|
ປີນີ້ແມ່ນປີສົງຄາມຕ້ານຟັດຊິດໂລກໄດ້ຮັບໄຊຊນະຄົບຮອບ 60 ປີ ໃນເວລາທີ່ຄົນທັງຫຼາຍຫວນຄືນແລະກຶກກອງປະຫວັດສາດນັ້ນ ໄດ້ມີບັນຫາຕົວຈິງແລະຮີບດ່ວນວາງໄວ້ຕໍ່ຫນ້າຄົນ ນັ້ນກໍ່ຄືຄຽງຄູ່ກັບສັກຂີພິຍານໃນຄາວນັ້ນລາໂລກໄປຕໍ່ເນື່ອງກັນບໍ່ກາຍເປັນເລື່ອງອະດີດຢ່າງແທ້ຈິງ ແລ້ວຖືກຄົນທັງຫຼາຍຫຼົງລືມບໍ່ ເພື່ອຈື່ຈຳປະຫວັດສາດ ແຕ່ຕົ້ນປີມານີ້ ເຢຍລະມັນໄດ້ຈັດການເຄື່ອນໄຫວລະລຶກຕ່າງໆ ໃຫ້ຊາວຫນູ່ມທົບທວນຄວາມເຈັບປວດທໍລະມານອັນຮ້າຍແຮງທີ່ເຢຍລະມັນນາຊີນຳມາໃຫ້ມວນມະນຸດນັ້ນອີກເທື່ອຫນຶ່ງ ລັດຖະບານເຢຍລະມັນໄດ້ໃຊ້ທ່າທີຮັບຜິດຊອບຕໍ່ປະຫວັດສາດຕະຫຼອດມາ ທ່າທີຂອງເຢຍລະມັນທີ່ສອນໃຫ້ຮຸ້ນຊາວຫນຸ່ມຢ່າລືມປະຫວັດສາດ ຫັນຫນ້າໄປສູ່ອະນາຄົດ ຍິ່ງໄດ້ຮັບຄວາມໂຄລົບຈາກປະຊາຊົນບັນດາປະເທດໃນໂລກ
ຢູ່ເຢຍລະມັນໃນປັດຈຸບັນ ການຫວນຄືນມະຫັນຕະໄພທີ່ຟັດຊິດຮິດແລນຳມາໃຫ້ມວນມະນຸດນັ້ນໄດ້ກາຍເປັນພັນທະທາງສິນທຳຢ່າງຫນຶ່ງຂອງຄົນທັງຫຼາຍ ຕໍ່ທ່າທີສາລະພາບຮັບໂທດຂອງລັດຖະບານເຢຍລະມັນກ່ຽວກັບເຢຍລະມັນນາຊີກໍ່ການຮຸກຮານແລະສັງຫານໂຫດນັ້ນໄດ້ປະເທດທີ່ປະສົບເຄາະຮ້າຍໄດ້ຮັບຮູ້ໂດຍທົ່ວໄປແຕ່ດົນແລ້ວ ນາຍົກລັດຖະມົນຕີແລະປະທານາທິບໍດີແຕ່ລະຊຸດຂອງເຢຍລະມັນລ້ວນແຕ່ສະແດງທ່າທີສຳຫຼວດຕົນແລະສຳນຶກໂດດຢ່າງອັນຈິງໃຈກ່ຽວກັບສົງຄາມໂລກຄັ້ງທີສອງຢູ່ປະເທດແລະສະຖານທີ່ຕ່າງກັນ.ບໍ່ພຽງແຕ່ທໍ່ນັ້ນ ລັດຖະບານເຢຍລະມັນຍັງກ່າວຢ່າງຈະແຈ້ງວ່າ ເຢຍລະມັນມີຫນ້າທີ່ຮັບຜິດຊອບທາງສິນທຳແລະການເມືອງ ຈື່ຈຳປະຫວັດສາດ ຈື່ຈຳຫນ້າທີ່ຮັບຜີດຊອບ ແລະເດັດດ່ຽວຕໍ່ສູ້ກັບການກະທຳອັນບໍ່ຍຸດຕິທຳແລະທາລຸນ
ວັນທີ 10 ພຶດສະພາ ໃນການເຄື່ອນໄຫວລະລຶກການປົດປ່ອຍຄ້າຍກັກຂັງບູເຮີນ ວາດຄົບຮອບ 60 ປີ, ທ່ານສະໂລເຕີ ນາຍົກລັດຖະມົນຕີຊຸດປັດຈຸບັນໄດ້ກ່າວຄຳປາໄສວ່າ ໃນຂະນະທີ່ປະຊາຊົນຮັບຮູ້ປະຫວັດ ສາດນັ້ນ ຍັງໄດ້ຫາບແບກພາລະກຳສຳຄັນ ນັ້ນກໍ່ຄືປົກປັກຮັກສາສັນຕິພາບແລະເສລີພາບ ສ້າງອະນາຄົດທີ່ດີງາມກວ່າເກົ່າ
ເພື່ອຊັກນຳແລະສິດສອນໃຫ້ຄົນຮຸ້ນຫຼັງຮູ້ຈັກປະຫວັດສາດຢ່າງຖືກຕ້ອງ ແລະສຳຫຼວດປະຫວັດສາດ ພະແນກສຶກສາທິການຂອງບັນດາລັດສະຫະພັນເຢຍລະມັນລ້ວນແຕ່ໄດ້ວາງແຜນການສຶກສາອັນຈະແຈ້ງທີ່ສຸດກ່ຽວກັບການສຶກສາປະຫວັດສົງຄາມໂລກຄັ້ງທີສອງໃນຫຼັກສູດພື້ນຖານໂຮງຮຽນມັດທະຍົມ ຮຽກຮ້ອງໃຫ້ໂຮງຮຽນມັດທະຍົມຕ່າງໆຊຳລະແກ້ໄຂເນື້ອໃນການສອນກ່ຽວກັບສົງຄາມໂລກຄັ້ງທີສອງດ້ວຍຄວາມຮັບຜິດຊອບ ໂຮງຮຽນມັດທະຍົມເຢຍລະມັນໄດ້ສ້າງບັນຍາກາດການສຶກສາທີ່ປອດໃສແລະດີງາມກ່ຽວກັບສົງຄາມໂລກຄັ້ງທີສອງ
ເພື່ອໃຫ້ນັກຮຽນມັດທະຍົມທີ່ໄດ້ເລີ່ມມີຄວາມສາມາດຈຳແນກແລະວິເຄາະບັນຫາເອົາເອງນັ້ນທີ່ເປັນເອກະລາດຍິ່ງເຂົ້າໃຈເນື້ອໃນທີ່ກ່ຽວຂ້ອງກັບສົງຄາມໂລກຄັ້ງທີສອງຢ່າງເລິກເຊິ່ງ ຮູ້ປະຫວັດສາດ ເຂົ້າໃຈປະຫວັດສາດ ວິເຄາະປະຫວັດສາດ ແລ້ວຖືປະຫວັດສາດເປັນແວ່ນແຍງ ໂຮງຮຽນມັດທະຍົມຕ່າງໆຂອງເຢຍລະມັນຍັງດຳເນີນການເຄື່ອນໄຫວສິດສອນຫຼາຍຮູບຫຼາຍແບບ ວິທີທີ່ເຜີຍແຜ່ກວ້າງຂວາງກວ່າຫມູ່ກໍ່ແມ່ນເຊີນໃຫ້ພິຍານຂອງເຫດການປະຫວັດສາດໄປລາຍງານຢູ່ໂຮງຮຽນ ແລກປ່ຽນຄວາມຄິດຄວາມເຫັນແລະສົນທະນາກັບນັກຮຽນ ທາງໂຮງຮຽນຍັງຈັດວາງໃຫ້ນັກຮຽນໄປເບິ່ງບ່ອນເກົ່າຄ້າຍກັກຂັງທີ່ຮັກສາໄວ້ແລະ ຫໍພິພິທະພັນຮ່ອງຮອຍສະຫນາມລົບຂອງເຢຍລະມັນ
ທ່ານຮົຟມາຍ ອະທິບໍດີໂຮງຮຽນມັດທະຍົມບາຟາເລຍເຢຍລະມັນຊີ້ອອກວ່າ ໃນຖານເປັນຄູ ຫນ້າທີ່ຂອງຕົນບໍ່ພຽງແຕ່ຕ້ອງໃຫ້ນັກຮຽນໄດ້ເຫັນແລະຮູ້ເລື່ອງທີ່ເປັນຕາຢ້ານທີ່ເຄີຍເກີດຂຶ້ນທໍ່ນັ້ນ ຫາກຍັງຍິ່ງຕ້ອງການໃຫ້ພວກເຂົາເຈົ້າຖອດຖອນເອົາບົດຮຽນຄຳສອນຈາກເລື່ອງເຫຼົ່ານີ້ ມີແຕ່ໃຫ້ຊາວຫນຸ່ມຮັບຮູ້ປະຫວັດສາດຢ່າງຖືກຕ້ອງສຳນຶກຄືນປະຫວັດສາດ ແລະຖືປະຫວັດສາດເປັນແວ່ນແຍງທໍ່ນັ້ນ ໂສກນາດຕະກຳໃນປະຫວັດສາດຂຈຶ່ງບໍ່ເກີດຂຶ້ນອີກຢ່າງແທ້ຈິງ
|
