|
ສັບປະດາໂທລະຄົມຈີນ-ອາຊຽນທີ່ຈັດຂຶ້ນໃນວັນທີ 12 ພຶດສະພານັ້ນໄດ້ອັດລົງແລ້ວຢູ່ເມືອງເຊີນເຈີນຈີນໃນວັນທີ 18 ພຶດສະພາ.
ຕາມໄດ້ຊາບ, ສັບປະດາໂທລະຄົມຈີນ-ອາຊຽນຄັ້ງນີ້ມີຫົວຂໍ້ວ່າ"ຈີນກັບອາຊຽນ:ສ້າງການພົວພັນໝູ່ຄູ່ໃນຂົງເຂດໂທລະຄົມຂໍ້ມູນຂ່າວສານ ທີ່ອວ່າຍໜ້າໄປສູ່ການພັດທະນາພ້ອມກັນ".ການຈັດສັບປະດາໂທລະຄົມຈີນ-ອາຊຽນຄັ້ງນີ້ແມ່ນປະຕິບັດຕາມຂໍ້ລິເລີ່ມທີ່ທ່ານເວີນເຈຍປາວ ນາຍົກລັດຖະມົນຕີຈີນສະເໜີໃນກອງປະຊຸມຜູ້ນຳອາຊີຕາເວັນອອກຄັ້ງທີ 8 ທີ່ຈັດຂຶ້ນຢູ່ວຽງຈັນ ນະຄອນຫຼວງສປປລາວໃນເດືອນພະຈິກປີ 2004.ເລຂາທິການກຸ່ມອາຊຽນ ລັດຖະມົນຕີຫຼືຮອງລັດຖະມົນຕີຂອງຂະແໜງການຄຸ້ມຄອງໂທລະຄົມຂໍ້ມູນຂ່າວສານຂອງ 10 ປະເທດອາຊຽນຄືລາວ ກຳປູເຈຍ ໄທ ມຽນມາ ຫວຽດນາມ ສິງກະໂປ ມາເລເຊຍ ອິນໂດເນເຊຍ ຟີລິບປີນ ບຼູໄນໄດ້ນຳພາຄະນະຜູ້ແທນເຂົ້າຮ່ວມການເຄື່ອນໄຫວເທື່ອນີ້.
ໃນພິທີໄຂສັບປະດາຢູ່ປັກກິ່ງໃນວັນທີ 12 ພຶດສະພາ,ທ່ານຮວງຈູ ຮອງນາຍົກລັດຖະມົນຕີຈີນໄດ້ກ່າວຄຳປາໄສຊີ້ອອກວ່າ,ແຕ່ຈີນກັບອາຊຽນເຊັນ"ຄຳຖະແຫຼງການຮ່ວມກ່ຽວກັບການພົວພັນໝູ່ຄູ່ຍຸດທະສາດທີ່ອວ່າຍໜ້າໄປສູ່ສັນຕິພາບແລະຄວາມຈະເລີນຮຸ່ງເຮືອງ"ໃນປີ 2003 ເປັນຕົ້ນມາ,ການພົວພັນລະຫວ່າງສອງຝ່າຍໄດ້ຂະຫຍາຍຕົວແລະລົງສູ່ລວງເລິກຕື່ມອີກ,ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກໍໄດ້ກ້າວເຂົ້າສູ່ໄລຍະໃໝ່.ການສົນທະນາທາງການເມືອງແລະຄວາມປອດໄພລະຫວ່າງສອງຝ່າຍນັບມື້ນັບເນື່ອງນິດແລະລົງສູ່ລວງເລິກ,ຄວາມໄວ້ເນື້ອເຊື່ອໃຈເຊິ່ງກັນແລະກັນໄດ້ເພີ່ມຂຶ້ນຢ່າງບໍ່ຢຸດຢັ້ງ;ການພົວພັນເສດຖະກິດການຄ້າໄດ້ເພີ່ມທະວີຂຶ້ນຢ່າງບໍ່ຂາດສາຍ,ຂົງເຂດການຮ່ວມມືກໍໄດ້ຂະຫຍາຍກວ້າງອອກຢ່າງຮອບດ້ານ,ການສ້າງເຂດການຄ້າເສລີຈີນ-ອາຊຽນໄດ້ຮັບຄວາມຄືບໜ້າທີ່ສຳຄັນ,ງານມະຫາກຳຈີນ-ອາຊຽນໄດ້ຈັດຂຶ້ນຢ່າງສຳເລັດຜົນ.ອາຊຽນແມ່ນພາກພື້ນໃກ້ຄຽງທີ່ສຳຄັນຂອງຈີນ,ຈີນຈະສືບຕໍ່ຮ່ວມມືກັບອາຊຽນໃນທຸກດ້ານ,ປັບປຸງແລະຂະຫຍາຍການພົວພັນໝູ່ຄູ່ຮ່ວມມືຍຸດທະສາດກັບອາຊຽນ.
ທ່ານຮອງນາຍົກຮວງຈູຫວັງໃຫ້ສອງຝ່າຍປະຕິບັດຕາມຫຼັກການທີ່ສະເໝີພາບກັນຕ່າງໄວ້ເນື້ອເຊື່ອໃຈກັນ ຮ່ວມມືກັນໃຫ້ໄດ້ຜົນນຳກັນບົນພື້ນຖານການຮ່ວມມືລະຫວ່າງສອງຝ່າຍໃນເມື່ອກ່ອນ,ລົງເລິກແລະເປີດກວ້າງການພົວພັນຮ່ວມມືໃນຂົງເຂດໂທລະຄົມຂໍ້ມູນຂ່າວສານຢ່າງຮອບດ້ານ,ເພີ່ມທະວີການລຸລົງກັນແລະການແລກປ່ຽນກັນຕື່ມອີກ,ກຳໂອກາດເຕັກນິກດີຈິຕອນ,ເຮັດໃຫ້ເນື້ອການຮ່ວມມືອຸດົມສົມບູນ,ບູລະນະແບບເບົ້າການຮ່ວມມື,ເປີດກວ້າງຊ່ອງທາງຮ່ວມມື,ຊຸກຍູ້ການຮ່ວມມືກັນໃຫ້ມິລະດັບສູງກວ່າເກົ່າ ຂອບເຂດກວ້າງກວ່າເກົ່າແລະບັງເກີດຜົນກວ່າເກົ່າ.
ຕອນບ່າຍວັນທີ 12 ພຶດສະພາໄດ້ຈັດກອງປະຊຸມເວທີປາໄສລັດຖະມົນຕີໂທລະຄົມຈີນ-ອາຊຽນ.ລັດຖະມົນຕີກະຊວງໂທລະຄົມຂອງຈີນແລະຂອງບັນດາປະເທດອາຊຽນ ເລຂາທິການກຸ່ມອາຊຽນໄດ້ແລກປ່ຽນຄວາມເຫັນໂດຍໝູນອ້ອມການພັດທະນາແລະການຮ່ວມມືໃນດ້ານໂທລະຄົມຂໍ້ມູນຂ່າວສານຂອງພາກພື້ນແຫ່ງນີ້,ເປັນເອກະສັນກັນຜ່ານຮັບຮອງຄຳຖະແຫຼງການປັກກິ່ງກ່ຽວກັບ"ຈີນກັບອາຊຽນ:ສ້າງການພົວພັນໝູ່ຄູ່ໃນຂົງເຂດໂທລະຄົມຂໍ້ມູນຂ່າວສານທີ່ອວ່າຍໜ້າໄປສູ່ການພັດທະນາພ້ອມກັນ".
ຕາມໄດ້ຊາບ,ຄຳຖະແຫຼງການປັກກິ່ງທີ່ຜ່ານຮັບຮອງໃນກອງປະຊຸມຄັ້ງນີ້ໄດ້ກ່າວເນັ້ນວ່າ ການຮ່ວມມືລະຫວ່າງຈີນກັບບັນດາປະເທດອາຊຽນໃນຂົງເຂດໂທລະຄົມຂໍ້ມູນຂ່າວສານມີຄວາມໝາຍສຳຄັນ,ໄດ້ສະເໜີວ່າ ຕ້ອງເພີ່ມທະວີການສົນທະນາແລະການແລກປ່ຽນກັນລະຫວ່າງລັດຖະບານບັນດາປະເທດໃນດ້ານພື້ນຖານໂຄງລ່າງໂທລະຄົມຂໍ້ມູນຂ່າວສານ ການບໍລິການທົ່ວໄປທາງໂທລະຄົມ ການບຳລຸງສ້າງຊັບພະຍາກອນມະນຸດ ຄວາມປອດໄພຂອງແວບໄຊແລະຂໍ້ມູນຂ່າວສານ ຄວາມສະດວກທາງການຄ້າແລະການລົງທຶນເປັນຕົ້ນ,ອັນໄດ້ສ້າງພື້ນຖານທີ່ໝັ້ນຄົງກວ່າເກົ່າໃຫ້ແກ່ການຮ່ວມມືຕື່ມອີກຂອງອຸດສາຫະກຳຂໍ້ມູນຂ່າວສານລະຫວ່າງຈີນກັບອາຊຽນ.
ວັນທີ 12 ພຶດສະພາ,ຍັງໄດ້ເປີດແວບໄຊຮ່ວມມືທາງໂທລະຄົມຂໍ້ມູນຂ່າວສານຈີນ-ອາຊຽນ,ທັງໄດ້ສະໜອງພາຫະນະທີ່ສະດວກໃຫ້ແກ່ການເພີ່ມທະວີຄວາມເຂົ້າໃຈແລະການຮ່ວມມືກັນລະຫວ່າງສອງຝ່າຍ.
ສັບປະດາໂທລະຄົມຈີນ-ອາຊຽນຄັ້ງນີ້ແມ່ນຈັດຂຶ້ນແຕ່ວັນທີ 12 ຫາວັນທີ 18 ພຶດສະພາໂດຍແບ່ງອອກເປັນສາມໄລຍະ,ຕ່າງຢູ່ນະຄອນປັກກິ່ງ ນະຄອນຊຽງໄຮ້ແລະນະຄອນເຊີນເຈີນ.ໃນໄລຍະດັ່ງກ່າວນີ້ໄດ້ຈັດກອງປະຊຸມສົນທະນາລະຫວ່າງລັດຖະບານກັບວິສາຫະກິດຂອງຈີນອາຊຽນ,ກອງປະຊຸມສຳມະນາໂທລະຄົມຂໍ້ມູນຂ່າວສານຈີນ-ອາຊຽນຄັ້ງທີ 4 ,ກອງປະຊຸມເຈົ້າໜ້າທີ່ອາວຸໂສບໍ່ເປັນທາງການລະຫວ່າງຈີນກັບອາຊຽນ ແລະການເຄື່ອນໄຫວອື່ນໆ.ຄະນະຜູ້ແທນບັນດາປະເທດຍັງໄດ້ທັດສະນະສຶກສາວິສາຫະກິດທຸລະກິດໂທລະຄົມແລະວິສາຫະກິດຜະລິດອຸປະກອນໂທລະຄົມຂອງຈີນ.
ຕາມໄດ້ຊາບ,ໃນຫຼາຍປີມານີ້,ການແລກປ່ຽນແລະການຮ່ວມມືລະຫວ່າງຈີນກັບອາຊຽນໃນຂົງເຂດໂທລະຄົມຂໍ້ມູນຂ່າວສານໄດ້ລົງສູ່ລວງເລິກຢ່າງບໍ່ຢຸດຢັ້ງ,ແຜນການທີ່ຈີນອົບຮົມຜູ້ຄຸ້ມຄອງໂທລະຄົມຊັ້ນກາງແລະຊັ້ນສູງຂອງອາຊຽນ 500 ຄົນນັ້ນພວມດຳເນີນຢ່າງຕັ້ງໜ້າ,ການກໍ່ສ້າງທາງດ່ວນໂທລະຄົມໃນອະນຸພາກພື້ນແມ່ນ້ຳຂອງເຊິ່ງລວມທັງຈີນກໍເລີ່ມດຳເນີນແລ້ວ,ການຮ່ວມມືດ້ານໂທລະຄົມຂໍ້ມູນຂ່າວສານໄດ້ກາຍເປັນຂົງເຂດສຳຄັນອັນໜຶ່ງໃນການຮ່ວມມືຮອບດ້ານລະຫວ່າງຈີນກັບບັນດາປະເທດອາຊຽນ,ມັນຈະມີບົດບາດສຳຄັນຕໍ່ການຊຸກຍູ້ການພົວພັນເສດຖະກິດການຄ້າລະຫວ່າງສອງຝ່າຍຂະຫຍາຍຕົວອອກ.
|
