|
CRIລາຍງານວ່າ,ຕອນເຊົ້າວັນທີ20ເມສາ,ທ່ານຫູຈິນທາວປະທານປະເທດຈີນໄດ້ຈາກປັກກິ່ງ,ໄປຢ້ຽມຢາມບຼູໄນ,ອິນໂດເນເຊຍແລະຟີລິບປິນທາງລັດຖະກິດຕາມຄຳເຊີນ,ແລະເຂົ້າຮ່ວມກອງປະຊຸມສຸດຍອດອາຊີອາຟິຼກກາປີ2005ແລະການເຄື່ອນໄຫວລະລຶກວັນຈັດກອງປະຊຸມບັນດຸງຄົບຮອບ50ປີທີ່ຈັດຂຶ້ນຢູ່ອິນໂດເນເຊຍຕາມຄຳເຊີນຂອງທ່ານຊູຊີໂລ ປະທານາທິບໍດີອິນໂດເນເຊຍແລະທ່ານເອັມເບກີປະທານາທິບໍດີອາຟີຼກກາໃຕ້. ເຈົ້າໜ້າທີ່ຊັ້ນສູງຂອງກະຊວງການຕ່າງປະເທດຈີນກ່າວວ່າ,ການຢ້ຽມຢາມຂອງທ່ານຫູຈິນທາວເທື່ອນີ້ຍ່ອມຈະມີຄວາມໝາຍສຳຄັນຕໍ່ການເຮັດໃຫ້ການພົວພັນຈີນອາຊຽນລົງສູ່ລວງເລິກໃນສະຕະວັດໃໝ່,ແລະຕໍ່ການຊຸກຍູ້ການຮ່ວມມືລະຫວ່າງຈີນກັບປະເທດພວມພັດທະນາ.ຕໍ່ໄປເຊີນຟັງບົດແຈ້ງຂ່າວລະອຽດ:
ໃນເວລາສະເໜີຈຸດປະສົງແລະຄວາມໝາຍຂອງການຢ້ຽມຢາມຂອງທ່ານຫູຈິນທາວ,ທ່ານລີຈ້າວຊິງ ລັດຖະມົນຕີການຕ່າງປະເທດຈີນທີ່ຕິດຕາມທ່ານຫູຈິນທາວໄປຢ້ຽມຢາມນັ້ນກ່າວວ່າ:
"ການຢ້ຽມຢາມຂອງທ່ານຫູຈິນທາວເທື່ອນີ້ແມ່ນການເຄື່ອນໄຫວທາງການທູດສຳຄັນເທື່ອໜຶ່ງຂອງຜູ້ນຳສູງສຸດຈີນຕໍ່ປະເທດອາຊຽນໃນປີນີ້,ແລະກໍແມ່ນການເຄື່ອນໄຫວສຳຄັນເທື່ອໜຶ່ງຂອງຈີນບົນເວທີການທູດຫຼາຍຝ່າຍໃນປີນີ້.ການຢ້ຽມຢາມເທື່ອນີ້ມີຄວາມໝາຍສຳຄັນແລະເລິກເຊິ່ງຍາວໄກຕໍ່ການຊຸກຍູ້ການພົວພັນລະຫວ່າງຈີນກັບບຼູໄນ,ອິນໂດເນເຊຍແລະຟີລິບປິນ,ແລະຕໍ່ການຂະຫຍາຍການພົວພັນຈີນອາຊຽນ,ຮັດແໜ້ນການພົວພັນມິດຕະພາບອັນເປັນມູນເຊື້ອລະຫວ່າງຈີນກັບປະເທດອາຊີອາຟິຼກກາ,ຊຸກຍູ້ຄວາມສາມັກຄີແລະການຮ່ວມມືລະຫວ່າງຈີນກັບປະເທດພວມພັດທະນາ."
ຈີນປະຕິບັດທິດທາງການຕ່າງປະເທດຕໍ່ປະເທດອ້ອມຂ້າງຄື ມີໄມຕີຈິດຕໍ່ປະເທດໃກ້ຄຽງ,ຖືປະເທດໃກ້ຄຽງເປັນເພື່ອນ,ແລະນະໂຍບາຍທີ່ເປັນບ້ານໃກ້ເຮືອນຄຽງທີ່ດີຕໍ່ກັນ,ຢູ່ຮ່ວມກັນກັບປະເທດໃກ້ຄຽງຢ່າງສະຫງົບ,ຮັ່ງມີນຳກັນກັບປະເທດໃກ້ຄຽງ.ຈີນກັບປະເທດອາຊີອາຄະເນມີປະຫວັດຍາວນານແຫ່ງການໄປມາຫາສູ່ກັນຢ່າງມີໄມຕີຈິດ.ບຼູໄນ,ອິນໂດເນເຊຍແລະຟີລິບປິນລ້ວນແຕ່ແມ່ນປະເທດອາຊີອາຄະເນ,ທັງເປັນປະເທດສະມາຊິກອາຊຽນ.ຈີນກັບປະເທດອາຊຽນແມ່ນປະເທດພວມພັດທະນາ,ມີຄວາມຄວາມຮັບຮູ້ຄືກັນແລະຜົນປະໂຫຍດຮ່ວມກັນຢ່າງກວ້າງຂວາງໃນຫຼາຍບັນຫາ.ການເພີ່ມທະວີການຮ່ວມມືດ້ວຍໄມຕີຈິດກັບປະເທດອາຊຽນແມ່ນນະໂຍບາຍຂອງລັດຖະບານຈີນທີ່ໄດ້ກຳນົດໄວ້ແລ້ວ.
ເນື້ອໃນສຳຄັນອັນໜຶ່ງໃນການຢ້ຽມຢາມອາຊີອາຄະເນຂອງທ່ານຫູຈິນທາວເທື່ອນີ້ແມ່ນເຂົ້າຮ່ວມກອງປະຊຸມສຸດຍອດອາຊີອາຟິຼກກາປີ2005ແລະການເຄື່ອນໄຫວລະລຶກວັນຈັດກອງປະຊຸມບັນດຸງຄົບຮອບ50ປີ.50ປີກ່ອນ,ຜູ້ແທນ304ທ່ານຂອງ29ປະເທດແລະເຂດແຄວ້ນໃນສອງມະຫາທະວີບຄືອາຊີແລະອາຟິຼກກາໄດ້ຈັດກອງປະຊຸມບັນດຸງທີ່ມີຄວາມໝາຍໄຂສັງກາດໃໝ່ຢູ່ບັນດຸງແຫ່ງອິນໂດເນເຊຍ,ໄດ້ສ້າງພື້ນຖານອັນໝັ້ນແກ່ນໃຫ້ແກ່ການຊຸກຍູ້ການສ້າງຕັ້ງລະບຽບການເມືອງແລະເສດຖະກິດສາກົນໃໝ່ທີ່ທ່ຽງທຳແລະສົມເຫດສົມຜົນ.
ເມື່ອກ່າວເຖິງຈຸດປະສົງຂອງການຈັດກອງປະຊຸມອາຊີອາຟິຼກກາອີກຫຼັງກອງປະຊຸມບັນດຸງ50ປີ.ທ່ານອາຄູສຕິອາ ເອກອັກຄະລັດຖະທູດອິນໂດເນເຊຍປະຈຳຈີນກ່າວວ່າ:
"ຕໍ່ໄປພາຍໜ້າ,ຈະເຊີດຊູຈິດໃຈບັນດຸງໃນທົ່ວໂລກແນວໃດ?ນີ້ຈະຊີ້ຂາດຢູ່ນຳບັນດາປະເທດອາຊີອາຟິຼກກາພວກເຮົາຈະຄຽງບ່າຄຽງໄລ່ກັນປະເຊີນກັບການທ້າທາຍຮ່ວມແນວໃດ?ອິນໂດເນເຊຍແລະລັດຖະບານອາຟິຼກກາໃຕ້ຮ່ວມກັນຈັດກອງປະຊຸມອາຊີອາຟິຼກກາເທື່ອນີ້.ຂ້າພະເຈົ້າຫວັງໃຫ້ປະເທດອາຊີອາຟິຼກກາຮັບຮູ້ວ່າ,ມີແຕ່ສາມັກຄີກັນເຂົ້າເທົ່ານັ້ນຈິ່ງສາມາດບັນລຸຄວາມຈະເລີນຮຸ່ງເຮືອງໄດ້,ແລະປົກປັກຮັກສາຄວາມປອດໄພຂອງໂລກໄດ້."
ຕາມໄດ້ຊາບ,ຫົວຂໍ້ຂອງກອງປະຊຸມເທື່ອນີ້ແມ່ນ"ຟື້ນຟູພະລັງຊີວິດຂອງຈິດໃຈບັນດຸງ,ສຸມກຳລັງເຂົ້າໃນການສ້າງການພົວພັນຄູ່ຂາຍຸດທະສາດອາຊີອາຟິຼກກາແບບໃໝ່."ກອງປະຊຸມຈະເຊັນຄຳຖະແຫຼງການການພົວພັນຄູ່ຂາຍຸດທະສາດອາຊີອາຟິຼກກາແບບໃໝ່,ປະກາດຖະແຫຼງການຮ່ວມຫຼຸດໄພພິບັດຂອງຜູ້ນຳອາຊີອາຟິຼກກາ.
ຈີນແມ່ນປະເທດສຳຄັນທີ່ເຂົ້າຮ່ວມກອງປະຊຸມບັນດຸງເມື່ອປີ1955,ໄດ້ປະກອບສ່ວນອັນສຳຄັນເຂົ້າໃນຜົນສຳເລັດຂອງກອງປະຊຸມ.ທ່ານຖຽງເຈຍສວນ ທີ່ປຶກສາແຫ່ງລັດຈີນກ່າວວ່າ,ໃນໄລຍະ ພັດທະນາໃນປະຫວັດສາດໃໝ່.ຈີນຍິນດີພ້ອມກັນກັບປະເທດອາຊີອາຟິຼກກາສົ່ງເສີມຈິດໃຈບັນດຸງ,ຊຸກຍູ້ການຮ່ວມມືອາຊີອາຟິຼກກາ.ທ່ານກ່າວວ່າ:
"ຈີນຈະຍຶດໝັ້ນເດີນໄປຕາມເສັ້ນທາງສັນຕິພາບແລະການພັດທະນາ.ເປັນເພື່ອນບ້ານໃກ້ຄຽງທີ່ດີ, ເພື່ອນທີ່ດີ,ໝູ່ຄູ່ທີ່ດີຂອງປະເທດອາຊີອາຟິຼກກາຈົນເທົ່າໃດໆ.ການພັດທະນາຂອງຈີນບໍ່ຫ່ອນຈະກີດຂວາງຫຼືຂົ່ມຂູ່ປະເທດອື່ນ,ມີແຕ່ຈະປະກອບສ່ວນຍິ່ງຫຼາຍກວ່າເກົ່າເຂົ້າໃນການປົກປັກຮັກສາສັນຕິພາບຂອງໂລກແລະການຊຸກຍູ້ການພັດທະນາພ້ອມກັນ."
|
