|
ນາງຊຸນອ້ຽນຈື່ກັບແຜ່ນCDເພງສ່ວນຕົວແຜ່ນທີ 8 ຂອງນາງ(ສຽງ)
cri
Author: mo
|
ໃນລາຍການມື້ນີ້, ຂ້າພະເຈົ້າຈະແນະນຳນາງຊຸນອ້ຽນຈື່ກັບແຜ່ນCDເພງສ່ວນຕົວແຜ່ນທີ 8 ຂອງນາງຄືStefanie ສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງWodeai ຄວາມຮັກຂອງຂ້ອຍ, ນີ້ແມ່ນເພງຮັກຈັງຫວະຊ້າທີ່ນາງຊຸນອ້ຽນຈື່ຊຳນານກວ່າໝູ່, ທຳນອງອອນຊອນ, ເນື້ອເພງໄດ້ສະແດງຄວາມກ້າຫານຂອງຊາວໜຸ່ມປັດຈຸບັນທີ່ກ້າສະແຫວງຫາຄວາມຮັກແທ້ຈິງ: ຄວາມຮັກຂອງຂ້ອຍຍັງມີຢູ່, ພໍຫັນຕົວກັບຫຼັງຈຶ່ງເຂົ້າໃຈວ່າ, ຄວນໄປຊອກເອົາຄວາມສຸກຄືນມາ, ຫາກບໍ່ແມ່ນຕ່າງຄົນຕ່າງຄຶດຮອດກັນ. ຂ້ອຍຈະຖ້າຢູ່ແຄມທະເລ, ລໍຖ້າໃຫ້ຄື້ນທະເລຂຶ້ນລົງ, ແລ້ວສົ່ງເຈົ້າຄືນມາ.
ນາງຊຸນອ້ຽນຈື່ແມ່ນນັກຮ້ອງສິງກະໂປທີ່ໄດ້ຮັບຄວາມນິຍົມບົນເວທີເພງຈີນໃນຫລາຍປີມານີ້, ຕັ້ງແຕ່ນາງອັດຈຳໜ່າຍແຜ່ນCDສ່ວນຕົວແຜ່ນທຳອິດໃນປີ 2000 ມານີ້, ນາງກໍໄດ້ຮັບຄວາມນິຍົມຫລາຍຂຶ້ນຢ່າງໄວວາ, ແລະນຳເອົາແຜ່ນCDສ່ວນຕົວ 7 ແຜ່ນອອກຈຳໜ່າຍຢ່າງຕໍ່ເນື່ອງກັນພາຍໃນ 3 ປີ, ລ້ວນແຕ່ຂາຍດິບຂາຍດີທີ່ສຸດ. ປີ 2003, ນາງຊຸນອ້ຽນຈື່ໄດ້ຜ່ານສື່ມວນຊົນປະກາດວ່າ, ນາງເມື່ອຍຫລາຍ, ຢາກຂໍລາຈາກເວທີເພງໄປພັກປີໜຶ່ງ. ໃນປີດັ່ງກ່າວ, ນາງຊຸນອ້ຽນຈື່ໄດ້ດຳລົງຊີວິດຢ່າງສະບາຍອົກສະບາຍໃຈ, ນາງຮຽນແຕ້ມຮູບ, ຮຽນປັ້ນດິນເຜົາ, ຮຽນແຕ່ງກິນ, ນອກນີ້ ນາງຍັງໄດ້ໄປທ່ຽວບາງກອກ ໂຕກຽວ ນິວຢວກ ແລະປາລີເປັນຕົ້ນ.
ເດືອນຕຸລາປີ 2004, ນາງຊຸນອ້ຽນຈື່ທີ່ໄດ້ພັກປີໜຶ່ງໄດ້ນຳເອົາແຜ່ນCDໃໝ່ຂອງນາງກັບຄືນເວທີເພງ. ທີ່ທ່ານພວມຟັງຢູ່ນີ້ກໍແມ່ນເພງ Ben ແປວ່າ ແລ່ນ, ເຊິ່ງມີທຳນອງທີ່ນາງຊຸນອ້ຽນຈື່ບໍ່ສູ້ໄດ້ຮ້ອງ. ຕອນທຳອິດມີທຳນອງເສົ້າໝອງເລັກໜ້ອຍ, ບວກກັບເພງຈັງຫວະໄວທີ່ຮ້ອງສະຫຼັບ, ໄດ້ສະແດງໃຫ້ເຫັນຄວາມມັກດິ້ນຮົນໃນໄລຍະໄວຄະນອງ, ຈັງຫວະລອກແອນໂລນທີ່ຮຸນແຮງແລະດົນຕີເອເລັກໂຕຼນິກ, ສຽງທຸ້ມກັບສຽງແຫຼມສັບປ່ຽນກັນຢ່າງຫຼ່ຽນໄຫຼ, ແມ່ນການປ່ຽນແປງເທື່ອໜຶ່ງຂອງນາງ. ຕໍ່ໄປເຊີນຟັງເພງນີ້ນຳກັນ.
ໃນແຜ່ນCDໃໝ່ຂອງນາງຊຸນອ້ຽນຈື່ມີ 11 ເພງ, ແຕ່ລະເພງຕ່າງມີເອກະລັກຕ່າງກັນ, ເພງທີ່ທ່ານຈະໄດ້ຟັງຕໍ່ໄປຄືເພງ Manmanlai ເຮັດໃຈເຢັນໆ ກໍໄດ້ເຊື່ອມໂຍງເຂົ້າໃນທຳນອງແທງໂກ, ຟັງແລ້ວປ່ຽມລົ້ມໄປດ້ວຍທຳນອງຕ່າງປະເທດ.
ເນື້ອເພງຮ້ອງວ່າ: ຖ້າວ່າຮ້ອງໄຫ້ເຮັດໃຫ້ວາດຊົງບໍ່ງາມ, ກໍແໜງວ່າເວົ້າກັນໃຫ້ຮູ້ເລື່ອງໂລດດ້ວຍສະໝອງປອດໂປ່ງ. ຜູ້ທີ່ໜີໄປແລ້ວ ກໍຢ່າໃຫ້ກັບຄືນມາອີກ, ມ້ານໆລາຍ, ເຮັດໃຈເຢັນໆ, ຄອຍຖ້າໃຫ້ທຸກສິ່ງທຸກຢ່າງກາຍເປັນເລື່ອງແນ່ນອນ, ລຶ້ງກັບຄວາມອ້າງວ້າງ, ຮັບເອົາຄວາມອ້າງວ້າງ, ແລະແລະເຊີຍຊົມຄວາມອ້າງວ້າງ.
ໃນCDແຜ່ນນີ້, ນາງຊຸນອ້ຽນຈື່ໄດ້ເຂົ້າຮ່ວມການແຕ່ງເພງເກືອບທຸກເພງ, ນີ້ເວົ້າສຳລັບນາງຊຸນອ້ຽນຈື່ທີ່ເກັ່ງພາສາອັງກິດແຕ່ບໍ່ເກັ່ງພາສາຈີນແລ້ວ, ກໍເປັນເລື່ອງຍາກເລື່ອງໜຶ່ງ, ເຖິງວ່າເພງເຫຼົ່ານີ້, ອາດຈະບໍ່ມີບ່ອນເດັ່ນຫລາຍປານໃດ, ແຕ່ສາມາດເຫັນໄດ້ວ່ານາງໃສ່ໃຈແລະມີຄວາມໃຈຈິງ. ນີ້ກໍສະແດງໃຫ້ເຫັນວ່າ, ຖ້າຢາກກາຍເປັນສິລະປິນດົນຕີຮອບດ້ານ, ນາງຊຸນອ້ຽນຈື່ຍັງຕ້ອງທຳຄວາມພະຍາຍາມຕໍ່ໄປອີກ.
ຕໍ່ໄປເຊີນຟັງເພງFanguolaizouzou ຍ່າງຫຼົບຄືນມາເບີ່ງ ເຊິ່ງຂັບຮ້ອງໂດຍນາງຊຸນອ້ຽນຈື່. ເພງນີ້ແມ່ນເພງທີ່ມີຄວາມເຫັນຕ່າງກັນຫລາຍກວ່າໝູ່ໃນCDແຜ່ນນີ້, ມັນໄດ້ເອົາງິ້ວປັກກິ່ງ ຈັງຫວະລອກແອນໂລນ ແລະຈັງຫວະR&B ທີ່ນິຍົມກັນໃນສະເພາະໜ້ານີ້ເຊື່ອມໂຍງເຂົ້າກັນ, ມີຄົນມັກຫລາຍ, ແຕ່ກໍມີຄົນເວົ້າວ່າແມ່ນເອົາຫລາຍໆຮູບການມາກອງໃສ່ກັນ. ແຕ່ຕົວຈິງມັນເປັນແນວໃດແທ້? ພວກເຮົາຈົ່ງມາລອງຟັງເບິ່ງ.
ສຸດທ້າຍ, ເຊີນຟັງເພງTonglei ປະເພດດຽວກັນ ຂັບຮ້ອງໂດຍນາງຊຸນອ້ຽນຈື່. ນີ້ແມ່ນເພງຮັກທີ່ມີທຳນອງມ່ວນອອນຊອນ, ໄຫຼຫຼ່ຽນດີ, ໄດ້ສະແດງເຖິງຄວາມສຸດວິໄສຂອງຊາວໜຸ່ມທີ່ມີຕໍ່ຄວາມຮັກ.ເນື້ອເພງຮ້ອງວ່າ: ລົມເຊົາແລ້ວກໍພັດມາອີກ, ບັງເອີນ, ຂ້ອຍຄິດເຖິງຜູ້ໃດຜູ້ໜຶ່ງ? ຟ້າແຈ້ງແລ້ວກໍມືດອີກ, ຂ້ອຍຜ່ານໄປຫລາຍປີ. ຈິດໃຈອົບອຸ່ນແລ້ວພັດເຍືອກເຢັນອີກ, ໃນໂລກນີ້ ບາງທີກໍເຫງົາຫລາຍ, ຕ້ອງການຄົນປະເພດດຽວກັນອີກຜູ້ໜຶ່ງ.
|
|
