|
ຕາມຂ່າວCRI ຄຽງຄູ່ກັບຟ້າຝົນລົມແດງເຄິ່ງສະຕະວັດກວ່າຜ່ານໄປ ໃນຄວາມຊົງຈຳຂອງຄົນທັງຫຼາຍ ສົງຄາມໂລກຄັ້ງທີສອງບໍ່ພຽງແຕ່ບໍ່ໄດ້ຈາງຫາຍໄປ ຜູ່ທີ່ຮັກຫອມຕິພາບຍັງໄດ້ເພີ່ມຄວາມຫມາຍໃຫມ່ໃຫ້ອີກຊ້ຳ ແຕ່ວ່າຄົນທັງຫຼາຍກໍຄວນເອົາໃຈໃສ່ວ່າ ນັບມາຮອດປັດຈຸບັນ ລັດທິຟັດຊິດຍັງບໍ່ສູນຫາຍໄປເທື່ອ ໂດຍສະເພາະແມ່ນຢູ່ອີຕາລີ ແຫຼ່ງກຳເນີດຂອງມັນ ນັກເລງການເມືອງສ່ວນຫນ້ອຍຍັງຫມາຍຈະບິດເບືອນເລື່ອງຈິງ ເຮັດໃຫ້ຄົນທັງຫຼາຍລືມປະຫວັດສາດໃນເມື່ອກ່ອນ
ຄົນໃນຍຸກປັດຈຸບັນຄວນເບິ່ງສົງຄາມໂລກຄັ້ງທີສອງແນວໃດ ກ່ຽວກັບບັນຫານນີ້ ທ່ານເຈມສ໌ ຄຼີການ ອະທິການບໍດີມະຫາວິທະຍາໄລຈອນຄາເບີດແຫ່ງກຸງໂຣມໄດ້ປະກາດຄວາມເຫັນທີ່ຕ່າງຫມູ່ ທ່ານກ່າວວ່າ ຂ້າພະເຈົ້າເອງເຫັນວ່າ ຄວາມຊົງຈຳກ່ຽວກັບສົງຄາມຕ້ານຟັດຊິດຂອງໂລກປະໄວ້ໃຫ້ພວກເຮົານັ້ນກໍ່ແມ່ນສົງຄາມທີ່ປະຊາຊົນຂອງຫຼາຍປະເທດເຊິ່ງລວມທັງຈີນແລະອີຕາລີດຳເນີນເພື່ອສະແຫວງຫາເສລີພາບ
ໃນສົງຄາມຕ້ານຟັດຊິດບັ້ນນີ້ ທະຫານຜູ່ຫນຸ່ມນ້ອຍເປັນຈຳນວນຫຼວງຫຼາຍໄດ້ສະຫຼະຊີວິດແລະເລືອດເນື້ອຢູ່ປ່າຊ້າທະຫານອາເມລິກາຊີຊີລີ ໂຣມຢູ່ຊານເມືອງໂຣມ ໄດ້ຝັງສົບທະຫານອາເມລິກາ 1 ຫມື່ນກວ່າຄົນທີ່ເສຍຊີວິດຢູ່ສະຫນາມລົບອີຕາລີໃນສະໄຫມສົງຄາມໂລກຄັ້ງທີສອງ ຢູ່ແຫ່ງນັ້ນ ນັກຂ່າວໄດ້ພໍ້ທ່ານໂຢເຊັຟ ເບວິນອາຄວາ ນັກລົບເກົ່າສົງຄາມໂລກຄັ້ງທີສອງ,ເພິ່ນໄດ້ຕັ້ງຈາກອາເມລິະກາຂ້ຽວເດີນທາງມາປັດກວາດຊຸມສົບໃຫ້ເພື່ອນຮ່ວມລົບໃນຄາວນັ້ນ ທ່ານກ່າວວ່າ ນັກຣົບທີ່ນອນຢູ່ແຫ່ງນີ້ລ້ວນແຕ່ແມ່ນຊາວຫນຸ່ມແຕ່ອາຍຸແຕ່ 18 ປີຮອດ 25 ປີ,ໃນຄາວນັ້ນ ທົ່ວໂລກລ້ວນແຕ່ພວມດຳເນີນສົງຄາມຕ້ານຟັດຊິດ ວຽກທີ່ພວກເຂົາເຈົ້າເຮັດນັ້ນແມ່ນວຽກທີ່ຍິ່ງໃຫຍ່ ພວກເຂົາເຈົ້າພັດພາກຈາກປະເທດຊາດທີ່ຢູ່ກວງໄກມາແຫ່ງນີ້ ໂດຍບໍ່ຮູ້ວ່າແຫ່ງນີ້ມີຫຍັງຄອງຄອຍພວກເຂົາເຈົ້າ ພວກເຂົາເຈົ້າໄດ້ເສຍສະຫຼະຢ່າງໃຫຍ່ຫຼວງ ສະຫຼະຊີວີດທີ່ຫນຸ່ມນ້ອຍ ບາງຄົນຍັງເຈັບປວດທໍລະມານໃນເວລາຈະພີຊີບໄປ
ໃນເວລາທ່ານເຟແວວນັກຣົບເກົ່າອັງກິດໃຫ້ສຳພາດຕໍ່ນັກຂ່າວນັ້ນ ທ່ານກໍໄດ້ກ່າວທັດສະນະເຊັ່ນດຽວກັນ ທ່ານເຫັນວ່າ ມີແຕ່ຄົນທີ່ເຄຣຍປະສົບສົງຄາມທໍ່ນັ້ນຈຶ່ງຮູ້ ຄວາມລ້ຳຄ່າຂອງສັນຕິພາບ
ແຕ່ວ່າ ສິ່ງທີ່ເຮັດໃຫ້ນັກຣົບເກົ່າເຫຼົ່ານີ້ຮູ້ສຶກຄວາມເສຍໃຈນນັ້ນແມ່ນໃນຫຼາຍປີມານີ້ ເຢຍລະມັນ ຍີ່ປຸ່ນແລະອີຕາລີເປັນຕົ້ນລ້ວນແຕ່ໄດ້ເກີດມີປະກົດການທີ່ອິດທິກຳລັງຂວາຈັດຂອງຟັດຊິດເງີຍຫົວຂຶ້ນ ນັກເລງການເມືອງສ່ວນຫນ້ອຍຈົນກະທັ້ງຫມາຍຈະພິກປີ້ນປະຫວັດສາດ ປ່ຽນແປງທາດແທ້ຂອງຟັດຊິດ ບັນດານັກຣົບເກົ່າຊີ້ອອກວ່າ ນີ້ແມ່ນການຢຽດຫຍາມອັນໃຫຍ່ຫຼວງຕໍ່ທະຫານສາມັນທີ່ເຄີຍເຂົ້າຮ່ວມສົງຄາມຕ້ານຟັດຊິດ
ທ່ານເດວິດ ມິນເລີ ສາດສະດາຈານປະຫວັດສາດມະຫາວິທະຍາໄລ_ແຊງຈອນແຫ່ງໂຣມຊີ້ອອກວ່າ ຢູ່ອີຕາລີ ແຫຼ່ງກຳເນີດຂອງລັດທິຟັດຊິດ ຫຼາຍປີມານນີ້ ນັກເລງການເມືອງຈຳນວນຫນ້ອຍໄດ້ມີທ່າງ່ຽງອັນຊົ່ວຮ້າຍຢ່າງຫນຶ່ງ ພວກເຂົາໃຊ້ວິທີຕ່າງໆ ຫມາຍຈະເຮັດໃຫ້ຄົນທັງຫຼາຍລືມໂທດກຳຂອງພວກຟັດຊິດ ພວກເຣົາຕ້ອງບອກໃຫ້ເຊັ່ນລູກຫຼາຍຮູ້ເລື່ອງຈິງ ແລະໃຫ້ພວກເຂົາເຈົ້າປະເຊີນຫນ້າກັບເລື່ອງຈິງ
ສິ່ງທີ່ເຮັດໃຫ້ຄົນທັງຫຼາຍປະໂລມໃຈນັ້ນແມ່ນ ຫຼັງຈາກສົງຄາມໂລກຄັ້ງທີສອງ ສາມັນຊົນອີຕາລີທີ່ເຄີຍຕົກທຸກໄດ້ຍາກຍ້ອນສົງຄາມນັ້ນໄດ້ຮັກສາສະຕິລັງວັງຕົວໃນລະດັບສູງຕໍ່ລັດທິຟັດຊິດຕະຫຼອດມາ ໃນເວລາທ່ານພາໂວເຊໂລ ນັກວິຈານການເມືອງທີ່ມີຊື່ສຽງຂອງອີຕາລີໃຫ້ສຳພາດຕໍ່ນັກຂ່າວນັ້ນ ທ່ານກ່າວວ່າ ກໍຍ້ອນຄວາມທຸກທໍລະມາມານອັນມະຫາສານເນື່ອງຈາກສົງຄາມເຮັດໃຫ້ບຸກຄົນທີ່ຮັກຫອມສັນຕິພາບມີຄວາມຮັບຜິດຊອບຢ່າງຫນຶ່ງ ນັ້ນກໍ່ຄືບໍ່ໃຫ້ຄົນຮຸ້ນຫຼັງລືມໄພພິບັດອັນຫນັກຫນາທີ່ຟັດຊິດນຳມາໃຫ້ມວນມະນຸດ ທ່ານກ່າວວ່າ ມີແຕ່ຫັນຫນ້າໃສ່ປະຫວັດອັນມືດມົນໃນອະດີດ ຖືປະຫວັດສາດເປັນແວ່ນແຍງທໍ່ນັ້ນ ອີຕາລີຈຶ່ງຈະບໍ່ຕົກລົງບວກຕົມແຫ່ງຟັດຊິດອີກ
|
