|
ທ່ານຜູ່ຟັງທີ່ໂຄລົບ, ເມື່ອເວົ້າເຖິງກິລາໄຕ່ສະເກດແລະແລ່ນສະກີຂອງຈີນແລ້ວ, ກ່ອນອື່ນໝົດ, ຄົນທັງຫຼາຍມັກຈະຄິດເຖິງນາງຢາງຢາງ ນັກກິລາຈີນຜູ່ທຳອິດທີ່ຊິງໄດ້ຫຼຽນຄຳໃນງານກິລາໂອລິມປິກລະດູໜາວແລະນາງເຊິນແຊກັບທ້າວຈາວຫົງປໍ ແຊມປຽນໂລກຄູ່ທຳອິດຂອງຈີນໃນການແຂ່ງຂັນໄຕ່ສະເກັດລວດລາຍແບບຍິງຊາຍປະສົມ. ທີ່ຈິງແລ້ວ, ນອກຈາກນັກກິລາທີ່ມີຊື່ສຽງດັ່ງກ່າວແລ້ວ, ຍັງມີນັກກິລາຜູ່ໜຶ່ງຂອງຈີນບໍ່ມີຊື່ສຽງປານໃດ ກໍ່ແມ່ນນາງຫວັງມານລີ ລາວຈະສູ້ຊົນຊິງເອົາຫຼຽນຄຳໃນງານກິລາໂອລິມປິກລະດູໜາວທີ່ຈະຈັດຂຶ້ນຢູ່ເມືອງຕູແຣງແຫ່ງອີຕາລີໃນປີໜ້າ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ນາງຫວັງມານລີ ນັກກິລາໄຕ່ສະເກັດຄວາມໄວຂອງຈີນແນໃສ່ຫຼຽນຄຳງານກິລາໂອລິມປິກລະດູໜາວ.
ເນື່ອງຈາກກິລາໄຕ່ສະເກັດແລະແລ່ນສະກີຕ້ອງລົງທຶນຫຼາຍ, ສະນັ້ນ ຢູ່ຈີນ ກິລາຊະນິດນີ້ຈຶ່ງບໍ່ໄດ້ເຜີຍແຜ່ໂດຍທົ່ວເຖິງກັນເໝືອນປິ່ງປ່ອງແລະດອກປີກໄກ່. ແຕ່ໃນຫຼາຍປີມານີ້, ກິລາໄຕ່ສະເກັດແລະແລ່ນສະກີຂອງຈີນກໍ່ມີຄວາມກ້າວໜ້າຫຼາຍ. ໃນງານກິລາໂອລິມປິກລະດູໜາວເມືອງຊອນທ໌ເລັກອາເມລິກາປີ 2002, ນັກກິລາໄຕ່ສະເກັດຄວາມໄວຈີນເຊິ່ງແມ່ນນາງຢາງຢາງເປັນຕົວແທນຊິງໄດ້ຫຼຽນຄຳຊຶ່ງເປັນຫຼຽນທຳອິດໃນປະຫວັດສາດທີ່ຈີນໄດ້ຮັບໃນງານກິລາໂອລິມປິກລະດູໜາວ. ສ່ວນງານກິລາໂອລິມປິກລະດູໜາວຄັ້ງທີ 20 ຈະຈັດຂຶ້ນຢູ່ຕູແຣງແຫ່ງອີຕາລີໃນຕົ້ນປີ 2006, ນາງຫວັງມານລີ ນັກກິລາໄຕ່ສະເກັດຄວາມໄວທີ່ອາຍຸ 31 ປີຂອງຈີນຖືກຖືວ່າມີຫວັງຊິງໄດ້ຫຼຽນຄຳງານກິລາໂອລິມປິກລະດູໜາວອີກຫຼຽນໜຶ່ງໃຫ້ຈີນ.
ໃນງານແຂ່ງຂັນໄຕ່ສະເກັດຄວາມໄວຊິງຂັນໂລກຕ່າງໆໃນລະດູການແຂ່ງຂັນເທື່ອນີ້, ນາງຫວັງມານລີຊິງໄດ້ແຊມປຽນ 4 ນັດ, ທັງຊິງໄດ້ແຊມປຽນລວມໃນບັ້ນສຸດທ້າຍ. ໃນການແຂ່ງຂັນໄຕ່ສະເກັດຄວາມໄວໃນງານກິລາແຫ່ງຊາດຈີນຄັ້ງທີ 10 ທີ່ສິ້ນສຸດລົງຫວ່າງມໍ່ໆນີ້, ນາງຫວັງມານລີຊິງໄດ້ຫຼຽນຄຳໃນການແຂ່ງຂັນເກັ່ງຮອບດ້ານເພດຍິງ.
ຊີວິດການກິລາຂອງນາງຫວັງມານລີບໍ່ສະດວກປານໃດ, ໃນໄລຍະຕົ້ນ ນາງເສຍໄຊເລື້ອຍໆ ເລີຍຢາກເຊົາ. ພັນລະຍາຂອງທ່ານເຊທຽນເອິນ ຄູຝຶກຂອງນາງແມ່ນຄູຝຶກໄຕ່ສະເກັດຄວາມໄວຂອງໂຮງຮຽນສະໝັກຫຼິ້ນ, 20 ປີກ່ອນ, ນາງໄດ້ສະເໜີນາງຫວັງມານລີໄປຝຶກຢູ່ທີມ ອາຊີບທີ່ຜົວເປັນຄູຝຶກ. ແຕ່ທ່ານເຊທຽນເອີນພັດໄດ້ເຫັນວ່າ, ໃນນັກກິລາ 9 ຄົນທີ່ຢູ່ທີມດຽວກັນ, ລະດັບຂອງນາງຫວັງມານລີຕ່ຳກວ່າໝູ່, ສະນັ້ນຈຶ່ງໃຫ້ນາງກັບຄືນໂຮງຮຽນສະໝັກຫຼີ້ນ. ເວລານີ້ ນາງຫວັງມານລີເລີຍມີແນວຄິດຢາກເຊົາ, ແຕ່ໃນທີ່ສຸດ, ເມື່ອໄດ້ຝຶກແອບຢ່າງລຳບາກກາກກຳເປັນເວລາສອງເດືອນແລ້ວ, ນາງຫວັງມານລີໄດ້ກັບຄືນທີມອາຊີບອີກ. ເມື່ອຫວນຄືນເຖິງປະສົບການດັ່ງກ່າວແລະເປັນຫຍັງຈຶ່ງຍຶດໝັ້ນຝຶກແອບການໄຕ່ສະເກັດນັ້ນ, ນາງຫວັງມານລີເວົ້າວ່າ: ໃນຄາວນັ້ນ ຄູຝຶກໄປຄັດເລືອກນັກກິລາ, ໄດ້ເຫັນຮ່າງກາຍຂອງຂ້າພະເຈົ້າເໝາະສົມ ເລີຍໄດ້ເລືອກເອົາຂ້າພະເຈົ້າ. ເມື່ອຝຶກແອບຄັ້ງທຳອິດ ຂ້າພະເຈົ້າມີຄວາມຮູ້ສຶກບໍ່ດີປານໃດ. ແຕ່ໃນຍາມຍັງນ້ອຍ, ພໍ່ກໍ່ບອກຂ້າພະເຈົ້າວ່າ ເຮັດຫຍັງກໍ່ຕ້ອງຍຶດໝັ້ນພະຍາຍາມຈົນເຖິງທີ່ສຸດ. ສະນັ້ນ ຂ້າພະເຈົ້າຕ້ອງຍຶດໝັ້ນພະຍາຍາມຈົນເຖິງທີ່ສຸດ.
ໃນຊີວິດປະຈຳວັນ, ນາງຫວັງມານລີມີນິດໄສອ່ອນໂຍນ, ແຕ່ເມື່ອລົງສະໜາມໄຕ່ສະເກັດແລ້ວ, ນາງຄືວ່າເປັນຄົນລະຄົນເລີຍ, ມີໃຈບໍ່ຍອມເສຍໂດຍຕະຫຼອດ. ທ່ານເຊທຽນເອິນ ຄູຝຶກຂອງນາງຫວັງມານລີເຄີຍເປັນນັກກິລາໄຕ່ສະເກັດຄວາມໄວ, ແຕ່ໃນໄລຍະຕົ້ນທີ່ສອນນາງຫວັງມານລີນັ້ນ, ທ່ານບໍ່ໄດ້ຊ່ອຍນາງຫວັງມານລີໃຫ້ໄດ້ຮັບຜົນເກັ່ງ. ພາຍຫຼັງມາ, ທ່ານໄດ້ໃຊ້ເວລາສອງເດືອນເຕັມໆ, ພ້ອມກັນກັບນາງຫວັງມານລີຄົ້ນຄວ້າແຜນຝຶກແອບ ການບັນທຶກສະພາບການຝຶກແອບຊູ່ມື້ ວີດີໂອເຕັກນິກແລະອື່ນໆ, ແລະໄດ້ວາງແຜນຝຶກແອບຄົບຊຸດຕາມນິດໄສຂອງນາງຫວັງມານລີ. ພາຍຫຼັງປະຕິບັດຕາມແຜນຝຶກແອບສະບັບໃໝ່ແລ້ວ, ຜົນງານຂອງນາງຫວັງມານລີໄດ້ມີຄວາມກ້າວໜ້າຢ່າງໄວພະລັນ. ທ່ານເຊທຽນເອິນເຫັນວ່າ, ການທີ່ນາງໄດ້ຮັບຜົນນັ້ນແມ່ນແຍກອອກຈາກຄວາມພະຍາຍາມຂອງທ່ານເອງບໍ່ໄດ້, ແຕ່ນິດໄສຂອງນາງຫວັງມານລີແມ່ນປັດໄຈສຳຄັນກວ່າ. ທ່ານເວົ້າວ່າ: ນາງຫວັງມານລີມີບຸກຄະລິກໝັ້ນໜຽວທົນທານ. ຂ້າພະເຈົ້າໄດ້ສອນນັກກິລາມາຫຼາຍຄົນແລ້ວ, ນິດໄສຂອງພວກເຂົາເຈົ້າແມ່ນອ່ອນໂຍນເໝືອນແບ້, ຄູຝຶກໃຫ້ຝຶກອັນໃດເຂົາກໍ່ຝຶກອັນນັ້ນ, ແນ່ນອນຈະສ້າງຜົນງານນີ້ບໍ່ໄດ້. ສ່ວນນາງຫວັງມານລີມີບຸກຄະລິກຕ່າງກັບໝູ່, ທະແນມແຕ່ນາງມີຄວາມເຫັນຕ່າງກັນໃນດ້ານການຝຶກແອບແລະເຕັກນິກ, ນາງກໍ່ຍຶດໝັ້ນທັດສະນະຂອງຕົນ, ນິດໄສແບບນີ້ກໍ່ຊ່ອຍໃຫ້ນາງໄດ້ຮັບຜົນງານດີ. ໃນການແຂ່ງຂັນລະດັບໂລກ, ເຖິງວ່າເສຍໄຊນາງກໍ່ບໍ່ຍອມທໍ້ຖອຍ, ທັງນີ້ລ້ວນແຕ່ໄດ້ພົວພັນເຖິງນິດໄສຂອງນາງໂດຍກົງ. ໃນງານແຂ່ງຂັນນຶກສຶກສາຊິງຊະນະເລີດໂລກທີ່ຈັດຂຶ້ນໃນຫວ່າງບໍ່ດົນນີ້, ນາງໄດ້ເສຍໄຊໃນການແຂ່ງຂັນປະເພດທຳອິດ, ຄົນທີ່ມີນິດໄສທຳມະດານັ້ນ ອາດຈະຍອມແລ້ວ, ແຕ່ນາງຫວັງມານລີພັດຍັງພະຍາຍາມສູ້ຊົນຕໍ່ໄປ, ໃນທີ່ສຸດນາງໄດ້ຮັບຜົນງານລວມເປັນທີໜຶ່ງ.
ຢາກຊິງໄດ້ແຊມປຽນໂລກຕ້ອງໃຊ້ເວລາໄລຍະໜຶ່ງ, ໃນໄລຍະນີ້, ນາງຫວັງມານລີໄດ້ຮັບການຊ່ອຍເຫຼືອຢ່າງຫຼວງຫຼາຍ. ຄອບຄົວແລະພໍ່ແມ່ຂອງນາງໄດ້ສະໜັບສະໜູນນາງຢ່າງບໍ່ລັງເລໃຈຈັກເມັດ. ນາງຫວັງມານລີເວົ້າຢ່າງເປີດອົກເປີດໃຈວ່າ, ຄອບຄົວແລະຄູຝຶກໄດ້ເອົາໃຈໃສ່ແລະຊ່ອຍເຫຼືອນາງເຕີບໂຕເປັນກ້າວໆ, ໃນທີ່ສຸດຍັງຊິງໄດ້ແຊມປຽນໂລກ. ນາງຫວັງຊິງໄດ້ຫຼຽນຄຳໃນງານກິລາໂອລິມປິກລະດູໜາວ ເພື່ອຕອບບຸນແທນຄຸນຄອບຄົວແລະຄູຝຶກ, ແລະເຮັດໃຫ້ຄວາມຝັນຂອງຕົນເອງທີ່ມີມາແຕ່ດົນນານນັ້ນປະກົດຜົນເປັນຈິງ. ນາງເວົ້າວ່າ: ພໍ່ແລະແມ່ລ້ວນແຕ່ສະໜັບສະໜູນຂ້າພະເຈົ້າເປັນພິເສດ, ເຫັນວ່າຂ້າພະເຈົ້າແມ່ນລູກຜູ່ໜຶ່ງທີ່ໄດ້ຜົນສຳເລັດຫຼາຍທີ່ສຸດ. ທະແນມແຕ່ມີການແຂ່ງຂັນທີ່ຂ້າພະເຈົ້າເຂົ້າຮ່ວມ, ພໍ່ແລະແມ່ຂອງຂ້າພະເຈົ້າກໍ່ຈະເບິ່ງໂທລະພາບເປັນປະຈຳ. ສະນັ້ນ, ຂ້າພະເຈົ້າຄວນມີການສະແດງທີ່ດີກວ່າເກົ່າເພື່ອຕອບບຸນແທນຄຸນພໍ່ແມ່. ຂ້າພະເຈົ້າເຫັນວ່າຄູຝຶກກໍ່ໄດ້ຊ່ອຍເຫຼືອຂ້າພະເຈົ້າໃນທຸກດ້ານ, ເຮັດໃຫ້ຂ້າພະເຈົ້າຈາກເດັກໄຮ້ດຽງສາເຕີບໂຕເປັນແຊມປຽນໂລກ. ຂ້າພະເຈົ້າຫວັງຢ່າງແຮງກ້າໂດຍຕະຫຼອດໄປຊິງເອົາຫຼຽນ ໃນງານກິລາໂອ ລິມປິກ, ນີ້ແມ່ນຄວາມຝັນຂອງຂ້າພະເຈົ້າທີ່ມີມາແຕ່ຍັງນ້ອຍ.
ນາງຫວັງມານລີອາຍຸ 31 ປີແລ້ວ ມໍ່ຈະໝົດຊີວິດກິລາ, ນາງເປັນຄົນມັກຮັກກິລາໄຕ່ສະເກັດທີ່ສຸດ ຫວັງວ່າຈະເຮັດວຽກເປັນຄູຝຶກຫຼືມີອາຊີບທີ່ກ່ຽວຂ້ອງກັບກິລາໄຕ່ສະເກັດແລະແລ່ນສະກີພາຍຫຼັງອອກການແລ້ວ, ເພື່ອຖ່າຍທອດບົດຮຽນຂອງຕົນໃຫ້ນັກກິລາໜຸ່ມ, ຊ່ອຍພວກເຂົາເຈົ້າໄດ້ຮັບຜົນສຳເລັດຫຼາຍກວ່າຕົນ.
|
