|
ທຸກໆຄົນຍ່ອມປາດຖະຫນາຢາກໃຫ້ຕົນມີສຸກຂະພາບແຂງແຮງ,ອາຍຸຫມັ້ນຂວັນຍືນ,ນີ້ແມ່ນເລື່ອງທຳມະດາ,ດັ່ງນັ້ນ,ບາງຄົນກໍຍຶດຫມັ້ນຫຼິ້ນກິລາຫັດແຮງ,ບາງຄົນກໍເອົາໃຈໃສ່ນຳການກິນອາຫານທີ່ມີທາດບຳລຸງ,ບາງຄົນກໍເອົາໃຈໃສ່ນຳການກິນຢາລຳລຸງແນວນັ້ນແນວນີ້,ແຕ່ມີຫຼາຍຄົນພັດລືມໃຊ້ຢາແນວຫນຶ່ງເພື່ອຮັກສາສຸກຂະພາບໂດຍຕົນເອງຄື:ຫົວ ໄປຄຽງຄູ່ກັບການຄົ້ນຄວ້າການຫົວນັ້ນ,ວິຊາກ່ຽວກັບການຫົວເຊິ່ງເປັນວິທະຍາສາດຈະເລີນໃຫມ່ຢ່າງຫນຶ່ງ,ດຽວນີ້ກໍພວມຈະເລີນ ຂຶ້ນໃນປະເທດຈຳນວນຫນຶ່ງແລ້ວ.
ນັກແພດສາດກໍຢືນຢັນມາແລ້ວວ່າ,ການຫົວນັ້ນກໍແມ່ນກິລາແນວຫນຶ່ງທີ່ມີຜົນປະໂຫຍດແກ່ຮ່າງກາຍຂອງຄົນເຮົາ,ຫົວເທື່ອຫນຶ່ງອາດເຮັດໃຫ້ຫນ້າເອິກ,ທ້ອງ ຫົວໃຈ ປອດ ຈົນຮອດຕັບໄຕລ້ວນແຕ່ໄດ້ຮັບການຝຶກຫັດໃນເວລາສັ້ນໆ.ໃນເວລາຫົວນັ້ນ,ສາຍເລືອດແດງຈະເປັ່ງຂຶ້ນ,ສາຍເລືອດຝອຍກໍຕື່ງຂຶ້ນນຳ,ເຮັດໃຫ້ຫນ້າແລະກ້າມຄໍແດງຂຶ້ນ,ບາງທີຫນັງຫົວແລະມືກໍຈະແດງຂຶ້ນນຳ.
ກ່ຽວກັບບົດບາດຂອງການຫົວນັ້ນ,ຜູ່ຊ່ຽວຊານຕ່າງປະເທດຜູ່ຫນຶ່ງໄດ້ສັງລວມໄວ້ 10 ຂໍ້ດັ່ງນີ້ວ່າ:1 ການຫົວ ຈະພາໃຫ້ປອດຫາຍໃຈໄດ້ຫຼາຍຂຶ້ນ,2 ຈະທຳຄວາມສະອາດໃນຫຼອດຫາຍໃຈ 3 ຈະລະບາຍອາລົມອັນປອດໄສ, 4 ຈະກຳຈັດປັດເປົ່າຄວາມເຄັ່ງຕຶງທາງປະສາດ 5 ຈະເຮັດໃຫ້ກ້າມຊີ້ນຜ່ອນຍານ 6 ຈະຊ່ອຍລະບາຍກຳລັງວັງຊາສ່ວນເຫຼືອ,7 ຈະຊ່ອຍຂັບໄລ່ຄວາມອຸກອັ່ງ 8 ຈະລົດຜ່ອນກຳລັງຫນີບຕ່າງໆທາງດ້ານຈິດໃຈ,9 ຈະຊ່ອຍແກ້ຄວາມລະອາຍ ຄວາມອຶດອັດໃຈ ແລະເລື່ອງຫຍຸ້ງສະຫມອງຕ່າງໆ,ແລະຈະມີຜົນດີຕໍ່ການເພີ່ມທະວີການຄົນຄ້າສະມາຄົມ ແລະມິດຕະພາບກັບແຂກຄົນແລະຫມູ່ເພື່ອນ,ແລະ 10 ຈະເຮັດໃຫ້ຄວາມເສົ້າຫມອງຈາກເຄາະກຳໃນອະດີດຈາງຫາຍແລ້ວຈະມີຄວາມຫຼາຍຂຶ້ນ,ຝັກໄຝ່ຕໍ່ອະນາຄົດອັນດີງາມ.
ສຸພາສິດຈີນມັກເວົ້າວ່າ ຫົວບາດຫນຶ່ງ ຫນຸ່ມ 10 ປີ,ຄົນມັກຫົວ ອາຍຸຍືນ,ຄົນມັກໄຫ້ ມັກເກີດພະຍາດໂລຄາ,ຫົວສາມາດປົວພະຍາດບາດເຍົາໄດ້ຮ້ອຍແປດພັນແນວ,ແລະອື່ນໆ,ສຸພາສິດເຫຼົ່ານີ້ໄດ້ສ່ອງແສງເຖິງຄວາມຮັບຮູ້ອັນເລິກເຊິ່ງກ່ຽວກັບຄຸນຄ່າປົວພະຍາດຂອງການຫົວໃນແພດສາດບູຮານຂອງຈີນ,ການປົວພະຍາດດ້ວຍານຫົວນັ້ນແມ່ນມີປະຫວັດຍາວນານມາແລ້ວຢູ່ໃນປະເທດຈີນ,ຕາມເລົ່າລືກັນວ່າ,ໃນສະໄຫມລາດຊະວົງເຊິ່ງ ມີເຈົ້ານາຍຊັ້ນສູງຜູ່ຫນຶ່ງເປັນພະຍາດອຸກອັ່ງປົວມາດົນນານກໍບໍ່ຫາຍ,ເລີ່ມເກີດມີອາລົມຄຶດສຸດຄຶດສ້ວຍ,ມີມື້ຫນຶ່ງເຈົ້ານາຍທ້ອງຖິ່ນຜູ່ຫນຶ່ງໄດ້ຫາຫມໍພື້ນເມືອງທີ່ຊື່ດັງຜູ່ຫນຶ່ງມາປົວໃຫ້,ເມື່ອນາຍຫມໍຜູ່ນີ້ຄຳເບິ່ງຊີບຈອນຂອງຜູ່ປ່ວຍແລ້ວ,ກໍເລີຍເວົ້ານຳເພິ່ນວ່າ,ທ່ານເປັນພະຍາດປະຈຳເດືອນຜິດປົກກະຕິ ເຈົ້ານາຍຜູ່ນີ້ ຟັງແລ້ວກໍເລີຍຫົວອາກໆຂຶ້ນ,ແລະຄຶດຢູ່ໃນໃຈວ່າ ແພດຜູ່ນີ້ຄືຊິເມົາແລ້ວຕິ,ແຕ່ນັ້ນມາ,ເມື່ອຄຶດເຫັນເລື່ອງນີ້ເທື່ອໃດ ເພິ່ນກໍຫົວອາກຂຶ້ນເທື່ອນັ້ນ,ຍ້ອນໄດ້ຫົວເລື້ອຍໆຄືແນວນີ້,ພະຍາດຂອງເພິ່ນກໍເລີຍຫາຍ.
ຍ້ອນວ່າການຫົວນັ້ນມີຄຸນປະໂຫຍດດີພິເສດສຳລັບປົວພະຍາດບາງຢ່າງ,ແພດຈຳນວນຫນຶ່ງຢູ່ຕ່າງປະເທດຈິ່ງໄດ້ຖືວ່າການຫົວກໍແມ່ນວິທີປິ່ນປົວແນວຫນຶ່ງ.
ຢູ່ອາເມລິກາ ການຄົ້ນຄວ້າການຫົວນັ້ນກໍໄດ້ມີການຂະຫຍາຍຕົວຂ້ອນຂ້າງໄວ,ຕາມສະຖິຕິຂອງຜູ່ຊ່ຽວຊານ ວິຊາຫົວໃຫ້ຮູ້ວ່າ,ຜູ່ມີອາລົມປົກກະຕິ ສະເລ່ຍແລ້ວ ແຕ່ລະມື້ຈະຫົວປະມານ 15 ເທື່ອ,ຜູ່ທີ່ຈິດໃຈເບີກບານມ່ວນຊື່ນນັ້ນ ມື້ຫນຶ່ງອາດຈະຫົວ 300 ເຖິງ 400 ເທື່ອ,ບັນດາຜູ່ຊ່ຽວຊານເຫັນວ່າ ການຫົວນັ້ນແມ່ນກິລາບຳລຸງກາຍຊະນິດຫນຶ່ງ.ມີໂຮງຫມໍຈຳນວນຫນຶ່ງຢູ່ອາເມລິກາໄດ້ເຜີຍແຜ່ວິທີປົວດ້ວຍການໃຫ້ຫົວ 5 ນາທີ,ຄືຮຽກຮ້ອງໃຫ້ຜູ່ປ່ວຍຫົວມື້ລະ 5 ນາທີ,ໂຮງຫມໍພັກຟື້ນຈຳນວນຫນຶ່ງກໍໃຫ້ຜູ່ເຖົ້າຜູ່ແກ່ຫົວເປັນປະຈຳ,ຄື:ໃຫ້ອ່ານນະວະນິຍາຍຕະຫຼົກ ເບິ່ງກະຕູນຕະຫຼົກແລະເບິ່ງການສະແດງເລື່ອງຕະຫຼົກເປັນຕົ້ນ,ສະມາຄົມຟື້ນຟູສຸກຂະພາບຂອງອາເມລິກາຍັງໄດ້ຈັດງານລາຕີ ຢອກກັນໃຫ້ມ່ວນສຳລັບຜູ່ເປັນມະເຮັງແລະຄອບຄົວເຂົາເຈົ້າ,ພວກເຂົາເຈົ້າໄດ້ປະກົດເຫັນວ່າ,ການເວົ້ານິທານຊວນຫົວແລະການຫົວນັ້ນສາມາດລົດຜ່ອນຄວາມຢ້ານກົວຕໍ່ພະຍາດມະເຣັງຂອງຜູ່ປ່ວຍແລະໃຊ້ສຽງຫົວມາຂັບໄລ່ເງົາມືດຂອງພະຍາດມະເຮັງນັ້ນ.ກໍໄດ້ມີບົດບາດໃນການປິ່ນປົວຢ່າງນຶກບໍ່ເຖິງມາແລ້ວ,ຜູ່ເຖົ້າຜູ່ຫນຶ່ງທີ່ເປັນມະເຮັງເວົ້າວ່າ,ຄັນບໍ່ແມ່ນຫົວເລື້ອຍໆ,ຂ້ອຍກໍຈະບໍ່ໄດ້ຢູ່ເມືອງຄົນນຳເພິ່ນແຕ່ດົນແລ້ວ!
ທ່ານຟາລາດີນັກເຄມີສາດທີ່ຊື່ດັງຂອງອັງກິດເປັນພະຍາດເສັ້ນປະສາດອ່ອນຍ້ອນໃຊ້ສະຫມອງຫຼາຍເກີນຄວນ,ນາຍຫມໍເວົ້າຕໍ່ເພິ່ນວ່າ,ຕົວຕະຫຼົກຜູ່ຫນຶ່ງເຂົ້າເມືອງ ດີກວ່ານາຍຫມໍເປັນໂຫຼ,ນີ້ແມ່ນຕຳລາຢາ,ເມື່ອອ່ານອອກຄວາມຫມາຍຂອງນາຍຫມໍແລ້ວ,ເພິ່ນຈິ່ງຫມັ່ນໄປເບິ່ງລະຄອນຕະຫຼົກເລື້ອຍໆ,ເທື່ອໃດກໍຫົວຈົນໄສ້ຂົດໄສ້ໂຂ,ໃນທີ່ສຸດ,ພະຍາດຂອງເພິ່ນບໍ່ຕ້ອງກິນຢາຫຍັງເລີຍຫາຍເອງ.ຢູ່ອັງກິດ ມີເດັກຍິງ 12 ຂວບຜູ່ຫນຶ່ງເປັນໂລກຈິດ ເຂົ້ານອນໃນໂຮງຫມໍ ນາຍຫມໍໄດ້ພານັກສະແດງຕະຫຼົກຜູ່ຫນຶ່ງຂອງຄະນະລະຄອນັດມາຢາມນາງ,ຫລັງຈາກນັ້ນນາງກໍເລີຍມີສະຕິຄືນຢ່າງເປັນຫນ້າງຶດງໍ້,ໃນທີ່ສຸດກໍເລີຍຫາຍປ່ວຍ.
ຢູ່ເຢຍລະມັນກໍມີການສົ່ງເສີມວິທີປົວດ້ວຍການຫົວຢ່າງມີລັກສະນະມວນຊົນ.ຢູ່ເຢຍລະມັນຕາເວັນຕົກແຕ່ກ່ອນມີສະໂມສອນຫົວແຫ່ງຫນຶ່ງ,ຕັ້ງຊື່ໃຫ້ວ່າ ສະຫະພັນຫົວ ເຢຍລະມັນ,ຈຸດປະສົງແມ່ນເພື່ອເຮັດໃຫ້ຊີວິດຂອງຄົນທັງຫຼາຍມີເນື້ອໃນອຸດົມສົມບູນ,ມີສຸກຂະພາບເຂັ້ມແຂງ,ອົບຮົມບົ່ມສ້າງຈິດໃຈອາລົມຂອງຄົນທັງຫຼາຍ,ແຕ່ລະປີ ສະຫະພັນດັ່ງກ່າວຈະຕ້ອງຈັດງານແຂ່ງຂັນແຕ່ຂັ້ນເມືອງເຖິງຂັ້ນຊາດລາຍການແຂ່ງຂັນນັ້ນມີ:ການຫົວແບບກຳນົດ, ມີການຫົວແບບເລືອກເອງ ມີການຫົວຄາວດຽວ ມີການຫົວດົນ ຫົວຈົນໄສ້ຂົດໄສ້ໂຂ ຫົວເຍື້ຍ ຫົວເປັນບັ້ນແລະອື່ນໆ.ສ່ວນຜູ່ຊົມກຳຈະສາມາດກຳຈັດປັດເປົ່າຄວາມອິດເມື່ອຍດ້ວຍການຫົວ,ແລະມ່ວນຊື່ນຍ້ອນໄດ້ຫົວ,ເຮັດໃຫ້ມີສຸກຂະພາບແຂງແຮງທັງກາຍແລະໃຈ,ໃນເວລາທ່ານນົງເນນັກສະລີລະສາດຊື່ດັງຂອງເຢຍລະມັນເຮັດບຸນວັນເກີດ 92 ປີນັ້ນ
ເພິ່ນໄດ້ສະເຫນີວິທີລັບທີ່ພາໃຫ້ອາຍຸຍືນຕໍ່ຄົນທັງຫຼາຍເຊິ່ງມີພຽງແຕ່ຄຳດຽວຄື:ຫົວ
ແພດຊື່ດັງຜູ່ຫນຶ່ງອີກຊື່ວ່າ,ຮຸຟແລນຖືວ່າ,ຜູ່ທີ່ຫົວເກັ່ງທີ່ສຸດນັ້ນແມ່ນແຂງແຮງກວ່າຫມູ່,ເພາະການຫົວນັ້ນສາມາດຊ່ອຍຍ່ອຍອາຫານ ເຮັດໃຫ້ເລືອດລົມໃນຮ່າງກາຍຫມູນເດີນດີຂຶ້ນ,ເຮັດໃຫ້ອອກເຫື່ອແລະອະໄວຍະວະທຸກພາກສ່ວນຫັນຫ້າວ.ມີນັກວິທະຍາສາດຜູ່ຫນຶ່ງໄດ້ໃຫ້ຂໍ້ສະຫຼຸບແກ່ການຫົວດັ່ງນີ້:ເວົ້າສຳລັບທຸກພາກສ່ວນຂອງຮ່າງກາຍແລ້ວ,ການຫົວນັ້ນກໍແມ່ນກາຍຍະກຳທີ່ດີທີ່ສຸດ,ເຫມືອນດັ່ງດອກເຕີເຊີນຊຸນຢືນ ແພດຈີນທີ່ຊື່ດັງຢູ່ຮົງກົງໄດ້ຂຽນໄວ້ໃນປື້ມກ່ຽວກັບອາຍຸຍືນຂອງເພິ່ນວ່າ:ຄວາມບໍ່ອຸກບໍ່ອັ່ງນັ້ນ,ແມ່ນຢາວິເສດພາໃຫ້ອາຍຸຍືນ,ຫົວເລື້ອຍໆກໍແມ່ນຢາປົວພະຍາດທີ່ດີກວ່າເພິ່ນ.
ເວົ້າລວມແລ້ວ,ການຫົວນັ້ນ,ແມ່ນມີຜົນດີຫຼາຍຢ່າງຕໍ່ຮ່າງກາຍຂອງຄົນເຮົາ,ແຕ່ກໍ່ຕ້ອງເຕືອນທ່ານທັງຫຼາຍວ່າ,ເວລາຫົວນັ້ນ ກໍຍັງຕ້ອງເບິ່ງກາລະເທສະ ແລະຕ້ອງມີຂອບເຂດຈຳກັດ,ຖ້າບໍ່ດັ່ງນັ້ນກໍຈະພາໃຫ້ມີເຫດຮ້າຍເກີດຂຶ້ນຢູ່ຄືກັນ,ເຊັ່ນໃນເວລາກິນເຂົ້າກິນນ້ຳ,ຖ້າຫົວແຮງ ອາດຈະາໃຫ້ຂອງກິນເຂົ້າໄປໃນຫຼອດລົມ ຜູ່ທີ່ເລືອດກັນສູງຖ້າຫົວແຮງຫຼາຍກໍອາດຈະພາໃຫ້ສາຍເລືອດສະຫມອງແຕກ,ຜູ່ເປັນໂລກຫົວໃຈ,ຖ້າຫົວແຮງຫຼາຍກໍອາດຈະພາໃຫ້ຫົວໃຈວາຍກໍເປັນໄດ້.ສະນັ້ນ,ໃນເວລາຫົວນັ້ນ,ຜູ່ເປັນພະຍາດທີ່ບໍ່ຄວນຕື່ນເຕັ້ນຫຼາຍ,ຍັງຕ້ອງຮູ້ລະງັບອາລົມຂອງຕົນໄວ້ແດ່.
|
