|
ຕາມຂ່າວCRI: ຫວ່າງມໍ່ໆນີ້, ຈີນໄດ້ສຳຫຼວດ ຮັບຮອງແລະຂະໜານນາມຜູ່ສືບທອດວັດທະນະທຳພື້ນເມືອງທີ່ດີເດັ່ນຂອງຈີນ, ຈຸດປະສົງແມ່ນເພື່ອຊຸກຍູ້ວຽກງານກອບກູ້ແລະປົກປັກຮັກສາມໍລະດົກວັດທະນະທຳພື້ນເມືອງ, ເຮັດໃຫ້ຊັບພະຍາກອນວັດທະນະທຳພື້ນເມືອງປະເພດຕ່າງໆຂອງຈີນໄດ້ຮັບການປົກປັກຮັກສາແລະພັດທະນາຢ່າງບັງເກີດຜົນ.
ຈີນແມ່ນໜຶ່ງໃນ 4 ປະເທດອາລະຍະທຳບູຮານໃນໂລກ, ມີປະຫວັດ 5000 ກວ່າປີ, ໄດ້ສ້າງວັດທະນະທຳທີ່ມີປະຫວັດຍາວນານແລະຮຸ່ງເຮືອງເຫຼືອງເຫຼື້ອມ. ໂດຍເປັນພາກສ່ວນປະກອບອັນສຳຄັນຂອງວັດທະນະທຳໂລກ, ວັດທະນະທຳພາກຕາເວັນອອກເຊິ່ງແມ່ນວັດທະນະທຳຈີນເປັນຕົວແທນ, ນອກຈາກມີວັດທະນະທຳຝ່າຍທາງການທີ່ໄດ້ບັນທຶກໄວ້ຢ່າງຄົບຖ້ວນແລ້ວ, ຢູ່ທ້ອງຖິ່ນຕ່າງໆຍັງມີວັດທະນະທຳພື້ນເມືອງຫຼາຍຢ່າງຫຼາຍແນວ. ວັດທະນະທຳພື້ນເມືອງເຫຼົ່ານີ້ມີຫຼາຍສີຫຼາຍສັນ, ມີລັກສະນະທ້ອງຖິ່ນແລະມີລັກສະນະຊົນເຜົ່າອຸດົມສົມບູນ, ແມ່ນພາກສ່ວນປະກອບອັນສຳຄັນຂອງວັດທະນະທຳມູນເຊື້ອຈີນ.
ໃນຫຼາຍປີມານີ້, ວັດທະນະທຳພື້ນເມືອງຫຼາຍຢ່າງຂອງຈີນໄດ້ປະເຊີນຄວາມອັນຕະລາຍທີ່ຫາຍສາບສູນ, ຜູ່ສືບທອດວັດທະນະທຳພົນລະເຮືອນນັບມື້ນັບໜ້ອຍລົງ. ກ່ອນໜ້ານີ້, ລັດຖະບານແລະອົງການຈັດຕັ້ງພື້ນເມືອງຫຼາຍອົງການຂອງຈີນໄດ້ພາກັນຈັດໂຄງການສຳຫຼວດແລະປົກປັກຮັກສາຫຼາຍໂຄງການ, ປັບປຸງແລະປົກປັກຮັກສາວັດທະນະທຳພື້ນເມືອງຈີນ. ວຽກງານສຳຫຼວດແລະຮັບຮອງຜູ່ສືບທອດວັດທະນະທຳພື້ນເມືອງທີ່ດຳເນີນໃນປະຈຸບັນ ກໍ່ແມ່ນມາດຕະການໜຶ່ງໃນການປົກປັກຮັກສາວັດທະນະທຳພື້ນເມືອງ. ທ່ານອີຈື້ໄຫ ເລຂາທິການສະມາຄົມສິລະປິນພື້ນເມືອງປັກກິ່ງແນະນຳວ່າ:
ໂຄງການສຳຫຼວດ ຮັບຮອງແລະຂະໜານນາມນີ້ ກວມວຽກສຳຫຼວດສະພາບຂອງນັກເລົ່າເລື່ອງພື້ນເມືອງ ນັກກະວີພື້ນເມືອງ ນັກເວົ້າແລະຮ້ອງພື້ນເມືອງ ນັກຮ້ອງພື້ນເມືອງ ນັກເສບດົນຕີພື້ນເມືອງ ນັກຟ້ອນພື້ນເມືອງ ນັກກາຍຍະກຳພື້ນເມືອງ ນັກກົງຟູພື້ນເມືອງ ນັກແຕ້ມຮູບພື້ນເມືອງ ແລະນັກຫັດທະກຳພື້ນເມືອງ. ໃນທີ່ສຸດ ສະຫະພັນວັດທະນະທຳຈີນຈະຂະໜານຍາມຍ້ອງຍໍ, ທັງມອບໃບຍ້ອງຍໍຜົນງານຕະຫຼອດຊີວິດໃຫ້ພວກທ່ານເຫຼົ່ານັ້ນ.
ທ່ານອີຈື້ໄຫກ່າວວ່າ, ວັດທະນະທຳພື້ນເມືອງຈີນຕ່າງກັບວັດທະນະທຳຝ່າຍທາງການ. ຮູບແບບສືບທອດວັດທະນະທຳພື້ນເມືອງຕົ້ນຕໍແມ່ນຄູສອນລູກສິດດ້ວຍປາກເປົ່າ, ສ່ວນຫຼາຍບໍ່ໄດ້ບັນທຶກໄວ້ດ້ວຍໂຕໜັງສື. ສະນັ້ນ ຈຶ່ງບໍ່ມີເທົ່າໃດຄົນຈົນມີພຽງຜູ່ດຽວໄດ້ກຳກັບຂໍ້ມູນຂ່າວສານຂອງສິລະປະພື້ນເມືອງປະເພດໜຶ່ງ. ຕາບໃດການສືບທອດຂາດສະບັ້ນໄປແລ້ວ, ວັດທະນະທຳພື້ນເມືອງປະເພດນັ້ນກໍ່ມີອັນຕະລາຍທີ່ຈະສູນເສຍໄປ. ສະນັ້ນ ໂຄງການນີ້ໝາຍຈະສຳຫຼວດສະພາບການສືບທອດວັດທະນະທຳພື້ນເມືອງຈີນ ສົ່ງເສີມຜູ່ສືບທອດພັດທະນາວັດທະນະທຳພື້ນເມືອງຕໍ່ໄປ.
ຕາມສະເໜີວ່າ, ເນື້ອໃນຂອງໂຄງການດັ່ງກ່າວກໍ່ລວມທັງການປົກປັກຮັກສາແລະພັດທະນາບັນດາວັດທະນະທຳຊົນເຜົ່າສ່ວນໜ້ອຍຂອງຈີນ. ວັດທະນະທຳເຜົ່າສ່ວນໜ້ອຍຂອງຈີນສ່ວນຫຼາຍແມ່ນວັດທະນະທຳພື້ນເມືອງ, ພວກເຂົາເຈົ້າບໍ່ມີໂຕໜັງສືຂອງເຜົ່າຕົນເອງ, ສືບທອດວັດທະນະທຳແລະສີໄມ້ລາຍມືຫັດທະກຳພື້ນເມືອງຂອງເຜົ່າຕົນດ້ວຍປາກເປົ່າ.
ທ່ານຮາອີສີແມ່ນນັກຫັດທະກຳເຜົ່າຫຸຍ, ມີຊື່ລືນາມຍ້ອນສີມືເຮັດວ່າວ. ທ່ານຫາກໍ່ໄດ້ຮັບນາມມະຍົດເປັນຜູ່ສືບທອດວັດທະນະທຳພື້ນເມືອງຜູ່ດີເດັ່ນໃນໂຄງການສຳຫຼວດດັ່ງກ່າວ, ທ່ານເວົ້າວ່າ: ນາມມະຍົດນີ້ແມ່ນລັດຖະບານແລະປະຊາຊົນມອບໃຫ້ຂ້າພະເຈົ້າ. ຂ້າພະເຈົ້າເຫັນວ່າ ຄວາມຫາບແບກຂອງຂ້າພະເຈົ້ານັບມື້ນັບໜັກແລ້ວ, ຂ້າພະເຈົ້າຕ້ອງເຮັດວຽກນີ້ຕໍ່ໄປ, ຕ້ອງພ້ອມກັນກັບສິລະປິນພື້ນເມືອງຂະແໜງການຕ່າງໆເຮັດວຽກນີ້ໃຫ້ດີ, ຈົ່ງສິ່ງປະດິດສ້າງທີ່ດີໃຫ້ສັງຄົມແລະຊົນເຜົ່າ.
ຕາມສະເໜີວ່າ, ໂຄງການນີ້ຈະໃຊ້ເວລາສອງປີ, ສຳຫຼວດຜູ່ສືບທອດວັດທະນະທຳພື້ນເມືອງຜູ່ດີເດັ່ນຢູ່ແຫ່ງຕ່າງໆຂອງຈີນ. ເມື່ອລັດຖະບານຈັດຕັ້ງຜູ່ຊ່ຽວຊານສຳຫຼວດພິຈາລະນາແລ້ວ, ປະກາດຜູ່ສືບທອດວັດທະນະທຳພື້ນເມືອງຜູ່ດີເດັ່ນຂອງຈີນ 100 ຄົນ, ຈະພິມແລະຈຳໜ່າຍປື້ມເອກະສານຕ່າງໆ, ສ້າງສາງຂໍ້ມູນດີຈີຕອນ.
|
