|
|
 |
| (GMT+08:00)
2005-04-22 21:34:15
|
 |
|
ໂມງຊີວະຊາດສາມາດເກີດຜົນສະທ້ອນການປິ່ນປົວມະເຮັງ
cri
Author: li
 ເປັນເວລາດົນນານມາແລ້ວທີ່ຜູ້ຊ່ຽວຊານຊີ້ນປົ່ງເຫັນວ່າ,ການປິ່ນປົວມະເຮັງໃນເວລາໃດໜຶ່ງໃນມື້ໜຶ່ງຈະໄດ້ຜົນດີກວ່າໃນເວລາທຳມະດາ. ແຕ່ຍ້ອນວ່າບໍ່ເຂົ້າໃຈຫຼັກມູນຂອງມັນ,ບັນດານັກວິທະຍາສາດຊີ້ນປົ່ງຈຶ່ງບໍ່ສາມາດເຮັດໃຫ້ຄວາມຄຶດດັ່ງກ່າວການເປັນການກະທຳຕົວຈິງ. ຫວ່າງມໍ່ໆນີ້ ໜ່ວຍຄົ້ນຄວ້າຂອງອາເມລິກາໄດ້ຊອກເຫັນກົນໄກໂມເລກຸນຊະນິດໜຶ່ງທີ່ສາມາດອະທິບາຍວ່າເປັນຫຍັງຮ່າງກາຍຂອງຄົນເຮົາຈຶ່ງມີຄວາມສະດຸ້ງຊ້າໄວຕ່າງກັນຕໍ່ຢາປົວມະເຮັງໃນເວລາທີ່ຕ່າງກັນ.
ຢູ່ໃນໂລກນີ້,ການເຄື່ອນໄຫວຂອງຊີວິດຊີວະຊາດຕ່າງໆລ້ວນແຕ່ມີຈັງຫວະເວລາຄືກັບມີໂມງຄວບຄຸມ,ປະກົດການນີ້ຖືກເອີ້ນວ່າ"ໂມງຊີວະຊາດ". ໃນວົງຈອນທຳມະຊາດ,ມີປະກົດການໂມງຊີວະຊາດທີ່ເປັນໜ້າສົນໃຈ. ຕົວຢ່າງຄືຢູ່ກົວເຕມາລາຂອງທະວີບອາເມລິກາໃຕ້,ມີນົກຊະນິດໜຶ່ງ,ບາ 30 ນາທີມັນກໍຈະຮ້ອງຄາວໜຶ່ງ,ຜິດດ່ຽງກັນພຽງແຕ່ 15 ວິນາທີທໍ່ນັ້ນ,ສະນັ້ນ ຄົນໃນແຫ່ງນັ້ນຈຶ່ງຄຳນວນເວລາອີງຕາມສຽງຮ້ອງຂອງນົກຊະນິດນີ້; ໃນປ່າໄມ້ທີ່ຕຶບໜາຂອງອາຟິຼກາ,ມີແມງໄມ້ແຈ້ງເວລາຊະນິດໜຶ່ງ,ບາຊົ່ວໂມງໜຶ່ງ,ມັນຈະປ່ຽນສີໜຶ່ງ,ຄົນທັງຫຼາຍທີ່ດຳລົງຊີວິດຢູ່ຫັ້ນ ກໍອີງຕາມການປ່ຽນສີຂອງແມງໄມ້ຊະນິດນີ້ມາຄິດໄລ່ເວລາ. ນອກຈາກສັດແລະພືດໃນວົງຈອນທຳມະຊາດແລ້ວ,ການເຄື່ອນໄຫວຂອງມະນຸດກໍຖືກໂມງຊີວະຊາດຄອບຫງຳຄືກັນ.
ໂມງຊີວະຊາດເສີມຂະຫຍາຍບົດບາດຢູ່ໃນສະໝອງ,ປອດ,ຕັບ,ໝາກຫົວໃຈ,ກະດູກແລະກ້າມເນື້ອ,24 ຊົ່ວໂມງເປັນຮອບໜຶ່ງທາງຊະລີລະສາດ,ຄວບຄຸມການນອນ,ການຕື່ນ,ພັກຜ່ອນແລະການເຄື່ອນໄຫວຂອງຄົນ. ພ້ອມກັນນັ້ນ ມັນຍັງມີການພົວພັນກັບອຸນຫະພູມຮ່າງກາຍ,ໃຈເຕັ້ນ,ການຫາຍໃຈເອົາອອກຊີແຊນ ແລະການຂັບຫຼັ່ງພາຍໃນເປັນຕົ້ນ.
ຫວ່າງມໍ່ໆນີ້ ເວບໄຊ້ຂອງສະຖາບັນຄົ້ນຄວ້າແພດສາດໂຮເວີດ ຮິວສ໌ອາເມລິກາລາຍງານວ່າ,ຫວ່າງມໍ່ໆນີ້ ໜ່ວຍຄົ້ນຄວ້າດັ່ງກ່າວໄດ້ປະກາດຜົນການຄົ້ນຄວ້າຂອງພວກເຂົາເຈົ້າ. ທ່ານໂຢເຊັຟສະມາຊິກຜູ້ໜຶ່ງຂອງໜ່ວຍຄົ້ນຄວ້າມະຫາວິທະຍາໄລນອດເວັສທ໌ອາເມລິກາກ່າວວ່າ,"ພວກຂ້າພະເຈົ້າສົນໃຈນຳບັນຫານີ້ຫຼາຍ,ເພາະວ່າໃນເວລາດົນນານມານີ້ ພວກຂ້າພະເຈົ້າກໍເຫັນວ່າການປິ່ນປົວໃຫ້ຜູ້ເປັນມະເຮັງໃນເວລາຕ່າງກັນໃນມື້ໜຶ່ງຈະໄດ້ຮັບຜົນທີ່ຕ່າງກັນ."
ຜູ້ຄົ້ນຄວ້າໄດ້ດຳເນີນການທົດລອງກັບໂຕໜູ. ພວກເພີ່ນປະກົດເຫັນວ່າ,ໂມງຊີວະຊາດພາຍໃນຮ່າງກາຍຂອງຊີວະຊາດມີຜົນສະທ້ອນຕໍ່ຄວາມຢູ່ລອດຂອງຈຸລັງຕ້ານທານຊະນິດໜຶ່ງທີ່ແນໃສ່ຢາປົວມະເຮັງ.
ທຳອິດ,ຜູ້ຄົ້ນຄວ້າໄດ້ເອົາໜູປົກກະຕິມາທົດລອງ. ເມື່ອຄົ້ນຄວ້າແລ້ວເຫັນວ່າ, ໜູທີ່ຮັບການປິ່ນປົວມະເຮັງໃນຕອນເຊົ້າເມື່ອທຽບກັບໜູທີ່ຮັບການປິ່ນປົວໃນຕອນບ່າຍແລ້ວ,ອັດຕາຢູ່ລອດຂອງໜູທີ່ປົວໃນຕອນເຊົ້າຈະຕ່ຳກວ່າໜູທີ່ປົວໃນຕອນບ່າຍ. ເພື່ອຢາກຮູ້ຫຼັກມູນຂອງມັນ,ນັກວິທະຍາສາດໄດ້ລົງເລິກຄົ້ນຄວ້າທົດລອງ. ທ່ານນາງມາລີນາ ສະມາຊິກຜູ້ໜຶ່ງຂອງໜ່ວຍຄົ້ນຄວ້າທີ່ສັງກັດສະຖາບັນຄົ້ນຄວ້າແພດສາດຄຼິຟແລນ ພ້ອມດ້ວຍຜູ້ຮ່ວມງານຂອງນາງໄດ້ໃຊ້ໜູທີ່ມີຂໍ້ບົກພ່ອງໃນດ້ານແຊນໂມງຊີວະຊາດມາທົດລອງ.
ໃນການຄົ້ນຄວ້າໄດ້ປະກົດເຫັນວ່າ,ເມື່ອແຊນໂມງໃນຮ່າງກາຍໜູປ່ຽນແປງກະທັນຫັນແລະແຊນBMA11ຖືກທຳລາຍແລ້ວ,ບໍ່ວ່າໃນຕອນເຊົ້າຫຼືວ່າໃນຕອນກາງຄືນ,ໜູເຫຼົ່ານີ້ລ້ວນແຕ່ມີຄວາມສະດຸ້ງໄວຫຼາຍຕໍ່ຢາປົວມະເຮັງ. ກົງກັນຂ້າມ,ເມື່ອທຽບກັບໜູທີ່ແຊນປົກກະຕິ,ຖ້າແຊນCRYຂອງໜູຈຳນວນໜຶ່ງຖືກທຳລາຍແລ້ວ,ເວລາໃດໆໃນໝົດມື້,ພວກມັນກໍໄດ້ສະແດງໃຫ້ເຫັນການສະດຸ້ງທີ່ຮຸນແຮງຕໍ່ຢາປົວມະເຮັງ.
ການຄົ້ນພົບດັ່ງກ່າວຂອງຜູ້ຄົ້ນຄວ້າມີຄວາມໝາຍສຳຄັນທີ່ສຸດຕໍ່ການປິ່ນປົວພະຍາດ,ຈົນຂະຫຍາຍເອົາໄປໃຊ້ຮອດຂົງເຂດປົວດ້ວຍຢາຕ້ານມະເຮັງອື່ນໆແລະການສ່ອງລັງສີ,ພ້ອມກັນນັ້ນ ຍັງສາມາດສະໜອງຫຼັກມູນພື້ນຖານຂອງການສັບຊ້ອນເວລາປິ່ນປົວດ້ວຍວິທີເຄມີແກ່ຄົນເຮົາ,ເພື່ອຫຼຸດບົດບາດທາງລົບຂອງວິທີປິ່ນປົວດັ່ງກ່າວໃຫ້ເບົາລົງ. ປັດຈຸບັນ,ບັນດານັກວິທະຍາສາດພວມສຸມກຳລັງຄົ້ນຄວ້າກົນໄກຈັງຫວະຊະລີລະສາດສົ່ງສັນຍານໂມເລກຸນໃຫ້ລະບົບພູມຕ້ານທານແນວໃດ.
|
|
|
