|
|
 |
| (GMT+08:00)
2005-04-11 15:40:14
|
 |
|
ລະບອບການປົກຄອງຕົນເອງຂອງເຂດຊົນເຜົ່າຈີນແມ່ນຫຍັງ?
cri
Author: huachunmei
ການປົກຄອງຕົນເອງຂອງເຂດຊົນເຜົ່າແມ່ນນະໂຍບາຍພື້ນຖານຂອງພັກກອມມູນິດຈີນທີ່ແກ້ໄຂບັນຫາຊົນເຜົ່າພາຍໃນປະເທດ, ແມ່ນລະບອບການເມືອງພື້ນຖານລາຍໜຶ່ງຂອງຈີນ. ການປົກຄອງຕົນເອງຂອງເຂດຊົນເຜົ່າແມ່ນຢູ່ໃຕ້ການນຳພາເປັນເອກະພາບຂອງລັດ, ໃນເຂດທີ່ບັນດາຊົນເຜົ່າສ່ວນໜ້ອຍຕັ້ງພູມລຳເນົາຢູ່ປະຕິບັດການປົກຄອງຕົນເອງ, ສ້າງຕັ້ງອົງການປົກຄອງຕົນເອງ, ປະຕິບັດສິດປົກຄອງຕົນເອງ. ເຂດປົກຄອງຕົນເອງຂອງບັນດາຊົນເຜົ່າລ້ວນແຕ່ແມ່ນພາກສ່ວນໜຶ່ງຂອງສາທາລະນະລັດປະຊາຊົນຈີນທີ່ຕັດແຍກບໍ່ໄດ້. ບັນດາອົງການປົກຄອງຕົນເອງລ້ວນແຕ່ແມ່ນອຳນາດການເມືອງແຫ່ງຊາດຂັ້ນທ້ອງຖີ່ນທີ່ຢູ່ໃຕ້ການນຳພາເປັນເອກະພາບຂອງລັດ.
ເຂດປົກຄອງຕົນເອງຂອງຊົນເຜົ່າມີຫຼາຍຮູບການດັ່ງລຸ່ມນີ້: ໜຶ່ງແມ່ນເຂດປົກຄອງຕົນເອງທີ່ສ້າງຕັ້ງຂຶ້ນໂດຍຊົນເຜົ່າດຽວ, ຄື, ເຂດຕິເບດປົກຄອງຕົນເອງ; ສອງແມ່ນເຂດປົກຄອງຕົນເອງທີ່ສ້າງຕັ້ງຂຶ້ນໂດຍສອງຊົນເຜົ່າຫຼືສອງຊົນເຜົ່າຂຶ້ນໄປ, ຄື, ກີ່ງແຂວງພາກຕາເວັນຕົກແຂວງຫູໜານເຜົ່າຖູເຈຍແລະເຜົ່າມົ້ງປົກຄອງຕົນເອງ, ເມືອງຟາງເຊີງແລະລອງລີນບັນດາຊົນເຜົ່າປົກຄອງຕົນເອງທີ່ເຂດກວາງຊີ; ສາມແມ່ນສ້າງຕັ້ງກີ່ງແຂວງແລະເມືອງປົກຄອງຕົນເອງຂອງຊົນເຜົ່າອື່ນໃນເຂດປົກຄອງຕົນເອງ, ແລະສ້າງຕັ້ງ ເມືອງປົກຄອງຕົນເອງຂອງຊົນເຜົ່າອື່ນໃນກີ່ງແຂວງປົກຄອງຕົນເອງ, ເຊັ່ນ, ຢູ່ເຂດຊິນຈຽງເຜົ່າວິອູເອີປົກຄອງຕົນເອງ ຍັງມີ 6 ກີ່ງແຂວງປົກຄອງຕົນເອງ ຄື, ກີ່ງແຂວງອີຫຼີເຜົ່າກາຊັກປົກຄອງຕົນເອງເປັນຕົ້ນ, ໃນກີ່ງແຂວງອີຫຼີເຜົ່າກາຊັກປົກຄອງຕົນເອງຍັງມີເມືອງຊາບຸຊາເອີເຜົ່າຊີໂປປົກຄອງຕົນເອງ; ສີ່ແມ່ນຊົນເຜົ່າດຽວນອກຈາກດຳເນີນການປົກຄອງຕົນເອງຢູ່ເຂດບໍລິຫານໜຶ່ງແລ້ວ, ຍັງສາມາດດຳເນີນການປົກຄອງຕົນເອງໃນູເຂດອື່ນໆ, ຄື, ຊົນເຜົ່າມົງໂກນນອກຈາກປະຕິບັດການປົກຄອງຕົນເອງຢູ່ເຂດມົງໂກໃນປົກຄອງຕົນເອງແລ້ວ, ຍັງມີ 3 ກີ່ງແຂວງເຜົ່າມົງໂກນປົກຄອງຕົນເອງແລະ 7 ເມືອງເຜົ່າມົງໂກນປົກຄອງຕົນເອງຢູ່ເຂດຊີນຈຽງ ແຂວງຊີງໄຮ ແຂວງລຽວນີງ ແຂວງເຮີຍລອງຈຽງ ແຂວງຈີລີນແລະແຂວງການຊູເປັນຕົ້ນ.
ເຂດຊົນເຜົ່າປົກຄອງຕົນເອງຈີນແບ່ງເປັນສາມຂັ້ນ: ໜຶ່ງແມ່ນເຂດປົກຄອງຕົນເອງ ເຊິ່ງມີຖານະບໍລິຫານທໍ່ກັບແຂວງ; ສອງແມ່ນກີ່ງແຂວງປົກຄອງຕົນເອງ; ສາມແມ່ນເມືອງປົກຄອງຕົນເອງ. ຈະສ້າງຕັ້ງເຂດປົກຄອງຕົນເອງຫຼືບໍ່ຕ້ອງຄຳນຶງເຖິງປັດໃຈຕ່າງໆ, ເຊັ່ນ, ປະຊາກອນຊົນເຜົ່າ ສະພາບເສດຖະກິດ ການພົວພັນລະຫວ່າງຊົນເຜົ່າ ການເປັນມາທາງປະຫວັດສາດແລະເຂດບໍລິຫານເປັນຕົ້ນ. ປັດຈຸບັນ, ຢູ່ຈີນມີເຂດມົງໂກໃນປົກຄອງຕົນເອງ ເຂດຊິນຈຽງເຜົ່າວິອູເອິປົກຄອງຕົນເອງ ເຂດກວາງຊີເຜົ່າຈ້ວງປົກຄອງຕົນເອງ ເຂດໜີງເຊ້ຍເຜົ່າຮຸ່ຍປົກຄອງຕົນເອງແລະເຂດຕິເບດປົກຄອງຕົນເອງ. ນອກນີ້, ຢູ່ເຂດຊົນເຜົ່າຕ່າງໆ, ເຊັ່ນ, ແຂວງຊີງໄຮ ແຂວງຢຸນນານ ແຂວງກຸ້ຍໂຈວ ແຂວງເຊສວນແລະເຂດພາກຕາເວັນອອກສ່ຽງເໜືອເປັນຕົ້ນຍັງມີ 31 ກີ່ງແຂວງປົກຄອງຕົນເອງແລະ 119 ເມືອງປົກຄອງຕົນເອງ.
|
|
|
