|
|
 |
| (GMT+08:00)
2005-03-23 19:56:54
|
 |
|
ເລື່ອງການກິນເຫຼົ້າກັບສຸກຂະພາບ
cri
Author: mo
ຈີນມີສຸພາສິດວ່າ,ຊຸມເຂົ້າຂາດເຫຼົ້າບໍ່ຮ່ອນເປັນ,ເຊິ່ງຫມາຍຄວາມວ່າ,ເວລາຊຸມເຂົ້າກັນໃນຍາມບຸນຫຼືໃນງານແຕ່ງດອງ,ເຖິງຈະມີອາຫານອັນໂອຊະເຕັມພາ,ແຕ່ຖ້າບໍ່ມີເຫຼົ້າແລ້ວກໍປານບໍ່ວ່າຫັ້ນລະ!ຂອງແຊບປານໃດກໍຄືວ່າຈືດຈາງບໍ່ມີລົດຊາດຫຍັງ.ເວົ້າສຳລັບເຮົາເອງເຖິງຈະກິນເຫຼົ້າບໍ່ເປັນແຕ່ໃນເວລາຊຸມເຂົ້າກັບຫມູ່ໃນຍາມບຸນນັ້ນ.ກໍມັກຍົກຈອກເຫຼົ້າຂຶ້ນກິນຈັກກຶກຫນຶ່ງ,ແລ້ວກໍຮູ້ສຶກວ່າມັນຫອມປາກຫອມຄໍ ທັງຮູ້ສຶກສະບາຍເອົາໂລດ,ຕາມເພິ່ນບັນທຶກໃນຫນັງສືບູຮານຈີນວ່າ,ການກິນເຫຼົ້າຈັກຫນ້ອຍຢ່າງພໍດ້າມພໍດີນັ້ນຈະເຮັດໃຫ້ເລືອດລົມດີ ຊື່ນຫູຊື່ນຕາທັງອຸ່ນຕົນອຸ່ນໂຕ.ຖ້າສັງເກດຈາກທັດສະນະຂອງແພດສາດສະໄຫມໃຫມ່ນີ້ແລ້ວກໍເຫັນວ່າການກິນເຫຼົ້າຈັກເລັກຈັກຫນ້ອຍນັ້ນສາມາດເພີ່ມວັດຖຸບາງຢ່າງທີ່ຮ່າງກາຍຄົນເຮົາຕ້ອງການ,ເຮັດໃຫ້ເລືອດລົມເດີນດີ ເຮັດໃຫ້ກະເພາະຮັບເອົາທາດບຳລຸງໄດ້ດີຍິ່ງຂຶ້ນ,ແລະອື່ນໆທັງເພີ່ມບັນຍາກາດໃນຍາມບຸນໃຫ້ມ່ວນຊື່ນຟົດຟື້ນຂຶ້ນ.
ແຕ່ວ່າ, ອີ່ຫຍັງກໍມີຂອບເຂດຈຳກັດຂອງມັນ,ຕ້ອງເຮັດຕາມຫລັກວິທະຍາສາດ. ການກິນເຫຼົ້າກໍຄືກັນ,ຄັນກິນຫຼາຍໂພດຫຼືກິນຈົນຕິດກາຍເປັນຄົນຂີ້ເຫຼົ້າແລ້ວ,ມັນກໍບໍ່ພຽງແຕ່ບໍ່ມີຜົນດີທໍ່ນັ້ນ,ຫາກຍັງມີຜົນຮ້າຍອີກຊ້ຳ,ເພາະວ່າພາກສ່ວນຕົ້ນຕໍຂອງເຫຼົ້ານັ້ນແມ່ນອັງໂກນເມື່ອກິນເຂົ້າໄປ,ອັງໂກນກໍຈະຜ່ານກະເພາະແລະລຳໄສ້ເຂົ້າໄປໃນສາຍເລືອດ ແລ້ວຫມູນເດີນໄປທົ່ວຕົນໂຕ ເຮັດໃຫ້ສາຍເລືອດຍະອອກ ຫົວໃຈກໍເຕັ້ນໄວເຂົ້າແລະເລືອດດັນສູງຂຶ້ນ,ເມື່ອອັງໂກນຢູ່ໃນເລືອດມີຫຼາຍເຖິງລະດັບອັນແນ່ນອນແລ້ວ,ກໍຈະເຮັດໃຫ້ເບື່ອເຊິ່ງພວກເຮົາມັກເວົ້າກັນວ່າເມົາເຫຼົ້ານັ້ນເອງ.
ຄົນເມົາເຫຼົ້ານັ້ນສ່ວນຫຼາຍຫນ້າແດງ,ເວົ້າຫຼົງຫນ້າຫຼົງຫລັງ,ບຶດຫົວບຶດໄຫ້ ມີອາການ,ວິນຫົວແລະຮາກແຕກອອກ,ຜູ່ເມົາແຮງກໍນອນຢ່າງບໍ່ຮູ້ເມື່ອຄີງ ຫນ້າຊີດ ສົບແຫຼ້ ຫັນໃຈຊ້າ ຊີບຈອນເຕັ້ນໄວ,ເລືອດດັນຕ່ຳລົງຫຼືພາໃຫ້ຕາຍກໍເປັນໄດ້.
ເມື່ອກີ້ນີ້,ເຮົາໄດ້ເວົ້າເຖິງຜົນດີຜົນຮ້າຍຂອງການກິນເຫຼົ້າສູ່ຟັງແລ້ວ,ຈາກນັ້ນກໍຈະເຫັນໄດ້ວ່າ,ກິນເຫຼົ້າຖືກຫລັກຫຼືບໍ່ນັ້ນມັນສຳຄັນແທ້ໆ,ຕໍ່ໄປນີ້,ເຮົາຈະເວົ້າຂໍ້ທີ່ຄວນລະວັງໃນເວລາກິນເຫົ້ຼາແລະວິທີແກ້ໃນເວລາເມົາເຫຼົ້າສູ່ຟັງຕື່ມ.
ກ່ອນອື່ນແມ່ນຢ່າກິນຫຼາຍ,ຈະດີໃຈປານໃດກໍໃຫ້ລະວັງຢ່າກິນຫຼາຍໂພດ,ສະເພາະແມ່ນຢ່າອວດວ່າຕົນກິນເຫົ້ຼາເກັ່ງແລ້ວດຶກເອົາດຶກເອົາ.ເຮັດແບບນີ້ກໍບໍ່ຕ່າງຫຍັງກັບສ້າງຜົນຮ້າຍໃສ່ເຈົ້າຂອງທໍ່ນັ້ນ.
2ແມ່ນຢ່າກິນເຫຼົ້າໃນເວລາທ້ອງເປົ່າ ແລະຢ່າກິນແບບດຶກເອົາດຶກເອົາ,ເພາະກິນແບບນີ້ກະເພາະຈະຮັບເອົາໂກນຫຼາຍໂພດໃນບາດດຽວ,ແລ້ວຈະພາໃຫ້ເມົາງ່າຍ, ນອກນີ້,ເມື່ອອັງໂກນໄປກະທົບກັບກະເພາະໂດຍກົງມັນຍັງຈະພາໃຫ້ກະເພາະອັກເສບນຳອີກ.
3 ແມ່ນໃນເວລາກິນເຫຼົ້ານັ້ນຢ່າສູບຢາ,ເພາະວ່າເນໂກຕິນໃນກອກຢານັ້ນເມື່ອລະ
ລາຍຢູ່ໃນເຫຼົ້າແລ້ວເລືອດກໍຈະຮັບເອົາໄວ,ແລ້ວໄປກະຕຸກປະສາດຢູ່ໃນມັນສະ
ຫມອງ.
4 ຂອງກິນແກ້ມເຫຼົ້ານັ້ນບໍ່ຄວນມັນຫຼາຍ.ທຳມະດາແລ້ວ,ໃນເວລາກິນເຫຼົ້ານັ້ນ, ຍ້ອນເຫຼົ້າປຸກຈາງຕ່າງກັນ,ບາງທີກິນຫຼາຍເກີນໄປກໍເລີຍເມົາ,ໂດຍທົ່ວໄປແລ້ວ,ການເມົາເຫຼົ້ານັ້ນ,ແມ່ນມັກສວ່າງເອງດອກສຳລັບຜູ່ເມົາແຮງນັ້ນແມ່ນຕ້ອງຈົກຄໍໃຫ້ຮາກແຕກອອກໃນທັນທີ,ເມື່ອຮາກອອກແລ້ວຕ້ອງໃຫ້ນອນພັກຜ່ອນ,ແລະຕ້ອງຫົ່ມຜ້າໃຫ້ມັນອຸ່ນ ເພາະຄົນເມົາເຫຼົ້ານັ້ນ,ຄີງຈະເຢັນແລ້ວມັກເປັນຫວັດ,ໃນໄລຍະນີ້ຕ້ອງກິນນ້ຳຮ້ອນໃຫ້ຫຼາຍ.ແຕ່ລະວັງຢ່າງກິນຊາປຸກ,ເພາະວ່າຊາປຸກຍິ່ງມີຜົນຮ້າຍສຳລັບຄົນເມົາເຫຼົ້າ,ຄັນຄົນເມົາເຫຼົ້າຮາກຫຼາຍເທື່ອ ໃຫ້ເອົາເກືອຫນ້ອຍ ຫນຶ່ງກອຍໃສ່ນ້ຳຮ້ອນໃຫ້ກິນ.ຜູ່ເມົາຍ້ອນກິນເຫຼົ້າໃນເວລາທ້ອງເປົ່ານັ້ນຄວນຊົງນ້ຳຕານຊາຍຫຼືນ້ຳອ້ອຍກິນ.ຖ້າຫາກມີອາການຫນັກກວ່ານີ້ໃຫ້ຟ້າວລົງໄປປົວກະທັນຫັນຢູ່ໂຮງຫມໍໂລດ.
ສຸດທ້າຍນີ້,ເຮັາຈະບອກວິທີເບິ່ງເຫຼົ້າຂາວ:ວິທີຫນຶ່ງ,ໃຫ້ເຫຍັ້ນເຫຼົ້າໃສ່ອົ້ງມືຈັກຢອດສອງຢອດ,ແລ້ວເອົາຝ່າມືສອງເບື້ອງຖູກັນຈັກຄາວຫນຶ່ງ,ເມື່ອເຫຼົ້າຮ້ອນແລ້ວມັນກໍຈະສົ່ງກິ່ນອອກມາຕ້ອງດັງໂລດ,ຄັນເປັນກິ່ນຫອມສີອ່ອນໆ,ກໍແປວ່າເຫຼົ້າດີ,ຄັນເປັນກິ່ນຫວານກໍແປວ່າເປັນເຫຼົ້າປານກາງ,ຄັນເປັນກິ່ນຂົມທັງຂິກໍຕ້ອງແມ່ນເຫຼົ້າໄຮ້ຄຸນນະພາບແນ່ນອນ.
ວິທີຫນຶ່ງອີກແມ່ນໃຫ້ປິ້ນປາກຂວດເຫຼົ້າລົງ,ແລ້ວສັງເກດເບິ່ງຫມາກປັດໃນເຫຼົ້ານັ້ນມີການປ່ຽນແປງແນວໃດ,ຖ້າຫມາກປັດໃນເຫຼົ້າບ້ວນຂຶ້ນຖີ່ໆແລ້ວກໍຫາຍໄປໂລດແລະຫມາກປັດກໍບໍ່ສຳຫມ່ຳສະເຫມີກັນ.ນ້ຳເຫຼົ້າກໍ່ຂຸ່ນອີກແປວ່າເປັນເຫຼົ້າໄຮ້ຄຸນນະພາບ,ຖ້າຫມາກປັດບ້ວນຂຶ້ນສະຫມ່ຳສະເຫມືແລະຢູ່ຫ່າງກັນພໍດ້າມພໍດີ,ທັງຫາຍໄປຊ້າໆແລະນ້ຳເຫຼົ້າກໍໃສດີນັ້ນ,ກໍແປວ່າເປັນເຫຼົ້າດີ.
|
|
|
