|
"ກົນຊ້ອນກົນ" ໝາຍເຖິງໃນເວລາຝ່າຍສັດຕູມີກຳລັງແຂງແຮງກວ່າຝ່າຍເຮົາ, ໃຊ້ກົນອຸບາຍຫຼອກລວງຜູກມັດສັດຕູໄວ້ກ່ອນ, ແລ້ວໃຊ້ກົນອຸບາຍອື່ນບຸກໂຈມຕີສັດຕູ, ໃຊ້ກົນອຸບາຍຫຼາຍຢ່າງປະສົມປະສານກັນຢ່າງຕໍ່ເນື່ອງ, ປະກອບເປັນຕ່ອງໂສ້ກົນອຸບາຍເປັນອົງປະກອບດຽວກັນຢ່າງສົມບູນ. ສົງຄາມຊື້ປີ້ລະຫວ່າງເມືອງເວິ້ຍກັບເມືອງສູແລະເມືອງອູໃນສະໄໝສາມກົກຂອງຈີນກໍ່ແມ່ນຕົວຢ່າງໜຶ່ງ.
ກ່ອນອື່ນ, ໂຈ່ວອີ ແມ່ທັບເມືອງອູໃຊ້ກົນອຸບາຍແບ່ງແຍກສັດຕູ, ຫຼອກໃຫ້ໂຈໂສຂ້າໄຊມ້າວແລະຈ່າງຢຸນ ນາຍທະຫານຊັ້ນສູງຂອງເຂົາ 2 ຄົນທີ່ຮັບຜິດຊອບຝຶກແອບທະຫານເຮືອ, ຖັດມາກໍ່ໃຊ້ກົນອຸບາຍທຸບຕີຫວງກ້າຍ ທີ່ຈິງຫວງກ້າຍແມ່ນລູກນ້ອງຂອງໂຈ່ວອີ. ຫຼັງຈາກຫວງກ້າຍຖືກຕີແລ້ວ, ກໍ່ເລີ່ມຫຼິ້ນກົນອຸບາຍເຮັດຕາງຕິໄປຍອມຈຳນົນຕໍ່ໂຈໂສ, ຫວງກ້າຍໄດ້ໃຫ້ຄົນສົ່ງຈົດໝາຍໄປໃຫ້ໂຈໂສ, ໃນຈົດໝາຍ ຫວງກ້າຍປ້ອຍດ່າໂຈ່ວອີຢ່າງໃຫຍ່, ແລະກ່າວວ່າຈະຫາໂອກາດມາຍອມຈຳນົນຕໍ່ໂຈໂສ. ໂຈໂສເຊື່ອແດ່ບໍ່ເຊື່ອແດ່, ເລີຍແຕ່ງຈຽງກ້ານ ນັກອຸບາຍຂ້າມຟາກໄປສືບເບິ່ງເລື່ອງລາວຢູ່ເມືອງອູມັນເປັນແນວໃດກັນແທ້.
ເມື່ອໂຈ່ວອີພໍ້ຈຽງກ້ານເທື່ອນີ້ ເຂົາກໍ່ວາງກົນອຸບາຍໜຶ່ງອີກອອກມາ. ກ່ອນອື່ນເຂົາໄດ້ກັກຕົວຈຽງກ້ານໄວ້ໃນຕູບແຫ່ງໜຶ່ງຢູ່ພູຊີ່ຊ່ານ. ຢູ່ມາມື້ໜຶ່ງ, ຈຽງກ້ານຮູ້ສຶກຫງຸດຫງິດ, ເລີຍໄປຍ່າງຫຼິ້ນຕາມທາງພູ, ບັງເອີນໄດ້ຍິນສຽງອ່ານໜັງສືດັງສົ່ງອອກມາຈາກຕູບນ້ອຍແຫ່ງໜຶ່ງ. ຈຽງກ້ານຍ່າງເຂົ້າໄປເບິ່ງເລີຍເຫັນມີຜູ່ຢູ່ເກັບຕົວຜູ່ໜຶ່ງພວມອ່ານຕຳລາວິທະຍາຍຸດ, ເມື່ອໄດ້ລົມກັນແລ້ວຈິ່ງໄດ້ຮູ້ວ່າຜູ່ນີ້ກໍ່ແມ່ນຜາງຖົງທີ່ມີຊື່ສຽງດົ່ງດັງເທົ່າທຽມກັບຂົງເບັ້ງ. ບັດນັ້ນ ຈຽງກ້ານກໍເລີຍຊັກຊວນໃຫ້ຜາງຖົງໄປເຂົ້າເພິ່ງໂຈໂສ, ຜາງຖົງຮັບປາກເຫັນດີນຳ, ແລະພາຈຽງກ້ານໄປຫາແຄມທ່າມິດງຽບ, ຂີ່ເຮືອນ້ອຍລຳໜຶ່ງຄ່ອຍໆພາຍໄປຫາຄ້າຍທະຫານໂຈໂສ.
ໂຈໂສພໍພົບຜາງຖົງ ຮູ້ສຶກດີໃຈຢ່າງໃຫຍ່, ເມື່ອລົມກັບຜາງຖົງແລ້ວໂຈໂສນັບຖືທີ່ສຸດຖືວ່າຜາງຖົງແມ່ນຜູ່ມີຄວາມຮູ້ຫຼາຍ. ພວກເຂົາເຈົ້າໄດ້ໄປກວດເບິ່ງຄ້າຍທະຫານຕ່າງໆ, ແລ້ວໂຈໂສເຊີນໃຫ້ຜາງຖົງສະເໜີຄວາມເຫັນ.
ຜາງຖົງກ່າວວ່າ, ທະຫານພາກເໜືອບໍ່ລື້ງສູ້ລົບເທິງນ້ຳ, ຄັນລົມແຮງ, ເຮືອໂຍກເຍກ ຈັ່ງໃດກໍທົນບໍ່ໄຫວ, ຈະໄປສູ້ກັບໂຈ່ວອີແນວໃດ? ໂຈໂສເລີຍຖາມວ່າ, ທ່ານມີແຜນດີໆແນວໃດບໍ່? ຜາງຖົງຕອບວ່າ, ເພື່ອແກ້ຈຸດອ່ອນຂອງທະຫານພາກເໜືອ, ເປັນຫຍັງຈຶ່ງບໍ່ຜູກເຮືອລົບເຫຼົ່ານີ້ກັນເຂົ້າກັນ, ມັນຈຶ່ງໝັ້ນທ່ຽງບໍ່ໂຍກເຍກ, ປານຢູ່ເທິງບົກ. ໂຈໂສຟັງແລ້ວກໍ່ເຫັນວ່າຈັ່ງແມ່ນຫົວຄິດທີ່ດີ ເໝາະສຳລັບທະຫານພາກເໜືອສູ້ລົບຢູ່ເທິງໜ້ານ້ຳ, ບັດນັ້ນ ເລີຍສັ່ງໃຫ້ຊ່າງຕີເຫຼັກໝົດທຸກຄົນໃນກອງທະຫານຂ້ຽວຕີບ້ວງເຫຼັກທັງເວັນທັງຄືນໃນທັນທີ, ແລ້ວສັ່ງໃຫ້ທະຫານເຮືອໃຊ້ບ້ວງເຫຼັກເກາະເຮືອລົບເຂົ້າຕິດກັນຢ່າງໝັ້ນໆ, 10 ລຳໃດເປັນຈຸໜຶ່ງ, ຢູ່ເທິງເຮືອຍັງປູໄມ້ແປ້ນໃສ່, ເມື່ອເຮັດແນວນີ້ແລ້ວ, ເຮືອກໍ່ທ່ຽງໝັ້ນດີຄືກັບຢູ່ເທິງບົກ, ນາຍແລະພົນທະຫານທັງຫຼາຍຮູ້ສຶກເພິ່ງພໍໃຈທີ່ສຸດ.
ແຕ່ໂຈໂສໃສຊິຮູ້ວ່ານີ້ແມ່ນກົນອຸບາຍໜຶ່ງຂອງໂຈ່ວອີ. ຜາງຖົງກັບໂຈ່ວອີໄດ້ວາງແຜນມາກ່ອນແລ້ວ, ຕັ້ງແກ້ງອອກຫົວຄິດໃຫ້ໂຈໂສມັດເຮືອຕິດເຂົ້າກັນ, ເພື່ອໃຫ້ໂຈ່ວອີໃຊ້ແຜນບຸກດ້ວຍໄຟ. ໃນທີ່ສຸດ, ແຜນບຸກດ້ວຍໄຟຂອງໂຈ່ວອີໄດ້ຮັບຜົນສຳເລັດ, ໃນບັ້ນລົບຊື້ປີ້, ເຮືອລົບຂອງໂຈໂສຖືກເຜົາເກືອບໝົດກ້ຽງ. ກົນຊ້ອນກົນຂອງໂຈ່ວອີເຮັດໃຫ້ກອງທັບຫຼວງຂອງໂຈໂສປະສົບການປະລາໄຊຈົນຍ່ອຍຍັບ.
|
