|
|
(GMT+08:00)
2005-05-11 16:49:43
|
|
ປະຊາຊົນຈີນກັບປະຊາຊົນໂລກຄຽງບ່າຄຽງໄຫຼ່ກັນສູ້ລົບໃຕ້ຄັນທຸງຕໍ່ຕ້ານຟັດຊິດ(ສຽງ)
cri
Author: mo
ປີນີ້ແມ່ນປີທີ່ສົງຄາມຕໍ່ຕ້ານຍີ່ປຸ່ນຂອງຈີນແລະສົງຄາມຕໍ່ຕ້ານຟັດຊິດຂອງໂລກໄດ້ຮັບໄຊຊະນະຄົບຮອບ 60 ປີ. ເມື່ອຫວນຄືນປະຫວັດສາດຕອນນັ້ນ, ທ່ານຢົງເວີຍມູ້ ຜູ້ຊ່ຽວຊານຄົ້ນຄວ້າປະຫວັດສາດສົງຄາມຕໍ່ຕ້ານຂອງສະຖາບັນຄົ້ນຄວ້າປະຫວັດສາດສະໄໝມໍ່ຂອງສະພາບັນດິດວິທະຍາສາດສັງຄົມຈີນກ່າວວ່າ, ໃນຖານເປັນສະມາຊິກຜູ້ໜຶ່ງໃນແນວໂຮມເອກະພາບຕໍ່ຕ້ານຟັດຊິດຂອງໂລກ, ປະຊາຊົນຈີນກັບປະຊາຊົນຫລາຍໆປະເທດໃນໂລກໄດ້ຄຽງບ່າຄຽງໄຫຼ່ກັນສູ້ລົບ, ໄດ້ປະກອບສ່ວນເຂົ້າໃນການຍາດແຍ່ງເຮັດໃຫ້ສົງຄາມຕໍ່ຕ້ານຟັດຊິດຂອງໂລກໄດ້ຮັບໄຊຊະນະ. ສ່ວນສົງຄາມຕໍ່ຕ້ານຂອງປະຊາຊົນຈີນກໍໄດ້ຮັບຄວາມເຫັນອົກເຫັນໃຈ ການສະໜັບສະໜູນແລະການຊ່ອຍເຫຼືອຈາກມວນຊົນບັນດາປະເທດໃນໂລກທີ່ຮັກຫອມສັນຕິພາບແລະເສລີພາບ, ໂດຍສະເພາະແມ່ນບັນດາປະເທດພັນທະມິດ.
ພາຍຫລັງເຫດການວັນທີ 7 ກໍລະກິດປີ 1937, ສົງຄາມຕໍ່ຕ້ານຍີ່ປຸ່ນຂອງຈີນໄດ້ດຳເນີນຢ່າງຮອບດ້ານ, ຈົນຮອດສົງຄາມຕໍ່ຕ້ານໄດ້ຮັບໄຊຊະນະເມື່ອປີ 1945, ປະຊາຊົນຈີນໄດ້ຍຶດໝັ້ນຕໍ່ຕ້ານການຮຸກຮານຂອງຍີ່ປຸ່ນຢ່າງໝັ້ນໜຽວທົນທານ, ໄດ້ເສຍສະຫຼະຢ່າງໃຫຍ່ຫລວງ, ໄດ້ທັບມ້າງກົນອຸບາຍຂອງຍີ່ປຸ່ນທີ່ຢາກເອົາຈີນເປັນທີ່ໝັ້ນ, ແລ້ວຍົນພົນຂຶ້ນເໜືອຮຸກຮານໂຊວຽດ, ລົງໃຕ້ຍຶດເອົາໝູ່ເກາະມະຫາສະໝຸດປາຊີຟິກໃຕ້, ໃນທີ່ສຸດ, ເປັນເຈົ້າອຳນາດທົ່ວອາຊີ, ແລະເປັນເຈົ້າອຳນາດທົ່ວໂລກ. ຕໍ່ເລື່ອງນີ້, ທ່ານຢົງເວີຍມູ້ເຫັນວ່າ, ເມື່ອພວກເຮົາຕີລາຄາຖານະຂອງສົງຄາມຕໍ່ຕ້ານຍີ່ປຸ່ນຂອງຈີນໃນສົງຄາມຕໍ່ຕ້ານຟັດຊິດຂອງໂລກ, ຄວນເວົ້າວ່າ, ຖ້າບໍ່ມີຈີນເສຍສະຫຼະຢ່າງໃຫຍ່ຫລວງໃນສົງຄາມຕໍ່ຕ້ານຍີ່ປຸ່ນເປັນເວລາ 8 ປີ, ຖ້າບໍ່ມີຈີນໄດ້ຍຶດໝັ້ນການຕໍ່ຕ້ານເປັນເວລາ 8 ປີຢ່າງທໍລະຫົດອົດທົນ, ສົງຄາມຕໍ່ຕ້ານຟັດຊິດຂອງໂລກຢາກໄດ້ຮັບໄຊຊະນະຢ່າງວ່ອງໄວນັ້ນແມ່ນຂ້ອນຂ້າງຫຍຸ້ງຍາກ. ຍ້ອນການຕໍ່ຕ້ານຂອງຈີນໄດ້ຈ່ອງດຶງເອົາກຳລັງທະຫານບົກສ່ວນຫລາຍທີ່ສຸດຂອງຍີ່ປຸ່ນ, ຍັງໄດ້ຈ່ອງດຶງກຳລັງທະຫານອາກາດແລະທະຫານເຮືອຂອງຍີ່ປຸນສ່ວນໜຶ່ງ, ນີ້ເປັນການສະໜັບສະໜູນຕໍ່ສະໜາມລົບເອີລົບແລະສະໜາມລົບອື່ນໆ. ໃນຖານເປັນພາກສ່ວນປະກອບອັນສຳຄັນຂອງສົງຄາມຕໍ່ຕ້ານຟັດຊິດຂອງໂລກ, ສົງຄາມຕໍ່ຕ້ານຍີ່ປຸ່ນຂອງຈີນໄດ້ຮັບການສະໜັບສະໜູນຈາກປະເທດຕໍ່ຕ້ານຟັດຊິດຂອງໂລກ. ໃນໄລຍະຕົ້ນແລະໄລຍະກາງຂອງສົງຄາມຕໍ່ຕ້ານຍີ່ປຸ່ນຂອງປະຊາຊົນຈີນ, ໂຊວຽດບໍ່ພຽງແຕ່ໄດ້ສະໜັບສະໜູນສົງຄາມຕໍ່ຕ້ານຂອງຈີນໃນດ້ານການເມືອງ ສິນທຳ ຈິດໃຈແລະການທູດທໍ່ນັ້ນ, ທັງແມ່ນປະເທດຕົ້ນຕໍທີ່ໃຫ້ການຊ່ອຍເຫຼືອແກ່ຈີນ. ຕາມສະຖິຕິ, ແຕ່ປີ 1937 ຮອດປີ 1941, ທະຫານອາສາສະໝັກເກືອບ 4 ພັນຄົນຂອງສະຫະພາບໂຊວຽດໄດ້ເຂົ້າຮ່ວມການສູ້ລົບໃນແດນຈີນ.
ພາຍຫລັງເກີດສົງຄາມມະຫາສະໝຸດປາຊີຟິກແລ້ວ, ໃນເວລາອາເມລິກາໃຫ້ການຊ່ອຍເຫຼືອຕໍ່ປະເທດອື່ນດຳເນີນສົງຄາມຕ້ານຟັດຊິດນັ້ນ, ຈີນໄດ້ຮັບການຊ່ອຍເຫຼືອດ້ານພັດສະດຸ 600 ລ້ານກວ່າໂດລາສະຫະລັດ. ນອກນັ້ນ, ອາເມລິກາຍັງໄດ້ໃຫ້ການສະໜັບສະໜູນດ້ານການທະຫານແກ່ຈີນ. ທ່ານຢົງເວີຍມູ້ກ່າວວ່າ,
ສົງຄາມຕໍ່ຕ້ານຍີ່ປຸ່ນມີຈຸດພິເສດໜຶ່ງກໍແມ່ນກຳລັງທະຫານອາກາດຂອງຈີນມີໜ້ອຍ, ເມື່ອຮອດໄລຍະສຸດທ້າຍຂອງສົງຄາມ, ສະພາບການແນວນີ້ໄດ້ມີການປ່ຽນແປງແລ້ວ. ປັດໃຈປ່ຽນແປງອັນໜຶ່ງແມ່ນທະຫານອາກາດອາເມລິກາໄດ້ເຂົ້າຮ່ວມການສູ້ລົບຢູ່ຈີນ, ເຮັດໃຫ້ທະຫານອາກາດຂອງຍີ່ປຸ່ນເສຍທ່າແຮງທາງອາກາດຢູ່ສະໜາມລົບຈີນ.
ພາຍຫລັງສ້າງຕັ້ງເຂດສູ້ລົບຈີນແລ້ວ, ກອງທະຫານຈີນໄດ້ປະສານສົມທົບກັບທະຫານພັນທະມິດໂດຍກົງດຳເນີນການສູ້ລົບ, ໄດ້ປະກອບສ່ວນອັນໃຫຍ່ຫລວງເຂົ້າໃນການເຮັດໃຫ້ສົງຄາມຕໍ່ຕ້ານຟັດຊິດຂອງໂລກໄດ້ຮັບໄຊຊະນະ. ທ່ານຢົງເວີຍມູ້ກ່າວວ່າ:
ກອງທະຫານຈີນທີ່ເດີນທັບທາງໄກໄປສູ້ລົບຢູ່ມຽນມາ, ໄດ້ຮ່ວມມືກັນກັບທະຫານອາເມລິກາແລະທະຫານອັງກິດດຳເນີນການສູ້ລົບ, ກອງທະຫານຈີນເຂົ້າມຽນມາໄດ້ເສີມຂະຫຍາບບົດບາດອັນໃຫຍ່ຫລວງ.
ບັ້ນລົບຢູ່ພາກຕາເວັນຕົກແຂວງຢຸນນານແລະຢູ່ພາກເໜືອມຽນມາຖືກເອີ້ນເປັນບັ້ນລົບຍົກພົນຂຶ້ນບົກນອກມັງດີຕາເວັນອອກ, ໄຊຊະນະຂອງມັນ ບໍ່ພຽງແຕ່ໄດ້ເຮັດໃຫ້ທະຫານພັນທະມິດກອບກູ້ເອົາດິນແດນຜືນກວ້າງໃຫຍ່ຢູ່ພາກຕາເວັນຕົກແຂວງຢຸນນານແລະພາກເໜືອມຽນມາທໍ່ນັ້ນ, ຫາກຍັງໄດ້ເຮັດໃຫ້ສາມປະເທດພັນທະມິດຄືຈີນ ອາເມລິກາ ແລະອັງກິດຫລຸດພົ້ນອອກຈາກສະພາບອັດຕະຄັດທາງຍຸດທະສາດຢູ່ແຜ່ນດິນໃຫຍ່ທະວີບອາຊີ. ເຮັດໃຫ້ສະໜາມລົບອາຊີອາຄະເນ, ສະໜາມລົບແຜ່ນດິນໃຫຍ່ຈີນຍ້າຍຈາກການປ້ອງກັນທາງຍຸດທະສາດມາເປັນການຕ່າວຕີຄືນທາງຍຸດທະສາດ; ເຮັດໃຫ້ໄຊຊະນະຂອງສະໜາມລົບມະຫາສະໝຸດປາຊີຟິກໄດ້ຮັບການປັບປຸງໃຫ້ໝັ້ນຄົງ. ເຮັດໃຫ້ຍີ່ປຸ່ນປະລາໄຊເລື້ອຍໆແລະພັງທະລາຍຢ່າງຮອບດ້ານຢູ່ສະໜາມລົບແຜ່ນດິນໃຫຍ່ຈີນແລະສະໜາມລົບອາຊີອາຄະເນພາຍໃນເວລາບໍ່ຮອດໜຶ່ງປີ, ໃນທີ່ສຸດ, ໄດ້ປະກາດວ່າພວກຟັດຊິດຍີ່ປຸ່ນຖືກດັບສູນຢ່າງເຖິງຖອງ.
|
|
|