|
|
(GMT+08:00)
2005-05-10 17:19:44
|
|
ໃນ 60 ປີຫລັງສົງຄາມໂລກ, ການພົວພັນຈີນຍີ່ປຸ່ນໄດ້ຂະຫຍາຍຕົວຢ່າງວ່ອງໄວ
cri
Author: mo
ປີນີ້ແມ່ນປີທີ່ສົງຄາມຕໍ່ຕ້ານຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟັດຊິດຂອງໂລກໄດ້ຮັບໄຊຊະນະຄົບຮອບ 60 ປີ. ເຖິງວ່າສົງຄາມຮຸກຮານທີ່ລັດທິລັດຖະທະຫານຍີ່ປຸ່ນກໍ່ຂຶ້ນນັ້ນໄດ້ນຳເອົາມະຫັນຕະໄພມາໃຫ້ປະຊາຊົນຈີນກໍ່ຕາມ, ແຕ່ລັດຖະບານຈີນໄດ້ເອົາການປົກປັກຮັກສາແລະຂະຫຍາຍການພົວພັນໄມຕີຈິດຖານບ້ານໃກ້ເຮືອນຄຽງຈີນຍີ່ປຸ່ນເປັນນະໂຍບາຍແຫ່ງຊາດທີ່ຍາວນານຢ່າງສະເໝີຕົ້ນສະເໝີປາຍ, ໄດ້ຈັດຢູ່ໃນຖານະສຳຄັນໃນການພົວພັນກັບຕ່າງປະເທດ, ແລະໄດ້ສ້າງການພົວພັນຄູ່ຂາຮ່ວມມືດ້ວຍໄມຕີຈິດທີ່ສຸມກຳລັງເຂົ້າໃນສັນຕິພາບແລະການພັດທະນາລະຫວ່າງຈີນຍີ່ປຸ່ນ. ໃນເວລາກ່າວເຖິງການພົວພັນຈີນຍີ່ປຸ່ນຫລັງສົງຄາມ, ເຈົ້າໜ້າທີ່ແລະນັກປາດຈີນກ່າວວ່າ, ໃນ 60 ປີມານີ້, ການພົວພັນລະຫວ່າງສອງປະເທດໄດ້ຂະຫຍາຍຕົວຢ່າງວ່ອງໄວ, ແລະມີຜົນສະທ້ອນຢ່າງເລິກເຊິ່ງຍາວໄກ.
ຈີນຍີ່ປຸ່ນແມ່ນປະເທດໃກ້ຄຽງ, ມີປະຫວັດສາດທີ່ໄປມາຫາສູ່ກັນດ້ວຍໄມຕີຈິດເປັນເວລາ 2 ພັນກວ່າປີ, ໃນໄລຍະສ່ວນຫລາຍ, ປະຊາຊົນສອງປະເທດຢູ່ຮ່ວມກັນຢ່າງປອງດອງກັນ. ທ່ານໂຈວເອີນລາຍ ນາຍົກລັດຖະມົນຕີຊຸດທຳອິດຂອງປະເທດຈີນໃໝ່ເຄີຍໃຊ້ຄຳເວົ້າທີ່ວ່າ"ມີມິດຕະພາບຕໍ່ກັນສອງພັນປີ, ເປັນປໍລະປັກກັນ 50 ປີ"ມາວາດພາບການພົວພັນຈີນຍີປຸ່ນ. ການຂະຫຍາຍການພົວພັນມິດຕະພາບແລະຮ່ວມມືກັນຈີນຍີ່ປຸ່ນທີ່ຍາວນານແລະໝັ້ນທ່ຽງແມ່ນທິດທາງຕໍ່ຍີ່ປຸ່ນທີ່ຜູ້ນຳຫລາຍຮຸ້ນຂອງຈີນລິເລີ່ມໂດຍຕະຫລອດ, ແລະກໍແມ່ນນະໂຍບາຍພື້ນຖານຕໍ່ຍີ່ປຸ່ນທີ່ລັດຖະບານຈີນປະຕິບັດ. ແຕ່ສ້າງຕັ້ງປະເທດຈີນໃໝ່ຮອດການພົວພັນຈີນຍີ່ປຸ່ນຟື້ນຟູເປັນປົກກະຕິເມື່ອປີ 1972, ການໄປມາຫາສູ່ກັນທາງພົນລະເຮືອນ, ໃຊ້ການພົວພັນດ້ານພົນລະເຮືອນມາຊຸກຍູ້ການພົວພັນຝ່າຍທາງການ, ແລະຂະຫຍາຍການພົວພັນຝ່າຍທາງການກັບຝ່າຍພົນລະເຮືອນໄປພ້ອມກັນທີ່ລັດຖະບານຈີນລິເລີ່ມນັ້ນເຮັດໃຫ້ການຂະຫຍາຍການພົວພັນຈີນຍີ່ປຸ່ນໄດ້ຮັບໝາກຜົນອັນຕັ້ງໜ້າ. ບົນພື້ນຖານທີ່ລັດຖະບານຍີ່ປຸ່ນສະແດງຄວາມເຂົ້າໃຈແລະເຄົາລົບອາລົມຈິດຂອງມວນຊົນຈີນທີ່ປະສົບທຳຮ້າຍດ້ວຍທ່າທີສຳຫລວດຕົນເອງແລະຂໍຂະມາໂທດນັ້ນ ການພົວພັນຈີນຍີ່ປຸ່ນໄດ້ຟື້ນຟູເປັນປົກກະຕິເມື່ອປີ 1972. ທ່ານລີຈ້າວຊິງ ລັດຖະມົນຕີການຕ່າງປະເທດຈີນໄດ້ຕີລາຄາສູງຕໍ່ການພົວພັນຈີນຍີ່ປຸ່ນຫລັງການສ້າງສາຍສຳພັນທາງການທູດ. ທ່ານເວົ້າວ່າ: ແຕ່ສ້າງສາຍສຳພັນທາງການທູດ 30 ກວ່າປີມານີ້, ໃນດ້ານການເມືອງ ເສດຖະກິດ ວັດທະນະທຳ ການສຶກສາແລະການໄປມາຫາສູ່ກັນທາງພົນລະເຮືອນ, ສອງປະເທດໄດ້ຮັບການຂະຫຍາຍຕົວອັນໃຫຍ່ຫລວງ, ໄດ້ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດ, ແລະກໍໄດ້ມີບົດບາດຊຸກຍູ້ຕໍ່ສັນຕິພາບແລະການພັດທະນາຂອງພາກພື້ນຕົນກໍຄືຂອງໂລກ. ເອກະສານການເມືອງສາມສະບັບຄື"ຖະແຫລງການຮ່ວມຈີນຍີ່ປຸ່ນ" "ສົນທິສັນຍາສັນຕີພາບມິດຕະພາບຈີນຍີ່ປຸ່ນ"ແລະ"ຄຳຖະແຫລງການຮ່ວມຈີນຍີ່ປຸ່ນ"ແມ່ນພື້ນຖານການເມືອງແຫ່ງການຂະຫຍາຍການພົວພັນຈີນຍີ່ປຸ່ນ. ໃນເວລາລັດຖະບານຍີ່ປຸ່ນຊຳລະບັນຫາປະຫວັດສາດຢ່າງຖືກຕ້ອງ, ປະຕິບັດຕໍ່ແລະຮັບຮູ້ປະຫວັດສາດລັດທິລັດຖະທະຫານຍີ່ປຸ່ນຮຸກຮານຈີນຢ່າງຖືກຕ້ອງນັ້ນ, ການພົວພັນຈີນຍີ່ປຸ່ນກໍຈະຂະຫຍາຍຕົວອອກແລະກ້າວໄປໜ້າ. ທ່ານຈາງລີ້ລີ້ ຫົວໜ້າຂະແໜງວິຊາການທູດຂອງວິທະຍາຄານການຕ່າງປະເທດຈີນ ຜູ້ຊ່ຽວຊານກ່ຽວກັບບັນຫາຈີນຍີ່ປຸ່ນໄດ້ໃຊ້ຈຸດພິເສດ 3 ຂໍ້ຄື"ຄວາມໂຕນກັນຫລາຍ, ຂະຫຍາຍຕົວຢ່າງວ່ອງໄວ, ແລະມີຜົນສະທ້ອນເລິກເຊິ່ງຍາວໄກ" ມາວາດພາບການພົວພັນຈີນຍີ່ປຸ່ນຫລັງສົງຄາມ 60 ປີມານີ້. ທ່ານເວົ້າວ່າ:
ພາຍຫລັງການພົວພັນຈີນຍີ່ປຸ່ນຟື້ນຟູເປັນປົກກະຕິແລ້ວ, ການພົວພັນຈີນຍີ່ປຸ່ນໄດ້ຂະຫຍາຍຕົວຢ່າງວ່ອງໄວ. ການພົວພັນສອງຝ່າຍໃນຖານເປັນສອງມະຫາປະເທດໃນໂລກ, ການພົວພັນຈີນຍີ່ປຸ່ນມີຜົນສະທ້ອນແລະບົດບາດອັນສຳຄັນຕໍ່ຄວາມປອດໄພແລະສະຖຽນລະພາບຂອງພາກພື້ນອາຊີຕາເວັນອອກ ພາກພື້ນອາຊີປາຊີຟິກ, ກໍຄືຕໍ່ສັນຕິພາບໂລກ. ນີ້ໄດ້ລື່ນກາຍຄວາມໝາຍສອງຝ່າຍຢ່າງກວາງໄກແລ້ວ.
ຄວນເຫັນໄດ້ວ່າ, ສົງຄາມຮຸກຮານຈີນທີ່ລັດທິລັດຖະທະຫານຍີ່ປຸ່ນກໍ່ຂຶ້ນໃນສະຕະວັດທີ່ແລ້ວໄດ້ເຮັດໃຫ້ປະຊາຊົນຈີນຈື່ຈຳຈົນເທົ່າໃດໆ.
ລັດຖະບານຈີນໄດ້ຢືນຢູ່ລະດັບສູງທາງຍຸດທະສາດ, ປະຕິບັດຕໍ່ການພົວພັນຈີນຍີ່ປຸ່ນດ້ວຍສາຍຕາຍາວໄກ, ເອົາການ"ຖືປະຫວັດສາດເປັນແວ່ນແຍງ, ອວ່າຍໜ້າໄປສູ່ອະນາຄົດ"ເປັນຫລັກມາດຖານອັນພື້ນຖານໃນການຊຳລະການພົວພັນຈີນຍີ່ປຸ່ນ. ແຕ່ໃນໄລຍະມໍ່ໆມານີ້, ຍີ່ປຸ່ນໄດ້ຍຶດໝັ້ນທ່າທີຜິດພາດໃນບັນຫາປະຫວັດສາດ, ຝ່າຝືນຄຳໝັ້ນສັນຍາຂອງຍີ່ປຸ່ນໃນບັນຫາປະຫວັດສາດ, ໃຊ້ການກະທຳອັນຜິດພາດທີ່ບາດໃຈປະຊາຊົນຈີນແລະປະຊາຊົນອາຊີຢ່າງບໍ່ຢຸດຢັ້ງ, ໄດ້ພາໃຫ້ປະເທດອາຊີເຊິ່ງລວມທັງຈີນຄຽດແຄ້ນຢ່າງຮຸນແຮງ.
ປີນີ້ແມ່ນປີທີ່ສົງຄາມຕໍ່ຕ້ານຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟັດຊິດຂອງໂລກໄດ້ຮັບໄຊຊະນະຄົບຮອບ 60 ປີ, ແລະກໍແມ່ນປີສຳຄັນກວ່າໝູ່ສຳລັບການຂະຫຍາຍການພົວພັນຈີນຍີ່ປຸ່ນ. ທ່ານຈາງລີ້ລີ້ເຫັນວ່າ, ການປະຕິບັດຕໍ່ປະຫວັດສາດຢ່າງຖືກຕ້ອງ, ສະຫລຸບບົດຮຽນທາງບວກແລະທາງລົບ, ການພົວພັນຈີນຍີ່ປຸ່ນຈື່ງຈະຂະຫຍາຍຕົວຢ່າງປອດໃສໄດ້, ນີ້ກໍແມ່ນພື້ນຖານທີ່ຍີ່ປຸ່ນຈະໄດ້ຮັບຄວາມໄວ້ເນື້ອເຊື່ອໃຈຈາກປະເທດອ້ອມຂ້າງແລະປະຊາຄົມໂລກ.
|
|
|