|
ຊົມເຊີຍທ່ານສືບຕໍ່ຮັບຟັງລາຍການເພື່ອນມິດຜູ່ຟັງ,ທ່ານຜູ່ຟັງ,ທ່ານກໍ່ຕ້ອງຮູ້ອາຈານທອງກ່ຳ.ອຸທິດາແລ້ວເນາະ,ອາຈານທອງກ່ຳແມ່ນຜູ່ໄດ້ຮັບລາງວັນພິເສດໃນການຂຽນບົດຄວາມຂ້ອຍກັບຄູຂອງຂ້ອຍທີ່ຈັດໂດຍວິທະຍຸສາກົນແຫ່ງປະເທດຈີນ,ທ່ານໄດ້ຮັບເຊີນໄປທັດສະນະຢ້ຽມຢາມຢູ່ແຂວງຢຸນ ນານຂອງຈີນ,ເມື່ອອາຈານທອງກ່ຳກັບເມືອຮອດເມືອງນ້ຳບາກແຂວງຫລວງພະບາງແລ້ວ,ອາຈານກໍ່ໄດ້ເລົ່າປະສົບການຢູ່ຈີນສູ່ຫມູ່ແລະນັກຮຽນທັງ ຫລາຍຟັງ,ເມື່ອໄດ້ຟັງແລ້ວ, ນັກຮຽນຂອງອາຈານທອງກ່ຳກໍ່ຕິດອົກຕິດໃຈຫລາຍນຳລາຍການຂອງພວກເຮົາ,ມື້ນີ້ ສາຍວັນນີໄດ້ຮັບຈົດຫມາຍຂອງອາຈານທອງກ່ຳແລະນັກຮຽກສິບກວ່າຄົນຂອງອາຈານ,ໃນຈົດຫມາຍຂອງນັກຮຽນເຫລົ່ານີ້ໄດ້ຖາມຄຳຖາມຕ່າງໆນາໆ,ສາຍວັນນີກໍ່ຈະອານຈົດຫມາຍຂອງແຕ່ລະຄົນໃນລາຍການແຕ່ລະອາທິດອາທິດ,ໃຫ້ນັກຮຽນແລະອາຈານທອງກ່ຳທີ່ໄດ້ຂຽນຈົດຫມາຍມາຫາສາຍວັນນີນັ້ນຈົ່ງຕິດຕາມຮັບຟັງເດີ!ນະທີ່ນີ້,ສາຍວັນນີຈະຈັດເພງສາຍໄທດຳຕ່ຳຜ້າໃຫ້ອາຈານທອງກ່ຳພ້ອມຄອບຄົວແລະນັກຮຽນຂອງອາຈານຟັງ,ຂອບໃຈເພື່ອນທັງຫລາຍທີ່ໄດ້ໃຫ້ຄວາມສົນໃຈນຳລາຍການຂອງພວກເຮົາ.
(ປ່ອຍເພງ)
ທ່ານຜູ່ຟັງ, ມື້ນີ້ແມ່ນວັນສຸກວັນທີ 15 ເມສາປີ 2005 ກົງກັບວັນເນົາຂຶ້ນ 6 ຄ່ຳເດືອນຫ້າ,ບິດມື້ນີ້ໄປກໍ່ຈະແມ່ນມື້ສັງຂານຂຶ້ນປີໃຫມ່ປີກະລາ.ທ່ານຜູ່ຟັງ,ທ່ານຮູ້ບໍ່ວ່າ, ນາງແສງແກ້ວ ໂຄສົກວິທະຍຸພວກເຮົາກຳລັງຢ້ຽມຢາມຢູ່ລາວ,ມື້ນີ້ ເພິ່ນໄດ້ໄປທ່ຽວຊົມຢູ່ນະຄອນຫລວງວຽງຈັນ,ຜູ່ທີ່ໄປກັບເພິ່ນນັ້ນກໍ່ມີເພື່ອນຜູ່ຟັງຂອງລາຍການພວກເຮົາ,ເນຶ່ອງໃນໂອກາດປີໃຫມ່ລາວວຽນມາເຖິງນີ້,ຜູ່ຟັງເຫລົ່ານີ້ກໍ່ມີຄຳອວຍພອນທີ່ຢາກເວົ້າຕໍ່ຫມູ່ເພື່ອນແລະຄອບຄົວຂອງຕົນເອງໂດຍຜ່ານວິທະຍຸ,ຕໍ່ໄປ ກໍ່ໃຫ້ພວກເຮົາຟັງວ່າພວກເຂົາເຈົ້າໄດ້ເວົ້າຫຍັງແລ້ວ?
"ຂ້າພະເຈົ້າຊື່ຈອມມະນີ.ລັດຕະນະຄຳ,ຮັບຜິດຊອບວຽກງານພັດທະນາຕົວເມືອງຢູ່ນະຄອນຫລວງວຽງຈັນ,ໃນນາມເປັນຮອງປະທານພັດທະນາຕົວເມືອງ.ດຽວນີ້ ອາກາດຢູ່ວຽງຈັນເຢັນດີ,ໃນໂອກາດປີໃຫມ່ລາວ, ຢູ່ນະຄອນ ຫລວງວຽງຈັນກໍ່ຄືຢູ່ທົ່ວປະເທດຂອງສປປລາວກຳລັງສະເຫລີມສະຫລອງວັນປີໃຫມ່,ປີໃຫມ່ປີນີ້ກໍ່ມີການຫລິ້ນປະເພນີລາວຢ່າງຄຶກຄື້ນມ່ວນຊື່ນ, ປະ ຊາຊົນມີຄວາມເບີກບານມ່ວນຊື່ນ,ສະນັ້ນ ໃນໂອກາດປີໃຫມ່ລາວນີ້, ຂ້າພະເຈົ້າຂໍມອບເພງອວຍພອນປີໃຫມ່,ໃຫ້ຄົນລາວທຸກຄົນຈົ່ງມີແຕ່ຄວາມສຸກ,ຄົນລາວທຸກຄົນຈົ່ງມີແຕ່ຄວາມເບີກບານມ່ວນຊື່ນ."
"ເຮົາແມ່ນຜູ່ອຳນວຍການສູນປະຕູໄຊ,ຊື່ບຸນຍົງ.ລັດສະວົງ,ປີໃຫມ່ລາວຂໍອວຍພອນໃຫ້ຫມົດທຸກຄົນຈົ່ງມີແຕ່ຄວາມຮຸ່ງເຮືອງເຫລືອງເຫລື້ອມ,ມີສຸກຂະພາບແຂງແຮງ."
"ຂ້າພະເຈົ້າຊື່ຄຳພາ.ອຳໄພທິບ,ດຽວນີ້ຢູ່ອຸດົມໄຊ,ຊ່ວງໄລຍະນີ້ກຳລັງແມ່ນກຸດສົງການ,ຢູ່ອຸດົມໄຊກໍ່ບັນຍາກາດຄຶກຄື້ນພໍສົມຄວນ.ມີການສະເຫລີມສະຫລອງປີໃຫມ່,ອອກໄປຫົນທາງກໍ່ມີການຫົດນ້ຳກັນ,ໄລຍະນີ້ແມ່ນໄລຍະສົງນ້ຳພະ,ທຸກຄົນບ່າວໆສາວໆບັນດາຊາວຫນຸ່ມຊາວອຸດົມໄຊກໍ່ພາກັນໄປຫົດນ້ຳ,ໄປສົງນ້ຳພະຢູ່ແຕ່ລະວັດ,ຢູ່ໃນໂອກາດປີໃຫມ່ນີ້, ຂ້າພະເຈົ້າຂໍອວຍພອນໃຫ້ບັນດາທ່ານ,ບັນດາເພື່ອນ,ບັນຫາຊາວຫນຸ່ມ,ບັນດາພໍ່ແມ່ປະຊາຊົນທົ່ວປະເທດລາວກໍ່ຄືຄົນລາວທີ່ຢູ່ຕ່າງປະເທດ,ຂໍໃຫ້ມີຄວາມສຸກຄວາມສົມຫວັງໃນສິ່ງທີ່ປາຖະຫນາ,ໃນໂອກາດປີໃຫ່,ປາຖະຫນາສິ່ງໃດກໍ່ຂໍມາໄດ້ສິ່ງນັ້ນ,ໄດ້ແຕ່ສິ່ງທີ່ດີໆຢູ່ໃນຊີວິດ,ໃຫ້ມີແຕ່ຮອຍຍິ້ມອັນສົດໃສຕະ ຫລາດປີໃຫມ່ແລະຕະຫລອດໄປ.ຢູ່ໃນຕອນທ້າຍ, ຂ້າພະເຈົ້າຂໍຟັງເພງອວຍພອນປີໃຫມ່,ຂໍມອບໃຫ້ສາຍວັນນີ ແສງແກ້ວແລະນາງນ້ອຍທີ່ເປັນຜູ່ຊ່ອຍວຽກ,ນັກຝຶກງານມາຈາກວິທະຍາໄລຫລວງພະບາງທີ່ເຮັດວຽກຊ່ອຍທຸກໆມື້ນີ້.ຂໍອວຍພອນໃຫ້ບັນດາທ່ານຮັບຟັງນຳກັນ, ຈິ່ງມີຄວາມສຸກ."
ນະທີ່ນີ້ ສາຍວັນນີກໍ່ຈະຈັດເພງສຸກສັນວັນປີໃຫມ່ໃຫ້ຜູ່ຟັງທັງຫລາຍ,ຂໍອວຍພອນໃຫ້ທ່ານທັງຫລາຍຈົ່ງສະບາຍດີປີໃຫມ່.
|
