|
|
 |
| (GMT+08:00)
2005-05-11 18:24:53
|
 |
|
ສົງຄາມໂລກຄັ້ງທີສອງແມ່ນມະຫັນຕະໄພທີ່ບໍ່ເຄີຍມີມາກ່ອນໃນປະຫວັດສາດມະນຸດ
cri
Author: mo
ສົງຄາມໂລກຄັ້ງທີສອງແມ່ນສົງຄາມທີ່ມີຂະໜາດໃຫຍ່ກວ່າໝູ່ແລະມີຄວາມເສຍຫາຍໜັກໜ່ວງກວ່າໝູ່ໃນປະຫວັດສາດມະນຸດ.
ສົງຄາມໂລກທີ່ຍືດເຍືອມາເປັນເວລາ 6 ປີຄັ້ງນີ້ໄດ້ມີ 60 ກວ່າປະເທດແລະເຂດແຄວ້ນເຂົ້າຮ່ວມເປັນລຳດັບ, ໄດ້ກະທົບເຖິງປະຊາກອນ 2 ຕື້ຄົນ, ເຊິ່ງກວມ 80% ຂອງປະຊາກອນໂລກໃນຄາວນັ້ນ, ແປວໄຟສົງຄາມໄດ້ໃໝ້ລາມໄປຮອດທະວີບເອີລົບ ອາຊີ ອາຟຼີກາ ທະວີບໂອຊຽນນີແລະມະຫາສະໜຸດປາຊີຟິກ ມະຫາສະໜຸດອິນເດຍ ມະຫາສະໜຸດອັດລັງຕິກ ມະຫາສະໝຸດຂົ້ວໂລກເໜືອ(ຫລືອາກຕິກ). ເນື້ອທີ່ເກີດຂຶ້ນສົງຄາມມີ 22 ລ້ານກິໂລແມັດຕາ, ກຳລັງທະຫານຂອງສອງຝ່າຍທີ່ລົບເລວກັນບັນລຸ 110 ລ້ານຄົນ, ທະຫານແລະສາມັນຊົນທີ່ຕາຍຍ້ອນສົງຄາມໄດ້ລື່ນກາຍ 55 ລ້ານຄົນ, ຄ່າໃຊ້ຈ່າຍທາງທະຫານໂດຍກົງລວມແລ້ວມີປະມານ 1300 ຕື້ໂດລາສະຫະລັດ, ກວມ 60% ຮອດ 70% ຂອງຍອດຈຳນວນລາຍຮັບແຫ່ງຊາດຂອງປະເທດທີ່ລົບເລວກັນ, ຄວາມເສຍຫາຍດ້ານວັດຖຸຂອງປະເທດເຂົ້າຮ່ວມສົງຄາມໄດ້ຄິດເປັນມູນຄ່າ 4000 ຕື້ໂດລາສະຫະລັດ.
ຈີນແມ່ນສະໜາມລົບຕົ້ນຕໍທີ່ຕໍ່ຕ້ານການຮຸກຮານຂອງຍີ່ປຸ່ນ. ຕາມສະຖິຕິບໍ່ຄົບຖ້ວນ, ໃຕ້ດາບຂອງທະຫານຍີ່ປຸ່ນຜູ້ຮຸກຮານ, ຄົນຈີນຜູ້ເສຍຊີວິດແລະບາດເຈັບມີ 35 ລ້ານຄົນ. ໃນນັ້ນ, ມີ 21 ລ້ານຄົນເສຍຊີວິດ, ພຽງແຕ່ໃນການສັງຫານໂຫດທີ່ນານກິ່ງກໍມີ 3 ແສນຄົນຂຶ້ນໄປເສຍຊີວິດ. ເມື່ອຄິດໄລ່ຕາມລາຄາສິນຄ້າປີ 1937, ຄວາມເສຍຫາຍທາງເສດຖະກິດໂດຍກົງທີ່ທະຫານຍີ່ປຸ່ນຜູ້ຮຸກຮານສ້າງໃຫ້ຈີນນັ້ນບັນລຸ 100 ຕື້ໂດລາສະຫະລັດ, ຄວາມເສຍຫາຍທາງເສດຖະກິດໂດຍທາງອ້ອມບັນລຸ 500 ຕື້ໂດລາສະຫະລັດ. ປະຊາຊົນຈີນໄດ້ເສຍສະຫຼະປະຊາຊາດຢ່າງມະຫາສານແລະໄດ້ປະກອບສ່ວນສຳຄັນທາງປະຫວັດສາດເພື່ອເຮັດໃຫ້ສົງຄາມຕ້ານຟັດຊິດຂອງໂລກໄດ້ຮັບໄຊຊະນະ.
ໂຊວຽດແມ່ນສະໜາມລົບຕົ້ນຕໍທີ່ຕໍ່ຕ້ານຟັດຊິດເຢຍລະມັນ. ໃນຄວາມເສຍຫາຍທັງໝົດຂອງປະເທດເຂົ້າຮ່ວມສົງຄາມໂລກຄັ້ງທີສອງມີ 41% ແມ່ນຂອງໂຊວຽດ. ຕາມເອກະສານທີ່ຣັດເຊຍປະກາດນັ້ນ, ໃນໄລຍະສົງຄາມປ້ອງກັນຊາດແຕ່ປີ 1941 ຮອດປີ 1945, ຢູ່ໂຊວຽດມີ 27 ລ້ານຄົນເສຍຊີວິດຍ້ອນສົງຄາມ, ໃນນັ້ນ, ກອງທັບແດງໂຊວຽດໄດ້ເສຍສະຫຼ 8 ລ້ານ 6 ແສນ 6 ໝື່ນ 8 ພັນ 4 ຮ້ອຍຄົນ; ຄວາມເສຍຫາຍດ້ານວັດຖຸທີ່ຄິດໄລ່ຕາມລາຄາໃນປີ 1941 ບັນລຸ 679 ຕື້ຣຸບ.
ອາເມລິກາແລະອັງກິດແມ່ນສະມາຊິກແກນກາງຂອງສະຫະພັນຕ້ານຟັດຊິດໂລກ, ພວກເຂົາເຈົາກໍ່ໄດ້ເສຍຄ່າຕອບແທນຢ່າງຫລວງຫລາຍເພື່ອເຮັດໃຫ້ສົງຄາມຕ້ານຟັດຊິດໄດ້ຮັບໄຊຊະນະ. ຕາມເອກກະສານປະຫວັດສົງຄາມ, ໃນສົງຄາມໂລກຄັ້ງທີສອງ, ຢູ່ອາເມລິກາລວມມີ 4 ແສນກວ່າຄົນເສຍຊີວິດ, ຢູ່ອັງກິດມີທະຫານ 2 ແສນ 7 ໝື່ນຄົນເສຍຊີວິດ.
ເຢຍລະມັນ ຍີ່ປຸ່ນແລະອີຕາລີແມ່ນຫົວໂປ່ເຈົ້າໂທດທີ່ກໍ່ສົງຄາມໂລກຄັ້ງທີສອງ, ໄດ້ຖືກປະເທດແລະປະຊາຊົນຕ້ານຟັດຊິດລົງໂທດຢ່າງເຂັ້ມງວດ. ຕາມສະຖິຕິ, ຄົນຂອງເຢຍລະມັນທີ່ເສຍຊີວິດແລະຖືກຈັບເປັນຊະເລີຍໃນສົງຄາມນັ້ນມີ 13 ລ້ານ 6 ແສນຄົນ. ພຽງແຕ່ຢູ່ສະໜາມລົບທີ່ໂຊວຽດແລະເຢຍລະມັນ, ທະຫານເຢຍລະມັນແລະທະຫານພັນທະມິດຂອງເຂົາໄດ້ມີ 6 ລ້ານກວ່າຄົນເສຍຊິວິດ. ຢູ່ສະໜາມລົບທີ່ຈີນ, ຍີ່ປຸ່ນໄດ້ມີ 1 ລ້ານ 5 ແສນຄົນຕາຍ ບາດເຈັບແລະຖືກຈັບ, ມີ 1 ລ້ານ 2 ແສນ 8 ໝື່ນຄົນຍອມຈຳນົນຕໍ່ຈີນ, ຢູ່ສະໜາມລົບທີ່ມະຫາສະໜຸດປາຊີຟິກ, ຍີ່ປຸ່ນໄດ້ມີ 1 ລ້ານ 2 ແສນ 4 ໝື່ນ 7 ພັນຄົນຕາຍ ບາດເຈັບແລະຖືກຈັບ. ອີຕາລີໄດ້ມີ 1 ແສນ 6 ໝື່ນຄົນຕາຍ ບາດເຈັບແລະຖືກຈັບ.
ສົງຄາມຮຸກຮານທີ່ເຢຍລະມັນ ຍີ່ປຸ່ນແລະອີຕາລີກໍ່ຂຶ້ນນັ້ນກໍ່ໄດ້ເຮັດໃຫ້ປະຊາຊົນພາຍໃນປະເທດເຫຼົ່ານີ້ຖືກທຳຮ້າຍຢ່າງໜັກ. ຢູ່ດິນແດນຂອງເຢຍລະມັນ, ມີສາມັນຊົນ 4 ລ້ານຄົນເສຍຊີວິດໃນສົງຄາມ, ມີ 14 ລ້ານຄົນບໍ່ມີບ່ອນເພີ່ງພາອາໃສ. ໃນເດຶອນສິງຫາ ປີ 1945, ເມືອງຮີໂລຊີມາແລະນາກາສະກີຂອງຍີ່ປຸ່ນຕ່າງໄດ້ຖືກອາເມລິກາຖີ້ມລູກລະເບີດປະລະມານູໃສ່. ໃນຄາວນັ້ນ, ໄດ້ມີ 2 ແສນກວ່າຄົນຕາຍແລະບາດເຈັບ, ແລະເປັນການບາດໃຈຕໍ່ໄທເມືອງທ້ອງຖິ່ນດັ່ງກ່າວ.
|
|
|
