່ງໄດ້ອັດປະຊຸມຕໍ່ເນື່ອງກັນ. ເມື່ອສັງເກດຈາກກອງປະຊຸມສອງສະພາປີນີ້ແລ້ວໄດ້ເຫັນວ່າ, ແລວຄວາມຄິດຄອງອຳນາດທີ່ຜັນຂະຫຍາຍພັດທະນະທັດວິທະຍາສາດຂອງລັດຖະບານຊຸດປະຈຸບັນໄດ້ມີການຄືບໜ້າໃໝ່; ຄວາມຕັດສິນໃຈຄັດຄ້ານການເຄື່ອນໄຫວແບ່ງແຍກໃຫ້ໄຕ້ຫວັນເປັນເອກະລາດ ປົກປັກຮັກສາຄວາມເປັນເອກະພາບແຫ່ງຊາດຍິ່ງເດັດດ່ຽວກວ່າເກົ່າ; ໃນຂະນະດຽວກັນ, ຈຸດພິເສດຂອງກອງປະຊຸມສອງສະພາທີ່ເອົາໃຈໃສ່ນຳຊີວິດການເປັນຢູ່ຂອງປະຊາຊົນກໍ່ພົ້ນເດັ່ນຂຶ້ນຕື່ມອີກ.
ເມື່ອສັງເກດຈາກບົດລາຍງານວຽກງານຂອງລັດຖະບານທີ່ທ່ານນາຍົກລັດຖະມົນຕີເວີນເຈຍປາວອ່ານແລະຜ່ານໃນກອງປະຊຸມຄົບຄະນະຂອງສະພາປະຊາຊົນແຫ່ງຊາດຈີນເທື່ອນີ້ກໍ່ເຫັນໄດ້ວ່າ, ບົດລາຍງານໄດ້ສືບທອດພັດທະນະທັດທີ່ຖືຄົນເປັນກົກ ພັດທະນາແບບຍືນຍົງທີ່ໃນບົດລາຍງານວຽກງານລັດຖະບານໃນປີກາຍນີ້, ແລະໄດ້ສະເໜີເປົ້າໝາຍຄອງອຳນາດສ້າງສັງຄົມທີ່ກົມກຽວກັນຕື່ມອີກ. ອັນທີ່ວ່າ "ສັງຄົມທີ່ກົມກຽວກັນ" ກໍ່ແມ່ນສັງຄົມທີ່ປົກຄອງດ້ວຍລະບອບກົດໝາຍປະຊາທິປະໄຕ ຍຸດຕິທຳແລະເປັນທຳ ຈິງໃຈແລະມີສັດທາຮັກແພງກັນ ເຕັມໄປດ້ວຍພະລັງຊີວິດ ສະຫງົບສັນຕິເປັນລະບຽບຮຽບຮ້ອຍ ມະນຸດແລະທຳມະຊາດຢູ່ຮ່ວມກັນຢ່າງກົມກຽວກັນ. ຕາມແລວຄວາມຄິດດັ່ງກ່າວ, ລັດຖະບານຈີນຈະຍິ່ງເອົາໃຈໃສ່ນຳຄວາມກົມກຽວກັນລະຫວ່າງການພັດທະນາເສດຖະກິດກັບການພັດທະນາພາລະກິດສັງຄົມທຸກລາຍ ຍິ່ງເອົາໃຈໃສ່ນຳຄວາມກົມກຽວກັນລະຫວ່າງການພັດທະນາຕົວເມືອງກັບຊົນນະບົດ ແລະຄວາມກົມກຽວກັນລະຫວ່າງການພັດທະນາເຂດທີ່ຕ່າງກັນ ຍິ່ງເອົາໃຈໃສ່ນຳຄວາມກົມກຽວກັນລະຫວ່າງການພັດທະນາເສດຖະກິດກັບການນຳໃຊ້ຊັບພະຍາກອນພະລັງງານ.
ຫາງສຽງເຫັນວ່າ, ການສ້າງສັງຄົມທີ່ກົມກຽວກັນ, ບໍ່ພຽງແຕ່ຈະປ່ຽນແປງເບົ້າແບບພັດທະນາແບບຊະຊາຍແລະສິ້ນເປືອງພະລັງງານຫຼາຍໃນເມື່ອກ່ອນທໍ່ນັ້ນ, ຍັງໄດ້ສະແດງໃຫ້ເຫັນຄວາມໝັ້ນໃຈຂອງຈີນໃນການລົງເລິກການປະຕິຮູບ, ຍ່ອມຈະທຸ່ມເທກຳລັງແມ່ແຮງແລະພະລັງຊີວິດໃໝ່ໃຫ້ແກ່ການພັດທະນາຢ່າງປອດໃສຂອງຈີນໃນດ້ານໂຄງປະກອບແລະກົນໄກ.
ກອງປະຊຸມສອງສະພາປີນີ້ຍັງມີອີກເລື່ອງໜຶ່ງປະຈັກຕາຄົນ, ນັ້ນກໍ່ຄືໃນພິທີອັດກອງປະຊຸມສະພາປະຊາຊົນແຫ່ງຊາດໄດ້ຜ່ານ "ກົດໝາຍຕ້ານການແບ່ງແຍກປະເທດ" ທີ່ມີຈຸດປະສົງສະກັດກັ້ນການເຄື່ອນໄຫວແບ່ງແຍກທີ່ໃຫ້ໄຕ້ຫວັນເປັນເອກະລາດ ປົກປັກຮັກສາຄວາມເປັນເອກະພາບແຫ່ງຊາດດ້ວຍສຽງສ່ວນຫຼາຍທີ່ສຸດ. "ກົດໝາຍຕ້ານການແບ່ງແຍກປະເທດ" ໄດ້ຜ່ານຮັບຮອງດ້ວຍສຽງສ່ວນຫຼາຍທີ່ສຸດຈາກຜູ່ແທນສະພາ, ນີ້ກໍ່ສະແດງໃຫ້ເຫັນຢ່າງເຕັມສ່ວນວ່າ ການສ້າງກົດໝາຍສະບັບນີ້ສອດຄ່ອງກັບຄວາມປາຖະໜາຂອງປະຊາຊົນຈີນທຸກຖ້ວນໜ້າຢ່າງສົມບູນ.
ກ່ອນໜ້ານີ້, ຢູ່ທາງນອກມີຄວາມລະແວງສົງໄສຫຼາຍຢ່າງຕໍ່ການສ້າງກົດໝາຍ ດັ່ງກ່າວ. ແຕ່ພາຍຫຼັງໄດ້ປະກາດຕົ້ນສະບັບຂອງກົດໝາຍນີ້ແລ້ວ, ຄົນທັງຫຼາຍໄດ້ສັງເກດເຫັນບໍ່ຍາກວ່າ, ສິ່ງທີ່ສອດຮ້ອຍກົດໝາຍສະບັບນີ້ແຕ່ຕົ້ນຕະຫຼອດປາຍແມ່ນທິດທາງພື້ນຖານຂອງລັດຖະບານຈີນທີ່ໃຫ້ແກ້ໄຂບັນຫາໄຕ້ຫວັນດ້ວຍການ "ໂຮມປະເທດເຂົ້າເປັນເອກະພາບກັນໂດຍສັນຕິ ປະເທດດຽວສອງລະບອບ", ຊຶ່ງພຽງແຕ່ເປັນການເຮັດໃຫ້ທິດທາງນະໂຍບາຍແກ້ໄຂບັນຫາໄຕ້ຫວັນດ້ວຍສັນຕິວິທີທີ່ລັດຖະບານຈີນຍາດແຍ່ງໃນ 20 ກວ່າປີມານີ້ກາຍເປັນກົດໝາຍ. ສະນັ້ນ, ຄຳໂຄສະນາຊວນເຊື່ອທີ່ວ່າກົດໝາຍສະບັບນີ້ແມ່ນ "ກົດໝາຍໃຊ້ກຳລັງອາວຸດຕໍ່ໄຕ້ຫວັນ" ຫຼື "ດຳລັດລະດົມຂວົນຂວາຍກໍ່ສົງຄາມ" ນັ້ນບໍ່ຕ້ອງອະທິບາຍກໍ່ແຈ່ມແຈ້ງແລ້ວ.
ກອງປະຊຸມສອງສະພາປີນີ້ຍັງມີຈຸດທີ່ປະຈັກຕາອີກຈຸດໜຶ່ງ, ກໍ່ຄື ຫົວຂໍ້ເອົາໃຈໃສ່ນຳຊີວິດການເປັນຢູ່ຂອງປະຊາຊົນໄດ້ພົ້ນເດັ່ນຂຶ້ນຕື່ມອີກ. ໃນໄລຍະກອງປະຊຸມສອງສະພາ, ບັນດາຜູ່ແທນສະພາປະຊາຊົນແຫ່ງຊາດແລະກຳມະການສະພາປຶກສາການເມືອງແຫ່ງຊາດໄດ້ສະເໜີຍັດຕິ ຄວາມເຫັນຫຼືຂໍ້ສະເໜີເປັນຈຳນວນຫຼວງຫຼາຍກ່ຽວກັບບັນຫາສຳຄັນໃນຊີວິດການເມືອງ ເສດຖະກິດແລະສັງຄົມແຫ່ງຊາດແລະບັນຫາທີ່ປະຊາຊົນເອົາໃຈໃສ່ນຳໂດຍທົ່ວໄປ. ບັນດາຜູ່ແທນແລະກຳມະການສອງສະພາມີສະຕິເຂົ້າຮ່ວມຫາລືການເມືອງສູງຂຶ້ນ, ສະແດງໃຫ້ເຫັນຄວາມຮັບຜິດຊອບອັນແຮງກ້າຕໍ່ສັງຄົມທີ່ເອົາໃຈໃສ່ນຳບັນຫາຕົວຈິງ.
ຈຸດຮ້ອນ ຈຸດສຸມໃນກອງປະຊຸມສອງສະພາມີລັກສະນະຕິດແທດຊີວິດຕົວຈິງ, ແລະກໍ່ເຮັດໃຫ້ສື່ມວນຊົນພາຍໃນແລະນອກປະເທດ ແລະມວນຊົນຊາວຈີນເອົາໃຈໃສ່ນຳກອງປະຊຸມສອງສະພາຫຼາຍກວ່າທຸກປີທີ່ຜ່ານມາ. ສື່ມວນຊົນຫຼາຍຮ້ອຍຫຼັງຂອງຈີນໄດ້ຕິດຕາມລາຍງານຂ່າວກອງປະຊຸມສອງສະພາ, ໃນນັ້ນກໍ່ລວມທັງເວັບໄຊທີ່ມີອິດທິພົນຂອງຈີນ. ພ້ອມກັນນັ້ນ ກອງປະຊຸມຄົບຄະນະແລະກອງປະຊຸມແບ່ງເປັນໜ່ວຍໃນສອງສະພາປີນີ້ ກໍ່ເປີດເຜີຍຕໍ່ສື່ມວນຊົນພາຍໃນແລະນອກປະເທດຫຼາຍກວ່າເກົ່າ.
ຫາງສຽງເຫັນວ່າ, ແລວຄວາມຄິດຄອງອຳນາດຂອງລັດຖະບານຈີນທີ່ຕົກລົງໃນກອງປະຊຸມສອງສະພາປີນີ້ ພ້ອມດ້ວຍຄວາມຕັດສິນໃຈອັນໝັ້ນໜຽວໃນດ້ານປົກປັກຮັກສາຜົນປະໂຫຍດແຫ່ງຊາດ ແລະຄວາມຮັບຜິດຊອບຕໍ່ສັງຄົມຂອງຜູ່ແທນແລະກຳມະການທັງຫຼາຍທີ່ນັບມື້ນັບເພີ່ມຂຶ້ນ, ລ້ວນແຕ່ຈະມີຜົນສະທ້ອນເລິກເຊິ່ງຍາວໄກຕໍ່ການພັດທະນາຂອງຈີນ.
|
