|
|
 |
| (GMT+08:00)
2005-04-27 14:58:44
|
 |
|
[ທ່ານຈຽງລີນຊາງ ນັກປາດທີ່ມີສື່ສຽງຂອງຈີນ]
cri
Author: mo
|
ໃນຂົງເຂດຄົ້ນຄວ້າປະຫວັດສາດບູຮານຂອງຈີນ, ມີນັກປາດທີ່ມີສື່ສຽງຜູ້ໜຶ່ງຊື່ວ່າ: ຈຽງລິນຊາງ , ເພີ່ນແມ່ນຮອງຫົວໜ້າສະຖາບັນຄົ້ນຄວ້າວິຊາການຈີນ. ມື້ນີ້, ພວກເຮົາຈະແນະນຳທ່ານຈຽງລິນຊາງສູ່ຟັງ.
 ທ່ານຈຽງລິນຊາງ ປີນີ້ອາຍຸ 40 ກວ່າປີແລ້ວ, ແມ່ນນັກປາດທີ່ມີຊື່ມີສຽງໃນວົງການປະຫວັດສາດຈີນ. ປີ 1981, ພາຍຫລັງທ່ານຮຽນຈົບມະຫາວິທະຍາໄລແລ້ວ, ທ່ານໄດ້ໄປເປັນຄູສອນຢູ່ໂຮງຮຽນມັດທະຍົມໃນຊົນນະບົດເປັນເວລາ 5 ປີ, ພາຍລຸນມາໄດ້ເສັງເຂົ້າມະຫາວິທະຍາໄລເຈີ້ຈຽງ, ຮຽນປະລິນຍາໂທແລະປະລິນຍາເອກ.
ປີ 1996, ທ່ານຈຽງລີນຊາງໄປເຮັດວຽກຢູ່ສະຖາບັນຄົ້ນຄວ້າປະຫວັດສາດຂອງສະພາບັນດິດວິທະຍາສາດສັງຄົມຈີນ, ຕິດຕາມທ່ານລີເສສີນ ນັກປະຫວັດສາດທີ່ມີຊື່ສຽງຄົ້ນຄວ້າວິທະຍາສາດຊັ້ນອັກຄະປະລິນຍາເອກ. ໃນປີນັ້ນ, ລັດຖະບານຈີນໄດ້ເລີ່ມດຳເນີນໂຄງການຄົ້ນຄວ້າປະຫວັດສາດສະໄໝລາຊະວົງເຊ້ຍ ລາຊະວົງຊ່າງແລະລາຊະວົງໂຈ່ວຂາດສະບັ້ນ, ເຊິ່ງເປັນໂຄງການຄົ້ນຄວ້າວິຊາການທີ່ສຳຄັນ. ຈຸດໝາຍໂດຍກົງຂອງກິດຈະການດັ່ງກ່າວ, ກໍແມ່ນເພື່ອຄົ້ນຄວ້າໃຫ້ຮູ້ປີຂອງສາມລາຊະວົງຄືລາຊະວົງເຊ້ຍ, ລາຊະວົງຊ່າງແລະລາຊະວົງໂຈ່ວ, ເຊິ່ງໃນປະຫວັດອາລະຍະທຳຂອງຈີນ. ທ່ານຈຽງລິນຊາງໄດ້ເຂົ້າຮ່ວມກິດຈະການດັ່ງກ່າວໃນຖານເປັນເລຂາວິຊາການ, ນີ້ໄດ້ກາຍເປັນຈຸດເລີ່ມຕົ້ນໃໝ່ໃນພາລະກິດວິຊາການຂອງທ່ານ. ທ່ານເວົ້າວ່າ,
ເວົ້າສຳລັບຂ້າພະເຈົ້າແລ້ວ, ສິ່ງທີ່ຫາຍາກທີ່ສຸດນັ້ນແມ່ນໄດ້ຮຽນຮູ້ຫລາຍສິ່ງຫລາຍຢ່າງໃນການຄົ້ນຄວ້າດັ່ງກ່າວ, ມີໂອກາດເຂົ້າຮ່ວມງານສຳມະນາຄົ້ນຄວ້າວິຊາການທຸກເທື່ອ, ກໍແມ່ນໂອກາດດີທີ່ສຸດໃນການຮ່ຳຮຽນສຳລັບຂ້າພະເຈົ້າ, ຂ້າພະເຈົ້າຖະນຸຖະໜອມປະສົບການໃນໄລຍະນີ້ທີ່ສຸດ.
ທ່ານຈຽງລິນຊາງກ່າວວ່າ, ແຫຼ່ງກຳເນີດຂອງອາລະຍະທຳຂອງຈີນ, ຢ່າງໜ້ອຍມີປະຫວັດແມ່ນ 5 ພັນປີຂຶ້ນໄປ, ແຕ່ປະຫວັດສາດ 2 ພັນປີໃນໄລຍະຕົ້ນ, ຍ້ອນເອກະສານປະຫວັດສາດນອກຕົວມີຈຳກັດ, ບໍ່ມີການບັນທຶກອັນຈະແຈ້ງ. ເມື່ອໄດ້ທຳຄວາມພະຍາຍາມ 5 ປີແລ້ວ, ກິດຈະການດັ່ງກ່າວໄດ້ສະເໜີບົດລາຍງານການຄົ້ນຄວ້າໄລຍະໜຶ່ງ.
ວຽກງານຄົ້ນຄວ້າແມ່ນວຽກງານທີ່ເມື່ອນຫລາຍ, ແຕ່ທ່ານຈຽງລິນຊາງພັດມ່ວນນຳວຽກ. ນອກຈາກເປັນຮອງຫົວໜ້າສະຖາບັນຄົ້ນຄວ້າວິຊາການຈີນແລ້ວ, ທ່ານຍັງເປັນຮອງອະທິການບໍດີຂອງມະຫາວິທະຍາໄລຢ່ຽນຖາຍ, ພ້ອມທັງເປັນຮອງປະທານຄະນະປະຈຳສະພາປະຊາຊົນເມືອງຢ່ຽນຖາຍ. ວຽກງານບໍລິຫານແລະການຄົ້ນຄວ້າວິຊາການ, ເຮັດໃຫ້ທ່ານຈຽງລິນຊາງເກືອບບໍ່ມີເວລາຫວ່າງ, ບໍ່ມີເວລາພັກຜ່ອນ. ແຕ່ທ່ານພັດມີຄວາມຈູບຈ້າວຫ້າວຫັນຢ່າງເຕັມປ່ຽມຕໍ່ວຽກງານຂອງຕົນ. ທ່ານເວົ້າວ່າ:
ທ່ານຟ້ານເວີນລານ ຜູ້ອາວຸໂສຮູ້ນກ່ອນຂອງພວກເຮົາເວົ້າວ່າ:
ນັກປາດໃດໆທີ່ຢາກໄດ້ຮັບຜົນສຳເລັດ ລ້ວນແຕ່ຕ້ອງທຳຄວາມພະຍາຍາມຢ່າງລຳບາກກາກກຳ. ຂ້າພະເຈົ້າຮູ້ສຶກວ່າ, ນັກປາດແທ້ຈິງຜູ້ໜຶ່ງ, ກ່ອນອື່ນຕ້ອງແມ່ນນັກນຶກຄິດ, ຕ້ອງມີສະຕິພາລະກຳປະຫວັດສາດ. ຂ້າພະເຈົ້າໂຊກດີທີ່ໄດ້ເລືອກຄົ້ນຄວ້າວັດທະນະທຳບູຮານຈີນ, ຄົ້ນຄວ້າວິຊາປະຫວັດສາດ, ເພາະວ່າ, ປະຫວັດອາລະຍະທຳຂອງຈີນແມ່ນມີເອກະລັກພິເສດໃນປະຫວັດອາລະຍະທຳຂອງໂລກ, ໃນນາມເປັນຄົນຈີນຂ້າພະເຈົ້າຮູ້ສຶກພາກພູມໃຈຫລາຍ.
ປັດຈຸບັນ, ທ່ານຈຽງລິນຊາງສຳຄັນໄດ້ເຮັດວຽກຄົ້ນຄວ້າໃນສອງດ້ານ, ຄື, ດ້ານໜຶ່ງຄົ້ນຄວ້າປະຫວັດວິຊາການຂອງຈີນ, ອີກດ້ານໜຶ່ງແມ່ນຄົ້ນຄວ້າປະຫວັດສາດປະຖົມບູຮານຂອງຈີນ. ທ່ານເວົ້າວ່າ, ເຖິງວ່າປັດຈຸບັນ, ໃນສັງຄົມ, ຄົນທັງຫລາຍເຮີ່ກັນຄົ້ນຄວ້າເສດຖະກິດແລະຂະແໜງການIT, ເມື່ອທຽບໃສ່ກັນແລ້ວ, ການຄົ້ນຄວ້າວິທະຍາສາດສັງຄົມປັດຊະຍາຍ້ອນບໍ່ສາມາດໄດ້ຮັບປະສິດທິຜົນເສດຖະກິດໃນທັນທີ, ຈຶ່ງບໍ່ໄດ້ຮັບຄວາມເອົາໃຈໃສ່ຢ່າງພຽງພໍ, ແຕ່ປັດຊະຍາແລະວິທະຍາສາດສັງຄົມ, ໂດຍສະເພາະແມ່ນປະຫວັດສາດ, ມັນແມ່ນກົກເຄົ້າຂອງຊາດໜຶ່ງໆ. ໃນນາມເປັນນັກປາດຜູ້ໜຶ່ງ, ທ່ານຈຽງລິນຊາງຮູ້ສຶກວ່າໂຊກດີທີ່ສຸດທີ່ໄດ້ເກີດໃນສະໄໝນີ້. ທ່ານເວົ້າວ່າ:
ຂໍ້ມູນເອກະສານບູຮານຄະດີ ແລະໜັງສືບູຮານທີ່ຂຸດຄົ້ນອອກຈາກໃຕ້ດິນ, ເຊິ່ງນັກປາດທັງຫລາຍຄືທ່ານໂກ່ໂມ້ໂຢ້ແລະທ່ານຊືມາຊຽນເປັນຕົ້ນບໍ່ທັນໄດ້ເຫັນນັ້ນ, ພວກເຮົາພັດໄດ້ເຫັນແລ້ວ, ສະນັ້ນ, ໃນປັດຈຸບັນ, ພວກເຮົາຈຶ່ງສາມາດເຮັດວຽກບາງຢ່າງທີ່ຄົນຮຸ້ນກ່ອນບໍ່ສາມາດເຮັດໄດ້, ນີ້ບໍ່ແມ່ນຍ້ອນພວກເຮົາມີລະດັບສູງປານໃດ, ແຕ່ຫາກແມ່ນຍ້ອນພວກເຮົາໄດ້ພົບພໍ້ໂອກາດທີ່ດີ, ບົນພື້ນຖານການຄົ້ນຄວ້າຂອງຄົນຮຸ້ນກ່ອນ, ພວກເຮົາຍັງມີເອກະສານໃໝ່, ຍັງສາມາດແກ້ໄຂຫລາຍບັນຫາໃນປະຫວັດວິຊາການໃນສະໄໝປະຖົມບູຮານ.
ປັດຈຸບັນ, ທ່ານຈຽງລິນຊາງໄດ້ພິມຈຳໜ່າຍບົດນິພົນຫລາຍບົດ, ແຕ່ທ່ານຈຽງລິນຊາງພັດເຫັນວ່າ, ຍັງເວົ້າບໍ່ໄດ້ວ່າຕົນເອງໄດ້ຮັບຜົນສຳເລັດຫຍັງ. ທ່ານເວົ້າວ່າ: ຂ້າພະເຈົ້າຮູ້ສຶກວ່າຕົນເອງຍັງແມ່ນນັກຮຽນຢູ່. ຂ້າພະເຈົ້າຈະເດີນໄປຕາມທາງເສັ້ນນີ້ຕະຫລອດໄປ, ແລະຫວັງສິດສອນນັກຮຽນຂອງຕົນໃຫ້ດີ, ເພື່ອເຜີຍແຜ່ນ້ຳໃຈວັດທະນະທຳມູນເຊື້ອຂອງຈີນໃຫ້ສືບທອດຕໍ່ໆກັນໄປ. ເຖິງຈະລຳບາກຈະອິດເມື່ອຍແນວໃດກໍຕາມ, ຂ້າພະເຈົ້າກໍຍິນຍອມປະກອບສ່ວນເພື່ອວັດທະນະທຳຂອງຊາດ, ຜູ້ອື່ນອາດຈະຄຶດວ່າ, ວຽກຂອງພວກເຮົາເຫງົາຫລາຍ, ແຕ່ຂ້າພະເຈົ້າບໍ່ຮູ້ສຶກເຫງົາ, ຂ້າພະເຈົ້າເຕັມໄປດ້ວຍຄວາມກະຕືລືລົ້ນຕໍ່ວິຊາສະເພາະຂອງຂ້າພະເຈົ້າ.
|
|
|
