|
 ຕາມຂ່າວ CRI: ວັນນະໂຣກແມ່ນພະຍາດຕິດແປດທີ່ເກົ່າແກ່ຊະນິດໜຶ່ງ,ພາຍຫຼັງຊຸມປີ 50 ສະຕະວັດທີ 20,ຄຽງຄູ່ກັບການປະດິດສ້າງຢາຕ້ານວັນນະໂຣກແລະນຳໃຊ້ຢ່າງກວ້າງຂວາງ,ວັນນະໂຣກໄດ້ຖືກຄວບຄຸມໃນລະດັບໃດໜຶ່ງ. ແຕ່ໃນຫຼາຍປີມານີ້,ຍ້ອນມູນເຫດຕ່າງໆ,ພະຍາດວັນນະໂຣກໄດ້ມີຮ່ອງຮອຍກຳເລີບຂຶ້ນ,ກາຍເປັນບັນຫາສາທາລະນະສຸກທີ່ໃຫຍ່ໂຕໃນທົ່ວໂລກ.
ປັດຈຸບັນ,ຈີນມີຜູ້ເປັນພະຍາດປອດແຫ້ງ 4 ລ້ານ 5 ແສນຄົນ,ຕົວເລກດັ່ງກ່າວພຽງແຕ່ຖັດຈາກອິນເດຍ,ເປັນທີສອງໃນໂລກ, ນອກນີ້ ຢູ່ຈີນຍັງມີຜູ້ເປັນພະຍາດປອດແຫ້ງເພີ່ມຂຶ້ນ 1 ລ້ານ 4 ແສນກວ່າຄົນຕໍ່ປີ. ເພື່ອສະກັດກັ້ນວັນນະໂຣກ,ຮັກສາສຸຂະພາບຂອງສາທາລະນະຊົນ,ຈີນໄດ້ປົວຟີໃຫ້ຜູ້ຕິດແປດພະຍາດປອດແຫ້ງທັງໝົດ,ລັດໄດ້ລົງທຶນໃນດ້ານນີ້ເພີ່ມຂຶ້ນຄູ່ປີ. ທ່ານວັງຫຼົງເຕີ ຮອງລັດຖະມົນຕີກະຊວງສາທາລະນະສຸກຈີນແນະນຳວ່າ:
"ໃນຫຼາຍປີມານີ້ ການເງິນສູນກາງໄດ້ເພີ່ມຄ່ໃຊ້ຈ່າຍໃນດ້ານຄວບຄຸມວັນນະໂຣກ. ບົນພື້ນຖານທີ່ເພີ່ມຂຶ້ນປີລະ 40 ລ້ານຢວນແຕ່ເດີມ,ປີ 2004 ໄດ້ເພີ່ມຂຶ້ນຮອດ 265 ລ້ານຢວນ, ຊື້ຢາປົວປອດແຫ້ງໃຫ້ຄົນເຈັບຟີ,ແລະໃຊ້ເພື່ອກວດໃຫ້ຮູ້ຜູ້ຕິດແປດພະຍາດໃໝ່ແລະເພີ່ມທະວີການສຶກສາດ້ານຮັກສາສຸຂະພາບເປັນຕົ້ນ."
ເຈົ້າໜ້າທີ່ແນະນຳວ່າ,ປີ 2004 ຈີນຍັງໄດ້ປະຕິບັດມາດຕະການໃຫມ່ຕ່າງໆເພື່ອປ້ອງກັນແລະປົວວັນນະໂຣກ,ເຊັ່ນຕັ້ງລາງວັນ"ແຈ້ງຜູ້ເປັນພະຍາດ",ເພື່ອສົ່ງເສີມໃຫ້ນາຍໝໍຂັ້ນຮາກຖານໃນຊົນນະບົດກວດພົບຜູ້ເປັນປອດແຫ້ງໃຫ້ຫຼາຍ; ສ້າງລະບົບລາຍງານພະຍາດຕິດແປດເຊິ່ງລວມທັງວັນນະໂຣກໂດຍຜ່ານລະບົບເຄືອຂ່າຍໃນທົ່ວປະເທດ; ເພື່ອອຳນວຍຄວາມສະດວກໃຫ້ຊາວນາປົວພະຍາດ,ຈີນຍັງໄດ້ສ້າງບ່ອນກວດຂີ້ກະເທີ່ຢູ່ໃນໂຮງໝໍຊົນນະບົດ 1 ສ່ວນ 3.
ພ້ອມກັນນີ້ ຈີນຍັງໄດ້ຮ່ວມມືກັບປະເທດຕ່າງໆເຊັ່ນອັງກິດແລະຍີ່ປຸ່ນພ້ອມທັງອົງການຈັດຕັ້ງສາກົນເຊັ່ນທະນາຄານໂລກເປັນຕົ້ນໃນດ້ານປ້ອງກັນແລະປົວວັນນະໂຣກ. ຕົວຢ່າງຄືຈີນໄດ້ໃຊ້ເງິນກູ້ຂອງທະນາຄານໂລກແລະເງິນບໍລິຈາກຂອງລັດຖະບານອັງກິດ ດຳເນີນໂຄງການຄວບຄຸມວັນນະໂຣກຢູ່ 16 ເຂດແຂວງເຊັ່ນແຂວງເຮີເປ,ເຂດຊິນຈຽງແລະເຂດມົງໂກໃນເປັນຕົ້ນ.
ໂຄງການດັ່ງກ່າວໄດ້ຮັບຜົນດີຫຼາຍ,ປີ 2004 ໄດ້ຮັບ"ລາງວັນຜູ້ວ່າການທະນາຄານໂລກ"ເຊິ່ງເປັນລາງວັນສູງສຸດຂອງທະນາຄານໂລກ.
ທ່ານວັງລົງເຕີ ຮອງລັດຖະມົນຕີກະຊວງສາທາລະນະສຸກຈີນກ່າວວ່າ,ເມື່ອໄດ້ທຳຄວາມພະຍາຍາມແລ້ວ,ວຽກງານປ້ອງກັນແລະປົວວັນນະໂຣກຂອງຈີນໄດ້ຮັບໝາກຜົນໃນເບື້ອງຕົ້ນ.
"ນັບມາຮອດທ້າຍປີ 2004 ສະເລ່ຍແລ້ວ ອັດຕາປົວຫາຍຕໍ່ຜູ້ເປັນປອດແຫ້ງທີ່ກວດພົບໃໝ່ແລະຂຶ້ນທະບຽນໃນທົ່ວປະເທດແມ່ນ 91,6%,ໄດ້ລື່ນກາຍເປົ້າໝາຍ 85% ທີ່ອົງການອະນາໄມໂລກສະເໜີອອກມາ."
ຕາມໄດ້ຊາບ,ແຕ່ຊຸມປີ 90 ສະຕະວັດທີ 20 ມານີ້ ອັດຕາຕິດແປດປອດແຫ້ງຢູ່ຈີນໄດ້ຫຼຸດໜ້ອຍລົງ 3% ຂຶ້ນໄປຕໍ່ປີ.
ເຖິງວ່າໄດ້ຮັບຜົນງານດັ່ງກ່າວ,ແຕ່ປັດຈຸບັນ ວຽກງານປ້ອງກັນແລະປົວວັນນະໂຣກຂອງຈີນຍັງປະສົບຄວາມຫຍຸ້ງຍາກແລະບັນຫາຈຳນວນໜຶ່ງ,ຄືປະຊາກອນເຄື່ອນຍ້າຍເພີ່ມຂຶ້ນເລື້ອຍໆໄດ້ເຮັດໃຫ້ວຽກງານປ້ອງກັນແລະປົວວັນນະໂຣກຫຍຸ້ງຍາກກວ່າເກົ່າ. ປັດຈຸບັນ,ຢູ່ຈີນມີປະຊາກອນເຄື່ອນຍ້າຍ 150 ລ້ານຄົນ,ຕົ້ນຕໍມາຈາກເຂດຊົນນະບົດທີ່ມີຜູ້ເປັນວັນນະໂຣກຂ້ອນຂ້າງໜັກໜ່ວງ,ຜູ້ເປັນວັນນະໂຣກໃນປະຊາກອນເຄື່ອນຍ້າຍເຫຼົ່ານີ້ອາດຕິດແປດໃຫ້ຜູ້ອື່ນງ່າຍທີ່ສຸດ. ດ້ວຍເຫດນີ້,ບາງຕົວເມືອງຂອງຈີນໄດ້ປ່ຽນແປງວິທີເຮັດວຽກໃນເມື່ອກ່ອນທີ່ປ້ອງກັນແລະປົວວັນນະໂຣກໃນໄທເມືອງທ້ອງຖິ່ນຕົນ,ຕໍ່ຜູ້ເປັນວັນນະໂຣກທີ່ມາຈາກຕ່າງຖິ່ນກໍປົວໃຫ້ຟີຢ່າງທັນການ.
ທ່ານລິວຈຽນຈູນ ຜູ້ຮັບຜິດຊອບວຽກງານປ້ອງກັນແລະປົວວັນນະໂຣກຂອງສູນປ້ອງກັນຄວບຄຸມພະຍາດຂອງຈີນເຫັນວ່າ,ເຮັດແນວນີ້ສາມາດປ້ອງກັນຢ່າງບັງເກີດຜົນບໍ່ໃຫ້ພະຍາດລະບາດຢູ່ໃນຕົວເມືອງ,ສະນັ້ນ,ຄວນເຜີຍແຜ່ໃນທົ່ວປະເທດ. ທ່ານເວົ້າວ່າ:
"ຜູ້ເປັນວັນນະໂຣກທີ່ພວກເຮົາເຫັນໃນບໍລິເວນຂອງພວກເຮົາລ້ວນແຕ່ແມ່ນຜູ້ທີ່ພວກເຮົາຄວນບໍລິການ. ຂ້າພະເຈົ້າເຫັນວ່າ,ປະເທດພວກເຮົາຄວນພະຍາຍາມເຮັດແບບນີ້."
ນອກນີ້ ວຽກງານປ້ອງກັນແລະປົວວັນນະໂຣກຂອງຈີນຍັງໄດ້ປະສົບກັບບັນຫາຕ່າງໆເຊັ່ນຄ່າໃຊ້ຈ່າຍແລະພະນັກງານປ້ອງກັນແລະປົວວັນນະໂຣກບໍ່ພຽງພໍເປັນຕົ້ນ,ຕໍ່ເລື່ອງນີ້ ເຈົ້າໜ້າທີ່ກະຊວງສາທາລະນະສຸກຈີນກ່າວວ່າ,ຈີນຈະເພີ່ມການລົງທຶນເຂົ້າໃນວຽກງານປ້ອງກັນແລະປົວວັນນະໂຣກຢ່າງບໍ່ຢຸດຢັ້ງ,ຂ້ຽວເລັ່ງອົບຮົມພະນັກງານໃນດ້ານນີ້ໃຫ້ຫຼາຍກວ່າເກົ່າ. ນອກນີ້ ຈີນຍັງຫວັງໃຫ້ເພີ່ມທະວີການຮ່ວມມືກັບປະຊາຄົມໂລກໃນຂົງເຂດດັ່ງກ່າວຕໍ່ໄປ.
|
