|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນັດພົບໃນວັນອາທິດ. ໃນລາຍການພາກນີ້, ຂ້າພະເຈົ້າຈະສະເໜີທ່ານຈາງສຽວເຟິງ ນັກແຕ່ງດົນຕີທີ່ມີຊີ່ສຽງຂອງຈີນແລະດົນຕີເສບດ້ວຍຊໍອູ້ຂອງທ່ານປະມວນໜຶ່ງ.
ທີ່ທ່ານພວມຟັງຢູ່ນີ້ແມ່ນດົນຕີເສບດ້ວຍຊໍອູ້ "ລີເກີສິງ" ແປວ່າ "ເດີນຕາມສຽງເພງມ່ວນ" ແຕ່ງໂດຍທ່ານຈາງສຽວເຟິງ. ດົນຕີນີ້ໄດ້ສັນລະເສີນຄຸນສົມບັດອັນສູງສົ່ງຂອງສິລະປິນຄີຕະສິນເພດຍິງຜູ່ໜຶ່ງທີ່ມີນ້ຳໃຈອັນສູງສົ່ງທີ່ມັກສິລະປະແລະມອບກາຍຖະຫວາຍຊີວິດໃຫ້ແກ່ສັງຄົມ.
ທີ່ທ່ານຟັງມານັ້ນແມ່ນດົນຕີເສບດ້ວຍຊໍອູ້ "ລີເກີສິງ" ແຕ່ງໂດຍທ່ານຈາງສຽວເຟິງ.
ທ່ານຈາງສຽວເຟິງເກີດຢູ່ເມືອງທ້າຍຊາງແຂວງຈຽງຊູຂອງຈີນເມື່ອປີ 1931, ຕັ້ງແຕ່ຍາມຍັງນ້ອຍເພິ່ນກໍມັກຟັງສຽງດົນຕີຊື່ຈູທີ່ເສບດ້ວຍເຄື່ອງເປົ່າເຄື່ອງສາຍຢູ່ບ້ານເກີດ, ເວລາອາຍຸ 15 ປີເພິ່ນກໍຮຽນຫຼິ້ນເຄື່ອງດົນຕີຊົນເຜົ່າໄດ້ຫຼາຍຊະນິດ. ປີ 1955, ທ່ານຈາງສຽວເຟິງໄດ້ເປັນນັກດີດຂິມຢູ່ໂຮງລະຄອນຊຽງໄຮ້, ສຽງຂິມຂອງທ່ານໃສແຈ້ງ ແລະປ່ຽມລົ້ນໄປດ້ວຍຄວາມງາມປານແຕ້ມ. ໃນດ້ານເຕັກນິກວິທີເສບ, ເພິ່ນກໍບໍ່ໄດ້ເຮັດຕາມວິທີເກົ່າແບບຕາຍຕົວ, ເພິ່ນກ້າປະດິດຄິດສ້າງ, ເພິ່ນໄດ້ຖອດຖອນເອົາວິທີເສບເຄື່ອງດົນຕີຕ່າງໆຄື ພິນບູຮານແລະກະຈັບປີ່ເປັນຕົ້ນ, ອັນໄດ້ເຮັດໃຫ້ສິລະປະການສະແດງ ອຸດົມສົມບູນຍິ່ງຂຶ້ນ. ເມື່ອຕົ້ນຊຸມປີ 60 ສະຕະວັດທີ່ແລ້ວ, ດົນຕີ "ປ່ຽນຈ້າຍຈື່ເກີ່" ແປວ່າ "ເພງບ້ານຂອກຄວາມ" ເສບດ້ວຍຂິມທີ່ທ່ານແຕ່ງແລະເສບເອງ, ກໍເຄີຍໄດ້ຮັບຄວາມນິຍົມຢ່າງຫຼາກຫຼາຍຢູ່ພາຍໃນປະເທດແລະຕ່າງປະເທດ.
ແຕ່ຊຸມປີ 70 ສະຕະວັດທີ່ແລ້ວເປັນຕົ້ນມາ, ທ່ານຈາງສຽວເຟິງໄດ້ແຕ່ງດົນຕີເສບດ້ວຍເຄ່ືອງດົນຕີຊົນເຜົ່າປະມວນໜຶ່ງດ້ວຍຄວາມຈູບຈ້າວທີ່ສຸດ, ຕົວຢ່າງຄື ດົນຕີ "ຕ້ອນຮັບແຂກ" ເຊິ່ງຄົບຂັນໄປດ້ວຍສຽງສີຕີເປົ່າອັນຟົດຟື້ນທີ່ສຸດ ແລະດົນຕີ "ຜູ່ຂາຍຂອງມາຮອດບ້ານພູດອຍ" ເສບດ້ວຍປີ່ແຕ້ທີ່ມີບັນຍາກາດມ່ວນຊື່ນເປັນຕົ້ນ, ດົນຕີເຫຼົ່ານີ້ເຄີຍນິຍົມກັນຢ່າງກວ້າງຂວາງຢູ່ທຸກບ້ານທຸກຫຼັງເຮືອນ.
ຕໍ່ໄປເຊີນຟັງດົນຕີ "ຢາງກຸ້ຍເຟີຍ" ແປວ່າ "ນາງຢາງສະໜົມເອກ" ເສບສະຫຼັບດ້ວຍຊໍອູ້.
ທີ່ທ່ານພວມຟັງຢູ່ນີ້ແມ່ນຕອນທີໜຶ່ງຂອງດົນຕີເສບສະຫຼັບດ້ວຍຊໍອູ້ "ນາງຢາງສະໜົມເອກ", ດົນຕີນີ້ເຕັມໄປດ້ວຍບັນຍາກາດທີ່ມີຊີວິດຊີວາແລະສົດຊື່ນ, ທຳນອງໄຫຼຄ່ອງຕ້ອງຫູແລະລະບາຍອາລົມ, ອັນໄດ້ວາດພາບນາງຢາງສະໜົມເອກ ຄົນງາມປະຈຳເມືອງ.
ທີ່ຟັງມານັ້ນແມ່ນດົນຕີເສບສະຫຼັບດ້ວຍຊໍອູ້ "ຢາງກຸ້ຍເຟີຍ" ແປວ່າ "ນາງຢາງສະໜົມເອກ" ແຕ່ງໂດຍທ່ານຈາງສຽວເຟິງ.
ບົດດົນຕີຂອງທ່ານຈາງສຽວເຟິງມີໂຄງຄວາມຄຶດອັນໃໝ່ອ່ຽມ ຮູບໂສມສົດໃສ ທຳນອງມ່ວນຈັບໃຈ ມີຊີວິດຊີວາກະຕຸ້ນໃຈຄົນ. ເພິ່ນເຄີຍໄປຈັດງານດົນຕີຢູ່ສິງກະໂປ ຮົງກົງແລະຊຽງໄຮ້ແລະເທື່ອໃດກໍໄດ້ຮັບຜົນສຳເລັດ.
ບົດດົນຕີຂອງທ່ານຈາງສຽວເຟິງໄດ້ຄຳນິງເຖິງທຳນອງອັນຄ່ອງງາມ ແລະສົນໃຈນຳຜູ່ຊົມ. ເວລາສະແດງຢູ່ສິງກະໂປ ຜູ່ຊົມໄດ້ຕີລາຄາວ່າ ຈັ່ງແມ່ນຄືສາຍນ້ຳອັນສົດໃສຂອງດົນຕີພື້ນເມືອງຈີນແທ້ໆ.
ທີ່ທ່ານພວມຟັງຢູ່ນີ້ແມ່ນດົນຕີເສບສະຫຼັບດ້ວຍຊໍອູ້ "ຊີຊືສິງ" ແປວ່າ "ຄວາມຮັກຂອງນາງຊີຊື" ແຕ່ງໂດຍທ່ານຈາງສຽວເຟິງ. ໃນສະໄໝຍຸດທະຈັກຊຸນຊິວເມື່ອ 2000 ກວ່າປີກ່ອນ, ເມືອງເຢະຖືກເມືອງອູຜາບແພ້. ເພື່ອແກ້ແຄ້ນ, ເຈົ້າຊີວິດເມືອງເຢະໄດ້ໃຊ້ອຸບາຍນາງງາມ, ຖວາຍນາງງາມຊີຊືໃຫ້ເຈົ້າຊີວິດເມືອງອູ. ດົນຕີນີ້ໄດ້ໃຊ້ວິທີການສະແດງແບບຫຼິ້ນລີເກ, ວາດພາບນາງຊີຊືອາໄລອາວອນເຖິງບ້ານເກີດແລະຄິດຮອດຄິດເຖິງພໍ່ແມ່ພີ່ນ້ອງໃນຍາມພັດພາກຈາກບ້ານເກີດເມືອງນອນ.
ແຕ່ປີ 2001 ເປັນຕົ້ນມາ, ທ່ານຈາງສຽວເຟິງໄດ້ໄປຈັດງານເສບດົນຕີທີ່ທ່ານປະດິດແຕ່ງຢູ່ສິງກະໂປໃນທຸກປີຕາມຄຳເຊີນ, ງານດົນຕີກໍໄດ້ຮັບຜົນສຳເລັດທຸກເທື່ອ, ແລະໄດ້ເຮັດໃຫ້ດົນຕີຊົນເຜົ່າຂອງຈີນໄດ້ຄວາມນິຍົມຫຼາຍຢູ່ແຫ່ງນັ້ນ.
ຕອນມ້ວນທ້າຍຂອງລາຍການພາກນີ້, ເຊີນຟັງດົນຕີເສບດ້ວຍຊໍອູ້ ທີ່ຊື່ວ່າ "ຫິມະໃນເດືອນ 6" ແຕ່ງໂດຍທ່ານຈາງສຽວເຟິງ.
ດົນຕີນີ້ແມ່ນທ່ານຈາງສຽວເຟິງແຕ່ງຕາມບົດປະພັນທີ່ມີຊື່ສຽງ "ໂຕ້ວເອີຢ່ວນ" ແປວ່າ "ນາງໂຕ້ວເອີຖືກຕູ່ຫາ" ເຊິ່ງແມ່ນກວນຮ້ານຊິງ ນັກແຕ່ງລິເກຈີນແຕ່ງໃນສະຕະວັດທີ 13. ໃນລິເກເລື້ອງນີ້, ນາງໂຕ້ວເອີ ຄົນໃຈບຸນຕົກທຸກໄດ້ຍາກ, ຖືກຄົນອີເລເກນັງຂົ່ມເຫັງເຕັງເຕັກແລະຖືກເຈົ້າຂຸນມູນນາຍຫາເລື້ອງໃສ່ ໃນທີ່ສຸດຈົນເສຍຊີວິດໄປໃນຍາມຍັງໜຸ່ມ. ເມື່ອນາງໂຕ້ວເອີຕາຍແລ້ວ, ມີຫິມະຕົກໃນຍາມເດືອນ 6, ຊຶ່ງເປັນຍາມຮ້ອນທີ່ຢືນຢັນວ່າການຕາຍຂອງນາງໂຕ້ວເອີແມ່ນຄົນຫາເລື້ອງໃສ່. ທ່ານຈາງສຽວເຟິງໄດ້ໃຊ້ທຳນອງອັນໂສກເສົ້າອ້ອຍອິ່ນແລະກະຕຸ້ນໃຈຄົນ, ເຊິ່ງສະແດງໃຫ້ເຫັນແມ່ຍິງຈີນຜູ່ໜຶ່ງມີນ້ຳໃຈຕໍ່ສູ້ຕ້ານຄືນຢ່າງທົນທານໜຽວແໜ້ນ.
ທ່ານຜູ່ຟັງທີ່ໂຄລົບ, ລາຍການນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທີ່ທ່ານຮັບຟັງ, ພົບກັນໃໝ່ໃນອາທິດໜ້າ, ສະບາຍດີ.
|
