|
|
 |
| (GMT+08:00)
2005-05-16 16:35:26
|
 |
|
ທ່ານນາງໄລສ໌ຢ້ຽມຢາມອີຣັກຢ່າງກະທັນຫັນ(ສຽງ)
cri
Author: da
|
ຕາມຂ່າວCRI: ວັນທີ 15 ພຶດສະພາ, ທ່ານນາງໄລສ໌ ລັດຖະມົນຕີການຕ່າງປະເທດອາເມລິກາໄດ້ເດີນທາງໄປຮອດອີຣັກ,ຢ້ຽມຢາມອີຣັກຢ່າງກະທັນຫັນ,ທ່ານແມ່ນເຈົ້າໜ້າທີ່ຊັ້ນສູງຜູ້ທຳອິດຂອງລັດຖະບານອາເມລິກາທີ່ຢ້ຽມຢາມອີຣັກຫຼັງລັດຖະບານຂ້າມຜ່ານອີຣັກສ້າງຕັ້ງຂຶ້ນມານີ້.
ທ່ານນາງໄລສ໌ແມ່ນດຳເນີນການຢ້ຽມຢາມເທື່ອນີ້ຢູ່ໃຕ້ສະຖານະການອັນເຄັ່ງຕຶງຂອງອີຣັກໄດ້ເລື່ອນຂັ້ນຢ່າງບໍ່ຢຸດຢັ້ງ.ແຕ່ລັດຖະບານຂ້າມຜ່ານອີຣັກສ້າງຕັ້ງຂຶ້ນໃນທ້າຍເດືອນເມສາມານີ້,ຢູ່ພາຍໃນອີຣັກ ອົງການປະກອບອາວຸດໄດ້ກໍ່ເຫດການຫຼອນໂຈມຕີຢ່າງບໍ່ຂາດສາຍໂດຍແນໃສ່ເຈົ້າໜ້າທີ່ລັດຖະບານອີຣັກ ກອງຕຳຫຼວດກອງທະຫານແລະກອງທະຫານອາເມລິກາປະຈຳອີຣັກ,ເຮັດໃຫ້ 450 ກວ່າຄົນຕາຍ.ເຖິງວ່າລັດຖະບານຊຸດໃໝ່ຂອງອີຣັກແລະກອງທະຫານອາເມລິກາປະຈຳອີຣັກໄດ້ໃຊ້ມາດຕະການຫຼາຍຢ່າງກໍຕາມ,ແຕ່ບໍ່ໄດ້ເຮັດໃຫ້ສະຖານະການອັນເຄັ່ງຕຶງຂອງອີຣັກຜ່ອນຄາຍລົງ.ໃນຫຼາຍມື້ມານີ້,ເຫດການລະເບີດແລະຫຼອນໂຈມຕີພັດຍັງຄົງເກີດຂຶ້ນຢ່າງຕໍ່ເນື່ອງ.ໃນວັນທີ 15 ພຶດສະພາທີ່ທ່ານນາງໄລສ໌ໄປຮອດອີຣັກ,ແຫ່ງຕ່າງໆຂອງອີຣັກຍັງເກີດເຫດການຫຼອນໂຈມຕີຫຼາຍເທື່ອ,ເຮັດໃຫ້ 8 ຄົນຕາຍເປັນຢ່າງໜ້ອຍ,ຫຼາຍສິບຄົນບາດເຈັບ.
ຕາມໄດ້ຊາບ,ໃນກາລະເວລາອັນຄັບຂັນດັ່ງກ່າວນີ້,ທ່ານນາງໄລສ໌ຢ້ຽມຢາມອີຣັກຢ່າງກະທັນຫັນນັ້ນແມ່ນເພື່ອສະແດງວ່າ ອາເມລິກາສະໜັບສະໜູນລັດຖະບານຊຸດໃໝ່ຂອງອີຣັກ,ທັງເຈາະຈົງຫາລືກັບລັດຖະບານຊຸດໃໝ່ຂອງອີຣັກເພື່ອຮັບມືກັບສະຖານະການອັນເຄັ່ງຕຶງໃນສະເພາະໜ້ານີ້,ເພີ່ມທະວີວຽກງານສ້າງສາຄືນໃໝ່ຂອງອີຣັກ ແລະສ້າງລັດຖະທຳມະນູນສະບັບໃໝ່ຂອງອີຣັກເປັນຕົ້ນ.
ມື້ດຽວກັນ,ທ່ານນາງໄລສ໌ໄດ້ຂີ່ຍົນເຮຣີກົບຈາກກາກຕາບິນໄປຮອດອາກບິນ ເທດສະບານເຂດເຄິດປົກຄອງຕົນເອງທີ່ຢູ່ພາກເໜືອອີຣັກ,ແລ້ວພົບປະກັບທ່ານບາຈານີ ປະທານພັກປະຊາທິປະໄຕເຄິດ.ຫຼັງການພົບປະ ທ່ານນາງໄລສ໌ກ່າວເນັ້ນວ່າ,ອາເມລິກາອອກແຮງຂະຫຍາຍການພົວພັນໄມຕີຈິດກັບຊາວເຄິດ,ເພື່ອຊຸກຍູ້ການສ້າງຕັ້ງອີຣັກທີ່ມີລະບອບສະຫະພັນປະຊາທິປະໄຕ.
ຖັດມາ,ທ່ານນາງໄລສ໌ຂິ່ຍົນໄປຮອດແບກແດດ,ເຈລະຈາກັບທ່ານຈາຟາລີ ນາຍົກລັດຖະມົນຕີຂ້າມຜ່ານອີຣັກ.ໃນງານຊຸມນຸມນັກຂ່າວຮ່ວມທີ່ຈັດຂຶ້ນຫຼັງການເຈລະຈາ,ທ່ານນາງໄລສ໌ເວົ້າວ່າ,ກອງທະຫານນານາຊາດຈະສືບຕໍ່ປະຈຳຢູ່ອີຣັກ,ຈົນຮອດອີຣັກມີຄວາມສາມາດປ້ອງກັນຕົນເອງ.ໃນໄລຍະນີ້,ທະຫານອາເມລິກາຈະສືບຕໍ່ປາບປາມພວກກໍ່ການຮ້າຍທີ່ເຈດຕະນາສະກັດກັ້ນຂະບວນການສ້າງສາຄືນໃໝ່ຂອງອີຣັກ.ແຕ່ພ້ອມກັນນັ້ນ ທ່ານນາງໄລສ໌ກ່າວເນັ້ນວ່າ,ລັດຖະບານຊຸດໃໝ່ຂອງອີຣັກຄວນພະຍາຍາມຕໍ່ໄປ,ເຮັດໃຫ້ຊາວມຸສລິມນິກາຍຊຸນນິດທີ່ເປີດການເຄື່ອນໄຫວຄັດຄ້ານອາເມລິກາດ້ວຍກຳລັງອາວຸດຢ່າງບໍ່ຢຸດຢັ້ງນັ້ນ ເຂົ້າຮ່ວມຂະບວນການສ້າງລັດຖະທຳມະນູນຖາວອນຂອງອີຣັກຕື່ມອີກໂດຍໄວເທົ່າທີ່ຈະໄວໄດ້.
ທ່ານຈາຟາລີເວົ້າວ່າ,ລັດຖະບານຊຸດໃໝ່ຈະພະຍາຍາມຮັບປະກັນໃຫ້ຊາວມຸສລິມນິກາຍຊຸນນິດເຂົ້າຮ່ວມຂະບວນການສ້າງລັດຖະທຳມະນູນອີຣັກ.ພ້ອມກັນນັ້ນ,ອີຣັກຍັງຈະເລັ່ງລັດເຝິກອົບຮົມກອງຕຳຫຼວດແລະກອງທະຫານ,ເຮັດໃຫ້ກອງຕຳຫຼວດແລະກອງທະຫານມີຄວາມສາມາດປ້ອງກັນຄວາມປອດໄພແລະສະຖຽນລະພາບຂອງຊາດໂດຍໄວ,ເພື່ອເລັ່ງລັດຂະບວນການທະຫານຕ່າງປະເທດຖອນອອກໄປ.
ບຸກຄົນວິເຄາະຊີ້ອອກວ່າ,ໃນການເຈລະຈາກັບທ່ານຈາຟາລີ,ທ່ານນາງໄລສ໌ທວງໃຫ້ລັດຖະບານຂ້າມຜ່ານອີຣັກຮັບປະກັນໃຫ້ຊາວມຸສລິມນິກາຍຊຸນນິດເຂົ້າຮ່ວມຂະບວນການສ້າງລັດຖະທຳມະນູນຕື່ມອີກ,ທັງນີ້ໄດ້ສະແດງໃຫ້ເຫັນວ່າ ອາເມລິກາເລີ່ມສວຍໃຊ້ພາຫະນະການເມືອງ ອອຍໃຈກອງປະກອບອາວຸດຊາວມຸສລິມນິກາຍຊຸນນິດທີ່ຕ້ານອາເມລິກາ,ເພື່ອບັນລຸເປົ້າໝາຍທີ່ເຮັດໃຫ້ການເຄື່ອນໄຫວດ້ວຍກຳລັງຮຸນແຮງສະຫງົບລົງ,ແລະເຮັດໃຫ້ສະຖານະການມີຄວາມສະຖຽນລະພາບ,ແລ້ວເຮັດໃຫ້ຂະບວນວິວັດການເມືອງຂອງອີຣັກປະຕິບັດຕາມແຜນການໄດ້.
ແຕ່ພ້ອມກັນນັ້ນ ການຢ້ຽມຢາມຂອງທ່ານນາງໄລສ໌ເທື່ອນີ້ບໍ່ມີຂ່າວຄາວກ່ຽວກັບການຈະຖອນທະຫານ,ຈະບໍ່ສາມາດຕອບສະໜອງຄວາມຮຽກຮ້ອງຕ້ອງການກ່ຽວກັບການສິ້ນສຸດການຍຶດຄອງອີຣັກຂອງກອງທະຫານອາເມລິກາທີ່ອົງການປະກອບອາວຸດຢູ່ອີຣັກສະເໜີອອກນັ້ນ,ສະນັ້ນ ການຢາກປົວແປງສະຖານະການຄວາມປອດໄພຂອງອີຣັກໃຫ້ດີຂຶ້ນນັ້ນຍາກຫຼາຍ.ນອກນີ້,ໃນໄລຍະຢູ່ອາກບິນ ທ່ານນາງໄລສ໌ໄດ້ສະແດງເປັນພິເສດວ່າ ສະໜັບສະໜູນຊາວເຄິດ,ນີ້ອາດຈະເຮັດໃຫ້ຄວາມຂັດແຍ່ງແລະການປະທະກັນລະຫວ່າງຊາວມຸສລິມນິກາຍຊຸນນິດ ຊາວເຄິດກັບຊາວມຸສລິມນິກາຍຊີອິດດຸເດືອດຂຶ້ນຕື່ມອີກ.ສະຖານະການການເມືອງຂອງອີຣັກໃນອະນາຄົດຍັງເຫັນໄປໃນແງ່ດີບໍ່ໄດ້.
|
|
|
