|
ຕາມຂ່າວCRI: ວັນທີ 14 ມີນາ, ທ່ານອານນານ ເລຂາທິການໃຫຍ່ສະຫະປະຊາຊາດໄດ້ໃຫ້ຄຳໝັ້ນສັນຍາວ່າ, ປະຊາຄົມໂລກຈະອອກແຮງຊຸກຍູ້ຂະບວນວິວັດສັນຕິພາບປາເລັສຕິນອິສຣາແອນ, ປະຕິບັດແຜນການເສັ້ນທາງສັນຕິພາບຕາເວັນອອກກາງ.
ທ່ານອານນານແມ່ນໃຫ້ທັດສະນະດັ່ງກ່າວພາຍຫຼັງພົບປະທ່ານອັບບາສ ປະທານອົງການອຳນາດແຫ່ງຊາດປາເລັສຕິນຢູ່ເມືອງລາມາລາຝັ່ງຕາເວັນຕົກແມ່ນ້ຳຈໍແດນໃນມື້ດຽວກັນ. ກ່ອນໜ້ານີ້, ທ່ານໄດ້ໄປຢ້ຽມຢາມອິສຣາແອນ, ແລະເຈລະຈາກັບທ່ານຊາລອນ ນາຍົກລັດຖະມົນຕີອິສຣາແອນ. ນີ້ແມ່ນທ່ານອານນານໄປຢ້ຽມຢາມປາເລັສຕິນອິສຣາແອນຄັ້ງທຳອິດໃນ 4 ປີມານີ້. ນັກສັງເກດການເຫັນວ່າ, ທ່ານອານນານໄປຢ້ຽມຢາມເທື່ອນີ້ ຈະມີຜົນສະທ້ອນອັນຕັ້ງໜ້າຕໍ່ການດຳເນີນຂະບວນວິວັດສັນຕິພາບປາເລັສຕິນອິສຣາແອນຄືນໃໝ່.
ໃນງານຖະແຫຼງຂ່າວທີ່ຈັດຂຶ້ນຫຼັງຈາກພົບປະທ່ານອັບບາສ, ທ່ານອານນານກ່າວວ່າ, ໃນສະເພາະໜ້ານີ້, ການຄືບໜ້າຂອງສະຖານະການປາເລັສຕິນອິສຣາແອນໄດ້ອຳນວຍໂອກາດໃຫ້ແກ່ການເລີ່ມຕົ້ນຂະບວນວິວັດສັນຕິພາບຄືນໃໝ່.
ວັນທີ 13 ມີນາ, ໃນເວລາເຈລະຈາກັບທ່ານຊາລອນ, ທ່ານອານນານກ່າວວ່າ, ທ່ານຊົມເຊີຍທ່ານຊາລອນທີ່ຕັດສິນໃຈປະຕິບັດແຜນການເຄື່ອນໄຫວແຕ່ຝ່າຍດຽວ, ຫວັງວ່າແຜນການນີ້ຄົງຈະຊ່ອຍໃຫ້ສອງຝ່າຍປາເລັສຕິນອິສຣາແອນກັບຄືນສູ່ແຜນການເສັ້ນທາງສັນຕິພາບຕາເວັນອອກກາງຄືນໃໝ່.
ນອກຈາກເຈລະຈາກັບຜູ່ນຳປາເລັສຕິນອິສຣາແອນແລ້ວ, ການເຄື່ອນໄຫວສຳຄັນອີກລາຍໜຶ່ງຂອງທ່ານອານນານທີ່ໄປຢ້ຽມຢາມຕາເວັນອອກກາງເທື່ອນີ້ແມ່ນເຂົ້າຮ່ວມພິທີສ້າງສຳເລັດຫໍລະລຶກການສັງຫານໂຫດຂອງອິສຣາແອນແຫ່ງໃໝ່ທີ່ຈັດຂຶ້ນໃນວັນທີ 15 ມີນາ. ໃນເວລານັ້ນ, ນັກການເມືອງສຳຄັນຂອງປະເທດຕ່າງໆປະມານ 30 ທ່ານເຊິ່ງລວມທັງຜູ່ນຳຝຣັ່ງ ອີຕາລີ ໂຮນລັງແລະໂປໂລຍເປັນຕົ້ນຈະເຂົ້າຮ່ວມພິທີ, ລະລຶກຊາວຢິວຫຼາຍລ້ານຄົນທີ່ຖືກພວກນາຊີເຂັ່ນຂ້າໃນສົງຄາມໂລກຄັ້ງທີສອງ, ທົບທວນປະຫວັດສາດ, ເຕືອນຄົນຮຸ້ນຫຼັງ, ເພື່ອຫຼີກເວັ້ນບໍ່ໃຫ້ໂສກນາດຕະກຳຄ້າຍຄືກັນນີ້ເກີດຂຶ້ນອີກ.
ໃນໄລຍະດົນນານມານີ້, ສະຫະປະຊາຊາດໄດ້ທຳຄວາມພະຍາຍາມອັນມະຫາສານໃນບັນຫາປາເລັສຕິນອິສຣາແອນ, ແລະພ້ອມກັນກັບອາເມລິກາ ຣັດເຊຍ ສະຫະພາບເອີລົບວາງແຜນການເສັ້ນທາງສັນຕິພາບໃນປີ 2003. ບຸກຄົນວິເຄາະຊີ້ອອກວ່າ, ເຖິງວ່າຜູ່ນຳທາງຂະບວນວິວັດສັນຕິພາບປາເລັສຕິນອິສຣາແອນຍັງຄົງແມ່ນອາເມລິກາກໍ່ຕາມ, ແຕ່ສະຫະປະຊາຊາດໃນຖານະເປັນອົງການຈັດຕັ້ງສາກົນທີ່ມີລັກສະນະຕົວແທນກວ້າງຂວາງກວ່າໝູ່ແລະສຳຄັນກວ່າໝູ່ໃນໂລກ, ຈະເສີມຂະຫຍາຍບົດບາດທີ່ເຂົ້າແທນບໍ່ໄດ້ໃນການຕິດຕາມກວດກາຂະບວນວິວັດສັນຕິພາບ ປະສານຫຼັກໝັ້ນຂອງບັນດາຝ່າຍ ຍາດແຍ່ງເອົາການສະໜັບສະໜູນຊ່ອຍເຫຼືອຈາກສາກົນ ຜ່ອນຄາຍໄພພິບັດດ້ານມະນຸດສະທຳຂອງປະຊາຊົນປາເລັສຕິນແລະບັນຫາອື່ນໆ. ຄຽງຄູ່ກັບສະຖານະການປາເລັສຕິນອິສຣາແອນມີທ່ວງທ່າຜ່ອນຄາຍລົງ, ບົດບາດຂອງສະຫະປະຊາຊາດໃນການເລີ່ມຕົ້ນແຜນການເສັ້ນທາງສັນຕິພາບຄືນໃໝ່ ຊຸກຍູ້ຂະບວນວິວັດສັນຕິພາບນັ້ນຈະພົ້ນເດັ່ນກວ່າເກົ່າ.
|
