ຕາມ​ຂ່າວCRI: ວັນ​ທີ 18 ພຶດສະພາ​ນີ້ ຢູ່​ທີ່​ເຊ​ອຸນ, ທ່ານ​ບານ​ກີ​ມູນ ລັດຖະມົນຕີ​ກະ​ຊວງ​ການ​ຕ່າງ​ປະ​ເທດ​ແລະ​ການ​ຄ້າ​ສ.​ເກົາຫຼີກ່າວ​ວ່າ, ທ່ານ​ເຊື່ອ​ວ່າການ​ເຈລະຈາ​ເຮັດ​ວຽກ​ຂັ້ນຮອງ​ລັດ​ຖະມົນຕີ​ລະຫວ່າງ​ສ.​ເກົາຫຼີກັບສ.ປ.ປ.​ເກົາຫຼີຈະ​ມີ​ຜົນ​ດີ​ຕໍ່​ການ​ຈັດການ​ເຈລະຈາ 6 ຝ່າຍ​ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາຫຼີຄືນ​ໃໝ່.

​ໃນ​ງາ​ນຊຸ​ມນຸມນັກ​ຂ່າວ​ທີ່​ຈັດ​ຂຶ້ນ​ໃນ​ມື້​ດຽວ​ກັນ, ທ່ານ​ບານ​ກີ​ມູນ​ກ່າວ​ວ່າ, ​ໃນ​ການ​ເຈ​ລະ​ຈາ​ເຮັດ​ວຽກ​ຂັ້ນຮອງ​ລັດຖະມົນຕີ​ລະຫວ່າງ​ສ.​ເກົາຫຼີກັບສ.ປ.ປ.​ເກົາຫຼີທີ່​ຈັດ​ຂຶ້ນຢູ່​ເມືອງ​ແຄ​ຊົງ​ແຫ່ງ​ສ.​ປ.ປ.ເກົາຫຼີ​ແຕ່​ວັນ​ທີ 16 ຮອດ​ວັນ​ທີ 17 ພຶດສະພາ​ນີ້, ສ.​ເກົາຫຼີ​ໄດ້​ສະ​ແດງ​ຫຼັກໝັ້ນ​ແລະ​ທັດສະນະ​ຂອງ​ຝ່າຍ​ສ.​ເກົາຫຼີທີ່​ມີ​ຕໍ່​ບັນຫາ​ນິວ​ເຄຼຍ​ແຫຼມ​ເກົາຫຼີນັ້ນຢ່າງ​ເຕັມ​ສ່ວນ. ຝ່າຍ​ສ.​ເກົາຫຼີ​ເຫັນ​ວ່າ, ການ​ຟື້ນ​ຟູ​ການ​ເຈລະຈາ 6 ຝ່າຍ​ແມ່ນ​ສຳຄັນ​ທີ່​ສຸດ.

ທ່ານ​ບານ​ກີ​ມູນ​ຍັງ​ກ່າວ​ວ່າ, ຖ້າ​ສ.ປ.ປ.​ເກົາຫຼີກັບ​ຄືນສູ່​ການ​ເຈລະຈາ 6 ຝ່າຍ​ອີກ​ແລ້ວ, ສ.​ເກົາ​ຫຼີຈະ​ສະ​ເໜີ "ຍັດຕິ​ສຳຄັນ", ​ແລ້ວ​ຊຸກ​ຍູ້​ໃຫ້ການ​ເຈລະຈາ 6 ຝ່າຍ​ໄດ້​ຮັບ​ໝາກ​ຜົນ​ທີ່​ມີ​ລັກສະນະ​ທາດ​ແທ້.

ພາຍຫຼັງການ​ເຈລະຈາ​ລະຫວ່າງ​ລັດຖະບານ​ທັງ​ສອງ​ປະ​ເທດ​ຂາດ​ສະບັ້ນ​ໄປ​ເປັນ​ເວລາ​ເກືອບ 1 ປີ​ແລ້ວ, ວັນ​ທີ 16 ພຶດສະພາ, ສ.​ເກົາຫຼີ​ກັບສ.ປ.ປ.​ເກົາຫຼີ​ໄດ້​ຈັດການ​ເຈ​ລະ​ຈາ​ເຮັດ​ວຽກ​ຂັ້ນ​ຮອງ​ລັດຖະມົນຕີ​ລະຫວ່າງ​ສອງ​ປະ​ເທດ​ຄືນ​ໃໝ່​ຢູ່​​ເມືອງ​ແຄ​ຊົງ​ແຫ່ງ​ສ.ປ.ປ.​ເກົາຫຼີ. ຍ້ອນ​ຍັງ​ບໍ່​ທັນ​ໄດ້​ກ້າວ​ເຖິງ​ຂັ້ນຕົກລົງ​ກັນ​ຂັ້ນສຸດ​ທ້າຍ, ສອງ​ຝ່າຍ​ຕົກລົງ​ເຈ​ລະ​ຈາ​ຕໍ່​ໄປ​ໃນ​ວັນ​ທີ 19 ພຶດສະພາ​ນີ້.