|
|
 |
| (GMT+08:00)
2005-04-29 17:36:15
|
 |
|
ການກິນຈຸກຈິກຫຼາຍຈະມີຄວາມອັນຕະລາຍພາໃຫ້ເປັນມະເຮັງ
cri
Author: li
 ຫວ່າງມໍ່ໆນີ້ ການຄົ້ນຄວ້າຂອງນັກໂພຊະນາການອາເມລິກາໄດ້ຢັ້ງຢືນຜົນທີ່ເປັນໜ້າຕື່ນຕົກໃຈຄື: ເວົ້າໃນຄວາມໝາຍໃດໜຶ່ງແລ້ວ,ການມັກກິນຈຸກຈິກພໍປານກັນກັບການຖືກລັງສີ,ຈະເຮັດໃຫ້ຄົນມັກເປັນມະເຮັງໄດ້ງ່າຍ. ນີ້ແມ່ນຍ້ອນວ່າ,ການສັງເຄາະແລະການສ້ອມແປງ DNA ເຊິ່ງເປັນວັດຖຸກຳມະພັນຂອງຄົນຕ້ອງການທາດໂຟເລັດ,ວິຕາມິນເບ 12,ວິຕາມິນເບ 6,ວິຕາມິນເຊ,ແລະວິຕາມິນເອີເປັນຕົ້ນ,ຖ້າທາດບຳລຸງເຫຼົ່ານີ້ບໍ່ພຽງພໍ,ກໍຈະພາໃຫ້ DNA ທີ່ຖືກທຳລາຍສ້ອມແປງໃຫ້ດີຄືນບໍ່ໄດ້,ຜົນຮ້າຍຢ້ອນຫຼັງຂອງມັນແມ່ນຄ້າຍຄືກັນຫຼາຍກັບການຖືກລັງສີ.
ການທີ່ຄົນເຮົາເອົາໃຈໃສ່ນຳວິຕາມິນຕົ້ນຕໍແມ່ນຍ້ອນວ່າມັນສາມາດປ້ອງກັນພະຍາດຂາດທາດບຳລຸງຕ່າງໆເຊັ່ນພະຍາດເລືອດຂາດວິຕາມິນເຊແລະພະຍາດຕີນຄັນເປັນຕົ້ນ. ໃນຫຼາຍປີມານີ້ໄດ້ຄົ້ນເຫັນວ່າ,ວິຕາມິນຍັງມີບົດບາດສຳຄັນໃນການປ້ອງກັນມະເຮັງ. ການສຳຫຼວດຫຼາຍລາຍກໍຢັ້ນຢືນວ່າ,ເມື່ອທຽບກັບຜູ້ທີ່ມີທາດບຳລຸງພຽງພໍແລ້ວ,ຜູ້ຂາດວິຕາມິນອາ,ວິຕາມິນເບ 2,ວິຕາມິນເຊແລະວິຕາມິນເອີແຮ່ງມັກເປັນມະເຮັງຫຼາຍກວ່າ,ລວມທັງມະເຮັງປອດ,ມະເຮັງກະເພາະ,ມະເຮັງຕ່ອມນົມແລະມະເຮັງປາກມົດລູກເປັນຕົ້ນ.
ແຕ່ລະມື້ ຄົນເຮົາຕ້ອງການວິຕາມິນບໍ່ຫຼາຍ. ຄຽງຄູ່ກັບຈັງຫວະເຮັດວຽກໄວເຂົ້າແລະອາຫານອຸດົມສົມບູນຂຶ້ນ,ໃນອາຫານການກິນຈຶ່ງມັກຈະຂາດເຂີນວິຕາມິນ,ນີ້ແມ່ນຍ້ອນວ່າອາຫານກິນເຫຼັ້ນສ່ວນຫຼາຍ,ເຊັ່ນເຂົ້າໜົມປັງ,ມັນຝຣັ່ງຈືນ,ເຂົ້າໜົມນ້ຳຕານ,ໂຊໂກລາ,ເຄື່ອງດື່ມຫວານແລະອາຫານກຽມໄວມີວິຕາມິນໜ້ອຍທີ່ສຸດ. ແຕ່ວ່າຫຼາຍຄົນບໍ່ມີເວລາກິນອາຫານເຊົ້າກ່ອນເຂົ້າການ,ຈຶ່ງກິນເຂົ້າໜົມປັງຕາງອາຫານເຊົ້າ,ຕອນທ່ຽງກໍກິນໝີ່ຫໍ່,ຄາບຄ່ຳກິນອາຫານແຊ່ເຢັນ; ເມື່ອຫິວເຂົ້າ,ກໍກິນອາຫານຈຸກຈິກ,ຫິວນ້ຳກໍກິນເຄື່ອງດື່ມຫວານ,ກິນແບບນີ້ແນ່ນອນຕ້ອງຂາດວິຕາມິນ. ໂດຍສະເພາະແມ່ນຜູ້ອອກແຮງງານດ້ວຍມັນສະໝອງແຮ່ງສິ້ນເປືອງວິຕາມິນຫຼາຍ,ສະນັ້ນ ຈຶ່ງຕ້ອງເພີ່ມຕື່ມວິຕາມິນເລື້ອຍໆ.
ຫຼາຍຄົນຢ້ານສິ່ງເຊື່ອມພິດ,ຢ້ານສີອາຫານ,ຢ້ານຖືກແຜ່ລັງສີ,ແຕ່ພັດບໍ່ຮູ້ວ່າ,ການກິນອາຫານຜິດກໍແມ່ນມູນເຫດສຳຄັນທີ່ພາໃຫ້ເປັນມະເຮັງ. ພະຍາດແລະຄວາມເຈັບປວດທໍລະມານຍ້ອນອາຫານບໍ່ອະນາໄມແມ່ນເຫັນໄດ້ກັບຕາ,ອາຫານທີ່ມີທາດບຳລຸງບໍ່ສະໝ່ຳສະເໝີກໍຈະນຳເອົາພະຍາດແລະຄວາມເຈັບປວດທໍລະມານມາໃຫ້ຄົນເຮົາເຊັ່ນດຽວກັນ,ຍ້ອນວ່າການເປັນພະຍາດນີ້ຂ້ອນຂ້າງຊັກຊ້າ, ຄົນເຮົາຈຶ່ງມັກປະໝາດ.
ໃນອາຫານຊະນິດຕ່າງໆ,ຜັກ,ໝາກໄມ້,ປະເພດມັນ,ປະເພດໝາກຖົ່ວເປັນຕົ້ນແມ່ນແຫຼ່ງສຳຄັນຂອງວິຕາມິນ. ຈຸລະທາດໃນອາຫານເຫຼົ່ານີ້ສ່ວນຫຼາຍແມ່ນທາດບຳລຸງທີ່ຕ້ານການຫັນເປັນອອກຊີ,ມີບົດບາດກຳຈັດອະນຸມູລະອິດສະຫຼະໃນຮ່າງກາຍຄົນເຮົາ,ສາມາດປ້ອງກັນບໍ່ໃຫ້ DNA ຖືກທຳລາຍ. ອະນຸມູລະອິດສະຫຼະແມ່ນກຳເນີດຂຶ້ນໄດ້ຈາກສານເຄມີ,ແສງແດດຕະຫຼອດຮອດອອກຊີແຊນທີ່ຫາຍໃຈເອົາຊູ່ມື້,ຖ້າບໍ່ມີການປົກປ້ອງຂອງທາດບຳລຸງທີ່ຕ້ານການຫັນເປັນອອກຊີຊະນິດຕ່າງໆ,ພວກມັນກໍຈະກັບມາທຳລາຍຮ່າງກາຍ,ກໍຄືອອກຊີແຊນສາມາດເຮັດໃຫ້ເຫຼັກທີ່ບໍ່ໄດ້ທາສີນ້ຳມັນໃສ່ທາງນອກເຂົ້າຂີ້ໝ້ຽງ.
ສິ່ງທີ່ຕ້ອງລະວັງເປັນພິເສດນັ້ນແມ່ນ,ຢາວິຕາມິນບໍ່ສາມາດເຂົ້າແທນວິຕາມິນໃນອາຫານທຳມະຊາດຢ່າງສົມບູນໄດ້. ເພາະວ່າວິຕາມິນມີແຕ່ປະສົມກັບສານບຳລຸງອື່ນໆໃນອາຫານທຳມະຊາດຈຶ່ງສາມາດເສີມຂະຫຍາຍບົດບາດປ້ອງກັນມະເຮັງໄດ້ຢ່າງເຕັມສ່ວນ. ຕົວເລກສຳຫຼວດໄດ້ຢັ້ງຢືນໃຫ້ເຫັນວ່າ,ຜູ້ທີ່ກິນຜັກ,ໝາກໄມ້ແລະປະເພດໝາກຖົ່ວໜ້ອຍນັ້ນຈະມີໂອກາດເປັນມະເຮັງຫຼາຍກວ່າຫຼາຍ. ພາຍຫຼັງກິນຂອງຈຸກຈິດແລະອາຫານກຽມໄວຢ່າງຫຼວງຫຼາຍແລ້ວ,ເຖິງວ່າກິນຢາວິຕາມິນໃສ່ກໍບໍ່ສາມາດໄດ້ຮັບຜົນຄືກັບກິນອາຫານທຳມະຊາດ.
ຖ້າຢາກປ່ຽນແປງອົງປະກອບອາຫານການກິນ,ກໍບໍ່ຄວນກິນອາຫານທີ່ມີທາດບຳລຸງບໍ່ສະໝ່ຳສະເໝີກັນ,ຄວນແຕ່ງກິນເອງເລື້ອຍໆ,ກິນຜັກສົດ,ມັນປະເພດຕ່າງໆແລະອື່ນໆ,ຫຼັງຈາກກິນອາຫານສາມຄາບແລ້ວ,ຕ້ອງກິນໝາກໄມ້ແລະໝາກໄມ້ແຫ້ງ,ກິນໝາກຖົ່ວແລະອາຫານທີ່ເຮັດດ້ວຍໝາກຖົ່ວເຂົ້າແທນອາຫານປະເພດຊີ້ນ. ນີ້ບໍ່ພຽງແຕ່ແມ່ນວິທີປ້ອງກັນມະເຮັງທໍ່ນັ້ນ ແລະຍັງແມ່ນວິທີຮັກສາສຸຂະພາບໃຫ້ມີອາຍຸຍືນໄດ້.
|
|
|
