|
ອິນໂດເນເຊຍຕັ້ງຢູ່ເສັ້ນສູນສຸດ,ປະກອບດ້ວຍເກາະນ້ອຍເກາະໃຫຍ່ 1 ໝື່ນ 7 ພັນ 508 ເກາະຢູ່ລະຫວ່າງມະຫາສະໝຸດປາຊິຟິກແລະມະຫາສະໝຸດອິນເດຍ.ເນື້ອທີ່ທາງບົກກວ້າງ 1 ລ້ານ 9 ແສນກວ່າກິໂລແມັດມົນທົນ.ອິນໂດເນເຊຍແມ່ນປະເທດທີສີ່ທີ່ມີປະຊາກອນຫຼາຍໃນໂລກ, 215 ລ້ານຄົນແຈກຢາຍຢູ່ເທິງປະມານ 6000 ເກາະ.ອິນໂດເນເຊຍມີ 100 ກວ່າຊົນເຜົ່າ,ໃນນັ້ນເຜົ່າຊາວາກວມປະຊາກອນທົ່ວປະເທດ 45%.ທົ່ວປະເທດມີປະຊາກອນ 87% ເຊື່ອຖືສາສະໜາອິສລາມ,ແມ່ນປະເທດທີ່ມີຊາວມຸສລິມຫຼາຍກວ່າໝູ່ໃນໂລກ.ໃນລາຍການເຂົ້າສູ່ອາຊຽນພາກນີ້,ດາລາວັນຂໍພາທ່ານໄປທ່ຽວອິນໂດເນເຊຍ.
ອິນໂດເນເຊຍແມ່ນປະເທດອາຊີມີປະຫວັດດົນນານ.ແຕ່ຄ.ສ.ສະຕະວັດທີ 3 ຮອດສະຕະວັດທີ 7 ໄດ້ສ້າງຕັ້ງລາຊະອະນາຈັກຢ່າງແຈກຢາຍ.ແຕ່ຄ.ສ.ທ້າຍສະຕະວັດທີ 13 ຮອດຕົ້ນສະຕະວັດທີ 13 ,ເກາະຊາວາໄດ້ປະກົດມີປະເທດຈັກກະພັດສັກດິນາມາໂນປາທີ່ເຂັ້ມແຂງ.ໃນລະຫວ່າງສະຕະວັດທີ 15 ,ປອກຕຸຍການ ແອສປາຍແລະອັງກິດເຂົ້າລ່ວງລ້ຳ.ເມື່ອປີ 1596,ຮອນລັງເຂົາລ່ວງລ້ຳແລະສ້າງຕັ້ງບໍລິສັດອິນເດຍຕາເວັນອອກທີ່ມີສິດອຳນາດການປົກຄອງຢູ່ອິນໂດເນເຊຍໃນປີ 1602,ເລີ່ມດຳເນີນການປົກຄອງແບບລ່າເມືອງຂຶ້ນຢູ່ອິນໂດເນເຊຍ 300 ກວ່າປີ.ປີ 1942 ຍີ່ປຸ່ນເຂົ້າຮຸກຮານ.ປີ 1945 ຍີ່ປຸ່ນຍອມຈຳນົນ,ຢູ່ອິນໂດເນເຊຍເກີດການປະຕິວັດສິງຫາ,ວັນທີ 17 ສິງຫາ ອິນໂດເນເຊຍປະກາດເປັນເອກະລາດ,ສ້າງຕັ້ງສາທາລະນະລັດອິນໂດເນເຊຍ.
ອິນໂດເນເຊຍແມ່ນປະເທດພູໄຟ,ຢູ່ທົ່ວປະເທດມີພູໄຟ 400 ກວ່າໜ່ວຍ,ໃນນັ້ນມີພູໄຟເປັນ 100 ກວ່າໜ່ວຍ.ຂີ້ຝຸ່ນພູໄຟແລະນ້ຳຝົນອັນອຸດົມສົມບູນທີ່ເກີດຈາກອາກາດ ທະເລ,ເຮັດໃຫ້ອິນໂດເນເຊຍກາຍເປັນໜຶ່ງໃນແຫ່ງຕ່າງໆທີ່ມີທີ່ດິນມັ່ງມູນທີ່ສຸດໃນໂລກ.ເກາະຕ່າງໆໃນທົ່ວປະເທດເຕັມໄປດ້ວຍປ່າໄມ້,ອາກາດຮ້ອນຕະຫຼອດປີ,ຄົນທັງຫຼາຍເອີ້ນອິນໂດເນເຊຍເປັນ"ຢົກຂຽວຢູ່ເທິງເສັ້ນສູນສຸດ."
ອິນໂດເນເຊຍຖືກເອີ້ນເປັນ"ເກາະປະເສີດຢູ່ແຖບຮ້ອນ",ມີຊັບພະຍາກອນບໍ່ແຮ່ສົມບູນຫຼາຍ.ນັບມາຮອດປີ 2003,ໄດ້ຢັ່ງແທກຮູ້ວ່າ ນ້ຳມັນເຊື້ອໄຟໃຕ້ດິນມີ 4 ຕື້ 720 ລ້ານບາເລນ,ມີອາຍແກັສທຳມະຊາດ 94 ພັນ 750 ຕື້ແມັດກ້ອນ. ປ່າໄມ້ມີ 94 ລ້ານເຮັກຕາ,ກວມເນື້ອທີ່ທົ່ວປະເທດ 49%.
ປັດຈຸບັນ ອິນໂດເນເຊຍແມ່ນອົງກອນເສດຖະກິດໃຫຍ່ກວ່າໝູ່ຂອງອາຊຽນ,ກະສິກຳແລະອຸດສາຫະກຳນ້ຳມັນເຊື້ອໄຟແມ່ນອຸດສາຫະກຳເສົາຄ້ຳດັ້ງເດີມ.ປະຊາກອນ 59% ຜະລິດກະສິກຳເຊິ່ງລວມທັງຂະແໜງການປ່າໄມ້ແລະຂະແໜງການປະມົງ,ປະລິມານຜະລິດໝາກກາກາວ ນ້ຳມັນພາມ ຢາງພາລາແລະພິກໄທເປັນທີສອງໃນໂລກ,ປະລິມານຜະລິດກາເຟເປັນທີສີ່ຂອງໂລກ.ອິນໂດເນເຊຍແມ່ນປະເທດສະມາຊິກໂອເປັກ,ໃນທ້າຍປີ 2004 ໄດ້ຜະລິດນ້ຳມັນດິບປະມານ 1 ລ້ານ 4 ແສນບາເລນຕໍ່ມື້.ລັດຖະບານອິນໂດເນເຊຍສົນໃຈນຳການທ່ອງທ່ຽວ,ພັດທະນາແຫຼ່ງທ່ອງທ່ຽວ,ການທ່ອງທ່ຽວໄດ້ກາຍເປັນຂະແໜງການສຳຄັນທີ່ສ້າງລາຍຮັບເງິນຕາຕ່າງປະເທດ.
ເກາະຊາວາແມ່ນເຂດເສດຖະກິດ ການເມືອງແລະວັດທະນະທຳຈະເລີນທີ່ສຸດຂອງອິນໂດເນເຊຍ,ຕົວເມືອງສຳຄັນແລະບູຮານນະສະຖານສຳຄັນຈຳນວນນຶ່ງລ້ວນແຕ່ຢູ່ເທິງເກາະນີ້.ຢາກາກຕາ ນະຄອນຫຼວງອິນໂດເນເຊຍແມ່ນເມືອງໃຫຍ່ທີໜຶ່ງໃນອາຊີອາຄະເນ,ຕັ້ງຢູ່ຝັ່ງທະເລເໜືອຂອງເກາະຊາວາຕາເວັນຕົກ,ມີປະຊາກອນ 8 ລ້ານ 3 ແສນກວ່າຄົນ.
ອິນໂດເນເຊຍແມ່ນປະເທດໜຶ່ງທີ່ສ້າງການພົວພັນການທູດກັບຈີນກ່ອນກວ່າໝູ່.ໃນເຄິ່ງສະຕະວັດມານີ້,ເຖິງວ່າການພົວພັນລະຫວ່າງສອງປະເທດໄດ້ຂະຫຍາຍຕົວຢ່ງຄົດລ້ຽວກໍຕາມ,ແຕ່ເວົ້າໃນດ້ານສັງລວມແລ້ວ ຍັງຂະຫຍາຍໄປໜ້າຢ່າງບໍ່ຢຸດຢັ້ງ.ຫຼັງຈາກສອງປະເທດຟື້ນຟູການພົວພັນທາງການທູດໃນເດືອນສິງຫາປີ 1990 ບໍ່ດົນ,ທ່ານຫຼີເພີງ ນາຍົກລັດຖະມົນຕີຈີນກໍໄດ້ຢ້ຽມຢາມສັນຖາວະໄມຕີອິນໂດເນເຊຍຢ່າງເປັນທາງການ,ເປັນຂີດໝາຍສະແດງໃຫ້ເຫັນວ່າ ການພົວພັນລະຫວ່າງສອງປະເທດໄດ້ເປີດໜ້າໃໝ່.ໃນຫຼາຍປີມານີ້,ການພົວພັນລະຫວ່າງຈີນອິນໂດເນເຊຍໄດ້ຂະຫຍາຍຕົວເປັນຢ່າງດີ.ຜູ້ນຳຊັ້ນສູງຂອງສອງປະເທດໄດ້ສຳຜັດກັນຢ່າງເນື່ອງນິດ,ການແລກປ່ຽນແລະການຮ່ວມມືລະຫວ່າງສະພາ ພັກຝ່າຍ ກອງທັບ ຊາວໜຸ່ມ ແມ່ຍິງແລະອົງການປົກຄອງທ້ອງຖິ່ນແຂວງແລະເມືອງໄດ້ຂະຫຍາຍຕົວຢ່າງວ່ອງໄວ.ການຮ່ວມມືຮອບດ້ານລະຫວ່າງສອງຝ່າຍໃນຂົງເຂດການເມືອງ ເສດຖະກິດ ສັງຄົມ ວັດທະນະທຳ ການສຶກສາແລະວິທະຍາສາດເຕັກນິກໄດ້ມີຄວາມຄືບໜ້າຫຼາຍ.ພາຍໃຕ້ຄວາມພະຍາຍາມຂອງລັດຖະບານທັງສອງປະເທດ,ການຄ້າລະຫວ່າງສອງຝ່າຍໄດ້ເພີ່ມຂຶ້ນຢ່າງໄວວາ,ຍອດມູນຄ່າການຄ້າລະຫວ່າງສອງຝ່າຍໃນປີ 2004 ໄດ້ບັນລຸ 13 ຕື້ 480 ລ້ານໂດລາສະຫະລັດ,ຈີນໄດ້ກາຍເປັນຄູ່ການຄ້າໃຫຍ່ຂອງອິນໂດເນເຊຍ.
|
