|
|
 |
| (GMT+08:00)
2005-05-20 11:03:45
|
 |
|
ຂໍ້ສຳຄັນໃນການປົວໂຣກມະເຮັງຄືກວດຮູ້ໄວ
cri
Author: li
 ຄຽງຄູ່ກັບການຂະຫຍາຍຕົວຂອງວິທະຍາສາດເຕັກນິກແລະລະດັບປິ່ນປົວພະຍາດຍົກສູງຂຶ້ນ,ພະຍາດຫຼາຍຢ່າງທີ່ເປັນໄພຮ້າຍແຮງບໍ່ໄດ້ເປັນຕາຢ້ານປານໃດແລ້ວ,ແຕ່ໂຣກມະເຮັງສ່ວນຫຼາຍທີ່ສຸດພັດຍັງແມ່ນພະຍາດທີ່ປົວຍາກຢູ່ຄືເກົ່າ,ສະນັ້ນ,ປັດຈຸບັນ,ໂຣກມະເຮັງໄດ້ກາຍເປັນບັນຫາສາທາລະນະສຸກທີ່ໃຫຍ່ກວ່າໝູ່ບັນຫາໜຶ່ງໃນໂລກ. ຕາມສະຖິຕິ,ໃນປີ 2000,ທົ່ວໂລກໄດ້ມີ 6 ລ້ານ 2 ແສນກວ່າຄົນຕາຍຍ້ອນໂຣກມະເຮັງ.
ແຕ່ວ່າ,ຢູ່ຕໍ່ໜ້າໂຣກມະເຮັງ,ຄົນເຮົາກໍບໍ່ແມ່ນບໍ່ມີວິທີຈັກເມັດ,ອົງການອະນາໄມໂລກເຄີຍສະເໜີວ່າ,ຖ້າປິ່ນປົວໃນໄລຍະຕົ້ນໄດ້ຢ່າງສຳເລັດຜົນ,ໂຣກມະເຮັງ 1 ສ່ວນ 3 ແມ່ນປົວໃຫ້ຫາຍຢ່າງເຖິງຖອງໄດ້. ສ່ວນປະຖົມປັດໄຈຂອງການປິ່ນປົວໃນໄລຍະຕົ້ນກໍແມ່ນກວດຮູ້ໄວ. ໃນລາຍການສຸກສາລາພາກນີ້ ພວກເຮົາຂໍລົມເລື່ອງກວດຮູ້ໂຣກມະເຮັງໃນໄລຍະຕົ້ນ.
ໂຣກມະເຮັງກໍເອີ້ນວ່າຊີ້ນປົ່ງຮ້າຍແຮງ,ແມ່ນພະຍາດທີ່ມີຈຸດພິເສດຄືຈຸລັງເພີ່ມຂຶ້ນຜິດປົກກະຕິແລະຍົກຍ້າຍ. ໃນການປິ່ນປົວໂຣກມະເຮັງ,ການກວດພົບໃນໄລຍະຕົ້ນ,ບົ່ງມະຕິໃນໄລຍະຕົ້ນແລະປິ່ນປົວໃນໄລຍະຕົ້ນມີຄວາມໝາຍສຳຄັນ. ຕົວຢ່າງຄືຜູ້ເປັນມະເຮັງໄສ້ແກ່,ຖ້າໄດ້ປິ່ນປົວໃນໄລຍະຕົ້ນ,ຈະມີຄົນເຈັບ 90% ສາມາດມີຊີວິດຢູ່ລອດອີກ 5 ປີຂຶ້ນໄປ; ແຕ່ຖ້າຮອດໄລຍະປາຍຈຶ່ງປິ່ນປົວ,ກໍມີແຕ່ຄົນເຈັບ 5% ຮອດ 7% ຈະມີຊີວິດຢູ່ລອດຕໍ່ອີກ 5 ປີ.
ທ່ານຊືຢວນຂາຍ ນາຍໝໍໃຫຍ່ຂອງໂຮງໝໍຊີ້ນປົ່ງແຫ່ງສະຖາບັນແພດສາດຈີນເວົ້າວ່າ:
"ຄຽງຄູ່ກັບວິທະຍາສາດເຕັກນິກກ້າວໜ້າແລະລະດັບຊີວິດການເປັນຢູ່ຂອງຄົນທັງຫຼາຍຍົກສູງຂຶ້ນ,ວິທີແລະຢຸກຢາປິ່ນປົວຊີ້ນປົ່ງປະເພດຮ້າຍແຮງກໍມີຫຼາຍຂຶ້ນເລື້ອຍໆ,ຜົນການປິ່ນປົວກໍດີຂຶ້ນໃນລະດັບໃດໜຶ່ງ,ແຕ່ວ່າ,ຜົນການປິ່ນປົວຜູ້ເປັນມະເຮັງໄລຍະຕົ້ນຈະດີກວ່າຄົນເຈັບໄລຍະກາງແລະໄລຍະທ້າຍ."
ທ່ານເວົ້າວ່າ,ໃນໄລຍະຕົ້ນຂອງໂຣກມະເຮັງບໍ່ໜ້ອຍມັກຈະມີອາການເຕືອນບາງຢ່າງທາງຮ່າງກາຍ,ເຊັ່ນເປັນຊີ້ນປົ່ງ,ເຈັບ,ອອກເລືອດ,ຄໍແຫບຫຼືອາຫານບໍ່ຍ່ອຍເປັນຕົ້ນ. ຕົວຢ່າງຄືຜູ້ເປັນມະເຮັງໄສ້ແກ່ໄລຍະຕົ້ນມີ 40% ຮອດ 60% ໃນເວລາຖ່າຍໜັກຈະມີເລືອດອອກ,ມະເຮັງຕ່ອມນົມໄລຍະຕົ້ນສ່ວນຫຼາຍຕ່ອມນົມຈະມີກ້ອນແຂງແລະອື່ນໆ. ເຖິງວ່າອາການເຫຼົ່ານີ້ອາດຈະຄ້າຍຄືກັບອາການຂອງພະຍາດທຳມະດາກໍຕາມ,ແຕ່ຖ້າຄົນເຈັບແລະນາຍໝໍເອົາໃຈໃສ່ແລ້ວ,ຈະຊ່ອຍການບົ່ງມະຕິໂຣກມະເຮັງໃນໄລຍະຕົ້ນ.
ຈີນແມ່ນປະເທດໜຶ່ງທີ່ມີການຫາບແບກໜັກຫຼາຍໃນດ້ານໂຣກມະເຮັງ. ປີ 2000,ຢູ່ຈີນມີ 1 ລ້ານ 5 ແສນຄົນຕາຍຍ້ອນໂຣກມະເຮັງ. ການກວດຮູ້ມະເຮັງໃນໄລຍະຕົ້ນແມ່ນວິທີສຳຄັນໃນການປ້ອງກັນແລະປົວໂຣກມະເຮັງ,ປັດຈຸບັນ ໄດ້ເຜີຍແຜ່ຢູ່ຈີນຢ່າງກວ້າງຂວາງ.
ຈີນໄດ້ເລີ່ມດຳເນີນວຽກງານກວດໂຣກມະເຮັງໄລຍະຕົ້ນມາແຕ່ຊຸມປີ 50 ສະຕະວັດທີ 20,ໃນຄາວນັ້ນ,ຄຳຂວັນທີ່ກະຕຸ້ນໃຈຄົນທີ່ສຸດແມ່ນ"ເລືອດຢອດໜຶ່ງປັດສາວະຢອດໜຶ່ງກໍກວດໂຣກມະເຮັງໄລຍະຕົ້ນໄດ້". ແຕ່ທີ່ຈິງແລ້ວກໍບໍ່ແມ່ນງ່າຍປານນັ້ນດອກ,ແຕ່ວຽກບາງດ້ານໄດ້ຮັບຜົນເດັ່ນຊັດທີ່ສຸດ. ຕົວຢ່າງຄືຈີນໄດ້ເຜີຍແຜ່ວິທີກວດດ້ວຍວິທະຍາສາດຈຸລັງຢູ່ໃນໝູ່ກຳມະກອນຕ່ຳແຜ່ນເພດຍິງແລະເຂດທີ່ມີຜູ້ເປັນມະເຮັງປາກມົດລູກຫຼາຍ,ແລະປິ່ນປົວຄົນເຈັບທີ່ກວດພົບນັ້ນຢ່າງທັນການ,ແລ້ວເຮັດໃຫ້ອັດຕາເປັນມະເຮັງປາກມົດລູກຫຼຸດໜ້ອຍລົງຢ່າງຫຼວງຫຼາຍ; ເມືອງຊືແຂວງເຮີເປ ພາກເໜືອຂອງຈີນແມ່ນເຂດທີ່ມີຜູ້ເປັນມະເຮັງຫຼອດອາຫານຫຼາຍ,ປີ 1973,ຈີນໄດ້ຕັ້ງຈຸດປ້ອງກັນແລະປິ່ນປົວມະເຮັງສັງລວມຢູ່ແຫ່ງນັ້ນ,ເມື່ອໄດ້ໃຊ້ມາດຕະການປ້ອງກັນປິ່ນປົວສັງລວມທີ່ຖືການກວດມະເຮັງຫຼອດອາຫານໄລຍະຕົ້ນເປັນຈຸດໜັກແລ້ວ,ອັດຕາເປັນພະຍາດແລະຕາຍຍ້ອນມະເຮັງຫຼອດອາຫານໄດ້ຫຼຸດໜ້ອຍລົງຢ່າງຫຼວງຫຼາຍ.
ປັດຈຸບັນ,ຢູ່ຈີນ ຜູ້ທີ່ຕາຍຍ້ອນໂຣກມະເຮັງໄດ້ມີທ່ວງທ່າເພີ່ມຂຶ້ນຕະຫຼອດມາ,ເພື່ອຕັ້ງໜ້າຮັບມືຕ້ານໂຣກມະເຮັງ,ຮັກສາສຸຂະພາບຂອງສາທາລະນະຊົນ,ພາກສ່ວນທີ່ກ່ຽວຂ້ອງຂອງຈີນໄດ້ວາງແຜນການປ້ອງກັນແລະປິ່ນປົວໂຣກມະເຮັງສະບັບໃໝ່. ທ່ານນາງຂົງລິງຈື ເຈົ້າໜ້າທີ່ຂອງກົມຄວບຄຸມພະຍາດກະຊວງສາທາລະນະສຸກຈີນເວົ້າວ່າ:
"ເດືອນທັນວາປີ 2003 ກະຊວງສາທາລະນະສຸກໄດ້ປະກາດໂຄງຮ່າງແຜນການປ້ອງກັນແລະຄວບຄຸມໂຣກມະເຮັງຈີນ,ແຜນການດັ່ງກ່າວມີຈຸດພິເສດທີ່ເນັ້ນໜັກການກວດມະເຮັງໃນໄລຍະຕົ້ນ,ບົ່ງມະຕິໃນໄລຍະຕົ້ນແລະປິ່ນປົວໃນໄລຍະຕົ້ນ."
ຫຼັງຈາກປະກາດ"ແຜນການ"ດັ່ງກ່າວແລ້ວ,ພາກສ່ວນທີ່ກ່ຽວຂ້ອງຂອງຈີນໄດ້ຕັ້ງໜ້າເຄື່ອນໄຫວ,ດຳເນີນວຽກງານຫຼາຍຢ່າງ,ເຊັ່ນຈັດຕັ້ງຜູ້ຊ່ຽວຊານຮຽບຮຽງ"ຄູ່ມືຊີ້ນຳການກວດ,ການບົ່ງມະຕິແລະປິ່ນປົວໂຣກມະເຮັງໃນໄລຍະຕົ້ນ","ຄູ່ມື"ດັ່ງກ່າວໄດ້ສະເໜີວິທີທີ່ເປັນແບບສະບັບໃນການບົ່ງມະຕິແລະປິ່ນປົວມະເຮັງສ່ວນໜຶ່ງໃນໄລຍະຕົ້ນ.
ໃນຂະນະດຽວກັນນີ້,ຜ່ານພຶດຕິກຳຄົ້ນຄວ້າເປັນເວລາຫຼາຍປີ,ຈີນໄດ້ສະສົມບົດຮຽນຫຼາກຫຼາຍທີ່ສອດຄ່ອງກັບສະພາບຂອງຈີນ,ດັ່ງນັ້ນ,ຈີນຈະຕັ້ງຈຸດທົດລອງກວດມະເຮັງຫຼອດອາຫານ,ມະເຮັງຕັບແລະມະເຮັງດັງແລະຄໍໄລຍະຕົ້ນຢູ່ເຂດທີ່ມີຜູ້ເປັນມະເຮັງເຫຼົ່ານີ້ຫຼາຍ,ແລະຄ່ອຍໆປົວແປງແຜນການເຕັກນິກ,ຊອກຫາກົນໄກໝູນເດີນທີ່ບັງເກີດຜົນ.
ທ່ານນາງຂົງລິງຈື ເຈົ້າໜ້າທີ່ກົມຄວບຄຸມພະຍາດຂອງກະຊວງສາທາລະນະສຸກຈີນເວົ້າວ່າ:
"ປີ 2004 ພວກເຮົາໄດ້ຄັດເລືອກ 3 ເຂດຊົນນະບົດທີ່ມີຜູ້ເປັນມະເຮັງຫຼາຍຢູ່ແຂວງເຮີນານ,ແຂວງເຮີໄປແລະແຂວງສ້ານຊີພ້ອມດ້ວຍຄຸ້ມເຮືອນຢູ່ຂອງນະຄອນເສີນເຈີ້ນແຂວງກວາງຕຸ້ງ,ແຍກອອກສ້າງຖານຕົວຢ່າງບົ່ງມະຕິແລະປິ່ນປົວມະເຮັງປາກມົດລູກແລະມະເຮັງຫຼອດອາຫານໃນໄລຍະຕົ້ນ,ຕໍ່ໄປພາຍໜ້າ,ຍັງຈະສືບຕໍ່ເລືອກເອົາເຂດສ່ວນໜຶ່ງ,ສ້າງຖານຕົວຢ່າງບົ່ງມະຕິແລະປິ່ນປົວມະເຮັງໄສ້ແກ່,ມະເຮັງຕັບແລະມະເຮັງດັງແລະຄໍ."
ຢູ່ຖານຕົວຢ່າງ,ພາກສ່ວນທີ່ກ່ຽວຂ້ອງຂອງຈີນຈະດຳເນີນການກວດມະເຮັງຢ່າງມີເປົ້າໝາຍ,ເພື່ອກວດພົບຄົນເຈັບໂດຍໄວ; ພ້ອມກັນນັ້ນ,ຍັງຈະໂຄສະນາຄວາມຮູ້ປ້ອງກັນແລະຕ້ານມະເຮັງຕໍ່ໄທເມືອງ,ສົ່ງເສີມໃຫ້ໄທເມືອງມີຄວາມຊິນເຄີຍດຳລົງຊີວິດຢ່າງຖືກຕ້ອງ; ນອກນີ້,ຖານຕົວຢ່າງຍັງມີໜ້າທີ່ຄົ້ນຄວ້າວິທະຍາສາດທີ່ກ່ຽວຂ້ອງ.
|
|
|
