|
|
 |
| (GMT+08:00)
2005-03-14 23:06:40
|
 |
|
ແຂວງຢູນນານແລະເຂດກວາງຊີຈີນຕັ້ງໜ້າເຂົ້າຮ່ວມການກໍ່ສ້າງເຂດການຄ້າເສລີຈີນ-ອາຊຽນ
cri
Author: da
ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນພວມໄຂຂຶ້ນຢູ່ປັກກິ່ງ.ວັນທີ 5 ມີນາ,ທ່ານເວີນເຈຍປາວ ນາຍົກລັດຖະມົນຕີຈີນໄດ້ລາຍງານວຽກງານລັດຖະບານໃນກອງປະຊຸມ ໂດຍສະເໜີອອກມາວ່າ,ຕ້ອງໃຫ້ສອດຄ່ອງກັບສະຖານະການໃໝ່,ສືບຕໍ່ຂະຫຍາຍການພົວພັນເສດຖະກິດການຄ້າສອງຝ່າຍແລະຫຼາຍຝ່າຍ,ຕັ້ງໜ້າເຂົ້າຮ່ວມການຮ່ວມມືເສດຖະກິດຂອງພາກພື້ນ. ປະຈຸບັນ,ເຂດການຄ້າເສລີຈີນອາຊຽນພວມກ້າວເຂົ້າສູ່ໄລຍະເລີ່ມຕົ້ນຢ່າງຮອບດ້ານ, ແຂວງຢູນນານແລະເຂດກວາງຊີທີ່ຕິດກັບອາຊຽນຈະເສີມຂະຫຍາຍທ່າແຮງທາງພູມຖານຂອງຕົນເຂົ້າຮ່ວມການກໍ່ສ້າງເຂດການຄ້າເສລີແນວໃດ?
ປີ2005,ການສ້າງສາເຂດການຄ້າເສລີຈີນ-ອາຊຽນໄດ້ເລີ່ມດຳເນີນ ຢ່າງຮອບດ້ານ. ຜູ້ແທນສະພາປະຊາຊົນແຂວງຢູນນານແລະເຂດກວາງຊີທີ່ເຂົ້າຮ່ວມກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນເວົ້າວ່າ, ເຂດການຄ້າເສລີຈະອຳນວຍໂອກາດດີໃຫ້ສອງເຂດແຂວງດັ່ງກ່າວໄຂປະຕູສູ່ພາຍນອກ, ແຂວງຢູນນານແລະເຂດກວາງຊີຈະເຂົ້າຮ່ວມການສ້າງສາເຂດການຄ້າເສລີຈີນ-ອາຊຽນຢ່າງຫ້າວຫັນ.
ແຂວງຢູນນານຈີນຕັ້ງຢູ່ບ່ອນຕິດຕໍ່ກັນຂອງສາມເຂດເສດຖະກິດໃຫຍ່ຄືຈີນ ອາຊີອາຄະເນແລະອາຊີໃຕ້,ທັງມີພູຜາປ່າໄມ້ແມ່ນ້ຳລຳເຊຕິດຈອດກັບລາວ ຫວຽດນາມແລະມຽນມາ, ພາສາປາກເວົ້າແລະວັດທະນະທຳກໍຄ້າຍຄືກັນແລະເຂົ້າໃຈກັນໄດ້, ລະຫວ່າງປະຊາຊົນກໍມີການໄປມາຫາສູ່ກັນດ້ວຍໄມຕີຈິດເລື້ອຍໆ,ແມ່ນຂົວແລະສາຍພານທາງບົກໃນການຮ່ວມມືກັນລະຫວ່າງຈີນກັບປະເທດອາຊີອາຄະເນແລະອາຊີໃຕ້.
ໃນຫຼາຍປີມານີ້,ແຂວງຢູນນານໄດ້ຍົກລະດັບໄຂປະຕູສູ່ພາຍນອກໃຫ້ສູງຂຶ້ນຢ່າງບໍ່ຢຸດຢັ້ງ,ພຽງແຕ່ໃນປີ 2004 ປີດຽວ,ຍອດມູນຄ່າການຄ້າຂາເຂົ້າຂາອອກກັບຕ່າງປະເທດຂອງທົ່ວແຂວງກໍບັນລຸ 3 ຕື້ 200 ລ້ານໂດລາສະຫະລັດ,ເພີ່ມຂຶ້ນຫຼາຍກວ່າປີກ່ອນ 20%, ສ່ວນອາຊຽນໄດ້ກວມອັດຕາສ່ວນຫຼາຍສົມຄວນໃນການຄ້າກັບຕ່າງປະເທດຂອງແຂວງຢຸນນານ.
ທ່ານປາຍເອີນເພີຍ ຜູ້ແທນສະພາປະຊາຊົນ ເລຂາຄະນະພັກແຂວງຢູນນານເວົ້າວ່າ,ແຂວງຢູນນານພວມເລັ່ງລັດສ້າງສາເສັ້ນທາງເນັ່ງໄປສູ່ອາຊີອາຄະເນ.ທ່ານເວົ້າວ່າ:
"ດຽວນີ້ ຈາກເມືອງຄຸນມິງໄປຫາຕົວເມືອງສຳຄັນຂອງປະເທດອາຊີອາຄະເນຕ່າງກໍມີມີຖ້ຽວການບິນໝົດແລ້ວ; ພວກເຮົາພວມສ້າງທາງຫຼວງຄຸນມີງ-ບາງກອກ;ພວກ ເຮົາໄດ້ສ້າງທາງລົດໄຟຈາກເມືອງຄຸນມິງໄປຫາເມືອງລາວກາຍຫວຽດນາມແລ້ວ,ແລະຍັງວາງແຜນຈະສ້າງທາງລົດໄຟຈາກຕ້າຫຼີໄປຮອດມຽນມາ,ຈາກສິບສອງພັ່ນນາໄປຮອດວຽງຈັນລາວ; ປີ 2004, ກິດຈະການລວງທາງເດີນເຮືອຢູ່ແມ່ນ້ຳລ້ານຊ້າງໄດ້ສ້າງສຳເລັດແລ້ວ,ການກໍ່ສ້າງທາງເດີນເຮືອແມ່ນ້ຳລ້ານຊ້າງ-ແມ່ນ້ຳຂອງກໍກຳລັງວາງແຜນຢູ່. ທັງນີ້ໄດ້ສ້າງເງື່ອນໄຂໃຫ້ແຂວງຢູນນານເຂົ້າຮ່ວມການສ້າງສາເຂດການຄ້າເສລີ."
ໃນປີ 2004,"ເຂດເສດຖະກິດການຄ້າວິທະຍາສາດເຕັກນິກພາກເໜືອໄທ"ທີ່ແຂວງຢູນນານຮ່ວມມືກັບໄທກໍເລີ່ມລົງມືສ້າງສາຢ່າງເປັນທາງການແລ້ວ, ທັງນີ້ໄດ້ສ້າງແທ່ນໃຫ້ວິສາຫະກິດຈີນເດີນໄປສູ່ອາຊີອາຄະເນ ເຂົ້າຮ່ວມການສ້າງສາເຂດການຄ້າເສລີແລະຮ່ວມມືເສດຖະກິດເຕັກກັບນາໆຊາດ.ທ່ານປາຍເອີນເພີຍເວົ້າວ່າ:
"ນີ້ແມ່ນໝາກຜົນຊຸກຍູ້ການຄ້າສອງຝ່າຍຂອງຈີນ,ທັງສະແດງໃຫ້ເຫັນຄວາມໝັ້ນໃຈຂອງແຂວງຢູນນານໃນການເຂົ້າຮ່ວມການສ້າງສາເຂດການຄ້າເສລີ."
ເຊັ່ນດຽວກັນ,ເຂດທີ່ໃກ້ຄຽງກັບປະເທດອາຊຽນຍັງມີເຂດກວາງຊີເຜົ່າ ຈ້ວງປົກຄອງຕົນເອງຂອງຈີນ.ເຂດກວາງຊີແມ່ນທາງອອກທະເລທີ່ສະດວກທີ່ສຸດທາງເຂດຕາເວັນຕົກສຽງໃຕ້ຂອງຈີນ,ແລະກໍແມ່ນປະຕູແລະຊ່ອງທາງສຳຄັນຈາກຈີນໄປສູ່ອາຊຽນ.
ທ່ານລູປິງ ຜູ້ແທນສະພາປະຊາຊົນຂອງເຂດກວາງຊີ ປະທານເຂດກວາງຊີເຜົ່າຈ້ວງປົກຄອງຕົນເອງເວົ້າວ່າ,ປີ 2004,ຍອດມູນຄ່າການຄ້າຂາເຂົ້າຂາອອກລະຫວ່າງເຂດກວາງຊີກັບປະເທດອາຊຽນໄດ້ບັນລຸ 1 ຕື້ກວ່າໂດລາສະຫະລັດ,ເພີ່ມຂຶ້ນຫຼາຍກວ່າເວລາດຽວກັນໃນປີ2003 21%, ກວມ1 / 4ຂອງຍອດມູນຄ່າການຄ້າຂາເຂົ້າຂາອອກຂອງເຂດກວາງຊີ. ອາຊຽນໄດ້ກາຍເປັນຄູ່ການຄ້າທີ່ໃຫຍ່ກວ່າໝູ່ຂອງເຂດກວາງຊີ.
ປີ 2004,ງານເອັກສ໌ໂປຈີນ-ອາຊຽນຄັ້ງປະຖົມມະເລີກໄດ້ຈັດຂຶ້ນຢູ່ເມືອງນານນິງຈີນຢ່າງສຳເລັດຜົນ. ຕາມໄດ້ຊາບ,ແຂກຈີນແລະຕ່າງປະເທດທີ່ເຂົ້າຮ່ວມງານວາງສະແດງຄັ້ງນີ້ມີເຖິງ 3 ໝື່ນກວ່າຄົນ,ໃນໄລຍະໄຂງານ ໄດ້ເຊັນຂໍ້ຜູກພັນແລະສັນຍາກັບທຶນຕ່າງປະເທດເກືອບ 5 ຕື້ໂດລາສະຫະລັດ,ທຶນພາຍໃນປະເທດຈີນກໍມີເຖິງ 40 ຕື້ກວ່າຢວນ.ງານເອັກສ໌ໂປຈີນ-ອຽນໄດ້ກາຍເປັນແທ່ນສຳຄັນທີ່ຊຸກຍູ້ການຮ່ວມມືທາງເສດຖະກິດການຄ້າລະຫວ່າງຈີນກັບປະເທດອາຊຽນແລ້ວ. ທ່ານລູ້ປິງ ຜູ້ແທນສະພາປະຊາຊົນແຫ່ງຊາດຈີນເວົ້າວ່າ:
"ການເລັ່ງລັດກໍ່ສ້າງເຂດການຄ້າເສລີໄດ້ກາຍເປັນຄວາມຮັບຮູ້ຄືກັນທີ່ສຳຄັນຂອງຈີນແລະອາຊຽນ. ພາຍໃຕ້ການຮ່ວມກັນບົ່ມເພາະຂອງຈີນແລະບັນດາປະເທດອາຊຽນ, ງານເອັກສ໌ໂປຈີນ-ອາຊຽນໃນຖານເປັນແທ່ນຮັບໃຊ້ເຂດການຄ້າເສລີໂດຍກົງໄດ້ກາຍເປັນສະຖານທີ່ສຳຄັນຂອງການໄປມາຫາສູ່ກັນທາງການເມືອງ ເສດຖະກິດການຄ້າແລະວັດທະນະທຳລະຫວ່າງຈີນກັບອາຊຽນແລ້ວ. ອາໄສແທ່ນນີ້, ຈີນກັບບັນດາປະເທດອາຊຽນສາມາດເຂົ້າໃຈກັນແລະໄວ້ເນື້ອເຊື່ອໃຈກັນເລິກເຊິ່ງກວ່າເກົ່າ, ມີຜົນດີຕໍ່ການຊຸກຍູ້ໃຫ້ວິສາຫະກິດຈີນແລະວິສາຫະກິດອາຊຽນຫຼາຍກວ່າເກົ່າດຳເນີນການຮ່ວມມືແລະແລກປ່ຽນກັນ. ເວົ້າສຳລັບຈີນກັບບັນດາປະເທດອາຊຽນແລ້ວ,ຕ່າງຝ່າຍຕ່າງຈະໄດ້ຮັບຜົນປະໂຫຍດນຳກັນ."
ຕາມໄດ້ຊາບ,ວຽກງານກະກຽມຈັດງານເອັກສ໌ໂປຈີນ-ອາຊຽນຄັ້ງທີສອງໄດ້ ເລີ່ມດຳເນີນຢ່າງຮອບດ້ານແລ້ວ,ແລະຈະຈັດຂຶ້ນໃນທ້າຍເດືອນຕຸລາປີນີ້. ເພື່ອຕອບສະໜອງຄວາມຮຽກຮ້ອງຕ້ອງການຂອງວິສາຫະກິດໃນດ້ານຮ້ານວາງສະແດງ,ງານເອັກສ໌ໂປຄັ້ງທີສອງໄດ້ຈັດຮ້ານວາງສະແດງມາດຖານໄວ້ 3500 ແຫ່ງ, ຫຼາຍກວ່າ ຄັ້ງທີໜຶ່ງ 1000 ແຫ່ງ. ເມືອງນານນິງວາງແຜນຈະສ້າງເຂດການຄ້າສາກົນຈີນ-ອາຊຽນທີ່ກວມເນື້ອທີ່ 3 ກິໂລແມັດມົນທົນຢູ່ເບື້ອງຕາເວັນອອກຂອງສູນປະຊຸມແລະວາງສະແດງສາກົນນານນິງສະຖານທີ່ຈັດງານເອັກສ໌ໂປຈີນ-ອາຊຽນ,ເພື່ອຊຸກຍູ້ການໄປມາຫາສູ່ກັນທາງການຄ້າລະຫວ່າງຈີນກັບບັນດາປະເທດອາຊຽນ.ທ່ານລູ້ປິງເວົ້າວ່າ:
"ຂ້າພະເຈົ້າຫວັງໃຫ້ເພື່ອນບັນດາປະເທດອາຊຽນ ສະຫຼະເວລາອັນລ້ຳຄ່າມາເຂົ້າຮ່ວມງານເອັກສ໌ໂປຈີນ-ອາຊຽນຄັ້ງທີສອງ.ໃນວາລະເດືອນຕຸລາ ລະດູໃບໄມ້ຫຼົ່ນ ທີ່ດອກອົບເຊີຍສົ່ງກິ່ນຫອມຫວນ, ພວກເຮົາຈົ່ງມາເຕົ້າໂຮມກັນຢູ່ເມືອງນານນິງ, ພ້ອມກັນຊົມໝາກຜົນອຸດົມສົມບູນແຫ່ງການຮ່ວມມືເສດຖະກິດຂອງພາກພື້ນພວກເຮົາ!"
|
|
|
