|
ພາຍຫລັງປາເລັສຕິນອິສລາແອນເຊັນສັນຍາມອບເມືອງເຈລີໂຄ ເມືອງຝັ່ງຕາເວັນຕົກແມ່ນ້ຳຈໍແດນໃນຕອນເດິກທ່ຽງຄືນວັນທີ 14 ມີນາແລ້ວ, ວັນທີ 16 ມີນາ ວຽກງານມອບຮັບກໍ່ໄດ້ດຳເນີນໄປຢ່າງສະດວກ. ໃນກອງປະຊຸມ ສຸດຍອດຊຳແອນເຊັກ,ອິສລາແອນກໍ່ໄດ້ປະກາດມອບສິດຄວບຄຸມ 5 ຕົວເມືອງຢູ່ຝັ່ງຕາເວັນຕົກແມ່ນ້ຳຈໍແດນເຊິ່ງລວມທັງເມືອງເຈລີໂຄໃຫ້ຝ່າຍປາເລັສຕິນແຕ່ດົນແລ້ວ,ແຕ່ການມອບຮັບໄດ້ໂຈະໄວ້ດົນນານ.ເປັນຫຍັງອິສລາແອນຈິ່ງໄດ້ເລືອກເອົາຍາມນີ້ມອບຮັບເມືອງເຈລີໂຄໃຫ້ຝ່າຍປາເລັດສຕິນ?
ເຖິງວ່າຫ້າຕົວເມືອງດັ່ງກ່າວຕັ້ງຢູ່ດິນແດນປາເລັສຕິນ, ແຕ່ຖືກອິສລາແອນຄວບຄຸມດ້ວຍກຳລັງການທະຫານຍາວນານ.ທະຫານອິສລາແອນໄດ້ ຕັ້ງປົດກວດກາແລະວາງສິ່ງຂວາງທາງຢູ່ອ້ອມແອ້ມຕົວເມືອງເຫລົ່ານີ້,ກວດ ກາຊາວປາເລັສຕິນທີ່ເຂົ້າອອກເມືອງເຫລົ່ານີ້ຢ່າງເຄັ່ງຄັດ.ສະນັ້ນ, ຍາມໃດຈິ່ງມອບສິດຄວບຄຸມເມືອງເຫລົ່ານີ້ແມ່ນຄຸມຢູ່ໃນກຳມືຂອງຊາວອິສລາແອນທີ່ເປັນເຈົ້າການ.ໃນຫນຶ່ງເດືອນທີ່ຜ່ານມາ, ການມອບຮັບເມືອງເຈລີໂຄໄດ້ຖືກເລື່ອນເວລາສອງເທື່ອແລ້ວ.
ສື່ມວນຊົນເຫັນໂດຍທົ່ວໄປວ່າ, ເທື່ອນີ້ ຝ່າຍອິສລາແອນມອບເມືອງເຈລີໂຄໃຫ້ຝ່າຍປາເລັສຕິນຢ່າງສະດວກພາຍຫລັງສອງຝ່າຍໄດ້ເຊັນສັນຍາກັນພຽງແຕ່ 24 ຊົ່ວໂມງ, ແມ່ນຍ້ອນພິຈາລະນາເຖິງສອງດ້ານ.ຄື ຫນຶ່ງແມ່ນເພື່ອເພີ່ມນ້ຳຫນັກຂອງທ່ານອາບັສ ຜູ່ນຳປາເລັສຕິນທີ່ພວມເຈລະຈາກັບອົງການຈັດຕັ້ງປະກອບອາວຸດຄືຂະບວນການຕໍ່ຕ້ານອິສລາມປາເລັສຕິນ.ຕັ້ງແຕ່ຂຶ້ນກຳອຳນາດເປັນຕົ້ນມາ, ທ່ານອາບັສຝ່າຍອ່ອນໂຍນໄດ້ຮັບຄວາມຊົມເຊີຍຈາກອິສລາແອນແລະອາເມລິກາ ຄູ່ຕໍ່ສູ້ເກົ່າໃນແຕ່ກ່ອນ, ທ່ານຊາຣອນ ນາ ຍົກລັດຖະມົນຕີອິສລາແອນຈົນໄດ້ກ່າວຫລາຍເທື່ອວ່າຈະໃຊ້ມາດຕະການສົມຄູ່ກັນເພື່ອສະຫນັບສະຫນູນທ່ານ.
ສອງແມ່ນເພື່ອສະແດງທ່າທາງ, ຫມາຍຈະປ່ຽນແປງຫລັກຫມັ້ນຂອງປະເທດສ່ວນຫນຶ່ງໂດຍສະເພາະແມ່ນປະເທດເອີລົບທີ່ເຂົ້າຂ້າງປາເລັສຕິນໂດຍຕະຫລອດໃນການປະທະກັນລະຫວ່າງປາເລັສຕິນກັບອິສລາແອນ.ວັນທີ 15 ມີນາ ອະນຸສອນສະຖານການສັງຫານໂຫດຊາວຢິວໃນສົງຄາມໂລກຄັ້ງທີສອງໄດ້ສ້າງສຳເລັດຢູ່ເຢລູຊາເລັມອິສລາແອນ, ນັກການເມືອງແລະຜູ່ນຳ 500 ກວ່າທ່ານທີ່ມາຈາກ 15 ປະເທດຄື ທ່ານອານນານ ເລຂາທິການໃຫຍ່ອົງການສະຫະປະຊາຊາດ ທ່ານລາຟາແລງ ນາຍົກລັດຖະມົນຕີຝຣັ່ງແລະທ່ານຟີເຊີ ລັດຖະມົນຕີການຕ່າງປະເທດເຢຍລະມັນເປັນຕົ້ນໄດ້ເຕົ້າໂຮມກັນຢູ່ເຢລູຊາເລັມ,ໃນນັ້ນ ຫລາຍໆຄົນແມ່ນມາຈາກເອີລົບ.
ຜູ່ວິເຄາະເຫັນວ່າ, ການມອບເມືອງເຈລີໂຄຈະສ້າງພື້ນຖານໃຫ້ແກ່ວຽກງານມອບຮັບຕົວເມືອງອີກ 4 ເມືອງ,ແລ້ວເຮັດໃຫ້ທ່ານອາບັສ ປະທານອົງ ການອຳນາດແຫ່ງຊາດປາເລັສຕິນໄດ້ຮັບການສະຫນັບສະຫນູນຍິ່ງຫລາຍ ຈາກມວນຊົນ, ພ້ອມກັນນັ້ນ, ກໍ່ຈະຊ່ອຍໃຫ້ປາເລັສຕິນອິສລາແອນສ້າງຄວາມໄວ້ເນື້ອເຊື່ອໃຈເຊິ່ງກັນແລະກັນຄືນໃຫມ່, ສ້າງພື້ນຖານໃຫ້ແກ່ການຟື້ນຟູການເຈລະຈາສັນຕິພາບຄືນໃຫມ່ໃນພາຍຫນ້າ.
|
