|
ຕາມຂ່າວCRI: ໃນຖານປັນບາດກ້າວໜຶ່ງແຫ່ງການສ້າງຄວາມເຊື່ອໃຈຕໍ່ກັນແລະປົວແປງການພົວພັນລະຫວ່າງປາເລັສຕິນແລະອິສຣາແອນໃຫ້ດີຂຶ້ນ, ວັນທີ 21 ມີນາ, ອິສຣາແອນໄດ້ມອບສິດຄຸ້ມຄອງຄວາມປອດໄພຂອງເມືອງ ຕູລກາແລມ ທີ່ຢູ່ຝັ່ງຕາເວັນຕົກແມ່ນ້ຳຈໍແດນໃຫ້ຝ່າຍປາເລັສຕິນ.ເພື່ອຕອບສະໜອງເລື່ອງນີ້, ຝ່າຍປາເລັສຕິນກໍໄດ້ອອກມາດຕະການຈຳກັດບໍ່ໃຫ້ພວກປະກອບອາວຸດໃຊ້ປືນ. ແຕ່ວ່າ, ແຜນການສ້າງເຮືອນຢູ່ໃໝ່ຫຼາຍພັນຫຼັງຢູ່ຝັ່ງຕາເວັນຕົກແມ່ນ້ຳຈໍແດນທີ່ ລັດຖະບານອິສຣາແອນຜ່ານໃນວັນທີ 21 ມີນາ, ໄດ້ເພີ່ມປັດໃຈບໍ່ກົມກຽວກັນໃຫ້ແກ່ການພົວພັນລະຫວ່າງປາເລັສຕິນແລະອິສຣາແອນທີ່ນັບມື້ນັບຜ່ອນຄາຍລົງ, ສະແດງໃຫ້ເຫັນເຈຕະນາຂອງລັດຖະບານອິສຣາແອນທີ່ຢາກກືນກິນເຢລູຊາເລັມຕາເວັນອອກແລະດີນແດນຝັ່ງຕາເວັນຕົກແມ່ນ້ຳຈໍແດນຢ່າງບໍ່ຢຸດຢັ້ງ.
ອີງຕາມສັນຍາທີ່ຜູ່ນຳສອງຝ່າຍປາເລັສຕິນອິສຣາແອນຕົກລົງກັນໃນເວລາ ພົບປະກັນຢູ່ເອຢິບໃນເດືອນແລ້ວນີ້, ຝ່າຍອິສຣາແອນຈະມອບສິດຄວບຄຸມຄວາມປອດໄພຂອງ 5 ຕົວເມືອງທີ່ຢູ່ຝັ່ງຕາເວັນຕົກແມ່ນນ້ຳຈໍແດນໃຫ້ຝ່າຍປາເລັສຕິນ. ຕູລກາແລມແມ່ນຕົວເມືອງທີ 2 ທີ່ຖືກມອບຫໃ້. ຕອນຄ່ຳວັນທີ 21 ມີນາ, ເຈົ້າໜ້າທີ່ຄວາມປອດໄພອິສຣາແອນແລະປາເລັສຕິນໄດ້ກ້າວເຖິງຂັ້ນເປັນເອກະສັນກັນກ່ຽວກັບບັນຫາລະອຽດຂອງການມອບຮັບ ຕູລກາແລມ, ແລະໄດ້ດຳເນີນວຽກງານມອບຮັບ.
ຝ່າຍປາເລັສຕິນກໍໄດ້ປະຕິບັດມາດຕະການຕ່າງໆເພື່ອຜ່ອນຄາຍການ ພົວພັນປາເລັສຕິນແລະອິສຣາແອນ. ຕາມຂ່າວແຈ້ງັວ່າ, ຫວ່າງມໍ່ໆນີ້, ກະຊວງວຽກງານພາຍໃນປາເລັສຕິນໄດ້ປະກາດແຈ້ງການ, ຮຽກຮ້ອງໃຫ້ພວກປະກອບອາວຸດປາເລັສຕິນຮັບຄຳໝັ້ນສັນຍາບໍ່ຖືອາວຸດໃນສະຖານທີ່ເປີດເຜີຍ, ພ້ອມທັງກຳນົດວ່າພວກປະກອບອາວຸດຜູ່ໜຶ່ງຢ່າງຫຼາຍຖຶອາວຸດອັນໜຶ່ງ, ອາວຸດຕ້ອງຂຶ້ນທະບຽນໃນກະຊວງວຽກງານພາຍໃນ.
ແຕ່ວ່າ, ເກືອບໃນຂະນະດຽວກັນນີ້, ວັນທີ 21 ມີນາ, ລັດຖະບານອິສຣາແອນຕົກລົງສ້າງເຮືອນຢູ່ໃໝ່ປະມານ 3500 ຫຼັງຢູ່ເຂດຝັ່ງຕາເວັນຕົກແມ່ນ້ຳຈໍແດນ. ເພື່ອເພີ່ມທະວີການຄວບຄຸມຕໍ່ເຢລູຊາເລັມແລະເຂດອ້ອມຂ້າງຂອງອິສຣາແອນ.
ອີງຕາມຂໍ້ກຳນົດຂອງແຜນການ" ເສັ້ນທາງສັນຕິພາບ" ຕາເວັນອອກກາງ, ອິສຣາແອນຕ້ອງຢຸດເຊົາການກໍ່ສ້າງບ່ອນຕັ້ງຖິ່ນຖານ, ພ້ອມທັງມ້າງຖິ້ມຈຸດຕັ້ງຖິ່ນຖານທີ່ບໍ່ຊອບກົດໝາຍຢູ່ຝັ່ງຕາເວັນຕົກແມ່ນ້ຳຈໍແດ. ເຖິງແມ່ນວ່າໄຕ້ກຳລັງໜີບຂອງລັດຖະບານອາເມລິກາ, ອິສຣາແອນສະແດງວ່າຈະມ້າງຈຸດຕັ້ງຖິ່ນຖານທີ່ບໍ່ຊອບກົດໝາຍ, ແຕ່ໃນດ້ານຮັກສາຈຸດຕັ້ງຖິ່ນຖານຂະໜາດໃຫຍ່ທີ່ຢູ່ຝັ່ງຕາເວັນຕົກແມ່ນ້ຳຈໍແດນພັດມີທ່າທີແຂງ, ແລະເວົ້າວ່າຫຼັກໝັ້ນຂອງເຂົາໄດ້ການຮັບຮອງແລະອະນຸຍາດຈາກອາເມລິກາ. ແຕ່ທ້າຍປີກາຍມານີ້, ຄ່ຽງຄູ່ກັບສະຖານະການປາເລັສຕິນແລະອິສຣາແອນຄ່ອຍໆຜ່ອນຄາຍລົງ, ອິສຣາແອນປະເຊີນໜ້າກັບກຳລັງໜີບນັບມື້ນັບແຮງຈາກປະຊາຄົມໂລກ. ໃນເວລາໃຊ້ມາດຕະການຜ່ອນຄາຍຈຳນວນໜຶ່ງນັ້ນ, ຝ່າຍອິສຣາແອນກໍໄດ້ເລັ່ງລັດບາດກ້າວໃຫ້ໄວເຂົ້າ, ເຈຕະນາຜ່ານການເຮັດ"ເປັນເລື່ອງຈິງຫຼາຍຍິ່ງຂຶ້ນ" ສືບຕໍ່ຍຶດຄອງບ່ອນຍຸດທະສາດສຳຄັນຢູ່ຝັ່ງຕາເວັນຕົກແມ່ນ້ຳຈໍແດນ, ໂດຍສະເພາະແມ່ນເພີ່ມທະວີການຄວບຄຸມເຢລູຊາເລັມຕາເວັນອອກ. ຂໍ້ຕົກລົງດັ່ງກ່າວທີ່ລັດຖະບານອິສຣາແອນທຳອອກໃນວັນທີ 21 ມີນາຍ່ອມຈະເກີດມີຜົນສະທ້ອນບໍ່ດີຕໍ່ສະຖານະການປາເລັສຕິນແລະອິສຣາແອນໂດຍບໍ່ຕ້ອງສົງໃສ.
|
