|
|
 |
| (GMT+08:00)
2005-03-21 10:55:13
|
 |
|
ປະຊາຊົນອີຣັກປາຖະໜາຢ່າງແຮງກ້າມີສັນຕິພາບແລະຄວາມສະຫງົບ
cri
Author: huachunmei
ວັນທີ 20 ມີນາ, ອາເມລິກາແລະອັງກິດໄດ້ກໍ່ສົງຄາມອີຣັກທີ່ເຮັດໃຫ້ໂລກຕື່ນຕົກໃຈ. ພັບຕາດຽວສອງປີໄດ້ກາຍໄປແລ້ວ, ສະຖານະການຢູ່ອີຣັກໄດ້ມີການປ່ຽນແປງຫຼວງຫຼາຍ, ວຽກງານສ້າງສາຄືນໃໝ່ພວມດຳເນີນຢູ່ເປັນເທື່ອລະກ້າວ. ແຕ່ບຸກຄົນວິເຄາະເຫັນວ່າ, ອີຣັກໃນປະຈຸບັນນີ້ຍັງຄົງປະເຊີນໜ້າກັບສາມບັນຫາໃຫຍ່ດັ່ງລຸ່ມນີ້:
ກ່ອນອື່ນແມ່ນປົວແປງສະຖານະການຄວາມປອດໄພ, ເຮັດໃຫ້ຫຼຸດການຫຼອມໂຈມຕີຫຼຸດໜ້ອຍລົງ. ປະຈຸບັນ, ກອງກຳລັງປະກອບອາວຸດຕ້ານອາເມລິກາໃຫຍ່ຢູ່ອີຣັກມີ 6 ກອງເປັນຢ່າງໜ້ອຍ, ໃນນັ້ນ, ບາງກອງແມ່ນຂອງອີຣັກ, ບາງກອງມາຈາກປະເທດອາລັບຫຼືປະເທດມຸສລີມອື່ນໆ. ທຳອິດ, ກອງກຳລັງປະກອບອາວຸດເຫຼົ່ານີ້ແມ່ນເປີດການຫຼອມໂຈມຕີແລະກໍເຫດການລະເບີດດ້ວຍຂໍ້ອ້າງຕ້ານການຍຶດຄອງຂອງອາເມລິກາແລະອັງກິດ. ແຕ່ພາຍຫຼັງມາ, ຄຽງຄູ່ກັບມາດຕະການປ້ອງກັນຂອງທະຫານອາເມລິການັບມື້ນັບເຄັ່ງຄັດຂຶ້ນ, ພວກປະກອບອາວິດຫຼອມໂຈມຕີເປົ້າໝາຍຂອງທະຫານອາເມລິການັບມື້ນັບຍາກ, ສະນັ້ນ, ພວກເຂົາເຈົ້າເລີຍຖືສາມັນຊົນເປັນເປົ້າໝາຍຫຼອມໂຈມຕີຫຼາຍກວ່າເກົ່າ. ສາມັນຊົນຜູ້ບໍ່ມີໂທດຫຍັງໄດ້ເປັນຜູ້ປະສົບໄພໃຫຍ່ກວ່າໝູ່ຂອງການເຄື່ອນໄຫວກໍ່ການຮ້າຍ.
ສອງ, ປະສານການພົວພັນລະຫວ່າງບັນດາກຳລັງການເມືອງໃຫ້ກົມກຽວກັນ. ປະຈຸບັນ, ບົນເວທີການເມືອງອີຣັກຕົ້ນຕໍມີສາມກຳລັງໃຫຍ່, ຄື, ມຸສລີມນິກາຍຊີອິດ ມຸສລີມນິກາຍຊຸນນີແລະຊາວເຄີດ. ໃນບັນຫາປະກອບລັດຖະບານຂ້າມຜ່ານ, ສາມກຳລັງການເມືອງໃຫຍ່ດັ່ງກ່າວນີ້ຕໍ່ໂອມກັນ, ຍັງຄົງມີຄວາມເຫັນຂັດກັນຫຼາຍ. ຈະປະສານການພົວພັນດ້ານປະໂຫຍດລະຫວ່າງບັນດາຝ່າຍໃຫ້ກົມກຽວກັນແນວໃດ, ເຮັດໃຫ້ບັນດາຝ່າຍມີຖານະທີ່ເໝາະສົມໃນອົງການປົກຄອງແຫ່ງຊາດໃນອະນາຄົດນັ້ນແມ່ນບັນຫາໃຫຍ່ທີ່ພົວພັນເຖິງສະຖຽນລະພາບແລະເອກະພາບແຫ່ງຊາດ.
ສາມ, ສາເຫດກົກຮາກຂອງບັນຫາອີຣັກແມ່ນການຍຶດຄອງອີຣັກຂອງກອງທະຫານຫຼາຍປະເທດ ເຊິ່ງແມ່ນທະຫານອາເມລິກາເປັນຫົວໂປ. ທະແນມແຕ່ການຍຶດຄອງດັ່ງກ່າວນີ້ຍັງຊົງຕົວຕໍ່ໄປ, ພວກປະກອບອາວຸດຢູ່ອີຣັກກໍບໍ່ຫ່ອມຊິຢຸດການຫຼອມໂຈມຕີດ້ວຍກຳລັງຮຸນແຮງ. ສະນັ້ນ, ການສິ້ນສຸດການຍຶດຄອງຂອງທະຫານຕ່າງປະເທດນັ້ນມີຄວາມໝານສຳຄັນຍິ່ງຕໍ່ບັນດາວົງການສັງຄົມອີຣັກ.
ປະຊາຊົນອີຣັກໄດ້ປະສົບຄວາມເດືອດຮ້ອນໃນການປະທະກັນດ້ວຍກຳລັງຄວາມຮຸນແຮງ, ປາຖະໜາຢ່າງແຮງກ້າໃຫ້ມີຊີວິດສັນຕິພາບແລະສະຖຽນລະພາບ. ໃນການເລືອກຕັ້ງຂອງອີຣັກທີ່ຈັດຂຶ້ນເມືອທ້າຍເດືອນມັງກອນປີນີ້, ສະພາບທີ່ຜູ້ມີສິດເລືອກຕັ້ງປ່ອຍບັດຢ່າງອຶກກະທຶກນຶກນອງນັ້ນໄດ້ສະແດງໃຫ້ເຫັນອີກວ່າ, ມວນຊົນຫວັງຢ່າງແຮງກ້າໃຫ້ສິ້ນສຸດສະພາບອັນວຸ້ນວາຍ ຟື້ນຟູຄວາມປອດໄພຢູ່ພາຍໃນປະເທດໂດຍໄວເທົ່າທີ່ຈະໄວໄດ້. ຄົນທັງຫຼາຍຫວັງວ່າ, ບັນດາກຳລັງການເມືອງຈົ່ງເອົາໃຈໃສ່ນຳພາກສ່ວນໃຫຍ່ແລະຜົນປະໂຫຍດຂອງປະຊາຊົນ, ພະຍາຍາມຊຸກຍູ້ຂະບວນວິວັດການເມືອງ, ຍາດແຍ່ງບັນລຸຈຸດໝາຍທີ່ຄົນອີຣັກປົກຄອງອີຣັກໂດຍໄວ. ພ້ອມກັນນັ້ນ, ອາເມລິກາກໍ່ຕ້ອງວາງຕາລາງເວລາຖອນທະຫານອອກຈາກອີຣັກໂດຍໄວ, ບໍ່ໃຫ້ກອງກຳລັງປະກອບອາວຸດຕ້ານອາເມລິກາມີມູນເຫດແລະຂໍ້ອ້າງແລ້ວດຳເນີນການເຄື່ອນໄຫວດ້ວຍກຳລັງຮຸນແຮງ, ເຮັດໃຫ້ປະຊາຊົນອີຣັກມີຊີວິດສັນຕິພາບແລະສະຖຽນລະພາບໂດຍໄວ.
|
|
|
