|
|
(GMT+08:00)
2005-05-09 15:34:14
|
|
ບັນດາປະເທດເອີລົບຈັດການເຄື່ອນໄຫວສະຫຼອງວັນໄຊຊະນະຂອງສົງຄາມໂລກຄັ້ງທີສອງຄົບຮອບ 60 ປີ
cri
Author: li
ຕາມຂ່າວ CRI: ວັນທີ 8 ພຶດສະພາເມື່ອ 60 ປີກ່ອນ,ເຢຍລະມັນນາຊີປະກາດຍອມຈຳນົນຕໍ່ທະຫານພັນທະມິດ. ນີ້ໄດ້ປະກາດເປັນທາງການວ່າ,ການສູ້ລົບໃນສະໜາມລົບເອີລົບຂອງສົງຄາມໂລກຄັ້ງທີສອງໄດ້ສິ້ນສຸດລົງ. ຫຼັງຈາກມື້ນັ້ນ 60 ປີ,ບັນດາປະເທດເອີລົບພາກັນຈັດການເຄື່ອນໄຫວສະຫຼອງຢ່າງຄຶກຄື້ນ,ໄວ້ອາໄລແລະລະລຶກນາຍແລະພົນທະຫານຂອງທະຫານພັນທະມິດແລະສາມັນຊົນຜູ້ບໍ່ມີໂທດຫຍັງທີ່ເສຍຊີວິດໃນສົງຄາມບັ້ນນັ້ນ.
ວັນທີ 8 ພຶດສະພາ ຢູ່ສຸສານທະຫານອາເມລິກາທີ່ມາກຼາເທັນທີ່ຕັ້ງຢູ່ມັສທຼີສ໌ ເມືອງທີ່ມີຊື່ສຽງໄປທາງທິດຕາເວັນອອກ 10 ກິໂລແມັດ,ໂຮນລັງໄດ້ຈັດພິທີລະລຶກ,ບຸກຄົນວົງການຕ່າງໆເຊິ່ງລວມທັງທ່ານບຸສ ປະທານາທິບໍດີອາເມລິກາ,ພະລາຊີນີໂຮນລັງແລະນັກລົບເກົ່າຂອງອາເມລິກາແລະໂຮນລັງທີ່ເຄີຍເຂົ້າຮ່ວມສົງຄາມໂລກຄັ້ງທີສອງ 100 ກວ່າຄົນໄດ້ເຂົ້າຮ່ວມພິທີລະລຶກ. ຢູ່ສຸສານທະຫານອາເມລິກາທີ່ມາກຼາເທັນໄດ້ຝັງສົບທະຫານອາເມລິກາທີ່ເສຍສະຫຼະໃນສົງຄາມໂລກຄັ້ງທີສອງປະມານ 8300 ຄົນ.
ໃນເວລາກ່າວຄຳປາໄສ ທ່ານບຸສກ່າວວ່າ,ເສຂຸມຝັງສົບນັບເປັນພັນໃນສຸສານສະແດງໃຫ້ເຫັນວ່າ,ອາເມລິກາໄດ້ເສຍຄ່າຕອບແທນອັນເຈັບແສບເພື່ອເສລີພາບຂອງເອີລົບ. ທ່ານເວົ້າວ່າ,ມື້ນີ້ ໃນເວລາຄົນທັງຫຼາຍລະລຶກໄຊຊະນະອັນຍິ່ງໃຫຍ່ດັ່ງກ່າວນັ້ນ ຄວນຈື່ຈຳຄ່າຕອບແທນຂອງນັກລົບເຫຼົ່ານີ້. ອາເມລິກາຫວັງໃຫ້ພ້ອມກັນກັບປະເທດເອີລົບ,ທຳຄວາມພະຍາຍາມເພື່ອຊຸກຍູ້ພາລະກິດແຫ່ງເສລີພາບ.
ມື້ດຽວກັນ,ຢູ່ຕໍ່ໜ້າປະຕູໄຊທີ່ປາຣີ,ຝຣັ່ງໄດ້ຈັດການເຄື່ອນໄຫວລະລຶກວັນໄຊຊະນະໃນສະໜາມລົບເອີລົບຢ່າງຄຶກຄື້ນ,ທ່ານຊີລັກ ປະທານາທິບໍດີຝຣັ່ງໄດ້ເປັນປະທານຈັດພິທີລະລຶກແລະໄດ້ກວດແຖວກອງກຽດຕິຍົດທະຫານສາມເຫຼົ່າທັບຂອງຝຣັ່ງ. ທ່ານຊີລັກໄດ້ວາງພວງມາລາຢູ່ສຸສານນັກລົບນີລະນາມຜູ້ເສຍສະຫຼະຢູ່ໃຕ້ປະຕູໄຊ,ແລະມອບຫຼຽນກອງພົນກຽດຕິຍົດໃຫ້ສະມາຊິກຂອງຂະບວນການຕໍ່ຕ້ານຂອງຝຣັ່ງໃນຄາວນັ້ນແລະບຸກຄົນທີ່ຖືກພັດຖິ່ນໃນສົງຄາມໂລກຄັ້ງທີສອງ 8 ຄົນ.
ວັນທີ 8 ພຶດສະພາ ແຫ່ງຕ່າງໆຂອງອັງກິດກໍໄດ້ຈັດການເຄື່ອນໄຫວລະລຶກຫຼາຍເທື່ອ. ສົມເດັດຊາຣສ໌ ອົງມົງກຸດລາຊະກຸມານຂອງອັງກິດໄດ້ໄປວາງພວງມາລາຢູ່ອານຸສາວະລີນັກລົບຜູ້ເສຍສະຫຼະທີ່ຕັ້ງຢູ່ໃຈກາງເມືອງລອນດອນ, ທະຫານປະຈຳການແລະອອກປະຈຳການພ້ອມດ້ວຍຄອບຄົວປະມານ 4000 ຄົນໄດ້ເຂົ້າຮ່ວມການລະລຶກດັ່ງກ່າວ. ຕອນຄ່ຳວັນທີ 8 ພຶດສະພາ ຢູ່ສະໜາມຫຼວງທຼາຟາໃຈກາງເມືອງລອນດອນ ໄດ້ຈັດງານຄອນເສີດຂະໜາດໃຫ່ເພື່ອລະລຶກ"ວັນໄຊຊະນະຂອງເອີລົບ"ທີ່ມີໝື່ນຄົນເຂົ້າຮ່ວມ.
ວັນທີ 8 ພຶດສະພາ ຢູ່ແບກແລງ ນະຄອນຫຼວງຂອງເຢຍລະມັນໄດ້ຈັດການເຄື່ອນໄຫວລະລຶກ. ຢູ່ຫໍລະລຶກຜູ້ປະສົບເຄາະຮ້າຍໃນສົງຄາມທີ່ຕັ້ງຢູ່ໃຈກາງເມືອງແບກແລງ,ທ່ານໂຄເລີ ປະທານາທິບໍດີ ທ່ານສະໂລເດີ ນາຍົກລັດຖະມົນຕີແລະທ່ານເທຍເຊີ ປະທານສະພາສະຫະພັນຂອງເຢຍລະມັນໄດ້ໄປວາງພວງມາລາໃຫ້ຜູ້ປະສົບເຄາະຮ້າຍ. ທ່ານໂຄເລີກ່າວວ່າ,ຊາວເຢຍລະມັນມີໜ້າທີ່ຈື່ຈຳຄວາມທໍລະມານທັງໝົດແລະມູນເຫດທີ່ພາໃຫ້ເກີດຄວາມທໍລະມານເຫຼົ່ານີ້ດແລະປ້ອງກັນບໍ່ໃຫ້ຄວາມທໍລະມານເຫຼົ່ານີ້ເກີດຂຶ້ນຄືນໃໝ່.
ວັນທີ 8 ພຶດສະພາ ໂປໂລຍ,ເຊັກແລະແບນຊິກເປັນຕົ້ນກໍໄດ້ຈັດການເຄື່ອນໄຫວລະລຶກດ້ວຍຮູບການຕ່າງໆ,ພ້ອມກັນຫວນຄືນບາດແຜຂອງສົງຄາມ,ເພື່ອເຕືອນຄົນທັງຫຼາຍຖະໜອມສັນຕິພາບທີ່ໄດ້ມາບໍ່ງ່າຍ.
ໃນເວລາບັນດາປະເທດເອີລົບລະລຶກສົງຄາມໄດ້ຮັບໄຊຊະນະຢ່າງຄຶກຄື້ນນັ້ນ ພວກນາຊີໃໝ່ສ່ວນໜ້ອຍຂອງເຢຍລະມັນພັດອອກສຽງບໍ່ກົມກຽວກັນ,ໄດ້ກາຍເປັນເງົາມືດປົກຫຸ້ມການເຄື່ອນໄຫວສະຫຼອງ. ຂ່າວແຈ້ງວ່າ,ວັນທີ 8 ພຶດສະພາ ພວກປີກຂວາຈັດຂອງເຢຍລະມັນປະມານ 3300 ຄົນໄດ້ເຕົ້າໂຮມກັນຢູ່ສະໜາມຫຼວງອາເລັກຊັນເດີຂອງແບກແລງ,ກຽມແຫ່ຂະບວນ,ມີປະຊາຊົນປະມານ 6 ພັນຄົນທີ່ຄັດຄ້ານນາຊີໃໝ່ໄປສະກັດກັ້ນ,ສອງຝ່າຍໄດ້ເກີດການປະທະກັນຂະໜາດນ້ອຍ. ເຖິງວ່າພວກນາຊີໃໝ່ມີບໍ່ຫຼາຍໃນເອີລົບກໍຕາມ,ແຕ່ເຫດການດັ່ງກ່າວໄດ້ເຕືອນຄົນທັງຫຼາຍອີກເທື່ອໜຶ່ງວ່າ,ວິນຍານຂອງລັດທິນາຊີໃໝ່ຍັງບໍ່ທັນສູນຫາຍໄປໝົດເທື່ອຢູ່ເອີລົບ,ຄົນທັງຫຼາຍຍັງຕ້ອງຮັກສາສະຕິລະວັງຕົວໃນລະດັບສູງ.
ວັນທີ 8 ພຶດສະພາປີ 1945 ເຢຍລະມັນນາຊີຍອມຈຳນົນຕໍ່ທະຫານພັນທະມິດ. ໃນປີນັ້ນ ເມື່ອທະຫານພັນທະມິດປຶກສາຫາລືກັນແລ້ວເຫັນດີກຳນົດເອົາວັນທີ 9 ພຶດສະພາເປັນວັນສະຫຼອງໄຊຊະນະໃນສະໜາມລົບເອີລົບ.
|
|
|