|
|
(GMT+08:00)
2005-05-10 17:52:01
|
|
ຕ້ອງເຄາະລະຄັງເຕືອນໃຈເລື້ອຍໆ
cri
Author: sayvanny
ປີນີ້ແມ່ນປີລະລຶກສົງຄາມຕ້ານຟັດຊິດຂອງໂລກໄດ້ຮັບໄຊຊະນະຄົບ ຮອບ 60 ປີ.ໃນຂະນະທີ່ຄົນທັງຫລາຍຈັດການເຄື່ອນໄຫວສະເຫລີມສະ ຫລອງຕ່າງໆນາໆນັ້ນ,ກໍ່ຕ້ອງເບິ່ງເຫັນຢ່າງມີສະຕິປອດໂປ່ງວ່າ, ທ່າງ່ຽງ ຂວາຈັດຢູ່ພາຍໃນປະເທດເຢຍລະມັນໃນສະເພາະຫນ້ານີ້ມີທ່ວງທ່າຟື້ນຊີບຄືນມາ.ຊາວເຢຍລະມັນທີ່ບໍ່ເຄີຍຜ່ານສົງຄາມ,ໂດຍສະເພາະແມ່ນຊາວຫນຸ່ມຈະຮູ້ຈັກປະຫວັດສາດຢ່າງຖືກຕ້ອງໄດ້ຫລືບໍ່?ລັດຖະບານເຢຍລະມັນຈະຖອດຖອນເອົາບົດຮຽນຄຳສອນຈາກປະຫວັດສາດແນວໃດ,ຕ່າວໂຈມຕີອິດທິກຳລັງຂວາຈັດແລະອິດທິກຳລັງຕ້ານຢິວ? ນັກຂ່າວວິທະຍຸ CRI ປະຈຳເຢຍລະມັນໄດ້ນຳບັນຫາເຫລົ່ານີ້ໄປສຳພາດຊາວເຢຍລະມັນສ່ວນຫນຶ່ງ.
ຊາວຫນຸ່ມແມ່ນອະນາຄົດຂອງປະເທດຫນຶ່ງ.ມີແຕ່ໃຫ້ຊາວຫນຸ່ມຮັບຮູ້ປະຫວັດສາດຢ່າງຖືກຕ້ອງທໍ່ນັ້ນ,ພວກເຂົາເຈົ້າຈິ່ງສາມາດປະເຊີນຫນ້າກັບສະພາບຕົວຈິງໄດ້, ແລະໄດ້ຮັບຄວາມເຄົາລົບ.ຍ້ອນມີຄວາມຮັບຮູ້ແນວນີ້, ການສຶກສາປະຫວັດສາດກ່ຽວກັບສົງຄາມໂລກຄັ້ງທີສອງຈິ່ງໄດ້ມີຖານະສຳຄັນສົມຄວນໃນການສຶກສາພື້ນຖານຂອງໂຮງຮຽນເຢຍລະມັນ,ກະຊວງສຶກສາທິການເຢຍລະມັນແລະພະແນກສຶກສາທິການຂອງລັດຕ່າງໆຈິ່ງໄດ້ມີການກຳນົດຢ່າງຈະແຈ້ງຕໍ່ການສິດສອນປະຫວັດສາດສົງຄາມໂລກຄັ້ງທີສອງ. ທ່ານໂຮຟມາຍເອີ ຮອງຜູ່ອຳນວຍການໂຮງຮຽນມັດທະຍົມນອຍກີເຊັນລັດບາວາເລຍຂອງເຢຍລະມັນແນະນຳວ່າ:
ເວົ້າໃຫ້ລະອຽດແລ້ວກໍ່ແມ່ນ, ກ່ອນອື່ນ ຕ້ອງໃຫ້ນັກຮຽນຮູ້ວ່າພວກນາຊີໄດ້ຍາດເອົາອຳນາດການປົກຄອງດ້ວຍກຳລັງຮຸນແຮງແລະວິທີທີ່ດູຫມີ່ນມະ ນຸດສະຍະພາບ, ແລະເຜີຍແຜ່ທິດສະດີແນວຄິດຂອງເຂົາ. ຂໍທີສອງຂອງຄວາມຮູ້ພື້ນຖານແມ່ນ, ສົງຄາມໂລກຄັ້ງທີສອງໄດ້ນຳເອົາໄພພິບັດອັນບໍ່ມີບ່ອນສຸດສ້ຽງມາໃຫ້ມວນມະນຸດ.ນອກນີ້,ໃນລັດຖະທຳມະນູນຂອງລັດບາວາເລຍຍັງຊີ້ອອກຢ່າງແຈ່ມແຈ້ງວ່າຕ້ອງເຄົາລົບກຽດສັກສີຂອງຄົນ, ຕ້ອງສອນນັກຮຽນໃຫ້ເພີ່ມຄວາມເຂົ້າໃຈຕໍ່ຊາດຕ່າງໆ.
ທ່ານໂຮຟມາຍເອີເຫັນວ່າ, ບໍ່ວ່າແມ່ນຝ່າຍໂຮງຮຽນຫລືແມ່ນອາຈານສອນ,ລ້ວນແຕ່ຕ້ອງຊຳລະການສຶກສາປະຫວັດສາດກ່ຽວກັບສົງຄາມໂລກຄັ້ງທີສອງດ້ວຍທ່າທີຈິງຈັງຮັບຜິດຊອບແລະເຄົາລົບສະພາບເປັນຈິງ.
ຄັນຊັ້ນ, ນັກຮຽນທັງຫລາຍຂອງເຢຍລະມັນເບິ່ງປະຫວັດສາດສົງຄາມໂລກຄັ້ງທີສອງແນວໃດ?ທ້າວປີຕີເລັດ ອາຍຸ 17 ປີເວົ້າຕໍ່ນັກຂ່າວວ່າ:
ສິ່ງສຳຄັນແມ່ນ,ໃນຊູ່ມື້ນີ້ຫລັງຈາກນັ້ນ 60 ປີ, ປະຫວັດສາດບໍ່ໄດ້ຖືກເວົ້າເປັນເລື່ອງງ່າຍໆ, ບໍ່ໄດ້ຖືກຫລົງລຶມ, ບໍ່ຖືກອະທິບາຍແລະບັນລະຍາຍ ຢ່າງຜິດພາດ.ເຖິງຈະເປັນເລື່ອງຈິ່ງອັນສະຫບົດສະຫນອງ,ກໍ່ຕ້ອງວາງສະແດງໃຫ້ຄົນທັງຫລາຍຮູ້ສະພາບຕົວຈິງ.
ຢູ່ໂນນຊີໂລ, ພໍ່ເຖົ້າຜູ່ຫນຶ່ງທີ່ຜົມຫງອກຈູ່ນພູ່ນໄດ້ເຮັດໃຫ້ນັກຂ່າວສົນໃຈນຳ.ພໍ່ເຖົ້າຊື່ແຮນເຄີ, ເຂົ້າເປັນທະຫານເຢຍລະມັນໃນໄລຍະສົງຄາມໂລກຄັ້ງທີສອງ, ຕໍ່ມາຍ້ອນໄດ້ຮູ້ທາດແທ້ທີ່ໂຫດຮ້າຍທາລຸນຂອງພວກນາຊີຈິ່ງໂຕນໄປເຂົ້າຮ່ວມກອງທະຫານລຸກຮືຂຶ້ນຕ້ານຟັດຊິດຂອງຝຣັ່ງ.ປະຈຸບັນ, ພໍ່ເຖົ້າທີ່ມີອາຍຸສູງແລ້ວຍັງດຳລົງຕຳແຫນ່ງຜູ່ນຳໃນສະມາຄົມຕ້ານຟັດຊິດ ຂອງເຍຢລະມັນ,ແລະໄປມາຢູ່ລະຫວ່າງໂຮງຮຽນຕ່າງໆຢ່າງບໍຮູ້ອິດຮູ້ເມື່ອຍ, ເລົ່າສະພາບສົງຄາມຕ້ານຟັດຊິດໃຫ້ຊາວຫນຸ່ມຮູ້, ສັ່ງສອນພວກເຂົາເຈົ້າ ຕ້ອງຮັບຮູ້ປະຫວັດສາດຢ່າງຖືກຕ້ອງ, ຢ່າລືມປະຫວັດສາດ.
ເລື່ອງທີ່ຕ້ອງກ່າວເຖິງນັ້ນແມ່ນ, ລັດຖະບານເຢຍລະມັນແລະອົງການ ປົກຄອງລັດຕ່າງໆກໍ່ສຳນຶກຮູ້ຢ່າງເຕັມສ່ວນຕໍ່ຄວາມສຳຄັນແລະຄວາມຮີບດ່ວນທີ່ຕ້ອງຕໍ່ສູ້ກັບອິດທິກຳລັງຂວາຈັດໃຕ້ສະຖານະການໃຫມ່.ໃນງານລະລຶກສົງຄາມຊີໂລຄົບຮອບ 60 ປີ,ທ່ານປັຼດແຊັກ ປະທານລັດບຼານເຕັນບວກໄດ້ປະກອບຄຳຄິດຄຳເຫັນຢ່າງຈະແຈ້ງວ່າ:
ອິດທິກຳລັງຂວາຈັດພວມໂດດອອກມາຢືນຢູ່ດ້ານກົງກັນຂ້າມກັບພວກເຮົາ.ພວກມັນດູຫມີ່ນເຊື້ອຊາດ, ຕ້ານຊາວຢິວ,ເວົ້າຍ້ອມພວກນາຊີແລະໂທດກຳສົງຄາມຂອງເຂົາ.ນະທີ່ນີ້, ຂ້າພະເຈົ້າຮັບປະກັນຕໍ່ທ່ານທັງຫລາຍອີກເທື່ອຫນຶ່ງວ່າ, ລັດຖະບານເດັດຂາດບໍ່ປະປ່ອຍໃຫ້ພວກມັນເຮັດຕາມໃຈ.ພວກຂ້າພະເຈົ້າຍ່ອມຈະຕໍ່ສູ້ກັບພວກເຂົາຢ່າງເດັດຂາດ.
ຕ້ອງເຄາະລະຄັງເຕືອນໃຈເລື້ອຍໆ.ມີແຕ່ຖອດຖອນເອົາບົດຮຽນຄຳສອນໃນປະຫວັດສາດຢ່າງຈິງຈັງແລ້ວ, ແລະໃຊ້ມາດຕະການຍາວນານຄັດຄ້ານອິດທິກຳລັງຂວາງຈັດ ຕ້ານຢິວແລະດູຫມີ່ນເຊື້ອຊາດທໍ່ນັ້ນ,ຈິ່ງບໍ່ຊ້ຳຮອຍໂສກນາດຕະກຳປະຫວັດສາດອີກ.
|
|
|