|
 ນາງຈ່າງເຮັດວຽກຢູ່ບໍລິສັດທຶນຕ່າງປະເທດໃນນະຄອນປັກກິ່ງ,ຫວ່າງມໍ່ໆນີ້ ນັກຂ່າວໄດ້ພົບນາງຢູ່ບ່ອນໃຫ້ຄຳປຶກສາຮັກສາສຸຂະພາບແມ່ແລະເດັກທີ່ໂຮງໝໍຫຼາຍຫຼັງຂອງປັກກິ່ງຮ່ວມກັນຈັດຂຶ້ນ,ນາງພວມຖາມຜູ້ຊ່ຽວຊານກ່ຽວກັບເລື່ອງກວດສຸຂະພາບກ່ອນແຕ່ງງານ. ໃນເວລາໃຫ້ສຳພາດຕໍ່ນັກຂ່າວນັ້ນ ນາງກ່າວວ່າກ່ອນແຕ່ງງານແນ່ນອນຕ້ອງໄປກວດກາສຸຂະພາບ.
"ແນ່ນອນຂ້ອຍຕ້ອງໄປກວດຮ່າງກາຍກ່ອນແຕ່ງງານ,ເພາະວ່ານີ້ແມ່ນທ່າທີທີ່ຮັບຜິດຊອບຕໍ່ສອງຝ່າຍຜົວເມຍ,ຂ້ອຍຮູ້ສຶກວ່າມີພັນທະເຮັດແບບນີ້."
ຈີນໄດ້ເລີ່ມປະຕິບັດລະບອບກວດຮ່າງກາຍກ່ອນແຕ່ງງານມາແຕ່ຊຸມປີ 80 ສະຕະວັດທີ 20,ແຫ່ງຕ່າງໆລ້ວນແຕ່ໄດ້ຕັ້ງອົງການປະເພດນີ້ໂດຍຈຳເພາະ. ກ່ຽວກັບເນື້ອໃນສຳຄັນຂອງການກວດຮ່າງກາຍປະເພດນີ້,ນາງຈ່າງຈູນ ນາຍໝໍພະແນກປະສູດຂອງໂຮງໝໍອານເຈີນປັກກິ່ງແນະນຳວ່າ:
"ການກວດຮ່າງກາຍກ່ອນແຕ່ງງານບໍ່ສັບສົນປານໃດ,ສຳຄັນແມ່ນຊີ້ນຳສິ່ງຄວນຮູ້ໃນຊີວິດການເປັນຢູ່ຫຼັງແຕ່ງງານແລະຍັງຕ້ອງກວດພະຍາດຕິດແປດແລະພະຍາດກຳມະພັນບາງຢ່າງ."
ນາງເວົ້າວ່າ,ການກວດຮ່າງກາຍກ່ອນແຕ່ງງານສຳຄັນແມ່ນເພື່ອກວດເບິ່ງວ່າມີພະຍາດທີ່ອາດຈະກະ ທົບກະເທືອນເຖິງການເກີດລູກຫຼືບໍ່,ປະເພດທີໜຶ່ງກໍຄືພະຍາດກຳມະພັນທີ່ໜັກໜ່ວງ; ປະເພດທີສອງແມ່ນພະຍາດຕິດແປດເຊິ່ງລວມທັງໂຣກເອດສ໌ແລະກຳມະໂຣກອື່ນໆເປັນຕົ້ນ; ປະເພດທີສາມແມ່ນພະຍາດທາງດ້ານຈິດໃຈເຊັ່ນໂຣກຈິດເປັນຕົ້ນ; ປະເພດທີສີ່ແມ່ນພະຍາດອະໄວຍະວະສຳຄັນແລະລະບົບສືບພັນທີ່ພົວພັນເຖິງການແຕ່ງດອງຄອດລູກ.
ຈາກນີ້ກໍເຫັນໄດ້ວ່າ,ການກວດຮ່າງກາຍກ່ອນແຕ່ງດອງມີຄວາມໝາຍສຳຄັນ,ບໍ່ພຽງແຕ່ພົວພັນເຖິງສຸຂະພາບຂອງແມ່ແລະເດັກແລະຄວາມສຸກຂອງຄອບຄົວທໍ່ນັ້ນ ສຳຄັນກວ່ານັ້ນແມ່ນພົວພັນເຖິງຄຸນທາດຂອງພົນລະເມືອງໂດຍກົງ.
ແຕ່ສິ່ງທີ່ເປັນໜ້າເສຍດາຍນັ້ນແມ່ນ,ແຕ່ຈີນປ່ຽນລະບອບກວດຮ່າງກາຍກ່ອນແຕ່ງງານແບບບັງຄັບເປັນແບບສະໝັກໃຈເມື່ອສອງປີກ່ອນແລ້ວ,ອັດຕາກວດຮ່າງກາຍກ່ອນແຕ່ງດອງໃນແຫ່ງຕ່າງໆກໍມີທ່ວງທ່າຫຼຸດລົງໃນລະດັບຕ່າງກັນ,ໃນນັ້ນ ປັກກິ່ງໄດ້ຫຼຸດຈາກ 95% ລົງຮອດ 5%. ນາງຊູສຸຍຊິງ ຜູ້ຊ່ຽວຊານຮັກສາສຸຂະພາບແມ່ແລະເດັກຂອງສູນປ້ອງກັນຄວບຄຸມພະຍາດຂອງຈີນເວົ້າວ່າ:
"ເມື່ອການກວດຮ່າງກາຍກ່ອນແຕ່ງດອງປ່ຽນເປັນແບບຕາມຄວາມສະໝັກໃຈຂອງຜູ່ກ່ຽວແລ້ວ,ອັດຕາການກວດກໍໄດ້ຫຼຸດຕ່ຳລົງ. ເວົ້າລວມແລ້ວ,ອັດຕາໃນຕົວເມືອງຈະສູງກວ່າໃນຊົນນະບົດ. ຢູ່ຊົນນະບົດ,ໂດຍສະເພາະແມ່ນຢູ່ເຂດທີ່ສອກຫຼີກແລະທຸກຍາກບາງຢ່າງ,ອັດຕາການກວດອາດຈະມີແຕ່ 1% ທໍ່ນັ້ນ."
ເປັນຫຍັງຄົນດຽວນີ້ຈຶ່ງບໍ່ຍິນດີໄປກວດຮ່າງກາຍກ່ອນແຕ່ງງານ? ທ່ານນາງສາສະດາຈານຊູສຸວຊິງວິໄຈເຫັນວ່າ,ດ້ານໜຶ່ງແມ່ນການບໍລິການຂອງອົງການກວດຮ່າງກາຍ ບໍ່ຖືກໃຈຄົນ; ອີກດ້ານໜຶ່ງແມ່ນຍ້ອນວ່າຜູ້ໄປກວດຮ່າງກາຍແຕ່ລະຄົນຕ້ອງເສຍຄ່າກວດໜຶ່ງ,ພົນລະເມືອງຢູ່ເຂດສອກຫຼີກແລະຜູ່ທຸກຍາກຈຳນວນໜຶ່ງຫາບແບກຄ່າໃຊ້ຈ່າຍລາຍນີ້ບໍ່ໄຫວ. ແຕ່ມູນເຫດສຳຄັນກວ່າໝູ່ແມ່ນມວນຊົນມີຄວາມຮັບຮູ້ບໍ່ພຽງພໍຕໍ່ຄວາມສຳຄັນຂອງການກວດກາຮ່າງກາຍກ່ອນແຕ່ງດອງ.
ປັດຈຸບັນ,ບາງເຂດຂອງຈີນພວມໃຊ້ມາດຕະການຢ່າງຕັ້ງໜ້າເພື່ອປ່ຽນແປງທ່ວງທ່າທີ່ອັດຕາການກວດຮ່າງກາຍກ່ອນແຕ່ງດອງຫຼຸດຕ່ຳລົງ. ຕົວຢ່າງຄືແຫ່ງຕ່າງໆລ້ວນແຕ່ພວມດັດແກ້ໄຂການບໍລິການເພື່ອໃຫ້ຖືກໃຈຄົນຜຸ່ມາໃຊ້ບໍລິການ ຮັບຜິດຊອບປິດລັບສະພາບສ່ວນຕົວຂອງຜູ້ມາກວດໃຫ້ດີກວ່າເກົ່າ ພ້ອມກັນນັ້ນ ໃນຕົວເມືອງໃຫຍ່ຈຳນວນໜຶ່ງເຊັ່ນປັກກິ່ງແລະຊຽງໄຮ້ເປັນຕົ້ນໄດ້ເລີ່ມໃຊ້ວິທີທີ່ອົງການປົກຄອງຫາບແບກຄ່າກວດໃຫ້ເພື່ອຍົກອັດຕາການກວດກາໃຫ້ສູງຂຶ້ນ. ມາດຕະການເຫຼົ່ານີ້ໄດ້ຮັບຄວາມຊົມເຊີຍຈາກມວນຊົນ,ພ້ອມກັນນັ້ນ ກໍໄດ້ຮັບຜົນດີສົມຄວນ.
ທ່ານນາງຊຸ້ຍຊິງ ສາດສະດາຈານ ຜູ້ຊ່ຽວຊານຮັກສາສຸຂະພາບແມ່ແລະເດັກຂອງສູນປ້ອງກັນຄວບຄຸມພະຍາດຂອງຈີນຊີ້ອອກວ່າ, ຈະປ່ຽນແປງສະພາບແນວນີ້ ມາດຕະການສຳຄັນກວ່າໝູ່ໃນການປ່ຽນແປງສະພາບແນວນີ້ແມ່ນຕ້ອງເພີ່ມທະວີການເຜີຍແຜ່ແລະສຶກສາຄວາມຮູ້ກ່ຽວກັບຄວາມຈຳເປັນໃນການກວດ ຮ່າງກາຍກ່ອນແຕ່ງດອງ. ນາງເວົ້າວ່າ: "ທີ່ມຈິງແລ້ວ,ອາໄສແຕ່ຄວາມພະຍາຍາມຂອງຝ່າຍອົງການປົກຄອງຝ່າຍດຽວແມ່ນບໍ່ພໍເທື່ອ. ຍັງຕ້ອງອອກແຮງໂຄສະນາເຜີຍແຜ່ຄວາມຮູ້ກ່ຽວກັບການກວດຮ່າງກາຍກ່ອນແຕ່ດອງ,ຍົກສະຕິຮັກສາສຸຂະພາບຂອງຕົນເອງໃຫ້ສູງຂຶ້ນຈາກດ້ານກົກຮາກ, ໃຫ້ກາຍເປັນການກະທຳທີ່ຕື່ນຕົວຂອງພວກເຂົາເຈົ້າ. ຂ້າພະເຈົ້າຮູ້ສຶກວ່ານີ້ຈຶ່ງແມ່ນວິທີທີ່ໄດ້ຜົນຢ່າງແທ້ຈິງ
ປັດຈຸບັນ,ເພື່ອໂຄສະນາຄວາມຮູ້ກ່ຽວກັບການກວດຮ່າງກາຍກ່ອນແຕ່ງດອງໃຫ້ທົ່ວເຖິງກັນ, ວຽກງານແມ່ແລະເດັກຄະນະລັດຖະບານຈີນ,ກະຊວງການປົກຄອງແລະປະຊາສົງເຄາະພ້ອມດ້ວຍຫຼາຍພາກສ່ວນທີ່ກ່ຽວຂ້ອງຫຼາຍໄດ້ພ້ອມກັນເລີ່ມຈັດການເຄື່ອນໄຫວໂຄສະນາເປັນເວລາປີໜຶ່ງ,ເນື້ອໃນຕົ້ນຕໍລວມທັງເຊີນຜູ້ຊ່ຽວຊານຮຽບຮຽງປຶ້ມກ່ຽວກັບຄວາມຮູ້ການກວດຮ່າງກາຍກ່ອນແຕ່ງດອງ,ຈັດການເສັງຄວາມຮູ້ທາງດ້ານນີູ້,ຈັດຄໍລຳໂຄສະນາຕາມສື່ມວນຊົນ ເປັນຕົ້ນ,ເພື່ອຊ່ອຍມວນຊົນຮູ້ໄດ້ຄວາມສຳຄັນຂອງການກວດຮ່າງກາຍກ່ອນແຕ່ງດອງ,ຊັກນຳໃຫ້ພວກເຂົາເຈົ້າໄປກວດຮ່າງກາຍກ່ອນແຕ່ງດອງດ້ວຍຄວາມຕື່ນຕົວສະຫມັກໃຈ.
|
