|
ລົງເລິກການຮ່ວມມືຖານບ້ານໃກ້ເຮືອນຄຽງ ສົ່ງເສີມນ້ຳໃຈບັນດຸງ--ທ່ານລີຈ້າວຊິງໃຫ້ສຳພາດຕໍ່ນັກຂ່າວກ່ຽວກັບໝາກຜົນທີ່ ທ່ານປະທານຫູຈິນທາວ ໄດ້ຮັບໃນການໄປຢ້ຽມຢາມປະເທດອາຊີອາຄະເນ
cri
Author: lqz
|
ແຕ່ວັນທີ 20 ຫາວັນທີ 28 ເມສາ, ທ່ານຫູຈິນທາວ ປະທານປະເທດຈີນໄດ້ ຢ້ຽມຢາມບຼູໄນ ອິນໂດເນເຊຍແລະຟິລິບປິນທາງລັດຖະກິດ, ຍັງໄດ້ເຂົ້າຮ່ວມກອງປະຊຸມສຸດຍອດອາຊີອາຟິຼກກາປີ 2005 ແລະການເຄື່ອນໄຫວລະລຶກກອງປະຊຸມບັນດຸງຄົບຮອບ 50 ປີທີ່ຈັດຂຶ້ນຢູ່ອິນໂດເນເຊຍ. ໃນການຢ້ຽມຢາມ 9 ມື້ເທື່ອນີ້, ໄດ້ຮັບໝາກຜົນ ອຸດົມສົມບູນ. ຢູ່ເທິງຍົນພິເສດບົນເສັ້ນທາງກັບ ຄືນປະເທດ, ທ່ານລີຈ້າວຊິງ ລັດຖະມົນຕີການຕ່າງປະເທດຈີນທີ່ຕິດຕາມທ່ານຫູຈິນທາວໄປຢ້ຽມຢາມນັ້ນ ໄດ້ໃຫ້ສຳພາດຕໍ່ນັກຂ່າວທີ່ຕິດຕາມຄະນະ.
ທ່ານລີຈ້າວຊິງກ່າວວ່າ, ການຢ້ຽມຢາມຂອງທ່ານຫູຈິນທາວເທື່ອນີ້ມີຈຸດພິເສດເດັ່ນ 4 ຂໍ້ຄືດັ່ງລຸ່ມນີ້:
ໜຶ່ງ ປັບປຸງມິດຕະພາບດັ້ງເດີມ, ແຕ່ງບົດໃໝ່ທີ່ເປັນບ້ານໃກ້ເຮືອນຄຽງທີ່ດີຕໍ່ກັນ.
ໃນໄລຍະຢ້ຽມຢາມ, ທ່ານປະທານຫູຈິນທາວແລະຊຸນຕັນໂບນເກຍແຫ່ງບຼູໄນເປັນເອກະສັນກັນເຫັນດີສືບຕໍ່ຂະຫຍາຍການພົວພັນຮ່ວມມືຢ່າງມີໄມຕີຈິດຖານບ້ານໃກ້ເຮືອນຄຽງ ລະຫວ່າງຈີນບຼູໄນ, ກັບທ່ານຊູຊີໂລ ປະທານາທິບໍດີອິນໂດເນເຊຍລົງນາມໃນຄຳຖະແຫຼງການຮ່ວມມືກ່ຽວກັບສ້າງການພົວພັນຄູ່ຂາຍຸດທະສາດລະຫວ່າງສອງປະເທດ, ກັບທ່ານນາງອາໂລໂຢ ປະທານາທິບໍດີຟິລິບປິນຕົກລົງສ້າງການພົວພັນຮ່ວມມືທາງຍຸດທະສາດທີ່ເລັ່ງໃສ່ສັນຕິພາບແລະການພັດທະນາ, ເຮັດໃຫ້ການພົວພັນໄມຕີຈິດທີ່ມີມາແຕ່ດົນນານລະຫວ່າງຈີນກັບສາມປະເທດດັ່ງກ່າວກ້າວເຂົ້າສູ່ໄລຍະຂະຫຍາຍຕົວໃໝ່.ວັດສະດຸສົງເຄາະ 50 ໂຕນທີ່ຂົນໄປນຳຍົນພິເສດຂອງທ່ານຫູຈິນທາວເພື່ອສົ່ງໃຫ້ປະຊາຊົນອິນໂດເນເຊຍ, ໄດ້ຮັບຄວາມຍ້ອງຍໍຈາກລັດຖະບານແລະປະຊາຊົນອິນໂດເນເຊຍ.
ສອງ: ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ຊຸກຍູ້ການພັດທະນາພ້ອມກັນ.
ໃນໄລຍະຢ້ຽມຢາມສາມປະເທດດັ່ງກ່າວ, ລວມທັງໝົດໄດ້ລົງນາມໃນສັນຍາຮ່ວມມືປະມານ 30 ສະບັບ, ກວມເຖິງຂົງເຂດ ການເມືອງ ເສດຖະກິດການຄ້າ ຄວາມປອດໄພ ວິທະຍາສາດເນັກໂນໂລຊີ ວັດທະນະທຳ ອະນາໄມ ການກູ້ໄພ ການແລກປ່ຽນ ບຸກຄະລາກອນແລະປະຊາຊົນ. ການຮ່ວມມືຢ່າງມີໄມຕີຈິດແລະຕ່າງຝ່າຍຕ່າງມີຜົນປະໂຫຍດດັ່ງກ່າວນີ້, ຍ່ອມຈະເພີ່ມຕື່ມພະລັງຊີວິດໃໝ່ເຂົ້າໃນການພົວພັນລະຫວ່າງຈີນກັບສາມປະເທດດັ່ງກ່າວ, ໃຫ້ປະຊາຊົນ ຮັບຜົນປະໂຫຍດ, ຊຸກຍູ້ປະເທດພັດທະນາ.
ສາມ,ຊຸກຍູ້ການຮ່ວມມືສັນຕິພາບແລະສະຖຽນລະພາບໃນພາກພື້ນ
ບຼູໄນ ອິນໂດເນເຊຍແລະຟີລິບປິນລ້ວນແມ່ນສະມາຊິກສຳຄັນຂອງອາຊຽນ.ທ່ານປະທານຫູຈີນທາວກ່າວເນັ້ນວ່າ,ຈີນຍິນດີເພີ່ມທະວີການຮ່ວມມືຢ່າງມີໄມຕີຈິດຖານບ້ານໃກ້ເຮືອນຄຽງກັບບັນດາປະເທດອາຊຽນ,ບັນລຸການພັດທະນາແລະຈະເລີນຮຸ່ງເຮືອງພ້ອມກັນ,ເພີ່ມທະວີການແລກປ່ຽນແລະປະສານສົມທົບໃນວຽກງານສາກົນແລະພາກພື້ນ.ຈີນສະໜັບສະໜູນຂະບວນເຊື່ອມໂຍງເຂົ້າກັນຂອງອາຊຽນ,ຊຸກຍູ້ການສ້າງເຂດການຄ້າເສລີຈີນ-ອາຊຽນ.ໃນບັນຫາທະເລຈີນໃຕ້,ຈີນຍິນດີໂຈະການວິວາດກັນ,ພ້ອມກັນພັດທະນາ.ຜູ້ນຳສາມປະເທດໄດ້ຕີລາຄາສູງຕໍ່ບົດບາດທີ່ມີລັກສະນະກໍ່ສ້າງຂອງຈີນໃນພາກພື້ນແຫ່ງນີ້.
ສີ່,ສົ່ງເສີມນ້ຳໃຈບັນດຸງ,ເກາະແຂນກັນສ້າງອະນາຄົດ
ກອງປະຊຸມອາຊີອາຟຼີກາໃນ 50 ປີກ່ອນ,ເປັນຫຼັກໝາຍທາງແຫ່ງຂະບວນປົດປ່ອຍຊາດອາຊີອາຟຼີກາ,ໄດ້ເກີດມີຜົນສະທ້ອນທີ່ສຳຄັນຕໍ່ການຂະຫຍາຍການພົວພັນລະຫວ່າງຊາດ.ໃນມື້ 50 ປີຫຼັງ,ຜູ້ນຳຂອງ 89 ປະເທດໄດ້ເຕົ້າໂຮມກັນອີກ,ຊອກຄົ້ນການພົວພັນອາຊີອາຟຼີກາໃຕ້ສະຖານະການໃໝ່,ກອງປະຊຸມໄດ້ປະກາດຄຳຖະແຫຼງການກ່ຽວກັບການພົວພັນໝູ່ຄູ່ຍຸດທະສາດໃໝ່ອາຊີອາຟຼີກາ.
ໃນກອງປະຊຸມ ທ່ານຫູຈີນທາວໄດ້ບັນລະຍາຍຄວາມເຫັນແລະເຈດຈຳນົງຂອງຈີນກ່ຽວກັບການສ້າງການພົວພັນໝູ່ຄູ່ຍຸດທະສາດໃໝ່ອາຊີອາຟຼີກາ,ໃນນັ້ນລວມທັງຕ້ອງໂຄລົບກັນແລະສະໜັບສະໜູນເຊິ່ງກັນແລະກັນທາງການເມືອງ;ຕ້ອງໃຫ້ທ່າແຮງຕາບຈູນກັນ,ແລະຕ່າງຝ່າຍຕ່າງມີຜົນປະໂຫຍດໃນທາງເສດຖະກິດແລະອື່ນໆ.ປະເທດພວມພັດທະນາຕ້ອງເພີ່ມທະວີການປະສານສົມທົບໃນວຽກງານເສດຖະກິດສາກົນ,ຊຸກຍູ້ການສົນທະນາແລະການຮ່ວມມືເໜືອໃຕ້,ຮັບມືກັບສິ່ງທ້າທາຍຈາກເສດຖະກິດໂລກາວິວັດ,ຄວາມເຫັນແລະເຈດຈຳນົງຂອງທ່ານຫູຈີນທາວໄດ້ຮັບຄວາມເຫັນດີນຳຢ່າງກວ້າງຂວາງ.
ຕອນສຸດທ້າຍ ທ່ານຫຼີຈ້າວຊິງເວົ້າວ່າ,ການຢ້ຽມຢາມຂອງທ່ານປະທານຫູຈີນທາວເທື່ອນີ້ໄດ້ຮັບຜົນເດັ່ນ,ໄດ້ບັນລຸຄາດໝາຍທີ່ວາງໄວ້ກ່ອນຄື ຮັດແໜ້ນມິດຕະພາບ,ຊຸກຍູ້ການຮ່ວມມື,ເພີ່ມທະວີຄວາມສາມັກຄີ,ແລະພ້ອມກັນພັດທະນາ.
|
|
