|
|
 |
| (GMT+08:00)
2005-04-13 21:17:48
|
 |
|
ອົງການນິຕິບັນຍັດຈີນໄດ້ເສີມຂະຫຍາຍບົດບາດນັບມື້ນັບສຳຄັນໃນດ້ານປົກປ້ອງສິດທິມະນຸດ
cri
Author: li
ຕາມຂ່າວສານຊິນຮວາ: ໜັງສືປົກຂາວທີ່ພາດຫົວເລື່ອງວ່າ"ການຄືບໜ້າຂອງພາລະກິດສິດທິມະນຸດຈີນປີ 2004"ທີ່ຫ້ອງການຖະແຫຼງຂ່າວຄະນະລັດຖະບານຈີນປະກາດໃນວັນທີ 13 ເມສາຂຽນວ່າ,ສະພາປະຊາຊົນແຫ່ງຊາດພ້ອມດ້ວຍຄະນະປະຈຳສະພາໄດ້ເສີມຂະຫຍາຍບົດບາດນັບມື້ນັບສຳຄັນໃນດ້ານປົກຄອງປະເທດຕາມກົດໝາຍແລະປົກປ້ອງສິດປະຊາທິປະໄຕຂອງປະຊາຊົນ.
ໜັງສືປົກຂາວຂຽນວ່າ,ປີ 2004 ກອງປະຊຸມສະພາຜູ້ແທນປະຊາຊົນແຫ່ງຊາດຈີນຄັ້ງທີ 2 ສະໄໝທີ 10 ໄດ້ຜ່ານຮັບຮອງລັດຖະທຳມະນູນສະບັບດັດແກ້,ໄດ້ເພີ່ມເນື້ອໃນຫຼາຍຢ່າງທີ່ພົວພັນກັບສິດທິມະນຸດ. ໃນໜຶ່ງປີມານີ້ ຄະນະປະຈຳສະພາປະຊາຊົນແຫ່ງຊາດຈີນໄດ້ສຳຫຼວດກົດໝາຍ,ການຕີຄວາມໝາຍກົດໝາຍແລະຮ່າງມະຕິຕົກລົງບັນຫາກ່ຽວກັບກົດໝາຍ 33 ສະບັບ,ໄດ້ຜ່ານຮັບຮອງ 25 ສະບັບ,ອັນໄດ້ໃຫ້ການຄ້ຳປະກັນທາງກົດໝາຍຕື່ມອີກໃຫ້ແກ່ການພັດທະນາເສດຖະກິດສັງຄົມແລະປົກປ້ອງສິດທິມະນຸດ.
ໃນນັ້ນ ກົດໝາຍເລືອກຕັ້ງສະພາປະຊາຊົນແຫ່ງຊາດແລະສະພາປະຊາຊົນທ້ອງຖິ່ນທຸກຂັ້ນທີ່ໄດ້ດັດແກ້ແລ້ວ ໄດ້ບູລະນະລະບອບເລືອກຕັ້ງຕື່ມອີກ,ເຮັດໃຫ້ລະບຽບການເລືອກຕັ້ງເປັນແບບສະບັບ,ໄດ້ເປີດກວ້າງແລະປົກປ້ອງສິດເລືອກຕັ້ງຂອງພົນລະເມືອງ; ການດັດແກ້ກົດໝາຍປ້ອງກັນແລະປົວພະຍາດຕິດແປດໄດ້ເຮັດໃຫ້ເນື້ອໃນປ້ອງກັນແລະເຕືອນໄພພະຍາດຕິດແປດພົ້ນເດັ່ນຂຶ້ນ,ມາດຕະການຄວບຄຸມແລະປິ່ນປົວພະຍາດຕິດແປດໃຫ້ແຂງແຮງຂຶ້ນ,ໄດ້ເພີ່ມທະວີການຮັບປະກັນສິດທິຂອງສັງຄົມ,ພົນລະເມືອງ,ຜູ້ເປັນພະຍາດຕິດແປດ,ຜູ້ຕິດຕົວເຊື້ອໂຣກແລະຜູ້ຖືກສົງໄສເປັນພະຍາດຕິດແປດ; ການຕົກລົງໃໝ່ກ່ຽວກັບການບູລະນະລະບອບຮອງຜູ້ພິພາກສາປະຊາຊົນໄດ້ເພີ່ມຄວາມໂປ່ງໃສຂອງການເຄື່ອນໄຫວຕຸລາການ,ເພີ່ມການຕິດຕາມກວດກາຂອງພົນລະເມືອງຕໍ່ການເຄື່ອນໄຫວຕຸລາການແລະຮັບປະກັນສິດກ່າວຟ້ອງຂອງພົນລະເມືອງ.
ໜັງສືປົກຂາວຊີ້ອອກວ່າ,ສະພາປະຊາຊົນແຫ່ງຊາດແລະຄະນະປະຈຳສະພາຍັງໄດ້ເພີ່ມທະວີການຕິດຕາມກວດກາອົງການບໍລິຫານ,ອົງການຕຸລາການແລະການກວດກາສະພາບປະຕິບັດກົດໝາຍ,ສະໜັບສະໜູນແລະຊຸກຍູ້ໃຫ້ອົງການລັດທີ່ກ່ຽວຂ້ອງປະຕິບັດອຳນາດຕາມກົດໝາຍ,ຮັກສາຜົນປະໂຫຍດຂອງປະຊາຊົນອັນໄພສານ.
ປີ 2004 ຄະນະປະຈຳສະພາປະຊາຊົນແຫ່ງຊາດຈີນໄດ້ກວດກາສະພາບປະຕິບັດກົດໝາຍ 6 ສະບັບເຊັ່ນກົດໝາຍຄຸ້ມຄອງທີ່ດິນ,ກົດໝາຍການສຶກສາພາກບັງຄັບແລະກົດໝາຍກຳມະບານເປັນຕົ້ນ,ໄດ້ຮັບຟັງແລະສຳຫຼວດພິຈາລະນາບົດລາຍງານວຽກງານຫົວຂໍ້ສະເພາະ 11 ຮອບຂອງຄະນະລັດຖະບານ,ສານປະຊາຊົນສູງສຸດແລະອົງການອະທິໄອຍະການປະຊາຊົນສູງສຸດກ່ຽວກັບການສ້າງແລະບູລະນະກົນໄກຊຳລະເຫດການສາທາລະນະສຸກສຸກເສີນ,ແລະສະພາບການສ້າງສານແລະອົງການໄອຍະການຂັ້ນຮາກຖານເປັນຕົ້ນ; ໃນໝົດປີ ຄະນະປະຈຳສະພາປະຊາຊົນແຫ່ງຊາດໄດ້ຕ້ອນຮັບປະຊາຊົນທີ່ໄປຮ້ອງທຸກ 4 ໝື່ນກວ່າເທື່ອຄົນ,ຊຳລະຈົດໝາຍຂອງປະຊາຊົນ 6 ໝື່ນກວ່າສະບັບ,ເຕືອນໃຫ້ພະແນກແລະທ້ອງຖິ່ນທີ່ກ່ຽວຂ້ອງແກ້ໄຂບັນຫາທີ່ປະຊາຊົນສ່ອງແສງຢ່າງຮຸນແຮງຈຳນວນໜຶ່ງ. ໄດ້ຮັບປະກັນສິດອຸທອນ,ກ່າວຟ້ອງແລະລາຍງານຂອງພົນລະເມືອງທີ່ລັດຖະທຳມະນູນກຳນົດ.
ໜັງສືປົກຂາວຂຽນວ່າ,ໃນກອງປະຊຸມສະພາປະຊາຊົນແຫ່ງຊາດຈີນຄັ້ງທີ 3 ສະໄໝີ 10 ທີ່ໄຂຂຶ້ນໃນປີ 2005,ຜູ້ແທນສະພາໄດ້ສະເໜີຍັດຕິ 991 ສະບັບ,ພົວພັນເຖິງບັນຫາສ້າງແລະດັດແກ້ກົດໝາຍໃນດ້ານຄວາມປອດໄພຂອງອາຫານ,ການສຶກສາພາກບັງຄັບ,ການປະກັນສັງຄົມແລະການຄຸ້ມຄອງທີ່ດິນເປັນຕົ້ນ,ເພີ່ມຂຶ້ນຫຼາຍກວ່າກອງປະຊຸມສະພາປະຊາຊົນແຫ່ງຊາດຈີນຄັ້ງທີ 2 ສະໄໝທີ 10 ໃນປີ 2004 54,6%.
|
|
|
