|
 ໃນປະຊາກອນຈີນ1ຕື້300ລ້ານຄົນ,ມີປະມານ60ລ້ານຄົນແມ່ນຄົນພິການ.ຢູ່ຈີນ,ຊີວິດປະຈຳວັນຂອງຄົນພິການໄດ້ຮັບຄວາມເອົາໃຈໃສ່ຢ່າງກວ້າງຂວາງຈາກລັດຖະບານແລະສັງຄົມ.ວັນອາທິດທີສາມຂອງເດືອນພຶດສະພາແຕ່ລະປີແມ່ນວັນຊ່ອຍເຫຼືອຄົນພິການທົ່ວປະເທດຈີນ.ລັດຖະບານຫວັງຢາກຜ່ານການກຳນົດວັນຊ່ອຍເຫຼືອຄົນພິການ,ເຕືອນໃຫ້ມວນຊົນເອົາໃຈໃສ່ນຳຄົນພິການຕື່ມອີກ,ເຮັດໃຫ້ພວກເຂົາເຈົ້າເຮັດວຽກແລະດຳລົງຊີວິດດີກວ່າເກົ່າ.ມື້ວານນີ້,ຄືວັນທີ15ພຶດສະພາແມ່ນວັນຊ່ອຍເຫຼືອຄົນພິການຂອງປີນີ້.ກ່ອນວັນຊ່ອຍເຫຼືອຄົນພິການ,ນັກຂ່າວວິທະຍຸພວກເຮົາໄດ້ໄປເອົາຂ່າວຢູ່ໂຮງໝໍນວດປັກກິ່ງ,ເພາະວ່າຢູ່ໂຮງໝໍແຫ່ງນີ້ມີນາຍໝໍຕາບອດຫຼາຍຄົນ.
ໂຮງໝໍນວດປັກກິ່ງແມ່ນໂຮງໝໍນວດວິຊາສະເພາະທີ່ໃຫຍ່ກວ່າໝູ່ຂອງຈີນ.ໂຮງໝໍແຫ່ງນີ້ມີນາຍໝໍ100ກວ່າຄົນ,ໃນນັ້ນ,ມີ40ກວ່າຄົນແມ່ນນາຍໝໍຕາບອດຫຼືນາຍໝໍສາຍຕາບໍ່ດີ.
ໂຮງໝໍນວດປັກກິ່ງຕັ້ງຢູ່ເຮືອນຊັ້ນດຽວ ອ້ອມກັນສີ່ດ້ານຫຼັງໃຫຍ່ແຫ່ງໜຶ່ງຢູ່ໃຈກາງນະຄອນປັກກິ່ງ.ໃນເດີ່ນບ້ານມີເຮືອນຊັ້ນດຽວທີ່ລຽນກັນເປັນສາມແຖວເຊິ່ງປະຕູແລະປ່ອງຢ້ຽມໄດ້ທາສີແດງຫຼືສີຂຽວ,ແລະມຸງດິນຂໍສີດຳ.ເຮືອນຊັ້ນດຽວເຫຼົ່ານີ້ກໍແມ່ນຫ້ອງນວດຂອງພະແນກຕ່າງໆ,ຜ່ານຈາກກະຈົກປ່ອງຢ້ຽມແຜ່ນໃຫຍ່ກໍເຫັນໄດ້ຕຽງນວດສີຂາວຫຼາຍຕຽງ,ໄດ້ເຫັນນາຍໝໍນວດພວມປົວພະຍາດໃຫ້ຄົນເຈັບດ້ວຍການນວດເສັ້ນເອັນແລະກ້າມຊີ້ນ.
ນັກຂ່າວມາຮອດຫ້ອງປົວພະຍາດຫ້ອງໜຶ່ງ,ໄດ້ເຫັນວ່າໃນຫ້ອງນີ້ໄດ້ວາງຕຽງ10ໜ່ວຍຢ່າງເປັນລະບຽບ, ຜູ້ປ່ວຍທີ່ນອນຢູ່ເທິງຕຽງພວມຮັບການປິ່ນປົວ.ຢູ່ບ່ອນແປະກັບປະຕູ, ນາຍໝໍຜູ້ໜຶ່ງທີ່ຊື່ວ່າເຈີ້ງລີພວມເງີຍຫົວໜ້ອຍໜຶ່ງ,ສອງມືພວມອອກແຮງນວດຫຼັງແລະແອວຂອງຄົນປ່ວຍ.ທ່ານເຈິ້ງລີບອກນັກຂ່າວວ່າ,ຜູ້ປ່ວຍຜູ້ນີ້ແອວຄົ່ນຍ້ອນແບກຂອງໜັກ,ທ່ານພວມນວດໃຫ້ຜູ້ປ່ວຍ,ທ່ານເວົ້າວ່າ:
"ດຽວນີ້ຂ້ອຍພວມນວດກ້າມຊີ້ນຂອງຜູ້ປ່ວຍຈາກສອງຂ້າງກະດູກສັນຫຼັງທີ່ບາດເຈັບ,ຫາແອວຈົນຮອດສົ້ນກະດູກສັນຫຼັງ,ເຮັດແນວນີ້ສາມາດເຮັດໃຫ້ກ້າມຊີ້ນໝົດຕົນໂຕຂອງຜູ້ປ່ວຍ ຜ່ອນຍານລົງແລະໄດ້ຮັບການຟື້ນຟູ."
ທ່ານໝໍນວດເຈິ້ງລີປີນີ້ອາຍຸ35ປີ,ທ່ານເປັນຕາເຂົ້າເຝື້ອຢ່າງໜັກໜ່ວງມາແຕ່ເກີດ.ທ່ານໄດ້ເຮັດວຽກຢູ່ໂຮງໝໍນວດປັກກິ່ງເປັນເວລາ10ກວ່າປີແລ້ວ.ໃນຫຼາຍປີມານີ້,ທ່ານເຈິ້ງລີພ້ອມກັນກັບໝູ່ຮ່ວມງານທັງຫຼາຍໄດ້ປິ່ນປົວຄົນເຈັບຫຼາຍໆຄົນ,ຈົນໄດ້ປົວດີພະຍາດຈຳນວນໜຶ່ງທີ່ປົວຍາກ,ຕົວຢ່າງຄື,ສາຍເລືອດກະດູກກ້ານຄໍແລະກະດູກສັນຫຼັງແຄບເປັນຕົ້ນ.ພາຍໃຕ້ການປິ່ນປົວຢ່າງພຽນໃຈຂອງພວກເຂົາເຈົ້າ,ຜູ້ປ່ວຍຫຼາຍຄົນໄດ້ຟື້ນຟູສຸຂະພາບໂດຍບໍ່ຕ້ອງຜ່າຕັດ.ໝໍນວດທັງຫຼາຍຂອງໂຮງໝໍນວດປັກກິ່ງກໍໄດ້ຮັບຄວາມໄວ້ເນື້ອເຊື່ອໃຈຫຼາຍຈາກຜູ້ປ່ວຍ.
ຕາມສະເໜີໃຫ້ຮູ້ວ່າ,ໝໍນວດຂັ້ນຜູ້ຊ່ຽວຊານຂອງໂຮງໝໍນວດປັກກິ່ງໄດ້ເງິນເດືອນປະມານ8ພັນຫາ9ພັນຢວນ,ໝໍນວດຜູ້ໜຸ່ມທີ່ຫາກໍ່ຮຽນຈົບຈາກໂຮງຮຽນກໍໄດ້ເງິນເດືອນ4ພັນຫາ5ພັນຢວນ.ຢູ່ຈີນ,ນີ້ແມ່ນລາຍໄດ້ສູງສົມຄວນ.
ທ່ານລາຍເວີຍ ຫົວໜ້າໂຮງໝໍນວດປັກກິ່ງເວົ້າວ່າ,ໝໍນວດທີ່ຕາບອດໄດ້ສ້າງປະສິດທິຜົນເພື່ອໂຮງໝໍ,ໂຮງໝໍກໍເອົາໃຈໃສ່ຫຼາຍນຳການບຳລຸງສ້າງພວກເຂົາເຈົ້າ,ແລະອຳນວຍຄວາມສະດວກໃນດ້ານ ເຮັດວຽກງານແລະຊີວິດການເປັນຢູ່ຂອງພວກເຂົາເຈົ້າ.ທາງທຸກເສັ້ນໃນໂຮງໝໍລ້ວນແຕ່ມີທາງສະເພາະສຳລັບຄົນຕາບອດ,ເຄື່ອງໃຊ້ຕ່າງໆໃນຫ້ອງປິ່ນປົວລ້ວນແຕ່ເກັບໄວ້ຢູ່ບ່ອນປະຈຳ,ຫ້າມບໍ່ໃຫ້ຍ້າຍໄປບ່ອນອື່ນຕາມໃຈ.ເພື່ອຊ່ອຍໝໍນວດທີ່ຕາບອດຍົກລະດັບວິຊາການນວດໃຫ້ສູງຂຶ້ນ,ແຕ່ລະປີ,ທາງໂຮງໝໍຍັງໄດ້ສົ່ງນາຍໝໍຕາບອດຜູ້ໜຶ່ງໄປຮຽນປະລິນຍາໂທໂດຍບໍ່ເສຍຄ່າຢູ່ມະຫາວິທະຍາໄລຢຸກຢາແພດສາດຈີນແຫ່ງໜຶ່ງຂອງປັກກິ່ງ.
1 2
|
