|
ທ່ານກໍຄົງອາດຈະຮູ້ສຶກວ່າຜູ້ຊາຍແຂງແຮງກວ່າຜູ້ຍິງ,ພວກເຂົາເຈົ້າມີກ້າມເນື້ອແຂງແຮງ,ຕ້ອງການສິ້ນເປືອງກາໂລລີຍິ່ງຫຼາຍກວ່າ. ຖັດມາ,ການຂັບຖ່າຍໂກເລສະເຕລອນຂອງຜູ້ຊາຍຈະຖືກທຳລາຍເລື້ອຍໆ,ສະນັ້ນ ພວກເຂົາເຈົ້າມັກຈະເປັນໂຣກເລືອດດັນສູງ,ໂຣກຫົວໃຈຍ້ອນຂາດເລືອດ,ເປັນລົມຍ້ອນເສັ້ນເລືອດສະໝອງແຕກແລະຫົວໃຈວາຍ.
ໜຶ່ງ,ໃຫ້ກິນທາດໂກຼມໃນປະລິມານອັນແນ່ນອນ.
ໂກຼມຈະຊ່ອຍຂັບຖ່າຍໂກເລສະເຕລອນ,ເພີ່ມຄວາມທົນຂອງຮ່າງກາຍ,ນອກນີ້ ໃຕ້ເງື່ອນໄຂອັນແນ່ນອນຂອງຮ່າງກາຍ,ມັນຍັງສາມາດຊຸກຍູ້ໃຫ້ມີກ້າມເນື້ອຈໍ່ຕົວຂຶ້ນ,ຫຼີກເວັ້ນບໍ່ໃຫ້ມີໄຂມັນເຫຼືອເຟືອ. ຜູ້ຊາຍໄວກາງຢ່າງໜ້ອຍຕ້ອງການໂກຼມມື້ລະ 50 ມີລີກຼາມ,ສ່ວນຜູ້ຊາຍທີ່ມີການເຄື່ອນໄຫວຫຼາຍແດ່ຕ້ອງການໂກຼມ 100 ຮອດ 200 ມີລີກຼາມຕໍ່ມື້,ປະລິມານນີ້ແມ່ນຍາກທີ່ຈະຮັບຈາກອາຫານ,ສະນັ້ນ ຈຶ່ງສະເໜີໃຫ້ຜູ້ຊາຍກິນຢາທີ່ມີໂກຼມ,ເຊັ່ນວິຕາມິນປະສົມແລະວັດຖຸທາດແຮ່,ຫຼືກິນເບຍ.
ສອງ,ໃຫ້ກິນອາຫານທີ່ມີໃຍພືດອຸດົມສົມບູນ
ບົດບາດສຳຄັນຂອງໃຍພືດແມ່ນເລັ່ງລັດການຄັ້ນຮູດຂອງລຳໄສ້,ຫຼຸດໂກເລສະເຕລອນໃຫ້ໜ້ອຍລົງ,ຫຼຸດກຼູໂກສແລະອາສິດໄຂມັນໃນເລືອດ,ແລະມີບົດບາດຫຼຸດຄວາມດັນເລືອດ,ນອກນີ້ ຍັງສາມາດກຳຈັດວັດຖຸທີ່ພາໃຫ້ເປັນມະເຮັງບາງຢ່າງ,ຫຼີກເວັ້ນບໍ່ໃຫ້ເປັນມະເຮັງໄສ້ສຸດ. ເມື່ອຄົນເຮົາກິນອາຫານທີ່ມີໃຍພືດຫຼາຍ,ຈະຮູ້ສຶກອີ່ມທ້ອງ,ແລະບໍ່ຕ້ອງເປັນຮ່ວງວ່າຈະສະສົມກາໂລລີຈົນເຫຼືອເຟືອ,ສະນັ້ນ ຍັງມີບົດບາດລົດຄວາມອ້ວນ. ອາຫານທີ່ມີໃຍພືດຫຼາຍມີຮຳເຂົ້າເບຼ,ເຂົ້າຈີ່ເຂົ້າເບຼລ້ວນ,ຜັກກະຫຼ່ຳປີ,ມັນຝຣັ່ງ,ຫົວກາຫຼົດ,ໝາກໂປມ,ໜໍ່ສະຫຼັດ,ກະຫຼ່ຳດອກແລະຜັກເຊເລີລີເປັນຕົ້ນ. ຜູ້ຊາຍຄວນກິນຫຼາຍແດ່.
ສາມ,ໃຫ້ກິນອາຫານທີ່ມີມາເຍຊີອົມ.
ສານມາເຍຊີອົມຈະຊ່ອຍດັດສົມການເຄື່ອນໄຫວຂອງຫົວໃຈ,ຫຼຸດຄວາມດັນເລືອດໃຫ້ຕ່ຳລົງ,ປ້ອງກັນໂຣກຫົວໃຈ,ເສີມຄວາມສາມາດສືບພັນຂອງຜູ້ຊາຍ. ອາຫານທີ່ມີມາເຍຊີອົມຫຼາຍນັ້ນມີຖົ່ວເຫຼືອງ,ມັນຝຣັ່ງເຜົາ,ໝາກມັນຫໍ້,ມັກກາໂລນີແລະປູປາທະເລ.
ສີ່,ໃຫ້ກິນອາຫານທີ່ມີວິຕາມິນອາ
ວິຕາມິນອາຈະຊ່ອຍຍົກພູມຕ້ານທານຂອງຄົນເຮົາໃຫ້ແຂງແຮງ,ປ້ອງກັນມະເຮັງ,ຮັກສາຕາ. ໃນແຕ່ລະມື້ ຜູ້ຊາຍຕ້ອງກິນວິຕາມິນອາ 1000 ມິລີກຼາມ,ແຕ່ວ່າຖ້າກິນຫຼາຍເກີນໄປກໍມີຜົນຮ້າຍຕໍ່ຮ່າງກາຍ. ອາຫານທີ່ມີວິຕາມິນອາຫຼາຍແດ່ນັ້ນມີຕັບ,ອາຫານປະເພດນ້ຳນົມ,ປາ,ໝາກເລັ່ນ,ຫົວກາຫຼົດ,ໝາກອະມັ່ງແລະໝາກແຕງຫອມເປັນຕົ້ນ.
ຫ້າ,ໃຫ້ກິນອາຫານທີ່ມີວິຕາມິນເບ 6.
ວິຕາມິນເບ 6 ຈະຊ່ອຍຍົກພູມຕ້ານທານຂອງຄົນເຮົາໃຫ້ແຂງແຮງ,ສາມາດປ້ອງກັນມະເຮັງຜິວໜັງແລະປ້ອງກັນເປັນໜິ້ວໝາກໄຂ່ຫຼັງ. ຜູ້ຊາຍມື້ໜຶ່ງຕ້ອງກິນວິຕາມິນເບຫົກ 2 ມີລີກຼາມ,ທໍ່ກັບກິນກ້ວຍງ້າວສອງໜ່ວຍ. ອາຫານທີ່ມີວິຕາມິນເບ 6 ຫຼາຍແດ່ນັ້ນມີຊີ້ນໄກ່,ຕັບ,ມັນຝຣັ່ງແລະໝາກກ້ວຍເປັນຕົ້ນ.
ຫົກ,ໃຫ້ກິນອາຫານທີ່ມີວິຕາມິນເຊຫຼາຍ.
ບົດບາດຕົ້ນຕໍຂອງວິຕາມິນເຊແມ່ນຍົກພູມຕ້ານທານຂອງຄົນໃຫ້ແຂງແຮງຂຶ້ນ,ປ້ອງກັນມະເຮັງ,ປ້ອງກັນໂຣກຫົວໃຈ,ປ້ອງກັນເປັນລົມ,ຕາເຂົ້າເຝື້ອ,ຮັກສາແຂ້ວແລະຟັນແຂ້ວ,ຈະຊ່ອຍດີບາດແຜ,ຕ້ານເປັນຫືດ,ປົວໝັນຊາຍ. ນອກນີ້ ກິນວິຕາມິນເຊເປັນປະຈຳສາມາດເຮັດໃຫ້ເຖົ້າຊ້າ. ອາຫານທີ່ມີວິຕາມິນເຊຫຼາຍກວ່າໝູ່ມີຜັກກະຫຼ່ຳດອກ,ໝາກເພັດໃຫຍ່,ໝາກກ້ຽງ,ນ້ຳອະງຸ່ນ,ໝາກເລັ່ນ. ນອກນີ້ ກິນນ້ຳໝາກກ້ຽງມື້ລະເຄິ່ງຈອກສາມາດປ້ອງກັນເປັນຫວັດ. ຜູ້ທີ່ສູບຢາຍິ່ງຄວນກິນວິຕາມິນເຊໃຫ້ຫຼາຍ.
ເຈັດ,ໃຫ້ກິນອາຫານທີ່ມີວິຕາມິນເອີຫຼາຍ.
ບົດບາດຕົ້ນຕໍຂອງວິຕາມິນເອີແມ່ນຫຼຸດໂກເລສະເຕລອນໃຫ້ໜ້ອຍລົງ,ຂັບຖ່າຍຂອງເສດໃນຮ່າງກາຍ,ປ້ອງກັນຕາເຂົ້າເຝື້ອ. ໃນຖົ່ວດິນມີວິຕາມິນເອີຫຼາຍ,ແຕ່ວ່າຄົນເຮົາບໍ່ອາດຮັບເອົາວິຕາມິນເອີຢ່າງພຽງພໍຈາກອາຫານເຫຼົ່ານີ້, ສະນັ້ນຈຶ່ງສະເໜີໃຫ້ຜູ້ຊາຍກິນຢາວິຕາມິນເອີມື້ລະ 10 ມີລິກຼາມ.
|
