|
|
 |
| (GMT+08:00)
2005-04-11 17:26:19
|
 |
|
ເນື້ອໃນພື້ນຖານຂອງນະໂຍບາຍເສລີພາບໃນການເຊື່ອຖືສາສະໜາຂອງຈີນ
cri
Author: li
1.ພົນລະເມືອງມີເສລີພາບໃນການເຊື່ອຖືສາສະໜາແລະບໍ່ເຊື່ອຖືສາສະໜາ. ພົນລະເມືອງທຸກຄົນມີເສລີພາບໃນການເຊື່ອຖືສາສະໜາ,ທັງມີເສລີພາບບໍ່ເຊື່ອຖືສາສະໜາ; ມີເສລີພາບເຊື່ອຖືສາສະໜານີ້,ແລະກໍມີເສລີພາບເຊື່ອຖືສາສະໜານັ້ນ; ຢູ່ໃນສາສະໜາດຽວ,ມີເສລີພາບເຊື່ອຖືນິກາຍນີ້,ແລະກໍມີເສລີພາບເຊື່ອຖືນິກາຍນັ້ນ; ມີເສລີພາບທີ່ແຕ່ກ່ອນບໍ່ເຊື່ອຖືສາສະໜາແຕ່ດຽວນີ້ເຊື່ອຖືສາສະໜາ,ແລະກໍມີເສລີພາບທີ່ແຕ່ກ່ອນເຊື່ອຖືສາສະໜາແຕ່ດຽວນີ້ບໍ່ເຊື່ອຖືສາສະໜາ. ໂຄລົບແລະປົກປ້ອງເສລີພາບເຊື່ອຖືສາສະໜາ,ແລະກໍປົກປ້ອງເສລີພາບບໍ່ເຊື່ອຖືສາສະໜາ,ນີ້ແມ່ນເນື້ອໃນພື້ນຖານທີ່ສຸດ.
2.ສາສະໜາຕ້ອງເຄື່ອນໄຫວຢູ່ພາຍໃນຂອບເຂດລັດຖະທຳມະນູນ,ກົດໝາຍແລະນະໂຍບາຍ. ໃນຂະນະທີ່ໃຊ້ສິດເສລີພາບໃນການເຊື່ອຖືສາສະໜານັ້ນ ພົນລະເມືອງກໍມີພັນທະໂຄລົບລັດຖະທຳມະນູນແລະກົດໝາຍ.
3.ບັນດາສາສະໜາສະເໝີພາບກັນໝົດ. ສາສະໜາພຸດ,ສາສະໜາເຕົາ,ສາສະໜາອິສລາມ,ສາສະໜາໂລມັງກະໂຕລິກແລະສາສະໜາຄິດຂອງຈີນ ບໍ່ວ່າມີສາສະນິກະຊົນໜ້ອຍຫຼາຍປານໃດ,ມີອິດທິພົນນ້ອຍໃຫຍ່ປານໃດ,ແມ່ນສະເໝີພາບກັນໝົດຢູ່ຕໍ່ໜ້າກົດໝາຍ,ບໍ່ມີສາສະໜາໃດທີ່ຄອງຖານະປົກຄອງ. ລັດຖະບານຖືສາສະໜາເຫຼົ່ານີ້ເທົ່າທຽມກັນໝົດ,ບໍ່ດູໝິ່ນສາສະໜາໃດ.
4.ສາສະໜາກັບອຳນາດການປົກຄອງຂອງລັດແມ່ນແຍກອອກຈາກກັນ. ອີງຕາມຫຼັກການດັ່ງກ່າວ,ບຸກຄົນໃດໆກໍບໍ່ໃຫ້ສວຍໃຊ້ສາສະໜາເຂົ້າແຊກແຊງການບໍລິຫານຂອງລັດ; ບໍ່ໃຫ້ເຂົ້າແຊກຕຸລາການ,ການສຶກສາໃນໂຮງຮຽນແລະການສຶກສາສາທາລະນະໃນສັງຄົມ; ບໍ່ໃຫ້ເຂົ້າແຊກການສົມລົດ,ແລະການຄຸມກຳເນີດເປັນຕົ້ນ.
5.ລັດປົກປ້ອງການເຄື່ອນໄຫວສາສະໜາໃດໆທີ່ດຳເນີນຢ່າງເປັນປົກກະຕິພາຍໃນຂອບເຂດລັດຖະທຳມະນູນ,ກົດໝາຍແລະນະໂຍບາຍ. ການກຳນົດວ່າພົນລະເມືອງມີສິດເສລີໃນການເຊື່ອຖືສາສະໜາ ກໍລວມທັງການຮັບຮອງອົງການຈັດຕັ້ງສາສະໜາທີ່ສາສະໜາຕ່າງໆສ້າງຕັ້ງຂຶ້ນຕາມກົດໝາຍແລະການເຄື່ອນໄຫວສາສະໜາທີ່ປົກກະຕິຂອງສາສະໜາທີ່ກ່ຽວ,ຮັບຮອງສະຖານທີ່ຈັດການເຄື່ອນໄຫວສາສະໜາທີ່ລັດຖະບານອະນຸມັດແລະຂຶ້ນທະບຽນແລ້ວ.
6.ອະເທວະນິຍົມແລະເທວະນິຍົມຕ້ອງໂຄລົບເຊິ່ງກັນແລະກັນ. ບຸກຄົນໃດໆກໍບໍ່ຄວນໄປໂຄສະນາອະເທວະນິຍົມຢູ່ສະຖານທີ່ການເຄື່ອນໄຫວສາສະໜາ,ຫຼືດຳເນີນການໂຕ້ຖຽງກັນກ່ຽວກັບມີເທວະດາຫຼືບໍ່ມີເທວະດາໃນໝູ່ມວນຊົນທີ່ເຊື່ອຖືສາສະໜາ; ອົງການຈັດຕັ້ງສາສະໜາແລະສາສະນິກະຊົນໃດໆກໍບໍ່ຄວນໄປເຜີຍແຜ່ສາສະໜາ,ໂຄສະນາສາສະໜາ,ໂຄສະນາເທວະນິຍົມ,ຫວ່ານໃບໂຄສະນາສາສະໜາແລະປຶ້ມສາສະໜາທີ່ພິມຈຳໜ່າຍໂດຍບໍ່ໄດ້ຜ່ານການອະນຸມັດຈາກພະແນກຄຸ້ມຄອງຂອງລັດຖະບານຢູ່ນອກສະຖານທີ່ເຄື່ອນໄຫວສາສະໜາ.
7.ອົງການຈັດຕັ້ງສາສະໜາແລະວຽກງານສາສະໜາບໍ່ໃຫ້ອິດທິກຳລັງຕ່າງປະເທດຄອບງຳ. ວຽກງານສາສະໜາຂອງຈີນຊາວຈີນເຮັດເອງ,ບໍ່ໃຫ້ອິດທິກຳລັງຕ່າງປະເທດແຊກແຊງແລະຄວບຄຸມ,ທັງນີ້ໄດ້ກາຍເປັນຫຼັກການທີ່ບັນດາສາສະໜາຂອງຈີນພ້ອມກັນປະຕິບັດຕາມ. ອົງການຈັດຕັ້ງສາສະໜາຂອງຈີນລ້ຽງກຸ້ມຕົນເອງ,ປົກຄອງຕົນເອງແລະສືບທອດກັນເອງໂດຍຍຶດໝັ້ນທິດທາງເປັນເອກະລາດຈັດຂຶ້ນເອົາເອງ.
|
|
|
