|
CRIລາຍງານວ່າ,ວັນທີ3ພຶດສະພາ,ລັດຖະບານຂ້າມຜ່ານ ອີຣັກໄດ້ຈັດພິທີສາບານຕົວຂຶ້ນຮັບຕຳແໜ່ງຢູ່ແບກແດດ,ນີ້ເປັນຂີດໝາຍສະແດງໃຫ້ເຫັນວ່າ,ລັດຖະບານຊຸດທຳອິດຂອງອີຣັກທີ່ປະຊາຊົນເລືອກຕັ້ງມາແລະນຳໂດຍທ່ານຈາຟາລີ ຜູ້ນຳນິກາຍຊີອິດໄດ້ສ້າງຕັ້ງຂຶ້ນຢ່າງເປັນທາງການ,ຂະບວນວິວັດການສ້າງສາຄືນໃໝ່ທາງການເມືອງຂອງອີຣັກໄດ້ຢ່ວງບາດກ້າວສຳຄັນກ້າວໜຶ່ງ.
ພິທີສາບານຕົວຂຶ້ນຮັບຕຳແໜ່ງໄດ້ຈັດຂຶ້ນຢູ່ສູນປະຊຸມໃນເຂດສີຂຽວຢູ່ແບກແດດ.ລັດຖະບານຂ້າມຜ່ານປະກອບດ້ວຍ37ຕຳແໜ່ງເຊິ່ງລວມທັງນາຍົກລັດຖະມົນຕີ,ໃນນັ້ນ,ສະຫະພັນສາມັກຄີອີຣັກນິກາຍຊີອິດທີ່ໄດ້ຮັບໄຊຊະນະໃນການເລືອກຕັ້ງເມື່ອທ້າຍເດືອນມັງກອນປີນີ້ໄດ້15ຕຳແໜ່ງ,ສະຫະພັນເຄີດໄດ້7ຕຳແໜ່ງ.ວັນທີ3ພຶດສະພາ, ສະມາຊິກລັດຖະບານມີແຕ່28ຄົນເທົ່ານັ້ນໄດ້ສາບານຕົວຂຶ້ນຮັບຕຳແໜ່ງ. ຮອງນາຍົກລັດຖະມົນຕີສອງຕຳແໜ່ງແລະລັດຖະມົນຕີຫ້າຕຳແໜ່ງເຊິ່ງລວມທັງລັດຖະມົນຕີກະຊ້ວງປ້ອງກັນປະເທດແລະລັດຖະມົນຕີກະຊວງນ້ຳມັນເຊື້ອໄຟຍັງເປົ່າຫວ່າງຢູ່.ຍ້ອນວ່າບັນດາຝ່າຍບໍ່ໄດ້ກ້າວເຖິງຂັ້ນມີຄວາມເຫັນເປັນເອກະສັນກັນກ່ຽວກັບການປະກອບລັດຖະບານໃນຂັ້ນສຸດທ້າຍ,ທ່ານອານຢາວາ ຮອງປະທານາທິບໍດີອີຣັກ,ຜູ້ນຳນິກາຍຊຸນນິດແລະທ່ານອາລາວີ ອະດີດນາຍົກລັດຖະມົນຕີລັດຖະບານຊົ່ວຄາວອີຣັກບໍ່ໄດ້ເຂົ້າຮ່ວມພິທີສາບານຕົວຂຶ້ນຮັບຕຳແໜ່ງ.
ສື່ມວນຊົນອາລັບຊີ້ອອກວ່າ, ໃນພິທີສາບານຕົວຂຶ້ນຮັບຕຳແໜ່ງຂອງລັດຖະບານຊຸດໃໝ່ໄດ້ປະກົດມີສະພາບທີ່ບໍ່ກົມກຽວກັນຕ່າງໆ,ນີ້ໄດ້ສະແດງໃຫ້ເຫັນວ່າ,ບັນດາຝ່າຍຂອງອີຣັກຍັງຄົງມີຄວາມເຫັນຂັດກັນບໍ່ໜ້ອຍໃນການແບ່ງປັນຕຳແໜ່ງໃນລັດຖະບານ.ກ່ອນອື່ນ,ໃນບັນຫາຜູ້ຈະເປັນລັດຖະມົນຕີກະຊວງປ້ອງກັນປະເທດ.ນິກາຍຊີອິດແລະຊາວເຄີດລ້ວນແຕ່ເຫັນດີເອົາຕຳແໜ່ງລັດຖະມົນຕີກະຊວງປ້ອງກັນປະເທດໃຫ້ນິກາຍຊຸນນິດ,ແຕ່ວ່າ, ສອງຝ່າຍດັ່ງກ່າວພັດຄັດຄ້ານສະມາຊິກພັກຟື້ນຟູສັງຄົມອາລັບເຊິ່ງເປັນອະດີດພັກຄອງອຳນາດໃນນິກາຍຊຸນນິດດຳລົງຕຳແໜ່ງດັ່ງກ່າວ.ຕາມລາຍຊື່ທີ່ນິກາຍຊຸນນິດສະເໜີນັ້ນ,ທ່ານອາຮາແມັດລີແກັນແມ່ນນາຍພົນຜູ້ໜຶ່ງຂອງອຳນາດການປົກຄອງຊັດດາມ.ນອກນີ້,ຜູ້ຈະເປັນລັດຖະມົນຕີກະຊວງປ້ອງກັນປະເທດກ່ຽວພັນເຖິງຄວາມປອດໄພຂອງກອງທະຫານອາເມລິກາປະຈຳອີຣັກ,ສະນັ້ນ,ອາເມລິກາໃຊ້ຜົນສະທ້ອນເລື້ອຍໆໃນບັນຫາປະກອບລັດຖະບານອີຣັກນັ້ນກໍໄດ້ເຮັດໃຫ້ການປະກອບລັດຖະບານອີຣັກປະສົບຄວາມຫຍຸ້ງຍາກຫຼາຍກວ່າເກົ່າ.
ສອງ, ລັດຖະມົນຕີກະຊວງນ້ຳມັນເຊື້ອໄຟເຊິ່ງເປັນຕຳແໜ່ງທີ່ເປັນຂໍກະແຈໃນລັດຖະບານແມ່ນສະຫະພັນເຄີດຫວັງຢາກໄດ້,ແຕ່ປັດຈຸບັນ,ຕຳແໜ່ງດັ່ງກ່າວຍັງເປົ່າຫວ່າງຢູ່, ທ່ານຊາລາບີ ຜູ້ນຳສະຫະພັນສາມັກຄີອີຣັກ,ຮອງນາຍົກລັດຖະມົນຕີລັດຖະບ້ານຂ້າມຜ່ານເປັນຜູ້ດຳລົງຕຳແໜ່ງແທນຊົ່ວຄາວ.ທ່ານຊາລາບີບໍ່ມີປະສົບການດ້ານການຄຸ້ມຄອງອຸດສາຫະກຳນ້ຳມັນເຊື້ອໄຟ,ສະນັ້ນ,ຈິ່ງຖືກ ຝ່າຍອື່ນໆເຊິ່ງລວມທັງສະຫະພັນເຄີດຕິຕຽນ.
ສຸດທ້າຍ,ສະຫະພັນພັກການເມືອງໃຫຍ່ທີສາມໃນສະພາທີ່ນຳໂດຍທ່ານອາລາວີທີ່ນິຍົມອາເມລິກາບໍ່ໄດ້ຮັບຈັກຕຳແໜ່ງໃນລັດຖະບານຊຸດໃໝ່,ສະນັ້ນ,ທ່ານອາລາວີກໍຈະສະແຫວງຫາການສະໜັບສະໜູນຈາກປະເທດອື່ນເຊັ່ນອາເມລິກາເປັນຕົ້ນ,ໃຊ້ກຳລັງໜີບຕໍ່ລັດຖະບານຈາຟາລີ.ດັ່ງນັ້ນຈິ່ງບໍ່ມີຜົນດີຕໍ່ສະຖຽນລະພາບທາງການເມືອງຂອງອີຣັກ.
ໜ້າທີ່ຕົ້ນຕໍຂອງລັດຖະບານຈາຟາລີແມ່ນຮັບຜິດຊອບສ້າງລັດຖະທຳມະນູນສະບັບໃໝ່ກ່ອນວັນທີ15ສິງຫາປີນີ້,ແລະກະກຽມ ການເລືອກຕັ້ງຢ່າງເປັນທາງການທີ່ຈະຈັດຂຶ້ນໃນທ້າຍປີນີ້.ຄັນຢາກຮັບປະກັນຂະບວນວິວັດການເມືອງຂອງອີຣັກດຳເນີນໄປຕາມແຜນການ,ທ່ານຈາຟາລີແລະລັດຖະບານຊຸດໃໝ່ຂອງເຂົາຍັງຈະປະເຊີນກັບຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ.ໜຶ່ງການທ້າທາຍດ້ານຄວາມປອດໄພ.ສອງ ບັນຫາປະກອບລັດຖະບານຍັງບໍ່ທັນໄດ້ແກ້ໄຂໃຫ້ຕົກຢ່າງເຖິງຖອງ.ຕໍ່ເລື່ອງນີ້,ທ່ານຈາຟາລີໄດ້ໃຫ້ຄຳໝັ້ນສັນຍາດັ່ງນີ້,ລັດຖະບານຊຸດໃໝ່ຈະໃຫ້ເວລາຫຼາຍກວ່າເກົ່າແກ່ນິກາຍຊຸນນິດ,ຈົນຮອດພວກເຂົາເຈົ້າຄັດເລືອກຜູ້ຈະເປັນລັດຖະມົນຕີກະຊວງປ້ອງກັນປະເທດທີ່ຊາວອີຣັກຮັບເອົາໄດ້;ຈະແຕ່ງຕັ້ງລັດຖະມົນຕີກະຊວງນ້ຳມັນເຊື້ອໄຟແລະລັດຖະມົນຕີກະຊວງໄຟຟ້າ ພາຍໃນສອງມື້ຂ້າງໜ້າ;ລັດຖະບານຊຸດໃໝ່ຈະສ້າງຕັ້ງກອງບັນຊາການໃນໄລຍະໄວໆນີ້ເພື່ອໂຈມຕີຜູ້ກໍ່ການຫຼອນໂຈມຕີດ້ວຍກຳລັງຮຸນແຮງ.
ບຸກຄົນວິເຄາະຊີ້ອອກວ່າ,ຖ້າລັດຖະບານຊຸດໃໝ່ທີ່ນຳໂດຍທ່ານຈາຟາລີຢາກຮັບມືກັບຄວາມຫຍຸ້ງຍາກແລະສິ່ງທ້າທາຍນາໆປະການ,ຮັບປະກັນຂະບວນວິວັດການເມືອງຂອງອີຣັກມີຄວາມຄືບໜ້າຢ່າງສະດວກນັ້ນຍັງຄົງແມ່ນໜ້າທີ່ໜັກໜ່ວງແລະລຳບາກສົມຄວນ.
|
