|
ວັນທີ 19 ເມສາ, ໃນກອງປະຊຸມສາກົນກ່ຽວກັບການປ້ອງກັນແລະປິ່ນປົວພະຍາດອາຊີບທີ່ຈັດຂຶ້ນຢູ່ປັກກິ່ງ, ທ່ານຈຽງຈົວຈຸ່ນ ລັດຖະມົນຕີຊ່ອຍວ່າການກະຊວງສາທາລະນະສຸກຈີນກ່າວວ່າ, ໃນຫລາຍປີມານີ້, ລັດຖະບານຈີນໄດ້ບູລະນະກົດໝາຍກົດບັນຍັດໃຫ້ສົມບູນ, ເພີ່ມຄວາມແຮງເຂົ້າໃນການປະຕິບັດກົດໝາຍ, ແລະສ້າງຕັ້ງກອງທຶນປະກັນໄພເປັນຕົ້ນ, ພະຍາຍາມຍົກລະດັບປ້ອງກັນແລະຄວບຄຸມພະຍາດອາຊີບ, ແລະເພີ່ມທະວີການແລກປ່ຽນແລະການຮ່ວມມືກັນລະຫວ່າງຊາດໃນຂົງເຂດທີ່ກ່ຽວຂ້ອງ.
ພະຍາດອາຊີບແມ່ນໝາຍເຖິງຜູ້ອອກແຮງງານເປັນພະຍາດໃນເວລາເຮັດວຽກໄດ້ດູດຂີ້ຝຸ່ນເຂົ້າ, ຖືກມວນສານແຜ່ລັງສີ, ຫຼືຖືກວັດຖຸທີ່ມີພິດຫຼືມີຜົນຮ້າຍອື່ນໆ. ພະຍາດອາຊີບບໍ່ພຽງແຕ່ມີຜົນສະທ້ອນຫຼືເປັນໄພອັນຕະລາຍຕໍ່ສຸຂະພາບແລະຊີວິດຂອງຜູ້ອອກແຮງງານຢ່າງໜັກໜ່ວງທໍ່ນັ້ນ, ທັງເຮັດໃຫ້ເສດຖະກິດປະສົບຄວາມເສຍຫາຍຢ່າງໃຫຍ່ຫລວງ. ທ່ານຈຽງຈົວຈູ່ນ ລັດຖະມົນຕີຊ່ອຍວ່າການກະຊວງສາທາລະນະສຸກຈີນກ່າວວ່າ, ລັດຖະບານຈີນໄດ້ຕັ້ງໜ້າເຮັດວຽກປ້ອງກັນແລະປິ່ນປົວພະຍາດອາຊີບໂດຍຕະຫລອດ. ທ່ານເວົ້າວ່າ:
"ຜູ້ອອກແຮງງານບໍ່ພຽງແຕ່ແມ່ນຜູ້ສ້າງຊັບສົມບັດສັງຄົມທໍ່ນັ້ນ, ກໍຄວນແມ່ນຜູ້ໄດ້ຮັບຜົນປະໂຫຍດຈາກການພັດທະນາເສດຖະກິດສັງຄົມ. ດັ່ງນັ້ນ, ການຮັກສາສຸຂະພາບທັງກາຍແລະໃຈຂອງຜູ້ອອກແຮງງານແມ່ນເນື້ອໃນສຳຄັນທີ່ຮັກສາເສດຖະກິດສັງຄົມມີການພັດທະນາຢ່າງກົມກຽວແລະສືບເນື່ອງ. ລັດຖະບານຈີນເອົາໃຈໃສ່ທີ່ສຸດນຳເລື່ອງນີ້."
ທ່ານຈຽງຈົວຈຸ່ນກ່າວວ່າ, ປະຈຸບັນ, ລະບົບກົດໝາຍກົດບັນຍັດທີ່ປ້ອງກັນແລະປິ່ນປົວພະຍາດອາຊີບເຊິ່ງເອົາ"ກົດໝາຍວ່າດ້ວຍການປ້ອງກັນແລະປິ່ນປົວພະຍາດອາຊີບ"ເປັນແກນກາງນັ້ນໄດ້ຈໍ່ຕົວຂຶ້ນໃນຂັ້ນພື້ນຖານ. ຂະແໜງການສາທາລະນະສຸກ ແລະຂະແໜງການຄຸ້ມຄອງການຜະລິດຢ່າງປອດໄພຂອງຈີນຍັງໄດ້ດຳເນີນການເຄື່ອນໄຫວຮ່ວມກັນປະຕິບັດກົດໝາຍກ່ຽວກັບການປ້ອງກັນແລະປິ່ນປົວພະຍາດອາຊີບ, ຕໍ່ວິສາຫະກິດທີ່ເງື່ອນໄຂເຮັດວຽກບບໍ່ໄດ້ມາດຖານນັ້ນໃຫ້ຢຸດເຊົາຜະລິດ, ຕໍ່ວິສາຫະກິດທີ່ລະເມີດກົດໝາຍກົດບັນຍັດ, ເກີດອຸປະຕິເຫດພະຍາດອາຊີບໜັກໜ່ວງ, ຈະລົງໂທດຕາມກົດໝາຍອາຍາ; ນອກນັ້ນ, ລັດຖະບານຈີນຍັງໄດ້ປະຕິຮູບລະບອບປະກັນໄພຕໍ່ຜູ້ບາດເຈັບໃນໜ້າທີ່ວຽກງານ, ສ້າງຕັ້ງກອງທຶນປະກັນໄພຕໍ່ຜູ້ບາດເຈັບໃນໜ້າທີ່ວຽກງານ, ດຳເນີນການກວດກາສຸຂະພາບເປັນປະຈຳຕໍ່ຜູ້ອອກແຮງງານ, ແລະກວດກາສິ່ງກໍ່ສ້າງປ້ອງກັນແລະປິ່ນປົວພະຍາດອາຊີບເປັນປະຈຳ, ແລະສະໜອງຄ່າໃຊ້ຈ່າຍດ້ານການປິ່ນປົວແລະການປະກັນຊີວິດພື້ນຖານແກ່ຜູ້ເປັນພະຍາດອາຊີບ.
ເພື່ອຍົກລະດັບປ້ອງກັນແລະປິ່ນປົວພະຍາດອາຊີບ,ເພີ່ມທະວີການແລກປ່ຽນແລະການຮ່ວມມືລະຫວ່າງຊາດໃນຂົງເຂດທີ່ກ່ຽວຂ້ອງ,ກອງປະຊຸມສາກົນກ່ຽວກັບພະຍາດລະບົບຫາຍໃຈດ້ານອາຊີບຄັ້ງທີ 10 ໂດຍແມ່ນກະຊວງສາທາລະນະສຸກຈີນແລະອົງການແຮງງານສາກົນຮ່ວມກັນເປັນເຈົ້າພາບນັ້ນໄດ້ຈັດຂຶ້ນຢູ່ປັກກິ່ງໃນວັນທີ 19 ເມສາ. ເຈົ້າໜ້າທີ່ລັດຖະບານແລະນັກວິຊາການທີ່ກ່ຽວຂ້ອງເກືອບ 500 ກວ່າຄົນທີ່ມາຈາກ 47 ປະເທດແລະເຂດແຄວ້ນຈະຫາລືກັນເປັນເວລາ 4 ມື້ກ່ຽວກັບຫົວຂໍ້ຕ່າງໆເຊັ່ນປ້ອງກັນແລະກຳຈັດພະຍາດປອດຂີ້ຝຸ່ນ,ມະເຮັງປອດລັກສະນະອາຊີບແລະນະໂຍບາຍກົດບັນຍັດດ້ານສາທາລະນະສຸກອາຊີບຂອງຈີນເປັນຕົ້ນ. ໃນຄຳປາໄສ,ທ່ານຈຽງໂຈ້ຈູນ ລັດຖະມົນຕີຊ່ອຍວ່າການກະຊວງສາທາລະນະສຸກຈີນກ່າວວ່າ,ຫວັງໃຫ້ເພີ່ມທະວີການຮ່ວມມືລະຫວ່າງຊາດໃນດ້ານປ້ອງກັນແລະປິ່ນປົວພະຍາດອາຊີບ,ຮ່ວມກັນຊົມໃຊ້ໝາກຜົນຄົ້ນຄວ້າວິທະຍາສາດທີ່ກ່ຽວຂ້ອງ,ພ້ອມກັນຊຸກຍູ້ລະດັບສາທາລະນະສຸກອາຊີບຂອງໂລກ.
"ປ້ອງກັນແລະຄວບຄຸມພະຍາດອາຊີບແມ່ນບັນຫາສາທາລະນະສຸກຕົ້ນຕໍອັນໜຶ່ງທີ່ລັດຖະບານບັນດາປະເທດໃນໂລກປະເຊີນ. ຈີນຫວັງໃຫ້ຊຸກຍູ້ການແລກປ່ຽນແລະການຮ່ວມມືກັນລະຫວ່າງຊາດໃນດ້ານຄົ້ນຄວ້າການປ້ອງກັນແລະການຄຸ້ມຄອງພະຍາດອາຊີບ,ປະກອບສ່ວນເພື່ອບັນລຸເປົ້າໝາຍທີ່ວ່າແຕ່ລະຄົນມີອະນາໄມດ້ານອາຊີບ,ກຳຈັດພະຍາດປອດຂີ້ຝຸ່ນທີ່ອົງການອະນາໄມໂລກວາງອອກມາ."
ກ່ອນໜ້ານີ້ ເຈົ້າໜ້າທີ່ກະຊວງສາທາລະນະສຸກຈີນຍັງເຜີຍໃຫ້ຮູ້ວ່າ,ກະຊວງສາທາລະນະສຸກຈະຮ່ວມກັນກັບພາກສ່ວນທີ່ກ່ຽວຂ້ອງວາງແຜນການປ້ອງກັນແລະປິ່ນປົວພະຍາດອາຊີບທົ່ວປະເທດ,ແລະຈັດເຂົ້າໃນແຜນການພັດທະນາເສດຖະກິດສັງຄົມແຫ່ງຊາດ; ພ້ອມກັນນັ້ນ ເພີ່ມຄວາມແຮງຕິດຕາມກວດກາຜົນຮ້າຍຂອງພະຍາດອາຊີບ,ເພີ່ມທະວີການຄຸ້ມຄອງວຽກງານເຕັກນິກສາທາລະນະສຸກອາຊີບແລະວຽກງານສຳຫຼວດອະນຸມັດຄຸນວຸດທິຂອງອົງການບໍລິການທີ່ກ່ຽວຂ້ອງ; ນອກນີ້ ກະຊວງສາທລະນະສຸກຍັງຈະຮ່ວມກັນກັບພາກສ່ວນທີ່ກ່ຽວຂ້ອງຕັ້ງໜ້າສັບຊ້ອນນະໂຍບາຍອຸດສາຫະກຳ,ຄວບຄຸມພະຍາດອາຊີບຈາກແຫຼ່ງກຳເນີດ.
|
