|
ທ່ານຜູ່ຟັງທີ່ໂຄລົບ, ຄຽງຄູ່ກັບເສດຖະກິດແລະສັງຄົມຂອງຈີນໄດ້ນັບມື້ນັບພັດທະນາ, ຄົນທັງຫຼາຍເອົາໃຈໃສ່ນຳງານແຂ່ງຂັນກິລາລະດັບໂລກປະເພດຕ່າງໆກໍ່ນັບມື້ນັບຫຼາຍ. ຄົນຈີນບໍ່ພຽງແຕ່ໄດ້ເຊີນງານແຂ່ງຂັນລະດັບສຸດຍອດເຊັ່ນ NBA ແລະງານແຂ່ງຂັນລົດສູດໜຶ່ງຊິງຊະນະເລີດໂລກຫຼື F1 ມາຈັດຢູ່ຈີນທໍ່ນັ້ນ, ທັງຍັງມີຄວາມສາມາດໄປຕ່າງປະເທດເຂົ້າຮ່ວມການແຂ່ງຂັນກິລາທີ່ເສຍຄ່າໃຊ້ຈ່າຍຫຼາຍເຊິ່ງແຕ່ກ່ອນຖືກຖືວ່າມີແຕ່ປະເທດຝ່າຍຕາເວັນຕົກທໍ່ນັ້ນຈຶ່ງມັກເຂົ້າຮ່ວມ. ໃນລາຍການພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ເຮືອໃບຈີນກ້າວໄປສູ່ງານແຂ່ງຂັນເຮືອໃບຊິງຂັນທະວີບອາເມລິກາ.
ງານແຂ່ງຂັນເຮືອໃບຊິງຂັນທະວີບອາເມລິກາເລີ່ມຈັດຂຶ້ນເມື່ອປີ 1851, ແມ່ນງານແຂ່ງຂັນລະດັບສູງສຸດໃນວົງການແຂ່ງຂັນເຮືອໃບ. ມັນຖືກເອີ້ນເປັນ "ງານແຂ່ງຂັນສຳຄັນສາມປະເພດໃນໂລກ" ພ້ອມກັນກັບງານແຂ່ງຂັນບານເຕະຊິງຂັນໂລກ ງານແຂ່ງຂັນເທັນນິສຊິງຂັນເດວິສ, ແມ່ນໜຶ່ງໃນງານແຂ່ງຂັນກິລາທີ່ນິຍົມກວ່າໝູ່ຢູ່ເອີລົບແລະທະວີບອາເມລິກາ. ງານແຂ່ງຂັນເຮືອໃບຊິງຂັນທະວີບອາເມລິກາຄັ້ງທີ 32 ຈະຈັດຂຶ້ນຢູ່ວາລັງເຊີ ເມືອງທ່າແຫ່ງແອສປາຍໃນປີ 2007, ໃນເວລານັ້ນ, ໃນງານແຂ່ງຂັນກິລາລະດັບໂລກທີ່ມີຊື່ລືນາມໄປທົ່ວໂລກນັ້ນ, ຈະໄດ້ເຫັນຄົນຈີນເປັນຄັ້ງທຳອິດ.
ຄົນຈີນທີ່ຄິດຢາກເຂົ້າຮ່ວມງານແຂ່ງຂັນເຮືອໃບຊິງຂັນທະວີບອາເມລິການັ້ນ ຊື່ວ່າທ່ານວາງເສົາຢົງ ທ່ານແມ່ນນັກລົງທຶນປັກກິ່ງ, ທ່ານກັບບໍລິສັດຄຸ້ມຄອງກິລາແຫ່ງໜຶ່ງຂອງຝຣັ່ງລົງທຶນຮ່ວມກັນ 32 ລ້ານເອີໂລ, ສ້າງທີມເຮືອໃບທີມໜຶ່ງແລະໃສ່ຊື່ໃຫ້ວ່າ "ທີມແຫ່ງຈີນ", ທີມເຮືອໃບນີ້ຈະເຂົ້າຮ່ວມງານແຂ່ງຂັນເຮືອໃບຊິງຂັນທະວີບອາເມລິກາໃນປີ 2007. ທ່ານວາງເສົາຢົງສະເໜີວ່າ, ໃນຊຸມປີ 80 ສະຕະວັດທີ່ແລ້ວ ຕົນເອງເຮັດວຽກຢູ່ວອນສະຕຼິດອາເມລິກາ, ບໍລິສັດຈັດຕັ້ງພະນັກງານໄປຝຶກແອບທາງຈິດໃຈເປັນໝູ່ຄະນະ, ໄດ້ສຳຜັດກັບກິລາເຮືອໃບຄັ້ງທຳອິດ, ແລະກໍ່ມັກກິລານີ້ໃນທັນທີ. ພາຍຫຼັງມາໄດ້ກັບມາສ້າງຕັ້ງບໍລິສັດຢູ່ຈີນ, ທ່ານບໍ່ໄດ້ສຳຜັດກັບການແຂ່ງຂັນເຮືອໃບອີກແລ້ວ, ແຕ່ກໍ່ບໍ່ໄດ້ລືມກິລານີ້ຈັກເທື່ອ. ປີກາຍນີ້, ໂອກາດບັງເອີນເທື່ອໜຶ່ງ, ທ່ານໄດ້ເຂົ້າຮ່ວມງານແຂ່ງຂັນເຮືອໃບຊິງຂັນທະວີບອາເມລິການັດມາກໄຊແຫ່ງຝຣັ່ງ, ແລະໄດ້ຮູ້ຈັກກັບບໍລິສັດຄຸ້ມຄອງກິລາ "ເລີເດຟີ" ຜູ່ຄອງທີມເຮືອ "ເບີເລີເດຟີ" ຝຣັ່ງ, ເມື່ອສອງຝ່າຍໄດ້ຫາລືກັນແລ້ວ, ໄດ້ກ້າວເຖິງຂັ້ນຕົກລົງກັນຮ່ວມມືສ້າງທີມເຮືອ. ເມື່ອເວົ້າເຖິງຄວາມໝາຍຂອງການເຂົ້າຮ່ວມງານແຂ່ງຂັນຊິງຂັນທະວີບອາເມລິການັ້ນ, ທ່ານວາງເສົາຢົງເວົ້າວ່າ:
ງານແຂ່ງຂັນເຮືອໃບຊິງຂັນທະວີບອາເມລິກາມີຄວາມໝາຍສ້າງມານະຈິດທີ່ເລິກເຊິ່ງ, ສາມາດກະຕຸກໃຫ້ທີມເຮືອທີ່ເຂົ້າຮ່ວມການແຂ່ງຂັນມີຄວາມພາກພູມໃຈຕໍ່ຊາດຕົນ. ງານແຂ່ງຂັນລາຍນີ້ມີລັກສະນະທ້າທາຍຢ່າງມະຫາສານ, ທັງເປັນຕົວແທນແຫ່ງຈິດໃຈຮັບມືກັບການທ້າທາຍໃໝ່. ເວົ້າສຳລັບນັກທຸລະກິດຄືພວກຂ້າພະເຈົ້ານີ້ແລ້ວ, ພວກຂ້າພະເຈົ້າບໍ່ຢ້ານການທ້າທາຍຈັກເມັດ, ເພາະວ່າທັງນີ້ມີບົດບາດໃຫຍ່ຫຼວງຕໍ່ການປຸກລະດົມພະນັກງານບໍລິສັດສ້າງກາໝາຍສິນຄ້າທີ່ຊື່ດັງ.
ທ່ານວາງເສົາຢົງບັນລຸຄວາມປາຖະໜາສ້າງຕັ້ງ "ທີມແຫ່ງຈີນ" ຂຶ້ນໄດ້, ນອກຈາກມີຄວາມຮັບປະກັນດ້ານເງິນທຶນກ້ອນໃຫຍ່ແລ້ວ, ຍັງແຍກອອກຈາກຜູ່ຮ່ວມມືຕ່າງປະເທດໃຫ້ການສະໜັບສະໜູນດ້ານເຕັກນິກແລະບຸກຄະລາກອນບໍ່ໄດ້. ເນື່ອງຈາກວ່າກິລາເຮືອໃບຢູ່ຈີນຍັງແມ່ນກິລາລາຍໜຶ່ງທີ່ຄົນຮູ້ບໍ່ຫຼາຍ, ພາຍໃນປະເທດເກືອບບໍ່ມີບົດຮຽນຈັກເມັດໃນການຕໍ່ເຮືອໃບຂະໜາດໃຫຍ່ທີ່ໃຊ້ໃນການແຂ່ງຂັນກິລາ. ແຕ່ເມື່ອສັງເກດຈາກວົງການແຂ່ງຂັນເຮືອໃບສາກົນແລ້ວ, ໄດ້ເຫັນວ່າຈີນແມ່ນຕະຫຼາດບົ່ມຊ້ອນອັນມະຫາສານ, ພວກເຂົາເຈົ້າຫວັງຖອດຖອນເອົາບົດຮຽນຂອງງານແຂ່ງຂັນລົດສູດໜຶ່ງຊິງຊະນະເລີດໂລກທີ່ຈັດຂຶ້ນຢູ່ຈີນຢ່າງສຳເລັດຜົນ, ຜ່ານການຮ່ວມມືລະຫວ່າງຊາດ, ເຮັດໃຫ້ຄົນຈີນຮັບຮູ້ແລະມັກກິລາເຮືອໃບເປັນກ້າວໆ. ຄະນະກຳມະການຄຸ້ມຄອງງານແຂ່ງຂັນເຮືອໃບຊິງຂັນທະວີບອາເມລິກາໄດ້ກ່າວຢ່າງຈະແຈ້ງຫຼາຍເທື່ອແລ້ວວ່າ, ຫວັງໃຫ້ມີທີມເຮືອໃບຈີນມາເຂົ້າຮ່ວມການແຂ່ງຂັນ, ພໍດີມີ "ທີມແຫ່ງຈີນ" ທີ່ທ່ານວາງເສົາຢົງກັບທີມເຮືອໃບ "ເບີເລີເດຟີ" ຝຣັ່ງຮ່ວມມືສ້າງຕັ້ງນັ້ນຕາມບ່ອນຫວ່າງ. ໃນເວລາເວົ້າເຖິງຄວາມປາຖະໜາຂອງພວກທ່ານຮ່ວມມືກັບທ່ານວາງເສົາຢົງ, ທ່ານນີໂກລາ ອາຊັກເກີ ຜູ່ຕາງໜ້າບໍລິສັດຄຸ້ມຄອງກິລາ "ເລີເດຟີ" ຝຣັ່ງເວົ້າວ່າ:
ຝ່າຍຕາເວັນຕົກສັງເກດເຫັນວ່າ, ບໍ່ວ່າໃນດ້ານເສດຖະກິດຫຼືວ່າໃນດ້ານກິລາ, ຈີນໄດ້ມີການພັດທະນາຢ່າງວ່ອງໄວ. ພວກຂ້າພະເຈົ້າເຫັນໄດ້ໃນການບົ່ງບອກຈາກງານແຂ່ງຂັນລົດສູດໜຶ່ງຊິງຊະນະເລີດໂລກ ເທັນນິສແລະບານບ້ວງທີ່ໄດ້ຮັບຜົນສຳເລັດຢູ່ຈີນ, ແລ້ວເລີ່ມຄິດຫາມີກິລາໃໝ່ໃດແດ່ທີ່ດຶງດູດຄົນຈີນໄດ້. ພວກຂ້າພະເຈົ້າຫວັງວ່າກິລາເຮືອໃບນີ້ຈະໄດ້ຮັບຄວາມນິຍົມຈາກຄົນຈີນ.
ເມືອງຊິງຕາວ ເມືອງທ່າຂອງຈີນຖືກຄັດເລືອກເປັນບ່ອນຕໍ່ເຮືອໃບຂອງ "ທີມແຫ່ງຈີນ", ເມືອງຊິງຕາວມີສິ່ງກໍ່ສ້າງທ່າກຳປັ່ນທີ່ດີ, ແມ່ນບ່ອນຈັດການແຂ່ງຂັນເຮືອໃບຂອງງານກິລາໂອລິມປິກປັກກິ່ງປີ 2008. ຄະນະກຳມະການຄຸ້ມຄອງງານແຂ່ງຂັນຊິງຂັນທະວີບອາເມລິກາພວມປຶກສາຫາລືກັບເມືອງຊິງຕາວ, ຫວັງໃຫ້ເມືອງຊິງຕາວຈັດງານແຂ່ງຂັນເຮືອໃບຊິງຂັນທະວີບອາເມລິການັດໜຶ່ງໃນປີ 2006, ຖ້າງານແຂ່ງຂັນເຮືອໃບຊິງຂັນທະວີບອາເມລິກາສາຂາຊິງຕາວຈັດຂຶ້ນໄດ້, "ທີມແຫ່ງຈີນ" ທີ່ເປັນເຈົ້າພາບຈະໄດ້ປະໂຫຍດຫຼາຍ. ຍ້ອນວ່າໄດ້ທ້ອນໂຮມບົດຮຽນໃຫ້ແກ່ການຈັດງານກິລາໂອລິມປິກປີ 2008.
ຝ່າຍຝຣັ່ງແລະທ່ານວາງເສົາຢົງລ້ວນແຕ່ກ່າວວ່າ, ເປົ້າໝາຍຂອງ "ທີມແຫ່ງຈີນ" ແມ່ນສ້າງເປັນທີມເຮືອໃບຂະໜາດກາງຢ່າງສຳເລັດຜົນ, ພະຍາຍາມຊິງໄດ້ຜົນງານລະດັບຜ້ານກາງຂຶ້ນໄປໃນງານແຂ່ງຂັນຊິງຂັນທະວີບອາເມລິກາປີ 2007. ເນື່ອງຈາກ "ທີມແຫ່ງຈີນ" ເຂົ້າຮ່ວມງານແຂ່ງຂັນຊິງຂັນທະວີບອາເມລິກາເປັນຄັ້ງທຳອິດ, ສະນັ້ນຢາກຊິງໄດ້ຜົນງານດີເດັ່ນຈະເປັນເລື່ອງຍາກ. ແຕ່ທີມເຮືອຈະພະຍາຍາມຍາດແຍ່ງໃຫ້ມີການສະແດງທີ່ດີ, ຊຸກຍູ້ໃຫ້ມວນຊົນຈີນມີຄວາມນິຍົມຊົມຊອບຕໍ່ທີມເຮືອແລະກິລາເຮືອໃບ, ຍາດແຍ່ງໃຫ້ມີການເຜີຍແຜ່ກິລາເຮືອໃບໄປທົ່ວເຖິງກັນຢູ່ຈີນເປັນກ້າວໆ. ທ່ານວາງເສົາຢົງເຫັນໄປໃນແງ່ດີ ທ່ານເວົ້າວ່າ: ຈີນມີຊາຍຝັ່ງທະເລທີ່ຍາວຢຽດ, ລະດັບການພັດທະນາເສດຖະກິດແລະສັງຄົມຢູ່ເມືອງທ່າແຄມທະເລຂ້ອນຂ້າງສູງ, ເຊື່ອວ່າຜ່ານການຊຸກຍູ້ຂອງງານແຂ່ງຂັນເຮືອໃບຊິງຂັນທະວີບອາເມລິກາ, ຈະປະກົດມີຜູ່ນິຍົມກິລາເດີນທະເລ. ຊາວຕ່າງປະເທດທີ່ເດີນທະເລກໍ່ສາມາດຊ່ອຍເຫຼືອສ້າງໂຮງຮຽນເດີນທະເລຈຳນວນໜຶ່ງ, ຜະລິດອຸປະກອນຮັບໃຊ້ໃນການຕໍ່ເຮືອໃບ, ແລ້ວເຮັດໃຫ້ກິລາເຮືອໃບກາຍເປັນກິລາມະຫາຊົນເປັນກ້າວໆ.
ທ່ານວາງເສົາຢົງຮັບຮູ້ວ່າ, ກິລາເຮືອໃບຢູ່ຈີນມີພື້ນຖານອ່ອນແອ, ວຽກທີ່ທ່ານເຮັດໃນປະຈຸບັນ ພຽງແຕ່ແມ່ນຍ້ອນຕົນເອງມັກທັງມີເງິນທຶນ, ພະຍາຍາມເຮັດໃຫ້ຄວາມຝັນຂອງຕົນປະກົດຜົນເປັນຈິງ, ແລະເປັນວິທີການຕອບແທນສັງຄົມຂອງຕົນເອງໃນຖານະເປັນນັກທຸລະກິດ.
ເມື່ອໄດ້ດຳເນີນການປະຕິຮູບແລະໄຂປະຕູສູ່ພາຍນອກມາເປັນເວລາ 20 ກວ່າປີ, ຢູ່ຈີນ ຜູ່ຮັ່ງມີເຊັ່ນດຽວກັນກັບທ່ານວາງເສົາຢົງມີຫຼາຍສົມຄວນ, ໃນຂະນະທີ່ພວກທ່ານໄດ້ຮັບຜົນສຳເລັດໃນພາລະກິດຂອງຕົນນັ້ນ, ກໍ່ພວມພະຍາຍາມສ້າງແລະນຳທາງແບບແຜນດຳລົງຊີວິດດ້ານສັງຄົມອັນໃໝ່. ໂດຍຜ່ານການເຮັດໃຫ້ຄວາມຝັນຂອງຕົນປະກົດຜົນເປັນຈິງ,ແລະເຮັດໃຫ້ກິລາຈີນມີການບຸກທະລຸໂດຍເລີ່ມແຕ່ສູນໃນຂົງເຂດໃດໜຶ່ງ, ທ່ານວາງເສົາຢົງກໍ່ໄດ້ເປີດສາກການເຂົ້າຮ່ວມກິລາເດີນທະເລຂະໜາດໃຫຍ່ຂອງຄົນຈີນ.
|
