|
ຕາມຂ່າວCRI: ໃນຫຼາຍມື້ມານີ້, ຜູ່ແທນຂອງປະເທດພວມພັດທະນາໄດ້ປະກອບຄຳຄິດຄຳເຫັນກ່ຽວກັບຫົວຂໍ້ສິດທິດ້ານເສດຖະກິດ ສັງຄົມແລະວັດທະນະທຳໃນກອງປະຊຸມສິດທິມະນຸດສະຫະປະຊາຊາດຄັ້ງທີ 61 ທີ່ຈັດຂຶ້ນຢູ່ທີ່ເຊີແນວ. ພວກທ່ານຊີ້ອອກວ່າ, ສິດທິດ້ານເສດຖະກິດ ສັງຄົມແລະວັດທະນະທຳແມ່ນພື້ນຖານສຳຄັນຂອງສິດທິມະນຸດທຸກລາຍ. ແຕ່ຈົນຮອດປະຈຸບັນ ສິດທິໃນດ້ານນີ້ຍັງບໍ່ທັນໄດ້ຮັບເຫັນດີເປັນສິດທິມະນຸດພື້ນຖານໃນທົ່ວໂລກ. ໃນການບັນລຸສິດທິດ້ານເສດຖະກິດ ສັງຄົມແລະວັດທະນະທຳຢູ່ຫຼາຍໆປະເທດ ໂດຍສະເພາະແມ່ນປະເທດພວມພັດທະນາຍັງຄົງປະສົບສິ່ງກີດຂວາງຫຼາຍ, ປະຊາຄົມໂລກຍັງມີໜ້າທີ່ອັນໜັກໜາໃນດ້ານນີ້.
ໃນຄຳຖະແຫຼງການແລະໂຄງການປະຕິບັດງານວຽນທີ່ກ່ຽວພັນເຖິງສິດທິມະນຸດໄດ້ລະບຸໄວ້ຢ່າງຈະແຈ້ງວ່າ: ສິດທິມະນຸດໝົດທຸກຢ່າງລ້ວນແຕ່ແມ່ນທົ່ວໄປ ຕັດແຍກອອກຈາກນັ້ນບໍ່ໄດ້ ຄົງຕົວຢູ່ໂດຍອາໄສເຊິ່ງກັນແລະກັນ ແລະມີການພົວພັນກັນ. ສິດທິດ້ານເສດຖະກິດ ສັງຄົມແລະວັດທະນະທຳກັບສິດທິດ້ານການເມືອງຂອງພົນລະເມືອງແມ່ນເປັນພື້ນຖານເຊິ່ງກັນແລະກັນ, ຊຸກຍູ້ເຊິ່ງກັນແລະກັນ, ປະອັນໃດກໍ່ບໍ່ໄດ້. ທ່ານໂຣສດີ ຜູ່ແທນເອຢິບແລະທ່ານໂດຼອີເຊ ຜູ່ແທນອານເຊລີຊີ້ອອກວ່າ, ເຖິງວ່າການພົວພັນລະຫວ່າງສິດທິດ້ານເສດຖະກິດ ສັງຄົມແລະວັດທະນະທຳກັບສິດທິດ້ານການເມືອງຂອງພົນລະເມືອງຈະແຈ້ງທີ່ສຸດກໍ່ຕາມ, ແຕ່ໃນເວລາດົນນານມານີ້, ສິດທິດ້ານເສດຖະກິດ ສັງຄົມແລະວັດທະນະທຳໄດ້ຖືກເບິ່ງຂ້າມແລະໝິ່ນປະໝາດໂດຍຕະຫຼອດ. ທ່ານອານໂຊ ຜູ່ແທນອິນໂດເນເຊຍກ່າວເນັ້ນວ່າ, ສິດທິດ້ານເສດຖະກິດ ສັງຄົມແລະວັດທະນະທຳແມ່ນສິດທິມະນຸດພື້ນຖານ, ແມ່ນເງື່ອນໄຂເບື້ອງຕົ້ນໃນການບັນລຸສິດການເມືອງຂອງພົນລະເມືອງ.
ທ່ານປູຣີ ຜູ່ແທນອິນເດຍຊີ້ອອກວ່າ, ມີແຕ່ມີສິດທິດ້ານເສດຖະກິດ ສັງຄົມແລະວັດທະນະທຳແລ້ວ, ມະນຸດຈຶ່ງຈະມີຄວາມກຽດສັກສີພື້ນຖານທີ່ສຸດ.
ທ່ານເຕເຄຼ ຜູ່ແທນເອີລີທຼີຊີ້ອອກວ່າ, ໃນໂລກຊູ່ມື້ນີ້, ຄວາມທຸກຍາກເປັນອຸປະສັກຕົ້ນຕໍທີ່ຂັດກວາງການບັນລຸສິດທິດ້ານເສດຖະກິດ ສັງຄົມແລະວັດທະນະທຳ. ທ່ານເຊ້ຍຈິງເກີ ຜູ່ແທນຈີນເຫັນວ່າ, ເສດຖະກິດຂອງຫຼາຍປະເທດພວມພັດທະນາພວມປະເຊີນໜ້າກັບອັນຕະລາຍທີ່ຖືກປັດປ່າຍ, ປະຊາກອນທຸກຍາກພວມເພີ່ມຂຶ້ນຢ່າງບໍ່ຢຸດຢັ້ງ, ສິ່ງແວດລ້ອມຊີວະພາບຊຸດຮ້າຍລົງຢ່າງສືບເນື່ອງ, ຍອດຈຳນວນໜີ້ສິນຕໍ່ຕ່າງປະເທດເພີ່ມຂຶ້ນຢ່າງບໍ່ຂາດ, ຄວາມສາມາດໃຊ້ໜີ້ພັດຫຼຸດລົງຢ່າງຕໍ່ເນື່ອງ, ສາທາລະນະສຸກແລະເງື່ອນໄຂທີ່ຢູ່ອາໄສຍາກທີ່ຈະປົວແປງໄດ້, ຊີວິດວັດທະນະທຳຂອງປະຊາຊົນຂາດເຂີນຫຼາຍທີ່ສຸດ. ຢູ່ພາຍໃຕ້ສະພາບການດັ່ງກ່າວ, ປະເທດພວມພັດທະນາອັນໄພສານຢາກບັນລຸສິດທິດ້ານເສດຖະກິດ ສັງຄົມແລະວັດທະນະທຳ ແມ່ນເຫຼືອບ່າກວ່າແຮງ.
ກ່ຽວກັບຮູບການບັນລຸສິດທິດ້ານເສດຖະກິດ ສັງຄົມແລະວັດທະນະທຳ, ທ່ານນາງເມໂລໂນ ຜູ່ແທນກຳເມລຸນຊີ້ອອກວ່າ, ຕໍ່ສູ້ກັບຄວາມທຸກຍາກຕ້ອງມີກຳລັງຊັບແລະກຳລັງວັດຖຸເປັນຈຳນວນຫຼວງຫຼາຍ, ນີ້ແຫຼະກໍ່ແມ່ນສິ່ງທີ່ປະເທດພວມພັດທະນາຂາດເຂີນ. ປະເທດພັດທະນາຄວນປ່ຽນຄຳໝັ້ນສັນຍາຂອງພວກເຂົາເຈົ້າເປັນການເຄື່ອນໄຫວຕົວຈິງ, ສ້າງສະພາບແວດລ້ອມທີ່ມີຜົນດີ. ທ່ານເຊ້ຍຈິງເກີ ຜູ່ແທນຈີນຊີ້ເນັ້ນວ່າ, ປີນີ້ແມ່ນປີສ້າງຕັ້ງສະຫະປະຊາຊາດຄົບຮອບ 60 ປີ, ເດືອນກັນຍາປີນີ້, ສະຫະປະຊາຊາດຈະໄຂກອງປະຊຸມສຸດຍອດ ພິຈາລະນາສະພາບປະຕິບັດແລະຜັນຂະຫຍາຍ "ເປົ້າໝາຍສະຫັດສະວັດດ້ານການພັດທະນາ", ຈີນຫວັງໃຫ້ປະຊາຄົມໂລກຖືໂອກາດນີ້, ວາງມາດຕະການໃໝ່ຊຸກຍູ້ປະເທດພວມພັດທະນາໃຫ້ມີການພັດທະນາ ແລະຈັດຕັ້ງປະຕິບັດເປົ້າໝາຍສະຫັດສະວັດດ້ານການພັດທະນາ ເຮັດໃຫ້ທົ່ວໂລກພັດທະນາຢ່າງກ້ຳເກິ່ງກັນ, ແລະຈັດຕັ້ງປະຕິບັດຢ່າງຕິດແທດຕົວຈິງ.
|
