ຕາມ​ຂ່າວCRI: ວັນ​ທີ 16 ພຶດສະພາ, ​ໃນ​ກອງ​ປະຊຸມ​ສົນທະນາ​ຊັ້ນສູງ​ກ່ຽວ​ກັບ​ການ​ສ້າງ​ສາ​ຄືນ​ໃໝ່​ແລະ​ການ​ພັດທະນາຫຼັງ​ໄພ​ຄື້ນຊູ​ນາ​ມິ​ທີ່​ຈັດ​ຂຶ້ນຢູ່​ບາງກອກ ນະຄອນ​ຫຼວງ​ໄທ, ທ່ານ​ເສິນ​ໂກ​ຟ້າ​ງ ຜູ່​ຊ່ອຍ​ລັດຖະ​ມົນຕີການ​ຕ່າງປະ​ເທດ​ຈີນ ຜູ່​ແທນ​ລັດຖະບານ​ຈີນ​​ໄດ້​ວາງ​ຂໍ້​ສະ​ເໜີ 3 ຂໍ້​ກ່ຽວກັບ​ການ​ສ້າງສາ​ຄືນ​ໃໝ່​ແລະ​ການ​ພັດທະນາຫຼັງ​ໄພ​ຄື້ນຊູ​ນາ​ມິ.

ຂໍ້​ສະ​ເໜີ 3 ຂໍ້​ມີ​ດັ່ງ​ນີ້: ໜຶ່ງ, ຈັດຕັ້ງປະຕິບັດ​ຕາມ​ຄວາມ​ຮັບ​ຮູ້​ຄື​ກັນ​ແລະ​ສັນຍາ​ທີ່​ປະ​ຊາ​ຄົມ​ໂລກ​ໄດ້​ຕົກລົງ​ກັນ​ໃນ​ການ​ຂົງ​ເຂດຫຼຸດ​ແລະ​ປ້ອງ​ກັນ​ໄພຢ່າງ​ແທ້​ຈິງ, ​ເຮັດ​ໃຫ້​ຄຳ​ໝັ້ນ​ສັນຍາກາຍ​ເປັນ​ການກະທຳຕົວ​ຈິງ, ຮັບປະກັນ​ໃຫ້ການ​ຊ່ອຍ​ເຫຼືອ​ແລະ​ການ​ສ້າງສາ​ຄືນ​ໃໝ່​​​ດຳ​ເນີນ​ໄປ​ຢ່າງ​ມີ​ປະສິດທິພາບ​ສູງ ມີ​ລະບຽບ​ແລະ​​ຢ່າງ​ຕໍ່​ເນື່ອງກັນ. ສອງ, ​ເສີມ​ຂະ​ຫຍາຍບົດບາດນຳພາ​ແລະ​ປະສານງານຂອງ​ສະຫະ​ປະຊາ​ຊາດ, ​ເພີ່ມ​ທະວີ​ການ​ແລກ​ປ່ຽນ​ແລະ​ການ​ປະສານ​ງານ. ສາມ, ​ເພີ່ມ​ທະວີ​ການ​ສ້າງຄວາມ​ສາມາດ​ໃນ​ການ​ຮັບ​ມື​ກັບ​ໄພ​ທຳ​ມະ​ຊາດ​ຂອງ​ປະ​ເທດ​ຕ່າງໆ ​ໂດຍ​ສະ​ເພາະ​ແມ່ນ​ປະ​ເທດ​ພວມ​ພັດທະນາ, ຊ່ອຍ​ປະ​ເທດ​ພວມ​ພັດທະນາ​ສ້າງ​ກົນ​ໄກ​ຕິດຕາມ​ວັດ​ແທກ ປ້ອງ​ກັນ​ແລະ​ປະ​ເມີນ​ໄພທຳ​ມະ​ຊາດ​ຂອງ​ສາກົນ​ແລະ​ພາກພື້ນ.

ກອງປະຊຸມ​ສົນທະນາ​ຊັ້ນສູງ​ກ່ຽວ​ກັບ​ການ​ສ້າງສາ​ຄືນ​ໃໝ່​ແລະ​ການ​ພັດທະນາຫຼັງ​ໄພ​ຄື້ນ​ຊູ​ນາ​ມິ ​ແມ່ນ​ພາກສ່ວນ​ປະກອບ​ໜຶ່ງ​ຂອງ​ກອງ​ປະຊຸມ​ປະຈຳ​ປີ​ຄັ້ງທີ 61 ຂອງ​ອົງການ​ແອ​ສ​ແຄບ​ສະຫະ​ປະຊາ​ຊາດ​ທີ່​ຈັດ​ຂຶ້ນຢູ່​ບາງກອກ​ແຕ່​ວັນ​ທີ 12 ຮອດ​ວັນ​ທີ 18 ພຶດສະພາ.