|
ຫວ່າງມໍ່ໆນີ້,ນ້ຳມັນຢູ່ຕະຫຼາດສາກົນໄດ້ຂຶ້ນລາຄາຢ່າງບໍ່ຢຸດຢັ້ງ,ນີ້ເປັນກຳລັງໜີບໃນລະດັບອັນແນ່ນອນຕໍ່ການສະໜອງພະລັງງານຂອງບັນດາປະເທດ,ການໃຊ້ມາດຕະການປະຢັດພະລັງງານແມ່ນໜ້າທີ່ຮີບດ່ວນໃນສະເພາະໜ້ານີ້.ໃນລາຍການເຂົ້າສູ່ອາຊຽນມື້ນີ້,ດາລາວັນຂໍແນະນຳໃຫ້ທ່ານຮູ້ວ່າ ລັດຖະບານຟີລິບປີນໄດ້ໃຊ້ມາດຕະການທີ່ສົມຄູ່ກັນແດ່?
ຫວ່າງມໍ່ໆນີ້ ລັດຖະບານຟີລິບປິນປະກາດວ່າ,ເພື່ອປະຢັດພະລັງງານ,ເລີ່ມແຕ່ວັນທີ 1 ເມສາຮອດທ້າຍເດືອນພຶດສະພາ,ພາກສ່ວນຕ່າງໆຂອງລັດຖະບານຈະປະຕິບັດລະບອບເຮັດວຽກອາທິດລະ 4 ມື້.ນີ້ແມ່ນມາດຕະການໃໝ່ອີກລາຍໜຶ່ງຫຼັງຈາກທ່ານນາງອາໂລໂຢ ປະທານາທິບໍດີຟີລິບປີນປະກາດມາດຕະການປະຢັດພະລັງງານຄືໃຫ້ພາກສ່ວນຕ່າງໆຂອງລັດຖະບານຫຼຸດອັດຕາໃຊ້ລົດຍົນແລະແອເຢັນໃນເດືອນສິງຫາປີກາຍນີ້.ພາຍຫຼັງປະກາດການຕົກລົງດັ່ງກ່າວແລ້ວ,ກໍກາຍເປັນຂ່າວສຳຄັນທີ່ສຸດຂອງໜັງສືພິມສະບັບຕ່າງໆ.ຈຸດເດືອດທີ່ຄົນທັງຫຼາຍສົນໃຈນັ້ນແມ່ນ:ມາດຕະການນີ້ຈະນຳເອົາຜົນດີຫຼາຍເທົ່າໃດໃຫ້ລັດ?ການບໍລິການຂອງພາກສ່ວນຕ່າງໆລັດຖະບານທີ່ສະໜອງໃຫ້ປວງຊົນນັ້ນຈະຖືກກະທົບກະເທືອນຫຼືບໍ່?
ກ່ຽວກັບບັນຫານີ້,ທ່ານລາເວີ ໂລຕີລາ ລັດຖະມົນຕີກະຊວງພະລັງງານຟີລິບປີນໄດ້ສຳພາດຕໍ່ສື່ມວນຊົນວ່າ,ການປະຕິບັດລະບອບເຮັດວຽກອາທິດລະ 4 ມື້ຢູ່ພາກສ່ວນຕ່າງໆຂອງລັດຖະບານໃນສະເພາະໜ້ານີ້,ແມ່ນເພື່ອປະຢັດພະລັງງານທີ່ມີປະລິມານຈຳກັດແລະລ້ຳຄ່າ,ຮັບມືກັບລະດູຮ້ອນທີ່ໃຊ້ໄຟຟ້າຫຼາຍໃກ້ຈະວຽນມາເຖິງ,ແຕ່ກົມຕຳຫຼວດ ດ່ານພາສີ ໂຮງໝໍແລະທະນາຄານແຫ່ງລັດເປັນຕົ້ນ ເຊິ່ງເປັນພາກສ່ວນຕ່າງໆສຳຄັນຈະບໍ່ປະຕິບັດລະບອບດັ່ງກ່າວ.
ຕາມແນະນຳວ່າ,ພາຍຫຼັງປະຕິບັດລະບອບເຮັດວຽກອາທິດລະ 4 ມື້ແລ້ວ,ໂມງລັດຖະການຂອງພາກສ່ວນລັດຖະບານຈະຈາກ 8 ຊົ່ວໂມງເພີ່ມຂຶ້ນເຖິງ 10 ຊົ່ວໂມງຕໍ່ມື້,ເມື່ອເປັນແນວນີ້ ລັດຖະກອນຂັບລົດເຂົ້າການເລີກການກໍຈະໜ້ອຍລົງ,ແລ້ວບັນລຸຈຸດປະສົງປະຢັດນ້ຳມັນ.ໃນຂະນະດຽວກັນນີ້ ຍັງຕົກລົງວ່າ,ໃນໄລຍະພັກຕອນທ່ຽງແລະກ່າຍຕອນບ່າຍ 4 ໂມງ,ຕ້ອງຢຸດໃຊ້ແອເຢັນແລະພັດລົມໃນຫ້ອງການ.
ໃນເວລາດົນນານມານີ້,ຟີລິບປິນເປັນປະເທດທີ່ຂາດພະລັງງານ,ໂດຍສະເພາະແມ່ນໃນບໍ່ເທົ່າໃດປີມານີ້,ຄຽງຄູ່ກັບເສດຖະກິດໄດ້ຮັບການຟື້ນຟູເປັນກ້າວໆແລະປະຊາກອນເພີ່ມຂຶ້ນຢ່າງໄວວາ,ການສິ້ນເປືອງພະລັງງານກໍນັບມື້ນັບຫຼາຍຂຶ້ນ.ຕາມຕົວເລກສະຖິຕິຂອງກະຊວງພະລັງງານຟີລິບປິນ,ແຕ່ລະມື້ ຟີລິບປີນສິ້ນເປືອງນ້ຳມັນດິບ 3 ແສນ 6 ໝື່ນ 7 ພັນເບເລນ,ສ່ວນປະລິມານຜະລິດຂອງຟີລິບປີນພັດມີແຕ່ 2 ແສນ 3 ໝື່ນ 5 ພັນເບເລນຕໍ່ມື້,ພາກສ່ວນອື່ນໆຕ້ອງນຳເຂົ້າໝົດ.ໃນດ້ານການສະໜອງໄຟຟ້າ,ຄວາມຂັດແຍ່ງກັນລະຫວ່າງການຕອບສະໜອງກັບຄວາມຮຽກຮ້ອງຕ້ອງການພົ້ນເດັ່ນອອກ,ຕາມຄາດຄະເນຂອງກະຊວງພະລັງງານ,ເມື່ອຮອດປີ 2009, ຟີລິບປີນຂາດໄຟຟ້າ 5 ລ້ານກິໂລວັດໂມງ.
ການຂາດໄຟຟ້າ,ຈຶ່ງເຮັດໃຫ້ລາຄາໄຟຟ້າແພງຂຶ້ນ,ເວົ້າສຳລັບຄອບຄົວທຸກຍາກ 20%-30% ໃນທົ່ວປະເທດທີ່ມີລາຍຮັບຍັງບໍ່ເຖິງ 2500 ເປໂຊນັ້ນ,ບໍ່ຕ້ອງສົງໄສວ່າ ມັນແມ່ນພາລະທີ່ໜັກໜ່ວງ,ຈົນວ່າຫຼາຍໆຄົນບໍ່ກ້າໃຊ້ໄຟຟ້າ.ເມື່ອເປັນແນວນີ້ແລ້ວ,ບໍລິສັດໄຟຟ້າກໍກູ້ເອົາຕົ້ນທຶນຄືນຢ່າງບັງເກີດຜົນບໍ່ໄດ້,ຍິ່ງບໍ່ມີວິທີເພີ່ມຕື່ມອຸປະກອນເພື່ອເພີ່ມທະວີຄວາມສາມາດຜະລິດໄຟຟ້າ,ເຮັດໃຫ້ລາຄາໄຟຟ້າຕ່ຳລົງ.ປີ 2004,ບໍລິສັດໄຟຟ້າແຫ່ງລັດຟີລິບປິນໄດ້ຕິດໜີ້ສິນ 7 ຕື້ໂດລາສະຫະລັດ,ກວມຍອດຈຳນວນໜີ້ສິນແຫ່ງລັດ 13%.
ສະນັ້ນ,ເວົ້າສຳລັບລັດຖະບານຟີລິບປີນແລ້ວ,ການປະຕິບັດລະບອບເຮັດວຽກອາທິດລະ 4 ມື້ ແມ່ນການຕົກລົງທີ່ຈຳເປັນແຕ່ສະຫຼາດສະຫຼຽວ.
ທ່ານລາເວີ ໂລຕີລາ ລັດຖະມົນຕີກະຊວງພະລັງງານຟີລິບປີນກ່າວວ່າ,ຕາມການຄິດໄລ່ແລະຄາດຄະເນໃນເບື້ອງຕົ້ນໄດ້ສະແດງໃຫ້ເຫັນວ່າ,ມາດຕະການດັ່ງກ່າວຈະປະຢັດລາຍຈ່າຍທາງພະລັງງານຢ່າງບັງເກີດຜົນ.ຖືກະຊວງພະລັງງານທີ່ມີພະນັກງານ 600 ຄົນມາເປັນຕົວຢ່າງ,ລະບອບເຮັດວຽກອາທິດລະ 4 ມື້ຈະປະຢັດລາຍຈ່າຍທາງໄຟຟ້າ 1 ແສນ 6 ໝື່ນ 6 ພັນ 4 ຮ້ອຍເປໂຊແລະນ້ຳມັນເອັດຊັງ 8 ໝື່ນ 1 ພັນ 8 ຮ້ອຍເປໂຊ.ທ່ານຮຽກຮ້ອງຂະແໜງການເອກະຊົນແລະປະຊາຊົນຈົ່ງຕອບສະໜອງການຕົກລົງຂອງລັດຖະບານຢ່າງຕັ້ງໜ້າ,ພ້ອມກັນພະຍາຍາມປະຢັດພະລັງງານ.
ພາຍຫຼັງປະກາດມາດຕະການດັ່ງກ່າວແລ້ວ,ປະຊາຊົນຟີລິບປີນສ່ວນຫຼາຍໄດ້ສະແດງຄວາມເຂົ້າໃຈແລະຄວາມສະໜັບສະໜູນ.ພວກເຂົາເຈົ້າເວົ້າວ່າ,ທະແນມແຕ່ລັດຖະບານຈັດວາງຢ່າງສົມເຫດສົມຜົນ,ບໍ່ກະທົບເຖິງການບໍລິການອັນປົກກະຕິ,ພວກເຂົາເຈົ້າຈະຕັ້ງໜ້າສະໜັບສະໜູນ.
|
