|
ລົດໄຟລອຍດ້ວຍແຮງແມ່ເຫຼັກ
cri
ທ່ານອາດຈະໄດ້ຮູ້ຂ່າວແລ້ວວ່າ,ໃນວັນທີ 31 ທັນວາ ປີ 2002,ລົດໄຟລອຍດ້ວຍແຮງແມ່ເຫຼັກຊຽງໄຮ້ຂອງຈີນໄດ້ທົດລອງແລ່ນລົດເປັນຄັ້ງທຳອິດ,ແລະທຸລະກິດທາງການຄ້າກ່ອນຫມູ່ໃນໂລກ.
ທາງລົດໄຟລອຍດ້ວຍແຮງແມ່ເຫຼັກຊຽງໄຮ້,ທິດຕາເວັນຕົກເລີ່ມຈາກສະຖານີໂລຢາງລູ້ຂອງລົດໄຟໃຕ້ດິນສາຍທີສອງເນັ່ງໄປຮອດເດີ່ນຍົນສາກົນພູຕົງຢູ່ທິດຕາເວັນອອກ,ຍາວທັງຫມົດປະມານ 33 ກິໂລແມັດ,ລົງທຶນທັງຫມົດປະມານ 10 ຕື້ຢວນ,ຄວາມໄວສູງສຸດແມ່ນ 430 ກິໂລແມັດຕໍ່ຊົ່ວໂມງ,ແລ່ນຖ້ຽວຫນຶ່ງ,ໃຊ້ເວລາປະມານ 8 ນາທີ,ປະຈຸບັນ,ລາຄາປີ້ລົດຖ້ຽວດຽວແມ່ນ 150 ຢວນ,ທໍ່ກັບປະມານ 1ແສນ 6 ຫມື່ນ 5 ພັນກີບ,ອາດມີຄົນຖາມວ່າ,33 ກິໂລແມັດ,ລົງທຶນຫຼາຍປານນີ້,ຄ່າປີ້ແພງປານນີ້,ມັນຄຸ້ມບໍ່?ສົມບໍ່?
ທີ່ຈິງແລ້ວ,ເມື່ອທຽບກັບທາງລົດໄຟຄວາມໄວສູງໃນປະຈຸບັນ,ລົດໄຟລອຍດ້ວຍແຮງແມ່ເຫຼັກມີຈຸດດີເດັ່ນ 6 ຂໍ້ທີ່ລົດແນວອື່ນທຽບບໍ່ໄດ້.
ຫນຶ່ງແມ່ນໄວ,ລົດໄຟລອຍດ້ວຍແຮງແມ່ເຫຼັກແມ່ນພາຫະນະຂົນສົ່ງຜູ່ໂດຍສານທາງຫນ້າດິນທີ່ຄວາມໄວສູງເຖິງ 500 ກິໂລແມັດຕໍ່ຊົ່ວໂມງພຽງຫນຶ່ງດຽວໃນປະຈຸບັນ,ຍ້ອນວ່າລົດໄຟປະເພດນີ້ມີແຕ່ລາງບໍ່ມີລໍ້,ໃນເວລາແລ່ນ,ອາໃສແຮງຢັນຂອງແມ່ເຫຼັກ,ລາງກັບລົດບໍ່ສຳຜັດກັນ,ບໍ່ຮຸກຖູກັນ,ສະນັ້ນ,ຄວາມໄວຈຶ່ງສູງເຖິງ 300 ຮອດ 500 ກິໂລແມັດຕໍ່ຊົ່ວໂມງ,ນີ້ຫມາຍຄວາມວ່າ,ສຳລັບການເດີນທາງລະຫວ່າງຕົວເມືອງທີ່ຫ່າງກັນແຕ່ 500 ຮອດ 1000 ກິໂລແມັດນັ້ນຂີ່ລົດໄຟປະເພດນີ້,ພໍປານກັບຂີ່ຍົນ.
ສອງແມ່ນສິ້ນເປືອງພະລັງງານຕ່ຳໂດຍທຽບຖານ,ໃນເວລາແລ່ນລົດ 500 ກິໂລແມັດຕໍ່ຊົ່ວໂມງການສິ້ນເປືອງພະລັງງານຕໍ່ທີ່ນັ່ງຕໍ່ກິໂລແມັດຂອງລົດໄຟລອຍດ້ວຍແຮງແມ່ເຫຼັກພຽງແຕ່ກວມ 1 ສ່ວນ 3 ຫຼືເຄິ່ງດຽວຂອງຍົນ,ຢ່າງຫນ້ອຍປະຢັດພະລັງງານໄດ້ຫຼາຍກວ່າລົດຍົນ 30%,ພ້ອມກັນນັນກໍປະຢັດພະລັງງານດີກວ່າທາງລົດໄຟທຳມະດາ.
ສາມແມ່ນລົດໄຟຊະນິດນີ້ລ້ຽວງ່າຍ,ຂຶ້ນຄ້ອຍໄດ້,ເລືອກເສັ້ນທາງໄດ້ຄ່ອງແຄ້ວແລະປັບໃຫ້ສອດຄ່ອງກັບສະພາບການໄດ້ດີ,ເຄິ່ງເສັ້ນຜ່າສູນກາງເວລາລ້ຽວລົດນ້ອຍກວ່າລົດໄຟທຳມະດາຫຼາຍ,ທັງສາມາດຂຶ້ນຄ້ອຍຄວາມເນີນສູງສຸດໄດ້ເຖິງ 10%,ທັງນີ້ເຮັດໃຫ້ທາງລົດໄຟດ້ວຍແຮງແມ່ເຫຼັກຍິ່ງສອດຄ່ອງກັບພູມສັນຖານຢ່າງຄ່ອງແຄ້ວ,ມູນຄ່າກໍ່ສ້າງກໍຖືກກວ່າອຸມົງແລະຂົວຫຼາຍ,ສ້າງພາບກັນໄປກັບທາງຄົມມະນາຄົມທີ່ມີຢູ່ແລ້ວເຊັ່ນທາງດ່ວນກໍງ່າຍ,ບໍ່ຕ້ອງເພີ່ມສິ່ງຫາບແບກທາງສິ່ງແວດລ້ອມໃຫມ່ອີກ.
ສີ່ແມ່ນສຽງບໍ່ນັນແຊວ,ຍ້ອນວ່າບໍ່ມີລໍ້ລົດຮຸກຖຸກັນ,ລາງລົດສຽງລົດໄຟລອຍດ້ວຍແຮງແມ່ເຫຼັກຈຶ່ງເບົາກວ່າລົດໄຟທຳມະດາ,ເມື່ອລົດໄຟແລ່ນເຂົ້າ,ເມືອງດ້ວຍຄວາມໄວ 200 ກິໂລແມັດຕໍ່ຊົ່ວໂມງນັ້ນ,ມັນຈະມີດງຽບກວ່າລົດໄຟລາງເບົາໃນຕົວເມືອງທີ່ຄວາມໄວຕ່ຳກວ່າ 100 ກິໂລແມັດຕໍ່ຊົ່ວໂມງນັ້ນຫຼາຍ.
ຫ້າແມ່ນບໍ່ເຊື່ອມພິດຕໍ່ສິ່ງແວດລ້ອມ,ຍ້ອນວ່າລົດໄຟລອຍດ້ວຍແຮງແມ່ເຫຼັກໃຊ້ໄຟຟ້າເປັນແມ່ແຮງ,ສະນັ້ນ,ໃນເວລາແລ່ນຈຶ່ງບໍ່ມີອາຍເສຍລະບາຍອອກຕະຫຼອດທາງແມ່ນພາຫະນະຄົມມະນາຄົມສີຂຽວຄືບໍ່ມີສິ່ງເຊື່ອມພິດແທ້ໆ.
ສຸດທ້າຍແມ່ນປອດໄພ,ຂີ່ສະບາຍບໍ່ຫຼຸຍຫ້ຽນງ່າຍ,ເວົ້າໃນດ້ານອົງປະກອບລົດໄຟລອຍດ້ວຍແຮງແມ່ເຫຼັກຮັບປະກັນບໍ່ຕົກລາງ,ວິທີແລ່ນລົດກໍ່ຮັບປະກັນບໍ່ຕ່ຳກັນງ່າຍ,ຍ້ອນວ່າພື້ນລົດບໍ່ສຳຜັດກັບລາງ,ສະນັ້ນ,ໃນເວລາແລ່ນລົດຈຶ່ງສະເທືອນຫນ້ອຍ,ຂີ່ສະລາຍ,ບໍ່ຫຼຸ້ຍຫ້ຽນງ່າຍ,ດັ່ງນັ້ນ,ຈຶ່ງມີແຕ່ສ້ອມແປງໃນດ້ານເຕັກນິກເອເລັກໂຕຼນິກເພື່ອຮັກສາ,ບໍ່ຕ້ອງການອອກກຳລັງກາຍຫຼາຍ.
ອາດຈະມີຄົນເວົ້າວ່າ,ເຕັກນິກລອຍດ້ວຍແຮງແມ່ເຫຼັກຂອງເຢຍລະມັນນຳຫນ້າໂລກ,ແຕ່ເປັນຫຍັງເຢຍລະມັນບໍ່ໄດ້ນຳມາໃຊ້ທາງການຄ້າ?ນີ້ແມ່ນຍ້ອນວ່າ,ເຢຍລະມັນມີປະຊາກອນຫນ້ອຍ,ຜູ່ໂດຍສານມີຈຳກັດ,ບວກກັບເນື້ອທີ່ດິນບໍ່ກວ້າງ,ໄລະທາງແລ່ນລົດສັ້ນ,ສະນັ້ນ,ຫລັງຈາກເຂົາເຈົ້າຄິດໄລ່ແລ້ວ,ເຫັນວ່າ,ອາດຈະຂາດທຶນ,ສະນັ້ນ,ຈຶ່ງບໍ່ໄດ້ນຳໃຊ້ທາງການຄ້າ.
ສ່ວນຈີນແມ່ນຕ່າງກັນຫຼາຍ,ໄລຍະທາງລະຫວ່າງຕົວເມືອງໃຫຍ່ໄກກັນຫຼາຍ,ຜູ່ໂດຍສານກໍຫຼາຍ,ລັກສະນະດີເລີດຂອງພາຫະະຂົນສົ່ງທີ່ມີຄວາມໄວ 400 ຮອດ 500 ກິໂລແມັດຕໍ່ຊົ່ວໂມງຕ້ອງສະແດງອອກໃຫ້ເຫັນຢູ່ບ່ອນໄລຍະທາງໄກ.ຕົວຢ່າງຄືຈາກນະຄອນຊຽງໄຮ້ຮອດນະຄອນຫາງໂຈວ, 30 ນາທີກໍພໍ,ຈາກປັກກິ່ງຮອດຊຽງໄຮ້ 3 ຊົ່ວໂມງກໍຮອດ,ເມື່ອເປັນແນວນີ້,ກໍຈະຈໍ່ຕົວປະກອບເປັນວົງເສດຖະກິດ 30 ນາທີທີ່ຫ່າງກັນຫຼາຍຮ້ອຍກິໂລແມັດແລະວົງເສດຖະກິດ 3 ຊົ່ວໂມງທີ່ຫ່າງຈາກກັນຫນຶ່ງພັນກິໂລແມັດ,ມັນອາດຈະກວມເຖິງບັນດາຕົວເມືອງໃຫຍ່ແລະເມືອງຜ້ານກາງຕ່າງໆຂອງຈີນ.
ຄວາມຫມາຍຫຼາຍກວ່າຫມູ່ຂອງການສ້າງລົດໄຟລອຍດ້ວຍແຮງແມ່ເຫຼັກຊຽງໄຮ້ແມ່ນຢູ່ບ່ອນວ່າມັນເປັນແບບຢ່າງໃຫ້ແກ່ອົງປະກອບຄົມມະນາຄົມຂອງຈີນໃນອະນາຄົດ,ໃນຄົມມະນາຄົມຜູ້ໂດຍສານ.ການເດີນທາງ 30 ນາທີທໍ່ກັບການເດີນທາງພາຍໃນຕົວເມືອງດຽວກັນ,ການເດີນທາງ 3 ຊົ່ວໂມງແມ່ນການເດີນທາງທີ່ສະບາຍກວ່າຫມູ່ຄືໄປກັບໄດ້ໃນມື້ດຽວ,ໃນການເດີນທາງໄກ,ດັ່ງນັ້ນ,ຄວາມຫມາຍເປັນແບບຢ່າງຂອງຫມາກຜົນນີ້ແມ່ນບໍ່ມີຂອບເຂດ,ອົງປະກອບວົງເສດຖະກິດຂອງຈີນຍ່ອມຈະສັບຊ້ອນກັນໃຫມ່ຢ່າງແນ່ນອນ.
ເຖິງວ່າລາຄາສ້າງທາງລົດໄຟເສັ້ນນີ້ແພງຫຼາຍ,ແຕ່ຖ້າກໍ່ສ້າງຢ່າງຂະຫນາດໃຫຍ່ແລ້ວ,ຕົ້ນທຶນກໍຈະຫຼຸດຕ່ຳລົງໃນຫນ້າພຽງຕ່າງກັນ,ເມື່ອຈີນເຢຍລະມັນພ້ອມກັນທຳຄວາມພະຍາຍາມແລ້ວ,ມີຫວັງຈະແກ່ງແຍ່ງກັບທາງລົດໄຟຄວາມໄວສູງໃນດ້ານລາຄາ,ນອກນີ້,ຕໍ່ໄປພາຍຫນ້າ,ຍ່ອມຈະມີເຄື່ອງປະກອບທາງລົດໄຟລອຍດ້ວຍແຮງແມ່ເຫຼັກຍິ່ງຫຼາຍຜະລິດຢູ່ຈີນ,ມັນກໍຈະຫຼຸດຕ່ຳຕົ້ນທຶນກໍ່ສ້າງໃຫ້ຕ່ຳລົງເຊັ່ນດຽວກັນ ຜູ່ຊ່ຽວຊານເຫັນວ່າ,ເຕັກນິກລອຍດ້ວຍແຮງແມ່ເຫຼັກມີຫວັງຈະຊຸກຍູ້ໃຫ້ອຸດສາຫະກຳລອຍດ້ວຍແຮງແມ່ເຫຼັກຂອງຈີນ,ຂະຫຍາຍຕົວອອກຢ່າງວ່ອງໄວ,ຂ້ຽວເລັ່ງໃຫ້ເຕັກນິກກ້າວຫນ້າທັນສະໄຫມຂອງຈີນ,ໄລ່ທັນລະດັບກ້າວຫນ້າຂອງໂລກ.
|
|
