|
ສີລະປະຄວັດຂອງຈີນມີປະຫວັດສາດດົນນານ ບັນດານັກສີລະປີນພື້ນເມືອງໄດ້ໃຊ້ວັດຖຸດິບຊະນິດຕ່າງໆ ຄວັດເຄື່ອງສີລະປະຫັດຖະກຳທີ່ມີວາດຊົງສີລະປະຫຼາຍຢ່າງຫຼາຍແນວ ແລ້ວຈໍ່ຕົວເປັນເຕັກນິກຄວັດສີລະປະຫັດຖະກຳພື້ນເມືອງຊະນິດຕ່າງໆຂອງຈີນ ຕົວຢ່າງຄືເຄື່ອງຄວັດດ້ວຍຍົກ ເຄື່ອງຄວັດດ້ວຍງາ ເຄື່ອງຄວັດດ້ວຍໄມ້ໄຜ່ແລະເຄື່ອງຄວັດດ້ວຍຖ່ານຫີນຍອດຢ້ຽມເປັນຕົ້ນ ສີລະປະຫັດຖະກຳອັນງາມປານີດ ເຫຼົ່ານີ້ລ້ວນແຕ່ແມ່ນຂອງປະເສີດໃນວັດທະນະທຳຈີນ
ໃນໄລຍະຍຸກເຄື່ອງມືຫີນໃຫມ່ຄືກ່ອນຄ.ສ 6000 ປີຮອດ 2000ປີ ຈີນກໍໄດ້ມີເຄື່ອງສຳລັບເອ້ຄວັດແລ້ວ ເຄື່ອງຄວັດສຳລັບເອ້ທີ່ພັດທະນາຈາກເຄື່ອງສີລະປະຕ່າງໆເຊັ່ນ ເຄື່ອງປັ້ນດິນເຜົາ ຍຸກທອງສຳລິດ ເຄື່ອງຍົກແລະເຄື່ອງນ້ຳກ້ຽງເປັນຕົ້ນລ້ວນແຕ່ມີຖານະສຳຄັນໃນທຸກສະໄຫມຂອງຈີນ ບໍ່ວ່າເຄື່ອງສີລະປະຄວັດຢ່າງໃດກໍໄດ້ສ່ອງແສງໃຫ້ເຫັນໂດຍທົ່ວໄປກ່ຽວກັບບົດບາດປະດັບເອ້ທີ່ມີປະຫວັດ ສາດດົນນານຂອງປະຊາຊາດຈີນ
ຕົວຢ່າງຄືເຄື່ອງຄວັດດ້ວຍຍົກ ມັນແມ່ນເຄື່ອງຄວັດຊະນິດຫນຶ່ງທີ່ມີປະຫວັດດົນນານກວ່າຫມູ່ຂອງຈີນ ຮອດປັດຈຸບັນໄດ້ມີປະຫວັດ 4 ພັນຮອດ 5 ພັນປີແລ້ວ ວັດຖຸດິບຂອງເຄື່ອງຄວັດດ້ວຍຍົກມີຫຼວງຫຼາຍ ໃນນັ້ນມີແກ້ວມໍລະກົດ ແກ້ວຂຽວແລະແກ້ວໂມລາເປັນຕົ້ນ ຊ່າງຫັດຖະກຳອີງຕາມສີທຳມະຊາດແລະຮູບທຳມະຊາດຕ່າງກັນຂອງຍົກ ແລ້ວອອກແບບຢ່າງພຽນໃຈທີ່ສຸດ ຄວັດຫີນຍົກເປັນເຄື່ອງສີລະປະທີ່ງາມປານີດ ເຄື່ອງຄວັດດ້ວຍຍົກຂະຫນາດໃຫຍ່ທີ່ຮັກສາໄວ້ໃນຫໍພິພິທະພັນພະລາຊະວັງກູກົງປັກກິ່ງທີ່ຊື່ວ່າທ່ານຕ້າຢູປົວແປງແມ່ນ້ຳ ແມ່ນເຄື່ອງຍົກທີ່ໃຫຍ່ກວ່າຫມູ່ໃນໂລກໃນປັດຈຸບັນ ເຄື່ອງຄວັດດ້ວຍຍົກດັ່ງກ່າວຍາວ 2 ແມັດປາຍ ມີນ້ຳຫນັກ 5000 ກວ່າກິໂລ ພວກຊ່າງສີລະປະຫັດຖະກຳໃນສະໄຫມລາຊະວົງເຊັງໄດ້ໃຊ້ເວລາ 6 ປີຈຶ່ງຄວັດສຳເລັດໃນຄ.ສ.ສະຕະວັດທີ 18 ອັນໄດ້ສະແດງໃຫ້ເຫັນສີມືອັນດີເລີດແຫ່ງການຄວັດດ້ວຍຍົກຂອງຈີນ
ເຄື່ອງຄວັດດ້ວຍງາແມ່ນເຄື່ອງສີລະປະຫັດຖະກຳທີ່ຄວັດດ້ວຍງາຊ້າງແລະແຂ້ວສັດອື່ນໆ ຮູບການຄວັດມີຮູບຄວັດຄືບານ ຮູບຄວັດປະເພດມີຮູບຊົ້ງອອກ ຮູບແກຼະສະຫຼັກໂຂ່ງໃນເປັນຕົ້ນ ຢູ່ຈີນ ເຄື່ອງຄວັດດ້ວຍງາຊ້າງຢູ່ນະຄອນປັກກິ່ງ ນະຄອນຊຽງໄຮ້ ແຂວງກວາງຕຸ້ງແລະນະຄອນນານກິ່ງເປັນຕົ້ນລ້ວນແຕ່ມີຊື່ສຽງດົ່ງດັງ ເຄື່ອງຄວັດດ້ວຍງາຊ້າງຂອງປັກກິ່ງມີຮູບສາວໃຊ້ທີ່ນຸ່ງຊຸດບູຮານ ດອກໄໄມ້ດອກຕອກ ນົກຫນູປີປີກ ຕົ້ນຫຍ້າແລະບົ້ງແມງເປັນຕົ້ນ ມີສີມືຄວັດຢ່າງລະອຽດປານີດ ມີຮູບຊົງບໍລິສຸດແລະງາມແບບບູຮານ ເຄື່ອງຄວັດດ້ວຍງາຊ້າງຂອງນະຄອນກວາງໂກວສ່ວນຫຼາຍແມ່ນເຄື່ອງຄວັດດອກໄມ້ທິດທັດເປັນຕົ້ນ ແກຼະສະຫຼັກເປັນຮູບໂຂ່ງໃນແລະມີສີສັດພິເສດ ເຄື່ອງຄວັດດ້ວຍງາຊ້າງຂອງນະຄອນຟູໂຈວມັກຄວັດຮູບຄົນແລະຮູບສັດເທິງງາຊ້າງຮູບບານ
ເຄື່ອງຄວັດດ້ວຍໄມ້ໄດ້ຖືກນຳໃຊ້ຢ່າງກວ້າງຂວາງໃນຊີວິດການເປັນຢູ່ຂອງຊາວຈີນບູຮານ ຕົວຢ່າງຄື ໃນສິ່ງກໍ່ສ້າງ ຂື່ເຮືອນ ບານປະຕູ ຂອບປ່ອງຢ້ຽມແລະເສົາເຮືອນ ຮາວເປັນຕົ້ນ ລ້ວນແຕ່ກໍ່ໄດ້ຄວັດຢ່າງລະອຽດປານີດ ເຮັດໃຫ້ສິ່ງກໍ່ສ້າງທັງຫມົດມີວາດຊົງງາມລຽບໆແບບບູຮານທັງສະແດງໃຫ້ເຫັນຄວາມຮັ່ງມີ ເຟີນິເຈີທີ່ເຮັດດ້ວຍໄມ້ໃນເຮືອນກໍໄດ້ຄວັດງາມຫຼາຍ ນອກນີ້ ໃນຊີວິດການເປັນຢູ່ຍັງໄດ້ໃຊ້ເຄື່ອງສີລະປະຫັດຖະກຳທີ່ຄວັດດ້ວຍໄມ້ ປັດຈຸບັນ ໃນເຄື່ອງຄວັດ ດອກໄມ້ຊະນິດຕ່າງໆຂອງຈີນ ເຄື່ອງຄວັດທີ່ມີຊື່ສຽງກວ່າຫມູ່ແມ່ນເຄຶ່ອງຄວັດດ້ວຍໄມ້ຂອງເມືອງຕົງຢາງແຂວງເຈີຈ່ຽງ ເຄື່ອງຄວັດໄມ້ທານ້ຳກ້ຽງສີຄຳຂອງແຂວງກວາງຕຸ້ງ ເຄື່ອງຄວັດໄມ້ຮວງຢ່າງຂອງເມືອງເວີນນໂຈວແລະເຄື່ອງຄວັດໄມ້ຂອງແຂວງຟູຈ້ຽງ ຖືກເອີ້ນເປັນ 4 ເຄື່ອງຄວັດທີ່ມີຊື່ສຽງ
ການຄວັດດ້ວຍຖ່ານຫີນຍອດຢ້ຽມແມ່ນເຄື່ອງສີລະປະຫັດຖະກຳທີ່ມີສີສັນພິເສດຂອງເມືອງຟູຊຸ້ນ ພາກຕາເວັນອອກສຽງເຫນືອຂອງຈີນ ເຫມາະສຳລັບຄວັດເຄື່ອງສີລະປະຫັດຖະກຳຕ່າງໆ ເຄື່ອງຄວັດງາມລຽບໆແບບບູຮານທຳມະຊາດ ນັກບູຮານນະຄະດີໄດ້ຄົ້ນພົບວ່າ ຢູ່ຮ່ອງຮອຍບ່ອນຢູ່ຂອງມະນຸດບູຮານທີ່ຫ່າງຈາກປັດຈຸບັນປະມານ 7000 ກວ່າປີກ່ອນ ໄດ້ຄົ້ນພົບເຄື່ອງສີລະປະຫັດຖະກຳຄວັດດ້ວຍຖ່ານຫີນຍອດຢ້ຽມຫຼາຍຢ່າງ,ສ່ວນ ເຄື່ອງຄວັດດ້ວຍຖ່ານຫີນຍອດຢ້ຽມໃນສະໄຫມປັດຈຸບັນແມ່ນເລີ່ມແຕ່ຕົ້ນສະຕະວັດ 20 ທ່ານຈ້າວຄຸ່ນເຊິ່ງ ນັກສີລະປີນຄວັດໄມ້ປັກກິ່ງໄດ້ຄວັດຖ່ານຫີນຍອດຢ້ຽມເປັນເຄື່ອງເອ້ ແລ້ວຂາຍຢູ່ເມືອງຟູຊຸ້ນ ແຕ່ນັ້ນເປັນຕົ້ນໄປ ເຄື່ອງຄວັດຖ່ານຫີນຈຶ່ງໄດ້ເກີດຂຶ້ນ
ນັກສີລະປີນຫັດຖະກຳຈີນຍັງໄດ້ເສີມຂະຫຍາຍຄວາມຄິດແປກ ປະຫຼາດຢ່າງເຕັມສ່ວນ ຄວັດຢູ່ເທິງແກນຫມາກໄມ້ເຊັ່ນ ແກນຫມາກຄາຍ ແກນຫມາກສົ້ມມໍແລະແກນຫມາກມັນຫໍເປັນຕົ້ນ ພວກເຂົາເຈົ້າໃຊ້ຈຸດພິເສດແລະການຂຶ້ນໆລົງລົງຂອງຮູບນອກແກນຫມາກໄມ້ ຄວັດຮູບຄົນ ສັດ ສາຍພູ ສາລາ ຜາສາດ ຫໍໂຮງເປັນຕົ້ນເປັນໂຕຢົ້ງໆມີສີສັນພິເສດທັງງາມປານີດ ນີ້ກໍ່ແມ່ນເຄື່ອງຄວັດດ້ວຍແກນຫມາກໄມ້
ນອກນີ້ ເຄື່ອງສີລະປະຫັດຖະກຳຄວັດຂອງຈີນຍັງມີເຄື່ອງຄວັດດ້ວຍຫີນ ເຄື່ອງຄວັດດ້ວຍດິນຈີ່ ເຄື່ອງຄວັດດ້ວຍໄມ້ ເຄື່ອງຄວັດດ້ວຍຮາກໄມ້ ເຄື່ອງຄວັດດ້ວຍກາບຫອຍ ເຄື່ອງຄວັດດ້ວຍນ້ຳກ້ອນແລະເຄື່ອງຄວັດດ້ວຍຫມາກພ້າວເປັນຕົ້ນ ລ້ວນແຕ່ສະແດງໃຫ້ເຫັນສະຕິປັນຍາຫຼວງຫຼາຍທີ່ສຸດແລະສີມືອັນຍອດຢ້ຽມຂອງຊາຍຈີນ
|
