|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່ານິທານສຸ ພາສິດເລື່ອງ "ຕາງຖົງຝາອີ້" ແປວ່າ "ເຂົ້າຂ້າງຝ່າຍຕົນ ໂຈມຕີຝ່າຍກົງກັນຂ້າມ" ສູ່ຟັງ.
ພາຍຫຼັງລາຊະວົງຮັ້ນຕາເວັນຕົກໄດ້ສ້າງຕັ້ງຂຶ້ນແລ້ວ, ມາຮອດໄລຍະຈັກກະ ພັດຮັ້ນອູຕີ້, ສັງຄົມມີຄວາມຈະເລີນຮຸ່ງເຮືອງແບບບໍ່ເຄີຍມີມາກ່ອນ, ຊີວິດການເປັນຢູ່ຂອງປະຊາຊົນມີຄວາມໝັ້ນທ່ຽງໂດຍທຽບຖານ. ຈັກກະພັດຮັ້ນອູຕີ້ຢາກປັບປຸງອຳນາດການປົກຄອງຂອງຕົນໃຫ້ໝັ້ນຄົງ, ເພີ່ມທະວີການໂຮມສູນອຳນາດຢູ່ສູນກາງ. ເພື່ອສອດຄ່ອງກັບຄວາມຕ້ອງການຂອງຈັກກະພັດຮັ້ນອູຕີ້, ຕົງຈົ້ງຊູ່ ນັກປັດຊະຍາສຳນັກຂົງຈື້ໄດ້ສະເໜີຄຳຂວັນ "ປາບສຳນັກອື່ນ ເຄົາລົບແຕ່ສຳນັກຂົງຈື້".
ໃນຕົ້ນສະໄໝລາຊະວົງຮັ້ນ, ລັດທິເຕົ໋າເຄີຍເຜີຍແຜ່ຫຼາຍໃນຊົ່ວໄລຍະໜຶ່ງ, ລັດທິນີ້ມີເຈດຈຳນົງທຳໃຈໃຫ້ສຳຫງົບ, ບໍ່ທຳການປະພຶດຫຍັງ, ກ່າວເນັ້ນວ່າຊີວິດຄົນເຮົາບໍ່ໃຫ້ມີຄວາມເພີ້ຝັນຫຍັງ, ນີ້ໄດ້ເສີມຂະຫຍາຍບົດບາດອັນຕັ້ງໜ້າຕໍ່ສະພາບສັງຄົມທີ່ຂ້ອນຂ້າງທຸກຍາກໃນຕົ້ນສະໄໝລາຊະວົງຮັ້ນຕາເວັນຕົກ. ແຕ່ເມື່ອຜ່ານການປະຕິບັດນະໂຍບາຍໂຈະໜີ້ແລະພດທະນາການຜະລິດມາຊົ່ວໄລຍະໜຶ່ງແລ້ວ, ສັງຄົມຂອງລາຊະວົງຮັ້ນຕາເວັນຕົກໄດ້ມີການພັດທະນາ, ກຳລັງແຫ່ງຊາດໄດ້ເພີ່ມທະວີຂຶ້ນຢ່າງເດັ່ນຊັດ, ຕໍ່ພາຍໃນ ຈັກກະພັດຢາກເພີ່ມທະວີອຳນາດຂອງຈັກກະພັດ, ແລະຢາກຂະຫຍາຍອຳນາດຕໍ່ພາຍນອກ, ທິດສະດີຂອງລັດທິເຕົ໋າທີ່ວ່າ "ທຳໃຈໃຫ້ສະຫງົບ ບໍ່ທຳການປະພຶດຫຍັງ" ນັ້ນ ເປັນອັນຈະແຈ້ງແລ້ວວ່າບໍ່ສອດຄ່ອງກັບຄວາມຮຽກຮ້ອງຕ້ອງການຂອງສະຖານະການແລ້ວ. ສະນັ້ນ ນັກກະພັດຮັ້ນອູຕີ້ໄດ້ເຫັນດີເຫັນພ້ອມນຳເຈດຈຳນົງຂອງຕົງຈົ້ງຊູ, ອອກຄຳສັ່ງໃຫ້ສົ່ງເສີມແຕ່ສຳນັກຂົງຈື້, ຖືເອົາສຳນັກຂົງຈື້ເປັນແນວຄິດທີ່ຊົງອິດທິພົນແລະເປັນເອກະພາບກັນໃນທົ່ວປະເທດ.
ໃນຄາວນັ້ນ, ເພື່ອສະແດງເຖິງການເອົາໃຈໃສ່ນຳສຳນັກຂົງຈື້, ຈັກກະພັດຮັ້ນອູຕີ້ໄດ້ສ້າງສຳນັກດອກເຕີຢູ່ວິທະຍາໄລຈັກກະພັດ, ເພື່ອຄົ້ນຄວ້າສຳນັກຂົງຈື້; ການຄັດເລືອກຂ້າລາຊະການແລະການນຳໃຊ້ຜູ່ມີຄວາມຮູ້ຄວາມສາມາດ, ກໍ່ຖືການສອບເສັງສຳນັກຂົງຈື້ເປັນມາດຖານ. ແຕ່ນັ້ນມາ, ສຳນັກຂົງຈື້ໄດ້ມີຖານະເໜືອສຸດເປັນກ້າວໆ, ຄົນທັງຫຼາຍພາກັນຮຽນສຳນັກຂົງຈື້.
ແຕ່ພາຍຫຼັງມາ, ຄົນຮຽນສຳນັກຂົງຈື້ນັບມື້ນັບຫຼາຍ ຄົນທີ່ຕ່າງກັນກໍ່ມີຄຳອະທິບາຍຕ່າງກັນຕໍ່ບາງຄຳພີຂອງສຳນັກຂົງຈື້. ຮອດລາຊະການຈັກກະພັດຮັ້ນຊ່ວນຕີ້, ມີນັກປາດທີ່ມີຊື່ສຽງຜູ່ໜຶ່ງຊື່ວ່າຊ່ຽວວ້າງຈື່, ເພິ່ນໄດ້ຈັດຕັ້ງລູກສິດທັງຫຼາຍຂອງສຳນັກຂົງຈື້ດຳເນີນການໂຕ້ວາທີຢູ່ຫໍເກັບຮັກສາໜັງສືຂອງຈັກກະພັດ.
ການໂຕ້ວາທີເທື່ອນີ້ໄດ້ດຳເນີນໄປຢ່າງດຸເດືອດທີ່ສຸດ, ຄົນທັງຫຼາຍພາກັນສະເໜີທັດສະນະຂອງຕົນ, ບັນລະຍາຍດ້ວຍສາເຫດຕ່າງໆ; ຄຶດຫາທຸກວິທີກ່າວຕີໂຕ້ທັດສະນະຂອງຜູ່ອື່ນ. ຄົນທັງຫຼາຍຖືຜູ່ທີ່ມີຄວາມເຫັນອັນດຽວກັນກັບຕົນເອງນັ້ນເປັນພັກພວກຂອງຕົນ, ແລະຖືຜູ່ທີ່ມີຄວາມເຫັນແຕກຕ່າງກັບຕົນເອງນັ້ນເປັນຝ່າຍກົງກັນຂ້າມ, ແລະກ່າວໂຈມຕີຢ່າງຮຸນແຮງ.
ແຕ່ການໂຕ້ວາທີພາຍໃນສຳນັກຂົງຈື້ຢ່າງຂະໜາດໃຫຍ່ເທື່ອນີ້ ພັດໄດ້ຊຸກຍູ້ໃຫ້ສຳນັກຂົງຈື້ມີການພັດທະນາ, ໃນ 2000 ກວ່າປີກ່ອນ ຄືຍຸກລາຊະວົງຮັ້ນ, ແນວຄິດສຳນັກຂົງຈື້ໄດ້ກາຍເປັນແນວຄິດການປົກຄອງຂອງສັງຄົມສັກດິນາຈີນໂດຍຕະຫຼອດ. ຈົນຮອດຕົ້ນສະຕະວັດທີ 20, ຄຽງຄູ່ກັບສັງຄົມສັກດິນາຈີນຊຸດໂຊມລົງ ແນວຄິດສຳນັກຂົງຈື້ກໍ່ນັບມື້ນັບສູນເສຍຖານະທີ່ເປັນແນວຄິດການປົກຄອງດັ້ງເດີມ. ແຕ່ຍ້ອນມັນໄດ້ຄອບງຳແນວຄິດວິຊາການຂອງຈີນມາເປັນເວລາ 2000 ກວ່າປີ, ກາຍເປັນພາກສ່ວນຕົ້ນຕໍຂອງວັດທະນະທຳສັກດິນາຈີນ, ສະນັ້ນ ຈຶ່ງໄດ້ຮັກສາມໍລະດົກວັດທະນະທຳຊົນເຜົ່າທີ່ອຸດົມສົມບູນໄວ້ໃຫ້ຮຸ້ນຫຼັງ.
|
