|
|
 |
| (GMT+08:00)
2005-03-17 16:33:57
|
 |
|
ທ່ວງທ່າຖອນທະຫານອອກຈາກອີຣັກສະກັດກັ້ນໄວ້ຍາກ
cri
Author: li
ຕາມຂ່າວ CRI: ເນື່ອງໃນໂອກາດສົງຄາມອີຣັກເກີດຂຶ້ນຄົບຮອບ 2 ປີ,ບາງປະເທດຄືອີຕາລີ,ບຸນກາລີ,ອູແກຼນແລະປອກຕຸຍການເປັນຕົ້ນທີ່ແຕ່ກ່ອນສະໜັບສະໜຸນອາເມລິກາກໍ່ສົງຄາມອີຣັກແລະແຕ່ງທະຫານໄປປະຈຳອີຣັກນັ້ນໄດ້ພາກັນຂໍຖອນທະຫານ. ໂດຍແນໃສ່ສະພາບດັ່ງກ່າວ,ບຸກຄົນວິເຄາະຊີ້ອອກວ່າ,ອາເມລິກາຢາກຊັກຊວນໃຫ້ສະມາຊິກອື່ນໆໃນກອງທະຫານນາໆຊາດປະຈຳຢູ່ອີຣັກຕໍ່ໄປແມ່ນເລື່ອງຍາກຫຼາຍ,ມູນເຫດຕົ້ນຕໍມີສາມດ້ານດັ່ງນີ້:
ໜຶ່ງ, ສັນຕິພາບກັບຕ່າວອີຣັກຍັງແມ່ນເລື່ອງຍາວໄກ. ຂະບວນການການເມືອງອີຣັກທີ່ອາເມລິກາເຂົ້າຮ່ວມການອອກແບບນັ້ນຄືບໜ້າຊັກຊ້າທີ່ສຸດ. ພັນທະມິດຂອງອາເມລິກາໃນສົງຄາມອີຣັກນັບມື້ນັບສຳນຶກຮູ້ວ່າ,ອີຣັກພາຍຫຼັງສົງຄາມນັ້ນບໍ່ໄດ້ເຂົ້າສູ່ຍຸກໃໝ່ທີ່ມີປະຊາທິປະໄຕ,ເສລີແລະຮັ່ງມີຄືດັ່ງທ່ານປະທານາທິບໍດີບຸສວາດພາບນັ້ນຈັກເມັດ.
ສອງ,ສະຖານະການຄວາມປອດໄພຂອງອີຣັກທີ່ຊຸດຮ້າຍເຂົ້າຕໍ່ມາເຮັດໃຫ້ລັດຖະບານຂອງປະເທດທີ່ສົ່ງທະຫານປະເຊີນກັບກຳລັງກົດໜີບທາງການເມືອງຢ່າງຮຸນແຮງ. ຕົວຢ່າງຄືອີຕາລີ,ຫວ່າງກ່ອນນີ້ບໍ່ດົນ,ສອດແນມຜູ້ໜຶ່ງຂອງອີຕາລີໄດ້ຖືກທະຫານອາເມລິກາປະຈຳອີຣັກຍິງຕາຍໃນເວລາປ້ອງກັນນັກຂ່າວເພດຍິງຂອງອີຕາລີທີ່ຖືກກອບກູ້ໄປເດີ່ນຍົນແບກແດັດ,ເຫດການດັ່ງກ່າວບໍ່ພຽງແຕ່ພາໃຫ້ປະຊາຊົນພາຍໃນປະເທດອີຕາລີຈັດການເຄື່ອນໄຫວຄັດຄ້ານອາເມລິກາເທື່ອໃໝ່ທໍ່ນັ້ນ ແລະຍັງເຮັດໃຫ້ການພົວພັນລະຫວ່າງອີຕາລີກັບອາເມລິກາປົກຫຸ້ມໄປດ້ວຍເງົາມືດການເມືອງ. ໃນຕົ້ນເດືອນເມສາ,ອີຕາລີຈະຈັດການເລືອກຕັ້ງຢູ່ທ້ອງຖິ່ນ,ປີ 2006 ຍັງຈະຈັດການເລືອກຕັ້ງທົ່ວໄປ,ທັງນີ້ເປັນການທົດສອບອັນມະຫາສານຕໍ່ລັດຖະບານສະຫະພັນເປັນກາງແລະປີກຂວາທີ່ນຳໂດຍທ່ານເບີລຸສ໌ໂຄນີ,ທ່ານຈຳເປັນຕ້ອງພິຈາລະນາຜົນສະທ້ອນທາງລົບຂອງນະໂຍບາຍຕໍ່ອີຣັກໃນໝູ່ປະຊາຊົນຜູ້ມີສິດເລືອກຕັ້ງ.
ສາມ,ບັນຫາຖອນທະຫານຈະພາໃຫ້ມີຜົນກະທົບສະເນືອນກັນໄປ. ກອງທະຫານຕ່າງປະເທດປະຈຳອີຣັກໄດ້ມີກະແສຖອນທະຫານຮອບໃໝ່,ບໍ່ພຽງແຕ່ຈະກະທົບກະເທືອນແຜນການຈັດວາງກອງທະຫານຂອງປະເທດສົ່ງທະຫານຕົ້ນຕໍໂດຍກົງ,ໂດຍສະເພາະແມ່ນອາເມລິກາ,ອັງກິດແລະອົສຕຼາລີຢູ່ອີຣັກທໍ່ນັ້ນ ຫາກຍັງເປັນກຳລັງໜີບແຮງທີ່ສຸດຕໍ່ບາງປະເທດເຊັ່ນໂປໂລຍເປັນຕົ້ນ. ເມື່ອຮອດເວລານັ້ນ ກອງທະຫານຕ່າງປະເທດທີ່ຍັງຄົງປະຈຳຢູ່ອີຣັກນັ້ນຈະປະເຊີນກັບສະພາບທີ່ຕາບຈູນແຖບເປົ່າຫວ່າງຍ້ອນທະຫານພັນທະມິດຖອນໜີ.
ບຸກຄົນວິເຄາະເຫັນວ່າ,ຄວາມໝາຍການເມືອງທີ່ປະເທດພັນທະມິດຂອງອາເມລິກາແລະອັງກິດຖອນທະຫານແມ່ນໃຫຍ່ກວ່າຄວາມໝາຍທາງການທະຫານຕັ້ງຫຼວງຫຼາຍ. ອະນາຄົດຂອງກອງທະຫານພັນທະມິດປະຈຳອີຣັກເວົ້າໃນສ່ວນໃຫຍ່ແລ້ວຕ້ອງອາໃສກອງທະຫານຮັກສາຄວາມປອດໄພຂອງອີຣັກມີຄວາມສາມາດຮັກສາຄວາມສະຫງົບພາຍໃນປະເທດ. ແຕ່ບຸກຄົນທີ່ກ່ຽວຂ້ອງກໍຊີ້ອອກວ່າ, ຄວາມສາມາດຂອງກອງທະຫານຄວາມປອດໄພອີຣັກດຽວນີ້ຍັງໄກຢູ່ທີ່ຈະຫາບແບກໜ້າທີ່ປ້ອງກັນ,ສະນັ້ນ ກອງທະຫານອາເມລິກາແລະອັງກິດຈຳເປັນຕ້ອງແຕ່ງທະຫານຍິ່ງຫຼາຍໄປອີຣັກ. ສາມາດຄາດຄະເນໄດ້ວ່າ,ນີ້ບໍ່ພຽງແຕ່ຈະເຮັດໃຫ້ລັດຖະບານບຸສແລະລັດຖະບານແບຼຖືກສັດຕູການເມືອງພາຍໃນປະເທດຕິຕຽນຫຼາຍກວ່າເກົ່າໃນບັນຫາອີຣັກທໍ່ນັ້ນ ແລະຍັງຈະເຮັດໃຫ້ກອງທະຫານອາເມລິກາແລະອັງກິດທີ່ຫຼົ່ມລົງບວກຕົມສົງຄາມອີຣັກຢ່າງເລິກນັ້ນຍິ່ງໂດດດ່ຽວກວ່າເກົ່າ.
|
|
|
